| ||||||
星展集團前副主席、重量級銀行家Frank黃鋼城,舊年8月底60歲榮休。後有新動向。噚日工商銀行(1398)發公佈,話工行去年底委任咗佢做獨立非執行董事嘅表決議案,已經正式獲中銀監批准,委任喺上星期五正式生效,每年基本袍金人民幣30萬元。 出任工行非執董 咁 日後阿Frank就可以同埋佢嘅老友、工行另一獨立非執董、美資私募基金黑石集團中國區主席梁錦松,齊齊孖住去工行董事會開會。曾經做過期交所主席嘅 Frank黃,係本港最早一批財資界賓架,同阿松、前花旗高層黃逸思等,差不多喺炒房同期出道,可謂財技與人物網絡都咁了得。黃鋼城先後做過花旗、JP摩 根、國民西敏銀行等大型外資機構,03年起加盟星展,之後就大部份時間港星兩邊飛,退休前亦擔任星展香港主席,可以話銀行界老行尊。 |
| ||||||
前財政司長、黑石大中華區主席梁錦松入南豐做行政總裁,主力睇太子女陳慧慧一向看重的投資部。金融界猜測,男朋友司徒啟瑞坐歪,莫非兩人感情生變。據知,梁錦松入局,其實要取代的是南豐執行董事唐國通。 這名Raymond Tong,早年在信和做咗十幾年律師,睇過物業管理、酒店、法律、秘書、內部審計等等,都幾吃重,年薪仲高過佢老闆黃志祥;佢一○年過檔南豐,都已經近七十歲。屆退休之年先轉工,估計都係幫太子女,過渡同家姐陳慧芳爭產之患難時期。唐國通不但幫手扶植陳慧慧兒子張世成上位;爭產期間,有名自稱係南豐「老臣子」的李孝仁,向傳媒抨擊司徒啟瑞不得陳廷驊心,又話有人分化兩姊妹,都係唐國通出信幫陳慧慧一一反駁。雖然爭產案尚在審議中,但陳慧慧已經搵到阿松幫手,佢都可以功成身退。至於陳慧慧同男朋友,兩人已計劃好未來日子,先去遊埠,sweet sweet。梁錦松喺投行浸淫多年,在金融界人脈甚廣,睇住南豐八百億資產唔難。佢仲係三子女之父,做埋奶媽幫陳慧慧睇仔,都應該難佢唔倒囉。 壹計就明盈利不能全面反映實質業績 本欄找來有二十多年經驗的資深會計師林智遠及鄔碩晉,每期踢爆一間上市公司的會計陷阱,股民入市前睇清睇楚,一計就明。滙豐(5)因應海外要求,在香港也公布第3季中期管理報告,季度和首9個月稅後盈利,比去年同期上升23%至24%,保持中期盈利增長趨勢。滙豐在季度報告中,不斷凸顯盈利上升,業績真的實質增長?為何股價還停滯不前?滙豐的季度報告不是香港法定要求,沒有中文版,財務摘要也只有收益表和資產負債表,其他報表一律欠奉。只有收益表是否足夠?看看滙豐8月公布的首6個月中期業績,「收益表」中稅後盈利是113億美元,比去年同期上升25%,但「全面收益表」中全面收益卻只是38億美元,只及稅後盈利三分一,比去年同期更大幅減少62%。盈利與全面收益有天淵之別,是因為盈利並未計算可供出售投資公允值虧損18億美元,和匯兌差額45億美元,管理層可在該相關項目出售或終止後,才把虧損計入收益表中。滙豐中期全面收益表,也已按今年生效的新會計準則要求,清楚顯示上述虧損是「符合特定條件後,將重新分類至損益賬的項目」。投資者分析業績時,除注意盈利外,也應留意全面收益。管理層每每有不同誘因,去延遲或提前在「收益表」中,計算其他全面收益。滙豐首9個月的全面收益是多少?季度報告為何不額外提供「全面收益表」?一切可能要留待全年業績去解答。但只看盈利,不看全面收益,相信未能「全面」了解滙豐的實質業績!(林智遠) 讀者有嘢講 居住元朗蝶翠峰嘅侯先生特意致電小宗話:「政府唔發牌俾王維基,搞到我哋啲老人家瞓唔着,梁振英平時攞住張櫈仔落區聽意見,請問佢以後仲會唔會落區,呢個政府咁不仁不義,要等到元旦遊行真係頂唔順,我啱啱見到屋苑有人貼出『我要睇電視』海報,你幫我話俾港視工會主席楊志豪知,可以印類似海報當免費報紙派,家家戶戶貼出嚟抗議。」 本週監察 企喺呢度,望左定望右好?如果閣下去到調景嶺翠善街就要小心啲,雞乸咁大隻字叫你望左,但係箭嘴就叫你望右,好矛盾噃!邊隻係左手、邊隻係右手,幼稚園都有教,但偉大嘅特區政府竟然唔識!「一男子」政府,擺明老點。 |
| ||||||
今日香港樓價貴得離譜,所以商鋪劏成格仔鋪,廁所可以變劏房,就連已由貨倉劏成的迷你倉,還可以再劏細為迷你「箱」。眼見有商機,分別三十及三十六歲的意大利兄弟Lewis Cerne及Stuart Cerne,於上年十一月搶先創立Spacebox,提供迷你箱儲存及運送服務。然而,很快就有人搶生意,三十三歲的香港人Norman,今年一月開設Boxful,並引入千多萬元資金,就連前財爺梁錦松亦有股份。雖然Norman錢多,贏在起跑線,但不代表老外兄弟會輸,憑着有橋夠膽識,兩家公司一樣有得鬥! 老外兄弟九年前來港,一直做生意,現與妻子住在一個四百呎單位。眼見香港地方細,香港人住得逼狹,於是萌起搞「迷你箱」的念頭。他們早Norman兩個月進入市場,預算投資五百萬;可惜對家有起碼千萬元資金做後盾!對家Norman,香港出生,但說起英文比廣東話流利,曾在英國讀工商管理,畢業後在英國及香港瑞銀工作。一二年離開,隻身去上海開網上服裝店。嫌賺得不夠,計劃迷你箱生意,並經朋友介紹,找來梁錦松入股。迷你箱服務就如call van,打電話落order,就有人送空箱上門或拿走。記者分別訪問這兩間公司的老闆,感受到那種火藥味。老外兄弟說:「香港市場一向競爭大,有人加入是意料中事。不過我哋個網頁設計,使咗成百萬,好過『行家』!」而Norman則暗寸:「有啲競爭者搵快錢,乜都外判出去,質素無保證!」兩家公司收費同為每個箱每月四十九元,但經營生意的方法卻截然不同,看來迷你箱大戰一觸即發! 第一仗:鬥倉 老外兄弟:「迷你箱顧名思義,就是幫顧客將無位放的珍藏DVD、漫畫書及冬天衫等,pack好入箱,再運到貨倉寄存。我們的策略,是與客同步擴張;有客,我們才租倉,這樣就不會因用唔晒地方而浪費租金。而且我們於九龍、新界等有五個分租貨倉,可以分散物流較靈活,總共可收納四千個儲存箱,倉內設全天候閉路電視及中央控制溫度和濕度。我哋仲可以隨時運番啲箱俾客人睇,但佢哋就唔可以入來我哋嘅貨倉,咁可以慳番管倉嘅人工成本。」Norman:「我哋都唔會開放貨倉俾客人取箱,所以地點唔需要近地鐵站。而家港島區有個二千呎貨倉,遲吓新界會加租一個五千呎地方,總共可容納一萬二千個箱,地方好夠大!雖然現時只用咗二千個儲存箱,仍未填滿,但預計未來幾個月嘅生意,經大事宣傳後會大幅颷升,到時就啱用啦!」結論:老外兄弟「慳住來租」,五個倉總共三個月的租金加物流費用,只是花了五萬元。而Norman合共的七千呎貨倉,月租則六萬元。雖然差別不算太大,但老外兄弟分散貨倉位置,運送及調配較靈活,故小勝一仗。老外兄弟:勝 第二仗:鬥服務 老外兄弟:「我哋顧客可無限次免費取回迷你箱,會直接送到府上,方便攞嘢或加啲嘢入去,限時二十分鐘。但無龐大資金,我哋無自己車隊、搬運員,正嘗試每月計或每箱計的外判方式,研究哪種成本較低。要與外判配合,故客人要一星期前預約,一星期內提箱就需要另收一百元,再加每個箱二十五元。「只要入來我哋網站,輸入電話及電郵,就會有專人聯絡取箱的數量與時間。為鼓勵新用家大膽預約,假設用家在網上要求五個箱,用家收拾後,發現只需三個箱,亦只會收三個箱嘅價錢。」Norman:「我覺得外判物流團隊,唔可取囉!服務無保證。我哋客人可以每月免費取回迷你箱一次,一樣由我哋運送到客人登記嘅地址,『執箱』亦限時二十分鐘。我哋自行聘請有十幾年船運管理的專家,安排每日的送貨路線,並租用三架噴上公司名的客貨車,有自己車隊,早一日安排好路線,所以短至一天前預約都得。「而且我哋嘅搬運員,全部受過培訓,確保服務態度有水準,仲可以幫手接收客人意見,外判點做到先!而我哋嘅網頁亦較先進,可在網上完成整個預約流程,及在網上瀏覽自己的存箱內容。」結論:Norman投資三部客貨車、三個司機及搬運員、並有一個物流管理員,每月消費約十萬!落足重本,但老外一招「無限次免費取箱」亦夠殺食,記者試過放蛇,對方表示要求每日免費取貨亦無問題,故講服務兩者打成平手。平手 第三仗:鬥宣傳 老外兄弟:「我哋認為用社交媒體舉辦活動,與網民有交流是有效的宣傳方法,不過暫時未有。我哋專頁有媒體的報導,like數暫時六百多,好快會同經紀、租屋網合作,接觸更多市民。」Norman:「我哋喺各個港鐵站扶手電梯都有廣告。用咗十幾萬,希望市民經過見到,對我哋公司有多啲印象。仲有銅鑼灣Sogo外的宣傳活動。三月份我哋花咗二十萬宣傳,在高登、facebook、搜索引擎Yahoo!都有落廣告。最近仲同GoGoVan及英國糖果品牌Mr Simms合作,俾網民估吓一個迷你箱能放多少粒糖及迷你GoGoVan,估中就能得到免費迷你箱服務,吸引咗數百人留言,專頁有近五千likes!」結論:Norman的宣傳可謂鋪天蓋地,此仗贏硬!不過老外兄弟攞番個尾彩,表示很感謝Norman,「經過港鐵電梯,有幾多人會記住你公司名?最多只會對這個服務有印象。要市場接受新概念需要時間,我好慶幸有人先教育市民,令市民對迷你箱服務有更多的認識。到時機成熟我才開始做宣傳,成效更大。」Norman:勝 一點意見 時昌迷你倉老闆 Kevin:「Norman運作較可取。」Kelvin認為做迷你箱,一定要有自己車隊及倉庫。「老外兄弟用分租的方式,係可以節省成本。但針無兩頭利,如果無自己的倉,業主可以年年加租,而你加費的幅度則一定追不上加租。」同時他認為外判好麻煩,質素無保證,「做迷你箱要清楚每個箱的位置,你唔見咗人哋個箱就好麻煩,但外判工人亂咁嚟o架!你鬧佢就直情唔做。所以最好就有自己的倉和工人。」另外,是車隊太季節性,「到了旺季如暑假,當佢哋有其他工作時,就會大幅加價,或者沒有車手替你送貨。好難控制到個運輸成本,若果不能如期送出迷你箱給客戶,就更麻煩。」比起迷你倉,Kevin認為迷你箱很難做。「只做幾千個箱就有得做,一多就要好多投資。」因為靠網站運作,用家多就要投放更多錢在網站的科技上。另外車隊的開支亦會不斷上升,不會因為規模增加而成本下降。「你要不斷買新車,不斷請司機同搬運員,仲要加倉。我發展就只係要加倉,你話十年後邊個好啲?」 |
隨着前法官胡國興宣布參選特首,其餘候選人名單亦呼之欲出,特首選戰正式開波。過去盛傳會出閘的前財政司司長梁錦松,已決定Not to run。野心勃勃的他,正在商界搭建另一個更華麗的大舞台。 梁錦松已在舊僱主黑石(Blackstone)中挖走多名猛將,年初成立創投公司New Frontier,複製本土版黑石。他的主要拍檔是今年三十四歲的吳[!8544]楠(Carl Wu)。能被阿松選中做生意拍檔,就如他娶伏明霞做老婆,一樣要是「國寶級」人馬。這名吳楠(Carl Wu)除了是「僆界女神」Janice Man男友,本刊發現他更是「超級紅三代」。父系在政界響噹噹,阿爺是中共黨員,亦是前汕頭市人大常委兼副主席,大伯吳康民是前港區人大代表,阿爸經營免稅店,堂兄是經營康師傅的台灣頂新集團快婿;母系家族亦是汕頭商界的龍頭人物。 創投講求的是非常長遠的回報,過程會遇到極多變數,與其識計數,不如識人多。New Frontier已獲南豐及台灣頂新集團初期注資最少一億元,除投資香港初創企業,亦會到國內建醫院。本刊找到吳[!8544]楠做專訪,他充滿信心說:「資金無問題!」阿松果然眼光獨到。 相比很多富二三代,Carl表面上並沒有「少爺仔」脾氣,記者上週「殺」上他位於上環的辦公室,正在開會的他仍禮貌地回應,原來是阿松教落,「梁生叫我哋要同出面嘅人溝通多啲。」唔只聽教聽話,論學歷Carl更跑贏幾條街。他在紐西蘭讀中學,十九歲中學畢業後,入讀倫敦政治經濟學院,一級榮譽畢業,未畢業已獲投行UBS招手,工作期間被倫敦黑石挖角。同期黑石欲發展中國市場,請來梁錦松擔任黑石大中華區主席,阿松為建立自己班底,親到黑石分公司「揀蟀」,當時只有二十四歲的Carl是其中之一。Carl謙虛指:「因為我當時應該係黑石第一個,或者係唯一一個識講中文嘅人。」 來港後更獲阿松重點栽培,阿松往內地見客,多數帶Carl一起同行,十年來黑石多單國內「大刁」,Carl都有份參與。阿松一三年離開黑石,Carl亦獨當一面,包括負責一四年黑石買入中國最大IT外判公司文思海輝科技及參與設立人民幣黑石基金等。吳[!8544]楠在黑石十年間步步高陞,由分析員升至黑石亞洲區董事總經理,更以廿多歲之齡,榮登黑石全球最年輕董事。他指他在黑石主要做一些好深入的研究,「梁生對我哋好嚴格,俾好多方向我哋,要求我哋執行力好強。」阿松親自為Carl執教鞭,他當然非池中物。他大伯是前港區人大代表,民建聯創黨成員吳康民,Carl尷尬指:「其實我伯伯都係做過人大代表啫,無乜嘢。」言下之意,大伯「無乜嘢」,因為相比之下,他的祖父,背景更「猛」。 祖父叱咤汕頭政界 在汕頭出生的Carl,爺爺是吳華胥,生前叱咤汕頭政界。吳華胥的紀念文集,乃由中共元帥葉劍英的長子葉選平題字。根據這本紀念集,吳華胥本是汕頭市一所小學校長,一九二五年加入共青團,周恩來任命他為改組國民黨惠來縣的特派員,翌年轉為中共黨員,是黨內活躍分子。一九二七年國共內戰,吳華胥在汕頭組織武裝,曾一度獲得勝利,可是後來因據點被破壞,隻身逃到泰國再輾轉到香港。在港時曾在《工商日報》、《大光報》寫專欄及任職小學校長。五○年潮汕解放,他回到汕頭市任辦公室副主任,後來相繼出任汕頭市民政局長、汕頭副市長。八一年他八十二歲,仍獲選為汕頭市人大常委兼副主席,同時是民革名譽主委,常接待外賓。九一年去世,骨灰放在汕頭高級幹部骨灰堂。Carl爸爸吳衞民是吳華胥的孻仔,是繼室楊瑞貞所出,衞民在紀念集中亦透露 :「(爸爸)老年得子,自然鍾愛萬分。」而Carl亦是吳衞民的獨生子,即是孻孫,自然更得人愛。吳華胥在年老時都是和他們一家住。Carl的爸爸在汕頭經營免稅商品店,也有賣免稅車。而舅父吳錫盾亦是汕頭市商人,是深圳上市公司汕頭電器生產商天際股份(SZ.2759)董事長和股東,市值七十多億,他亦是現時汕頭市人大代表。他們家族成員之間關係密切,翻查資料,這名舅父在香港曾報住的地址,亦是他父母的住址。 獲台灣頂新注資 Carl家族威盡汕頭政商界,事實上國家早年已將汕頭與珠海同列為經濟特區,只是汕頭過去發展比較緩慢,不過今年初長實主席李嘉誠出錢出力,促成以色列理工學院與汕頭大學合作,在當地開設廣東以色列理工學院,打造中國「矽谷」,相信汕頭未來的創投機會多的是,Carl的人脈正好幫到手。不過訪問期間,每每講到家族背景,Carl就表現得有點尷尬,希望解釋自己並非靠關係,「其實我自己都係一邊讀書,一邊打工,這些關係都不是什麼,我哋做嘢都好professional。」不過做生意,確實是識人好過識字。當年Carl師父梁錦松過檔黑石,只是半年,已促成了中投與黑石的世紀合作,中投斥資三十億美元入股黑石,黑石創辦人蘇世民亦這樣讚梁錦松:「他與北京政商高層有很好的關係!齱v事實上,New Frontier成立只有幾個月,已獲南豐及台灣頂新集團投入一億元人民幣資金,前者相信是由現時擔任南豐行政總裁的梁錦松親自拉線,而經營康師傅、台灣頂新集團,表面上眾人風馬牛不相及,記者發現Carl的堂兄、亦是New Frontier合夥人吳嘉林,外父是台灣頂新家族魏家成員魏應交,他○五年與其長女魏妙玲結婚。而Carl指台灣頂新的集團董事、即魏老大魏應州的兒子魏宏丞亦是他倫敦黑石同事。 一千萬打殘對手 在成立New Frontier之前,梁錦松與Carl兩年前已開始合作另一盤迷你箱生意Boxful,即上門讓客人存放物品在他們的箱,再寄存在貨倉內。他們燒錢做宣傳,在港鐵、巴士落廣告,又搵《100毛》主持專家Dickson及黃慘盈拍片。為提升層次,與發展商合作,曾向九建(34)旗下紅磡「環海.東岸」買家送半年儲存服務。他們反應甚快,牛頭角迷你倉大火後,台北亦在迷你倉檢獲爆炸品,台北市長柯文哲宣布住宅區不可設置迷你倉庫,Boxful即到台灣開設迷你箱服務,取代迷你倉,標榜「全台唯一合法迷你倉庫在Boxful」,對此Carl承認都是因為有台灣的人脈關係,故對當地的資訊敏感度會較高。自Boxful推出市場後,先後引來很多競爭,一名迷你倉老闆透露當中大部分已「執笠」,其中一間迷你箱公司本來是Boxful的主要競爭對手,但去年做唔掂,已把旗下客戶賣給Boxful,對於競爭對手,Carl說:「Boxful到咗一個dominate嘅位置,其實幾難再俾人追到,你以為迷你箱好簡單,其實背後個物流好複雜。我哋係投資好多好多錢,客服呀、物流、路線安排,緊急措施呀,要做到好大規模,先可以賺到錢。」Boxful前年私募集資一百五十萬美元,去年再獲頂新、鷹君集團(41)、金朝陽集團(878)及阿松私人等注資六百六十萬美元。普通人要同Boxful鬥燒錢,簡直就是玩命! 黑石挖角專攻醫療 除了錢多,New Frontier要複製黑石,僱用的全部是猛將,團隊之中個個都是哈佛、耶魯、倫敦政治經濟學院等海歸派、做過瑞銀、美林等大行,而當中六人同樣來自黑石。其中一個成員徐宸(音︰臣),在黑石時已負責涉及十億人民幣的醫療投資項目;另一個成員袁帥,亦曾在摩根士丹利任亞洲私募基金,負責亞洲醫療的投資項目,包括公營醫院私有化、復康醫院收購等。袁帥背景亦有點「紅」,其父袁光明為成都邛崍市國稅局公務員。請得兩人,為的是一個更重頭的計劃——「顧連醫療」,他們將投資逾五億元在成都等地興建多間醫院、診所、復康中心等。另一個醫療項目「易得康」,則主攻上海的家居醫療及安老服務。事實上,去年國家宣布放寬審批及鼓勵上市融資醫療項目,剛完結的六中全會期間再頒布《健康中國2030規劃綱要》,提出「建立完善的分級診療制度」,New Frontier似乎甚懂配合國策之道。「單係顧連,我哋起緊兩千張病床,審批當然好複雜啦,但係我哋覺得我哋有全中國最好嘅團隊,最好嘅公立醫院裡面請出嚟。香港好多好好嘅私家醫院,但內地唔係特別多,我哋請咗最top嘅國際團隊嚟做呢一件事,中間嘅投資係遠遠超過一億元。」Carl說。 欲在香港上市 梁錦松是金融界揸「鑊鏟」的高手,打造這支以黑石班底為中心的團隊,又豈會是慢慢「揼石仔」。Carl說:「以前係Blackstone收購咗間公司然後營運,之後上市或者賣走。我哋呢度都一樣,係做好深入嘅研究,關於行業、公司,然後營運,搵最好嘅團隊去營運,Blackstone可能三到五年後就要賣,我哋唔同就係依家嘅項目可以賣,又可以唔賣,靈活好多。」New Frontier有一半項目在國內進行,但主要營業地點卻在香港,有投資startup的公司老闆估計他們未來想把項目在香港上市,「香港IPO當然係容易好多。」他認為亦有另一個原因,「佢哋可讓內地的同事透過加入他們的團隊,一段時間後成為新香港人。」創新科技是未來新經濟,搏連任的梁振英週一在網誌撰文吹噓在位時成立創科局,社會各界反應正面。創科局未來將撥二十億元資助創投項目,不過論背景及能力,年屆六十四的阿松以這班年輕人作班底,相對參選特首,似乎回報更高。 撰文:梁佩均、吳婉英攝影:胡智堅、李育明資料:資料組[email protected] |