胡孟青：小老散 慘慘慘！
1 :
GS(14)@2012-02-08 23:00:43http://www.sharpdaily.hk/article/index/15307/20120208/51046
在一眾行家實牙實齒認為周大福（1929）上市後冇得跌亦唔會穿底，大行包銷商又對其盈利前景預測異常心雄樂觀之際，把零售界中人去年下半年銷售增長放緩當作是錯覺幻覺，事實擺在眼前，跌穿了。行家畀面唔踩多腳撐其不會跌穿，卻少有人夠膽睇得高過招股價，事關估值真係好貴。
以為有好多散戶會中招，原來又冇包括中環某大型中資券商的客戶，聽說大孖沙特別眷顧該家大行，整家大行於早前IPO時，竟罕有兼神奇地未有為認購該股預留任何孖展額，連經紀也覺得很奇怪，而他們似乎亦收到上級指示，不必太積極呼籲客戶與此股隻抽，因此旗下客戶完全未有因而輸錢或被綁，樂得有更多閒錢享受港股最近一輪升浪。
中資大行未被要求參加畀面派對。背後動機不難估，中國人不打中國人，該行多的是內地富豪級客戶，買貨沽貨均習慣大手掃出掃入，兼且唔會問價，電話接通就市價即做。可惜，不是所有中國人能倖免於在此股身上中招，多得大行分析員翻轉豬肚，食住隻股貴夾未夠秤入MSCI，乘機再清理跑道，香港小老散，真係慘慘慘！
戲院換租客 累及樓上舖
講開零售股，本地零售市道未見得有幾差，起碼仍然不時有國際大品牌天價霸黃金購物旺區街舖，市場都在觀望舖租何時會因租客承受力或消費者購買力爆煲而出現拐點，究竟駱駝背上最後一條稻草幾時才會出現，難道真的Sky is the limit？
另一樁就算找到雙方當事人也難以證實的小道消息，近期較多到食通天將被逼遷的阿里朗，因為唔捨得。羅素街戲院換租客，累及樓上租客，儘管大業主向錢看是對股東負責之舉，月租天價兩千萬卻未證實是否千真萬確，聞說租客一方，見市場傳得甚囂塵上，亦顯得甚不以為然，沒有證實是或不是，只係向對方反問一句，究竟佢知唔知要賣幾多個包包才可以收入兩千萬？既然有心人放料，他們也懶得去反駁。商舖寫字樓租務市場玩法，冇景時租值唔跌，可以利用「免租期」走棧，隨時給租客半年免租期又何妨？租金即時便宜一半。
胡孟青
獨立股評人