📖 ZKIZ Archives

藉口阿哥生癌外父病死　 40下屬行家上當 UA吸血上司極速呃 200萬

1 : GS(14)@2011-04-09 20:53:41



涉向下屬及同行借款後失蹤的 UA財務前高層蘇瑞瀚（紅圈示）今年 2月出席公司晚宴，與同事合照。

【本報訊】亞洲聯合財務有限公司（ UA FINANCE，下稱 UA）直銷部前經理蘇瑞瀚，半年來以「阿哥生癌、外父病死」等藉口向同事借錢，更要求下屬以個人名義向高利貸舉債相助，極速吸錢逾 200萬元。今年愚人節，蘇與任職同公司的妻子突然失蹤，同事始驚覺「孝子、賢弟」原是「吸血上司」，揭發他專向下屬埋手，博同情呃錢，超過 40名下屬與行家「中招」，三名年輕下屬更為他借貴利相助，結果「連工都冇埋，又俾大耳窿追」。
記者：梁曙光　馮樂琳


人間蒸發的蘇瑞瀚，人稱「蘇師傅」， 41歲，曾在多間財務公司任職，約五年前跳槽至 UA直銷部任經理，其下約有 60名營業員。蘇在行內具江湖地位，很多營業員都是其徒子徒孫，妻子是其下屬，兒子剛出世，家庭美滿。據悉，蘇名下沒有物業，有同事指他好賭，每次下注以萬元計，近期疑欠下外圍巨債。蘇氏夫婦手提電話近日已停機，連 facebook賬戶亦刪除，記者曾到蘇位於秀茂坪寶達邨達貴樓通訊地址查問，單位無人應門。記者就此事向 UA查問，至截稿前未有回應。
據同事透露，近半年 UA直銷部約有 20人借錢給蘇，行家亦有 20多人上當，估計受騙金額至少 200萬元。其中一名事主透露， 3月 31日曾向蘇討債，「佢話自己唔掂，仲叫我介紹二線財務公司畀佢借錢」。另一下線員工亦於上月 30日借出 1.2萬現金，「佢叫我用信用卡撳錢，仲誓神劈願話兩日後會還，點知兩日後就失蹤，分明係有心呃錢，走佬前都要刮盡」。


UA直銷部同事收集受騙者資料，涉及金額近 100萬。

部份受害人昨晚報警

同事痛心信錯人之餘，亦替三名「受害大戶」不值：「簡直係人間悲劇，唔單止冇咗份工，連人生都摧毀，仲慘過雷曼苦主，大耳窿錢點還呀？」。三人是 20歲馬仔、 24歲阿李及 28歲陳先生，均是蘇的下屬，半推半就下以個人名義向財務公司及大耳窿借錢，分別孭了 26萬、 21萬及 28萬數。因為「貴利王」上公司追數，李及陳已辭職，馬亦表示在公司「命不久矣」。部份受害人昨晚到灣仔警署報案。
綜合受害人被騙過程，蘇借錢時以逐個擊破手法向同事埋手，並要求保密， 60名下屬幾乎全部問過，「同事講開先發現佢三年前已開始借錢，初時用女朋友走佬做藉口，之後話阿哥喺澳門賭錢、生癌、跳樓，最後連外父都搬埋出來，『家族血淚史』感動唔少人」。
「佢係老細點敢拒絕」

挺身指證「吸血上司」的阿李，去年中加入 UA任營業員，至 12月蘇聲稱因為胞兄患癌，求他到財務公司借 10萬元應急，更暗示日後有「秘撈」預他一份。「佢係老細，我點敢拒絕」。今年 1月中，「（蘇）又話阿哥喺大陸跳樓死，頭爆骨裂，殮房要執番靚條屍，又要使 10幾萬，叫我同大耳窿借」。李雖感不妥，但怕之前借出的 10萬元收不回，惟有就範，「佢帶我到麥當勞見大耳窿，將我個人資料交出，要我喺身份證上簽名，大耳窿就畀咗 10萬蚊現金我，冇任何單據，我轉手將 10萬蚊交畀蘇師傅」。
其後蘇又以哥哥骨灰要運返香港，又要求李到另一間財務公司借錢，雖然只借到 1萬元，蘇亦不放過。李以為蘇會自動還錢，沒有放上心，至農曆年後大耳窿致電追數，李才追問，蘇以「拖字訣」回應，不斷強調就快會有「一嚿大錢」到手，李無奈接受解釋。
而馬及陳受騙過程亦大同小異，亦有向大耳窿借錢，其他受騙同事大多是借出「私己錢」。本月 1日，蘇氏夫婦突失蹤，同事懷疑他們已挾巨款走佬。
吸血上司借錢藉口

約 3年前
女朋友挾走 20萬現款走佬，要替對方還債

約 1年前
胞兄在澳門賭輸錢，被大耳窿押返港，江湖救急，助兄脫險

約半年前
胞兄患癌症，做化療及打針，每次要數萬元，兄弟情深，不能見死不救

約 3個月前
胞兄在內地跳樓身亡，善後殮葬要花 10多萬，一世人兩兄弟希望兄長安息

時間不詳
外父、妻子的外婆分別過身，需要殮葬費，後輩要盡孝義

資料來源：綜合被騙錢事主

---

2 : GS(14)@2011-04-09 20:54:07

特稿
「係我咁蠢至會幫佢」

「我唔擔心大耳窿搵到我，只係怕連累媽媽」。 UA財務的吸血上司蘇瑞瀚誘迫下屬借貴利事件曝光後，其中三名遭大耳窿登門討債的職員終日受驚，其中一人雖然已辭工，但每天都要應付大耳窿的「奪命追魂 call」，「屋企返唔到，出街都膽顫心驚，擔心俾大耳窿認得」。
被大耳窿逼得走投無路的三名 UA財務職員，在記者眼中，並沒有來自財仔（財務公司的俗稱）的那種老練、世故及江湖氣，難怪蘇瑞瀚的手法並不高明，卻已將他們呃透。
「擔心屋企人安全」

20歲苦主馬仔，家有患病母親要照顧，但現時不敢回家，「我唔係擔心大耳窿搵到我，只係怕連累媽媽」。他自稱在 UA月入兩萬，更被人以逾兩倍薪金挖角過檔，但巨債纏身，大耳窿登門，令他「冇得再撈落去，被迫轉行」。他形容自己大好前途被蘇瑞瀚摧毀，慨嘆：「係我咁蠢先至會幫佢！」
另一名受害人阿李入行只有數月，惹上周身債，嚇得辭工，不敢回家，每天仍要應付大耳窿的「奪命追魂 call」。一臉愁容的他無奈地說：「屋企返唔到，份工冇埋，食飯、瞓覺都搞到亂晒龍，活喺呢個陰影之下，都唔知點過。我完全冇能力還錢，仲要擔心屋企人同自己人身安全，大耳窿認得我都冇辦法，我真係無辜。」
自從蘇瑞瀚失蹤，借貸最多、達 28萬元的陳先生亦要展開「走佬」生涯，四處寄人籬下的他形容，每天「生活緊張」，事業及人生大受影響，「屋企返唔到，出街都膽顫心驚，擔心俾大耳窿認得」。由於母親是他借貸的諮詢人，他更擔心債主會找上其母，令母親人身安全受影響。
他說，蘇不斷游說他借錢，他是因為擔心蘇無法償還之前代借的債務，自己要全數孭上身，結果借完一次又一次，自言當日同情蘇「好蠢」。
本報記者

---

3 : GS(14)@2011-04-09 20:55:47

話你知
UA借貸手續寬鬆
2011年04月09日

亞洲聯合財務有限公司（ UA財務）前名為日本國際金融有限公司， 1991年成立，現為新鴻基有限公司（ 086）成員之一，提供樓宇按揭、稅務貸款、大專生貸款等服務，借貸手續一般較銀行寬鬆。前年有市民向廣播事務管理局投訴指，亞洲聯合財務的電台廣告聲稱，居屋未補地價可「套現」，廣管局指廣告有誤導成份，但基於法律限制未能對亞洲聯合財務採取任何行動。

---

4 : reference(1610)@2011-04-09 23:32:04

利用別人同情心撳錢，正人渣

---

5 : 龍生(798)@2011-04-10 16:56:47

人渣, 但就算找得到佢
都未必有佢符, 借錢唔還唔犯法的

---

6 : GS(14)@2011-04-10 18:35:44

5樓提及

---

人渣, 但就算找得到佢
都未必有佢符, 借錢唔還唔犯法的

小額錢債審裁處都唔得?

---

7 : 龍生(798)@2011-04-10 18:48:09

唔得, 呢的只係個人錢債問題

況且小額好弱雞, 無權的, 只係仲裁

比如說, 如果大公司, 你去告國泰, 佢走唔甩局住陪你玩

但如果告人, 搵佢唔到, 係唔可以因此通輯佢的

即係佢失踪你就無符

寄信就收唔到,

呢班後生仔要為佢地既天真付上代價了...

所以係個社會令佢地變質, 呢班苦主, 以後還會樂善好施嗎?

橫屍街頭都無人會理的文化, 就是這種環境做成的

---

8 : GS(14)@2011-04-10 18:53:44

但是我睇這些苦主的相都是唔太好...

其實這個騙子只是利用別人的信用同埋一種香港人不理他人的心理吧

---

9 : idsdown(1658)@2011-04-10 18:55:22

同一張相裡的其他人真慘, 上左報

---

10 : 亞力士(1473)@2011-04-12 00:39:00

如果間公司嚴格D 上司係唔可以問下屬借錢

右邊個女仔有D似 觀陰娜

---