| ||||||
本地老牌家族沽售磚頭，被譽為樓市見頂指標不無道理，九七前何東後人何鴻章出售布力徑大宅，傅老榕家族摸頂賣富麗華酒店是經典；至早前山頂何東花園以七十億易手，其實老家族後人繁衍，各有各睇法，見磚頭價飛升，點會唔牙癢癢，梗係想沽貨分錢啦 ，好似舊年起頻頻標售物業嘅福利集團，已沽售數十億貨，一幢幢咁賣，家族以前立法局議員何世柱為首，共有十兄弟姊妹，個個有番咁上下斤兩。原來去年九月通過特別決議，將福利地產申請自動清盤，透過一太，不斷標售旗下物業，旨在分錢，連伯爺何耀光喺南灣道嘅大屋都賣埋，所以好多地產經紀都好留意富豪爭產、族人反目嘅新聞，分分鐘有大生意做嘛！ 南灣道這幢大宅建於五十年代，何家持有逾五十年，去年以八億賣出。（陳浩樂攝） 「香港人血液有水貨基因」 作為水貨車鼻祖，富利堡老闆黃毅力最有資格回應：「香港人有水貨基因係事實，但睇你點演繹，香港人不嬲都係機會主義者，邊度有錢搵就去邊，香港直頭係水貨之都，七十年代日本仔來香港掃勞力士，我哋叫佢做羊牯，八十年代到台灣人來掃話佢財大氣粗，九十年代歐美人士來掃名牌貨，二千年打後韓國加埋強國人殺到。我哋都去日本藥房掃貨啦，我都有樽日本感冒丸傍身！不過水能載舟亦能覆舟，以往香港政府採取積極不干預政策，家陣搞到買兩罐奶粉都要坐監，真係唏噓！」 唔好衰俾人睇 喺花旗，星巴克宣布，未來十年會用兩億五千萬美元幫員工攻讀網上大學學位，所有員工皆可受惠。其總裁預期起碼有兩萬五千名員工因而得到沙紙。可惜佢哋嘅香港員工冇行吖，否則點會搞出張咁嘅告示呢！香港人加油，千萬要爭氣，唔好衰俾人睇吖！ 中環寸嘴 工廈大王楊耀松長子，是各大有名食肆之VIP，喜歡研究已故及城中有錢佬對食之喜好，強調「貴」唔等如識食，自詡分享食經乃是提升讀者之水平。 無能廁所 唓！湯文亮轉倉去買中隻港交所就話係股神，八十億股票個倉，有幾多係佢家姐嘅先？買實股算咩股神呀？炒股梗係刀仔鋸大樹，唔好話我認叻，好似平保咁，舊年聖誕節前已升咗一輪，我喺七十八蚊左右，knock out（甩）咗我啲accumulator，再將賺到嘅去買平保嘅call option，咁平保一路升我都有貨喺手，家陣我又做咗decumulator，一百三十三蚊沽平保。講住咁多先，同你啲讀者分享咁多我又冇錢袋嘅。股市暢旺，名牌食府人氣都旺咗，呢個禮拜即管試吓近日好多鱔稿都寫嘅「禮賓傅」，用前特首個廚作招徠，標榜懷舊菜式。唔知係咪股市好，想試佢啲貴嘢都無貨，話賣晒喎！點咗鵝肝蝦多士、特首炒飯、老少平安、和牛炒四季豆，嘩，一個字：鹹得無道理，我估個廚以前喺特首府，煮慣俾啲老嘢食，老人家味覺退化，唔加鹹無味！食完呢餐晏，條脷揦住，我估塊超鬆脆嘅蝦多士，落咗唔少發粉呀。名牌食肆梗係要用吓個廁所，基本上𠌥低身個八月十五就貼住道門，最「渣」嘅係，傷殘人士廁所個英文——DISABLE都串錯字，無咗個D呀——DISABLED；呢個廚話晒喺特首府揸過鑊鏟，招呼過曾爵士，點解英文咁水？DISABLE可以話人係「無能」，男人入廁所撞到個咁屎嘅英文，特別敏感，「禮賓傅」賣懷舊菜式啫，哈，連英文都懷舊埋嘅！ 億萬磚頭冇老婆名 英皇娛樂酒店嘅CEO余永焯，近日頻頻出手買豪宅，繼年初掃入三伙紅山半島，近日又幫襯新地買赤柱村道五十號，澳門賭場開放逾十年，英皇楊發大達，連佢馬仔都豬籠入水，難怪杜琪峯愛將黃卓玲○九年閃電下嫁呢位億萬打工皇帝，雖然為第三任老婆，似乎腳頭唔錯，婚後，老公單係炒賣物業就賺三千五百萬，手持無按揭嘅貨，未計升值都有億半，不過物業見唔到黃卓玲個名囉 ！ 金牙大狀講嘢開水炮好過掟氫氣彈 監警會成員關治平認為對付示威者，開水炮好過開槍。佢係葉劉匯賢智庫嘅黨友，葉劉出身保安系統，關生加入佢嘅黨，認同其女強人作風，殆無疑問。關生個人資料透露，佢興趣之一係射擊，同葉劉肯定合晒何尺。按關生開水炮好過開槍嘅邏輯，開槍肯定好過掟手榴彈，掟手榴彈好過出迫擊炮，出迫擊炮好過投擲燃燒彈，投擲燃燒彈好過掟中子彈，掟中子彈好過掟氫氣彈，掟氫氣彈好過一鑊熟、冚家剷。究竟你想做乜先？古語有云，割雞焉用牛刀。班人上街示威啫，又唔係要同你死過，使唔使一嘢就話要開槍啊？恃住庫房有錢，警察武備不斷升級，莫非真係想逼到班人作反為止？ | ||||||