智取大市：暴龍級別好消息？
1 :
GS(14)@2018-01-15 03:10:3012連升破紀錄，最重要係知道當中意義，點解咁強。上一期講到港股出現長線圖表訊號，9個月RSI明顯升越80超買水平，過往50年次次出現呢個訊號，之後都仲有大升市。老實講太長線嘅事情有幾多人能說得準，絕唔係一個圖表就看透世事，之但係，面前基本因素形勢有幾利好，投資者可能都要知道。最重要睇經濟周期，近期上市公司好消息不斷，茅台狂加價18%，雪花啤酒、青啤加價半成至一成；去到連唔少人長期睇淡嘅石油業，宏華（196）接一張外國大訂單佔2016年全年收入三分之一；運動用品股由摺舖變為淨開舖……實體經濟復蘇訊號從四方八面殺埋身，係咪虛火？小弟覺得唔係，就算係，資金亦有條件當真復蘇去炒，炒到係人都信為止，到時港股都可以去到一個大家未必預計得到嘅高度。最好笑係，自己完全只係從股市上感受呢一片歌舞昇平嘅氣氛，日常生活完全feel唔到，究竟係小弟身處傳媒行業太過糟糕？定係香港經濟跟唔上其他地方？實在搞唔清。之所以，而家絕對係炒梗一個若隱若現嘅上升周期，咁樣仲好，估值未夠高，起碼仲有幻想空間。另外，有一個大家未必聯想得到係非常利好嘅消息，就係H股全流通試點將會出台，點解？雖然話H股全流通會令港股產生價值2.6萬億嘅新股票供應，理論上股市應該大大不利，但潛台詞係，中央覺得呢個時間推出大增股票供應嘅政策都冇有怕，完全唔驚新增股票供應會令市場下跌，反映中央對現階段港股非常之咁有信心。回顧中央以前做類似嘅事，2005年股權分置推出，之後港股一樣升到嘭嘭聲。晉佳
https://www.facebook.com/advanceguy1/
來源:
https://hk.finance.appledaily.co ... e/20180111/20270693
智取大市：升市高位的劇本
1 :
GS(14)@2018-01-22 05:52:38港股年初到而家升2,000點，以%計，升7%。至於2017年到而家升咗45%，以2016年低位至今近2年升咗75%。以級數計，同2003年牛一升市嘅68%相若，而同2009年金融海嘯後升足1倍比，就未有得比。講呢番話，只係想講家呢個升市，只係股市大周期裏面其中一個尋常嘅turnaround升市。即使小弟曾經統計過往50年恒指9個月RSI走勢，往績顯示長線仲有得爆升，但恒指9月RSI升到87.27，9日RSI89.62，係極之超買水平，以月為單位嘅中線調整係必然將會發生嘅事，而以月計嘅調整過程可以跌你幾千點，不得不防。不過與其畏高，持貨者進取、積極做法係預測高位摸出賺盡啲，安全、被動做法就係持有藍籌然後逢高減持。進取做法早前已講過，參考日股舊年10月至11月走勢，家配合埋睇上證50指數，為中短線「估頂」做更好準備。之前講恒指走勢同10月至11月日經平均指數極為相近，但近兩日觀察，發現恒指調整再破頂過程比當時日經更急，劇本照寫落去，3日內可能會Hit到個短期頂部了。配合埋上證50指數，噚日以超大成交向上突破、升逾2%後急回，日線圖睇大成交射擊之星好似見咗頂咁嘅勢，但睇小時圖，舊年11月升市亦試過小時圖大陽燭突破、然後小時圖再錄大陰燭，以為見頂？原來只要守得住10小時線，及後仲有兩三個交易日火速爆上先短線玩完。乜咁啱又3個交易日內？寫出呢個劇本，旨在令自己有心理準備迎接過山車走勢。截稿時港股黑期仲升到未識停，睇嚟仲有得亢奮多陣。劇本係咪會如預期發生？又能否高位食糊？就要執生，祝我們好運。晉佳
https://www.facebook.com/advanceguy1/
來源:
https://hk.finance.appledaily.co ... e/20180118/20277573
智取大市：中央高位又出手
1 :
GS(14)@2018-01-22 06:06:52連升14個交易日係強嘅象徵，但有一單新聞值得留意，就係大陸多家信託公司收緊股票配資業務，包括暫停新增有中間級嘅配資業務同單票配資業務。即係點？股票配資本來係限制每1蚊本金只能借多1蚊炒股，但近期大陸股票信託產品好興走灰色地帶，例如最流行嘅「3：2：10」比例配資方式，將本金分開3份，大股東、財務公司同銀行分別將本金放大3倍、2倍同10倍，最後以最低嘅財仔槓桿2倍嚟避開法規，但實際係1蚊本金放大到5蚊去炒股，但而家呢招已經唔Work。點解中央喺呢個時候打壓配資？記唔記得舊年11月，公募基金喺上證50指數升穿3,000點就沽貨，中央叫公募基金唔可以淨沽出股票維穩股市，點知個個走去掟港股。去到上周五，上證50指數再度升至3000點樓上，中央要及時唧出過度槓桿，可見中央視3000點為一個風險升溫嘅水平。唔係話唔畀A股明顯突破3000點，而係希望喺一個股市資金健康嘅情況下先爆上去。另外，監管當局亦叫停部份銀行app嘅證券開戶及交易，有機會再度成為A股短線陰霾。如果近排港股慢升，閣下持倉較重、加上表現冇乜大進展嘅話，就不妨適度減持，候機再博，相信今年仍大把機會，毋須急於一時。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180115/20275042
智取大市：牛市切忌輸耐性
1 :
GS(14)@2018-02-04 23:55:42細價A股大跌市，但以大價股為主嘅上證50指數先跌後回升，仲要係尾市以Day high收，睇A股反應似乎唔會影響整體大市資金鏈。至於香港嘅全購殼股都受到拖累而下跌，好明顯受同一負面因素所拖累，呢點值得炒友們留意。港股整體市況方面冇太多新Update，上述因素令大市借勢震倉，洗完牌下一日又可能係另一種玩法。美匯指數未見回升，執筆時外圍股市並無不妥，繼續估計港股整固然後逐漸回復慢牛狀態。更重要係恒指技術超買然後整固，係自然不過，升勢未被破壞就維持較樂觀睇法。主流強勢股近期興升跌梅花間竹，有時內銀轉強，騰訊（700）、港交所（388）同平保（2318）就走弱，但一兩日後情況又可能調轉，就算同一個板塊股份亦常有呢種情況。只要手持大路人氣強股，毋須太在乎一兩日零舍跑輸其他股份，因為強勢股尤其大藍籌嘅基本因素唔會一時三刻扭轉，投資者對其睇法亦唔會突然改變。就算係強如牛市三期，對一隻持股至少都保持一兩日嘅耐性，何況喺慢牛。事實上舊年玩法係逐個板塊炒起，直至最近變咗一批強勢板塊梅花間竹咁炒，其實升勢已更趨全面。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180202/20293341
智取大市：跌市為反攻準備
1 :
GS(14)@2018-02-13 03:48:16A股兩日急跌拖累港股，執筆時睇標普500指數波幅未減，升市嘅支持位50天線變成阻力，未回復安全亦未終極恐慌。港股早前下跌先由騰訊（700）、平保（2318）等帶動，然後到走勢緊貼A股嘅二三線中資股下跌，國航（753）、南航（1055）、馬鋼（323）同鞍鋼（347）齊齊失守升勢以嚟一直守住嘅保歷加中軸。噚日百大市值港股嘅升跌比例大約4：6，市場情緒略見虛怯之下，未至於好差。不過，仍要提防大市有下一波拋售潮，跌勢可以更急劇。如果睇返恒指牛市之中尖頂急跌嘅往績，近年非常有限，對上係2011年8月歐債危機，恒指分兩轉大跌直至9月尾先見底。再對上已經係1987年至1993年期間，成廿幾年前，當時幾乎每次跌市都係尖頂急跌模式，跌市途中多數有一個短則1日、長則近10日嘅造旗反彈，然後好快重拾急劇跌勢。與其望天打卦，倒不如為下一轉反攻做準備，務求令自己喺確認市況回穩時買對股票。就趁噚日市況稍為喘定，望一望乜嘢股之前跌得少、單日彈得多，呢批股可能係下一轉嘅強勢股。今日睇有賭股同零售股望落唔差，之後慢慢研究吓。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180209/20300404
智取大市：揀人類定揀現金
1 :
GS(14)@2018-02-20 21:11:37長線投資，心態決定一切，揸實資產會恐慌？抑或揸實現金會恐慌？要成為有錢贏嘅長線投資者，必先成為後者，做一個厭惡現金嘅人。道理十分簡單，撇除估值因素，你估一班專業知識豐富嘅人幫你做生意搵錢好？定係現金幫你搵錢叻？當然一定係前者，前提唔好買錯搵股東笨嘅殼股，講緊正經公司。買樓，道理亦相若，你係押注區內人嘅搵錢能力，因為人人都要住屋，大部份人都靠份工去製造收入，再投入落層樓度，所以長遠持有物業，係買緊香港人或大陸人嘅製造收入能力，同樣點都好過現金。當估值高嘅時候，你可以相信人類嘅搵錢能力再上一層樓，管理層能搵到賺錢新渠道。當出現危機嘅時候，你亦可以選擇相信管理層解決問題嘅能力。換言之，只要你買嘅都係正經公司股票長揸，理論上只得一個情況要沽出股票變返現金，就係見到面前好大鑊、出晒事，面對管理層不能解決嘅外在因素。至於換馬情況亦得一種，就係見到潛力更佳嘅股票，重點係咪可以正確判斷呢兩件事。人經常會誇大危機或大升市可能性，同時亦經常高估自己判斷力，但去到危機關頭，到時唯一建議係，相信人類吧。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180214/20305344
智取大市：今期怪事特別多
1 :
GS(14)@2018-03-06 03:47:07近幾日嘅怪事，似乎對後市呈頗深層意義。美國對進口鋼鋁徵關稅，單嘢對中國鋼鐵業影響極微。中國鋼材出口佔總產量唔夠一成，舊年中國鋼材得百幾萬噸出口至美國，相對以億計嘅中國鋼材總產量，實在不具意義。呢個時候，侵侵發Tweet話「貿易戰係好事，因為美國能夠輕鬆取勝。」呢句話市場信以為真的話，殺傷力非同少可，換轉係2月中講同一番話，相信美股會死咗，但今次美股即日已回穩。話說，特朗普開始籌措連任班底，假如呢吓亂噏嘢隊冧個市，共和黨內想搵人埋堆都難。究竟點解特朗普咁放心亂噏嘢？係咪曲線話你聽，有個美國總統覺得個市穩陣到點噏都唔再冧？那邊廂，聯儲局主席鮑威爾話，美國經濟冇過熱，回應IMF拉加德話美國經濟可能會過熱嘅睇法。就嚟退休嘅紐約聯儲總裁杜德利食咗誠實豆沙包，話加4次息都合理。正正係一年加息4次呢個訊息太誇，就反映經濟過熱並非空口講白話。倘若經濟過熱，即使加多幾次息，到時股市都可能按捺不住一齊過熱。相反經濟冇過熱，加息次數少過預期，股市亦似乎無壞。呢個位，再返轉頭思考吓點解侵侵放心搞事，局勢似乎明朗化一點了。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180305/20322883
智取大市：殭屍股不再殭屍
1 :
GS(14)@2018-03-06 03:53:46睇住恒指波幅會覺得玩死人，但睇二三線股，似乎同指數呈個別發展。業績期亦更方便大家搜羅好股，如果業績反映turnaround，但股價仲未完全反映turnaround，就有條件唔理市況一路強勢落去。畢竟恒指13.5倍PE，係牛市中期嘅估值，但同時好多剛剛復蘇嘅股份，仍然低估值，令二三線股相比指數股更有吸引力。潛在復蘇嘅股不妨睇清楚業績先買，只要確認到真復蘇，股價高幾個巴仙去追都仍然感覺良好。今日再睇多隻增長可測性高、但唔算貴嘅股。福壽園（1448）喺2013年新股浪潮之中上市，由於上市估值超高，於是股價「殭屍」咗幾年，但唔代表公司質地有問題，業績幾年來一路增長，一直交到數，估值亦由貴變到唔貴，於是股價準備由棺材彈返出嚟，進入升浪。福壽園喺內地做殯儀服務應該大家都仲記得，舊年上半年收入增長兩成，純利增長28.6%，每股盈利10.8分，預計全年市盈率低過25倍，以現價計，以佢業務簡單兼盈利增長可測性高嘅情況，2018年市盈率可能得返20倍。照計roll over，加上估值再上一層樓，股價都仲有一大段路可以升，值得吸納。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180302/20320225
智取大市：選股避人多擠迫
1 :
GS(14)@2018-03-11 23:50:212月港股跌市，7日內高低位唔見近4,000點，近排調整市都唔嘢少，5日內跌近2,000點，近兩日跌完697點再升624點，但相比2月，暫時波幅似已減弱，市場情緒相對已經穩定咗。好就好在，貿易戰、兩會等等不明朗因素，大家已有一定心理準備，除非修憲唔通過箒，否則短線爆大鑊劇本出現機會較微。喺咁多潛在負面因素、投資者普遍驚驚青青之下，指數都仲有3萬點。小弟對後市採取審慎樂觀態度，策略上係buy and hold二三線股。跌完700點再彈700點，其實大概打回原形，唔影響本身策略，當然，亦要頂得住指數每日2%波幅。除咗騰訊（700）之外，散戶焦點股變得走勢難測，例如融創（1918）同恒大（3333）兩者散戶內房愛股，近月走勢一般，短期低位徘徊，反而雅居樂（3383）已經重返高位附近。邊隻強弱唔易估，但避開人多擠迫嘅人氣股，冇咁風高浪急。選股方面，行業基本因素好轉係必要條件，而炒通脹升溫之下，好多板塊業績都處於上升周期，可選擇同炒上嘅股份範圍頗大，於是指數股好難同二三線股同時爆升，即使港股稍後回升，都可能呈輪流炒局面，值得留意。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180307/20324761
智取大市：享受定害怕波幅
1 :
GS(14)@2018-03-19 04:40:06經歷過2月跌市之後，呢一刻多數分析都認為港股尚未突破上落市格局，唔少人估恒指喺31000點至31800點上落。睇返恒指1月升市係沿住小時線保歷加中軸樓上運行，但最近恒指似乎沿住30分鐘保歷加通道中軸以上攀升，足證波幅加劇，反彈速度轉急。如果恒指波幅加劇嘅話，上落範圍又點會係800點咁少？經過一輪貿易戰、兩會不明朗消息之後，港股仍跌唔落，市場風險胃納似乎開始升溫，如果投資者由驚青變成信心滿滿，資金投入返去股市，要再破頂亦非難事。2月大跌市過後，波幅進一步擴大，所謂嘅逐步上升，行軍速度會比1月時快得多，入市仍要有大上大落嘅心理準備。長線落後嘅零售股翻生，之前推介過嘅莎莎（178）、李寧（2331）以至同仁堂國藥（8138）都有唔錯表現，而之前發過盈喜，預料舊年純利升28%至35%嘅都市麗人（2298），計返數2017年市盈率高極都係20倍左右，喺消費市道復蘇環境下，又多一隻分注吸納嘅選擇。除此之外，預料資金蜂擁被動投資嘅趨勢未變，大注啲持有大價股亦未必差，業績期亦有望谷高大價股。難以估計大注買大價股好啲，還是小注啲博二三線好啲，只要令自己能放心坐貨，嗰種方式已經算係適合自己嘅作戰方式了。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20180314/20331446
Next Page