📖 ZKIZ Archives

噚日由東方銀座（996）主席田琬善打骰嘅濱海鎰泰證券公司開張，嘉賓陣容好強勁，有玩具大王蔡志明同仔仔蔡加讚、上海前首富周正毅個老婆毛玉萍，仲有「三哥」苗僑偉等，呢班大忙人親自撐場，睇嚟田琬善都好吃得開。

現場所見，田小姐長袖善舞，忙住招呼賓客，令華華一直埋唔到身，無機會傾偈。濱海鎰泰董事韓銘生話，老闆人脈好廣，可以搵到唔少大客開戶口，公司仲搞埋投資移民，希望用一年時間，爭到3%市場佔有率，期望兩至三年內喺創業板上市。

濱海鎰泰個名夠晒特別，「濱海」代表服務長三角、珠三角等地嘅有錢人，鎰泰當然係表示幫班客賺錢啦。前身係92年成立嘅駿溢證券，今年1月就俾田小姐買咗返嚟，o依家全資擁有。

本刊早前報導，深得「廢青」網民喜愛的兩間譚仔米線，本是同根生的譚氏兄弟鬥得難分難解。其中「譚仔三哥」老闆譚澤群高調亮相，大談日賣五萬碗米線的彪炳業績。相反對家「譚仔雲南米線」東主、五弟譚澤均，多年來都無接受過傳媒訪問，直至本刊報導刊出後，五弟決定首次開腔，大談當日分家的來龍去脈。他聲言八年前是由三哥提出各行各路，但在雙方傾談分家期間，三哥一方一馬當先在大陸註冊譚仔商標，此後五弟北上發展處處碰壁，至今未有在大陸開業。譚仔兄弟戰，原來燒到強國。

本刊的「譚仔兄弟激戰」報導引發網民熱議，五弟當然知道，「同事話連佢啲朋友都討論。」五弟覺得事態嚴重，決定與拍檔兼姐夫周志明一同亮相：「過往我冇出來講，因為我希望關係仲可以修補，唔想再搞爛。」如今他已去到忍無可忍地步，決定企出來為自己辯護，並出示當日分家的會議記錄。「分家之初，我印卡片連佢哋六間都印埋。揀鋪我亦刻意避開三哥的分店，以為大家有默契，各有各自己做。」但他不滿三哥一方，近年在長沙灣青山道和藍田的五弟鋪旁邊開分店：「鋪頭愈開愈埋，有一間係隔籬鋪，另一間隔一個鋪位。」五弟認為：「並唔係佢訪問中所講『唔爭』，係爭得好緊要。」三哥聲言日賣五萬碗米線，以此估算年度銷售高逾七億元。手握三億元物業的五弟則指，他去年營業額「僅僅唔夠七億」，但強調會努力發圍，今年除了加開分店，更將啟用一個六萬呎新廠房，點都唔認輸。

加入譚仔

五弟爆料故事，由譚仔一九九六年在深水埗永隆街開業說起。當時五弟仍未加入，他表示，最初的股東共有五人，包括：三哥、六弟譚澤强、以妻子名義持股的姐夫周志明、六弟的兩位同學。「九九年，細佬（六弟）跟兩個同學因為錢銀問題相處得唔好，三哥、六弟、姐夫三人建議另起爐灶，叫我加入，一齊用三哥乳名，在元朗康樂路開『蟲哥米線』，但生意慘淡，三個月就結業，每人損失十幾萬元。」結業後，三哥、六弟、姐夫重返譚仔，五弟繼續從事原本的藥房工作。回巢後，二千年六弟和兩個同學關係惡化，這一次輪到同學離開譚仔，在外另開米線鋪。五弟說，此時三人再叫他加入，並讓他用廿多萬元入股一成。當時在藥房賣藥、月入只有一萬多元的五弟，只能分期付款。同年譚仔決定擴充，以五十二萬元頂埋鄰鋪來做，五弟卻無力夾錢，「我喺蟲哥米線輸咗十幾萬，基本上已經冇錢。」三哥於是加按自己一個單位，幫五弟暫時支付頂手費。五弟為盡快還錢，將深圳的一幢樓賤價出售：「起咗六十萬，但就只賣得三十三萬人民幣。」大約一年多之後，五弟將入股費和頂手費連利息還清。三哥曾說過，當日邀請五弟入股：「係想幫人，五弟經濟拮据，佢有老婆仔女，又搵唔到食……好啦，埋嚟啦。」五弟認為，當時三哥找他入蟲哥米線，主要是想找投資者，但他對三哥後來在經濟上的幫忙都十分感激：「我唔會隱瞞，幫過就幫過，恩情就係恩情。」譚仔擴充後，旁邊的新鋪叫「湘蜀風」，同屬四人，加入多款外省小食，五弟記得：「當時成功吸引蔡瀾入嚟試，佢喺專欄寫完真係火紅。」客人日日排隊，他們做到下午四、五點都冇機會食午飯，傳媒訪問接踵而來，兄弟終於賺得第一桶金。

兄弟爭拗

○三年，四人註冊成立「同心飲食有限公司」準備開分店，名字由譚父所改，寓意兄弟同心為譚仔大展拳腳，四人各佔公司百分之廿五股份。直到○八年分家前，十二間分店都由四人共同持有。 同心成立後，譚仔生意愈做愈旺，為何要分家？五弟聲稱有幾個導火線。首先，○七年，譚仔在觀塘開第九間分店時，他和姐夫全力為開新鋪做準備，曾經多次邀請三哥和六弟落鋪視察及俾意見，但兩人未有現身。直到開張當日，「六弟一嚟到就話要停工兩星期，覺得廚房設計唔啱心水，要裝修佬夜以繼日改。」姐夫為自己的設計解畫：「之前其他鋪都用咁嘅設計。」五弟則認為：「係溝通問題。錢損失唔係最重要，但我真係有邀請你俾多啲意見，點解事前唔傾好？」之後又發生租務問題，令兄弟間裂痕加深。五弟稱，同年三哥和六弟未經他和姐夫同意，以每月三萬多元租了石硤尾巴域街地鋪並簽約：「嗰間鋪話千四呎，但用到嘅地方唔夠五百呎，係一個好大失誤，以往搵鋪要通過四個人，因為牽涉五、六年租約，錯咗可能好大件事。」決定性的爭拗在年尾發生，四人在一個會議上，三票贊成溫和加價，只有六弟認為要大幅加價。五弟指，投票通過一週之後，六弟又召四人齊集元州街麥當勞：「目的係要推翻投票決定。」五弟即時沉不住氣說：「如果咁，以後即係你話事咪得囉！」五弟稱，當時六弟回敬一個極侮辱性的動作，但他「唔想形容」。眼見會議無法進行，姐夫即時拉走五弟，三哥則站在六弟一邊。五弟說：「佢一向咩事都係六弟啱，三哥係冇主見嘅人。」

決定分家

眼見兄弟間矛盾加深，五弟想了一個禮拜後，想出一個辦法讓公司繼續運作：「既然佢哋等於一組，我同姐夫又夾得幾好，不如將公司十二間鋪頭，分開兩隊管理，各自做好，對方有好嘅嘢，互相學習，但利潤歸總公司。」姐夫將建議轉達給三哥和六弟：「講完好似石沉大海。」但事隔一兩個月，○八年農曆新年後，三哥約開會，五弟引述他說：「佢哋話唔係『分管』，係要分家，佢哋已經安排好晒，同咗啲員工講好：『你到時跟我，一分開就辭職。』」資料顯示，三哥和六弟在○八年二月初，聯同其妻，成立群順有限公司，及後處理分家事宜，亦以該公司名義進行。決定分家後，五弟聲稱，三哥曾提議將「同心」解散，但五弟和姐夫認為公司名是父親所選，有紀念價值，故二人決定留在「同心」，繼續經營「譚仔雲南米線」。三哥早前解釋為何未有留在同心時說：「因為現實同個名相反，唔再同心。」三哥一方曾多次暗示，當日分家與兄弟間的錢銀爭拗有關。六弟曾向本刊說：「我同三哥從冇因為金錢發生爭拗……但同其他所謂兄弟就有，既然道不同，不如各有各做。」但五弟就否認是因錢銀問題而分開。

商標爭議

○八年分家前夕，負責會計的姐夫表示，當時譚仔每年生意額大約有九千萬元，拆夥時分店邊間歸邊個，主要用生意額計算：「A組嘅生意額有咁多，B組要相若。」五弟和姐夫獲長沙灣和觀塘等分店，三哥和六弟則以深水埗和佐敦等作大本營，自○八年四月起生效。（首間永隆街店，於分家前○七年年尾已結業。）四人在○八年七月達成共識，葵涌中央工場由五弟一方以六十萬元收購。同一會議中，四人亦協議繼續以「協力飲食有限公司」，共同持有「譚仔雲南米線」和「土匪雞翼」等三個商標，雙方均可使用至今。分家看似和平解決，但五弟發現，三哥一方達成協議前一個月，率先在大陸註冊譚仔的「倒轉腳印」嘜頭。中國商標局網頁顯示，該商標現由「譚仔三哥雲南米線有限公司」持有。五弟稱，因三哥一方在大陸註冊了譚仔商標，令他打入內地有困難，他現在大陸無分店。三哥的網頁，現無提及在大陸有分店。與此同時，五弟一方亦不甘示弱，去年用英屬處女島註冊的「宜策有限公司」，向大陸官方入紙申請用同樣的譚仔腳印商標，今年年初被駁回，現處於覆審階段。另外，宜策亦於去年在內地申請註冊了三個「譚仔五哥」商標。不過，五弟否認和三哥一方爆發商標爭奪戰。

父親功勞

三哥與五弟的口舌之爭，還包括譚仔招牌湯底和小食秘方。三哥一直強調湯底和小食都是他研發，但五弟就曾在facebook專頁指，他們「沿用譚老先生遺下之珍藏秘方加以整理及改良」，三哥曾為此直斥五弟「卑污」，認為其說法「唔係事實」。五弟說，父親一直「對於飲食嘅觸覺好強」，整家鄉菜非常了得：「湖南熏肉，親戚個個豎起手指公讚。」他指，父親在文革時期坐過監，認識做廚師的監友，又學識四川菜。五弟如此形容父親對譚仔食物的貢獻：「個意念係爸爸俾……係問佢，睇吓佢俾到咩意見，然後一路問，一路試……父親嘅功勞係最大。」他指，分家後自己的食物，調整成更接近父親的味道，「除湖南酸辣米線是我創之外，主要靠父親的意念及資料。」如今兄弟間形同陌路，但以前一家八口住在石硤尾山寨冶金廠的日子，五弟依然歷歷在目：「嗰時冇咩嘢玩，就一齊喺山邊摘山棯，捉蜻蜓同草蜢……我仲好記得，同三哥、四哥一齊喺空地耍『虎鶴雙形』，第一招叫『龍虎出現』。」三哥和五弟更一同返小學：「三哥喺學校好出名，出名曳。」當時父親管教極嚴，孩子們稍頑皮就會被重重掌摑。但到後來，兄弟間因譚仔生意開始有分歧時，年老的父親已患重病，無力再勸子女：「但我覺得佢察覺到，因為三哥會將喜怒哀樂擺喺塊面度。」五弟更聲言：「父親○六年臨終前最大願望，都係我哋兄弟間相親相愛。」兒時手足變成生意對手，近年五弟更感到三哥一方視他為勁敵，他惟有以此訪問作「終極」反抗：「希望三哥同六弟考慮吓，大家都係親人，做生意時唔使再破壞關係，大家冇深仇大恨。」對於五弟的說法，本刊曾邀三哥受訪，但他透過公關表示不欲再談。記者之後以書面查問也不獲回覆。

撰文：關冠麒攝影、攝錄：胡智堅、葉漢華、李育明資料：鄭詠欣[email protected]