借公公人頭一用 左丁山
1 :
GS(14)@2012-05-13 11:54:19http://hk.apple.nextmedia.com/su ... t/20120509/16319051
五月六日沙田馬場有「寶馬冠軍一哩賽」，下午四時三十五分舉行。四點鐘過啲，左丁山見到頒獎嘉賓，香港特區政府政務司司長林瑞麟到達馬場，由馬會主席施文信迎迓，接佢上主席廂房。當日早上左丁山掛住睇報紙，然後開始刨馬，冇聽電台/電視台新聞，突然間聽到一位馬主話：「哎，忠心耿耿，落得流放英國，讀神學就有耶穌打救咩！」左丁山問呢位馬主：「你講乜嘢呀？」馬主話：「咪講林瑞麟囉，佢今朝在電台講話離開政府，去英國讀神學吖嗎，十成係新特首冇預佢留任，堅持要林鄭做政務司，佢咪要知所進退囉！」哦，近日盛傳林鄭月娥民望高，可以帶挈梁振英提升民望，相信有九成九係真嘅，如此一來，林瑞麟除非肯放低身段，再做番局長啫，否則新政府邊有空櫈俾佢坐？
呢位馬主原來係林司長嘅多年朋友，仲有嘢講：「我識佢咁耐，佢係好人一個，待人接物好有禮貌，做事勤力非常，忠於職務，上頭叫佢做乜，佢就交足貨，搞政制，你估佢有權話事咩，北京最權威，壓落俾曾特首做，曾特首叫林瑞麟處理，於是所有啲批評痛罵，明箭暗箭都落在佢身上，佢一味硬啃，忠心為主，拖低曬民望在所不惜。成個特區政府，去邊度搵個問責官員肯為政府捱到滿身傷痕呀！」
哈，捱到咁傷，不如去英國養身，到歐洲散嚇心咯，政治上，曹操借主簿王垕人頭一用嘅故事，屢見不爽，梁振英不過係好現實地引用歷史故事啫。有公公之稱嘅林司長識得揀牛津，唔去深圳，一定有人讚佢有品味，民望會回升㖭。三個星期前，在酒會碰到一位跟隨曾特首之有為中年高官，左丁山與佢開玩笑：「喂，有冇人叫你去梁特首辦呀？」高官速忙耍手擰頭：「唔好開玩笑，我仔細老婆嫩，一定要做番一份公務員工作先至有保障㗎！」咁又係，一旦離開公務員體制，職位就毫無安全感，到起碼55歲之後先至諗啦。