有瓦遮頭，是不少香港人的夢想，之不過，對於startup，單單「有瓦遮頭」，點夠？ 正如開檔賣魚蛋，都要搵個地方夠旺兼人流夠多的位置，雖然startup毋須講人流，但一樣好有要求，所以，專為startup而「衍生」的共同工作空間（co-working space），近年就大行其道，收費好有彈性，不過，點先算好？ 相信，不少搞startup的「老闆」，都是充滿創意與熱誠，但講到資金，就「無乜幾多」，所以，樣樣都要慳得就慳，雖然寫網頁、做手機app等startup，大可以話去搵間coffee shop，由朝坐到晚，一樣做得到，之不過，想同人交流，除了收銀員之外，應該都幾難，除非，你想傾咖啡經。 增強人脈 無論做生意定搞startup，幾時都「識人好過識字」，所以，外國相當普及的共同工作空間概念（co-working space），在香港愈開愈多，顧名思義，即是「大家在同一空間下工作」，在一個開放式的地方，一人一個bean bag、梳化（或者工作枱）、一部手提電腦（已經無人會再拎一支筆一本簿一張摺櫈），工作之餘，可以趁機識到更多不同startup行家。「搞startup經常都會遇到問題，而co-working space就提供一個好好嘅條件，一班志同道合的人聚在一起，除了可以分享經驗，亦可以互相幫忙扶持，最重要的是，可以擴闊人際網絡，兼且更快接收行內資訊，點都好過單打獨鬥。」八年前於科學園搞startup，成立「科韻動力」的鄒健宏（Kenneth）表示。 同聲同氣 要揀一間合適的co-working space，不應只着重有無得上網、環境企理、coffee or tea等等，Kenneth認為最重要的，是了解同場其他startup，「例如你搞手機app，不過搵勻成間co-working space，都只得你一個寫app，想搵人交流都無，同坐coffee shop無分別，所以參加前，最好問清楚場內所進駐的，多數是哪類型的startup。」中國人，潛意識認為同行如敵國，最好收收埋埋自己搞，Kenneth就相當不同意，「兩年前，參觀美國矽谷的startup，發現在同一間co-working space內，竟然大部分人同樣在研發穿戴式裝置 （wearable device），於是好奇問他們，不怕其他人抄襲？結果他們異口同聲講，最重要是解決問題，而且就算抄得到，亦未必一定成功，所以我好希望香港的co-working space，都做到這種分享的風氣。」 總有一間喺左近 香港co-working space愈開愈多，設備大致相同，包括免費茶、水及咖啡、休憩空間、影印機、會議室及活動場地。不過，地方大小、收費各有不同，報名之前，記得睇清楚。 Coffice地點：長沙灣設有共用及指定辦公枱之外，更有一日通行證，朝九晚七收費$150，點都好過坐coffee shop，如果人數較多，亦可以租用辦公室，但就要留意使用時間。收費：辦公室：24小時（每月$3,000起）指定辦公枱：24小時（每月$2,500起）共用辦公枱：09:00至19:00（每月$1,600）一日通行證：09:00至19:00（$150）網址：http://www.coffice.com.hk NeighborFarm地點：觀塘位處東九龍海旁，有無敵靚景之餘，亦有定期舉行不同類型的活動，由各行各業到特別針對startup人士都有，兼且可以乘機拓展人脈，夠實用。收費：辦公室：24小時（1至2人房/每月$4,000起）（3至5人房/每月$7,500起）（6至8人房/每月$15,000起）共用辦公枱：09:00至18:00（每月$900）、24小時（每月$2,000）網址：http://www.neighborfarm.com WYND地點：中環要在中環租個office，成本不輕，而WYND位處鄰近蘭桂坊，共用辦公枱每月只要二千多元，想再平啲，一日通行證三百元有找，話晒都喺中環返工，抵！收費：辦公室：24小時（每月$12,000起）指定辦公枱：24小時（每月$6,200起）共用辦公枱：07:00至19:00（每月$4,200）、半日（每月$2,800）一日通行證：07:00至18:00（$280）網址：http://www.wynd.hk Ooosh地點：長沙灣提供多種辦公方式，鍾意傳統辦公枱定bar枱，任君選擇，甚至設有bean bag房，自由又自在，而且一日通行證收費只需$50，當歎冷氣都抵。收費：辦公室：24小時（每月$6,000起）指定辦公枱：24小時（每月$1,500起）共用辦公枱：09:30至19:00（每年$5,000、每月$500）一日通行證：09:30至19:00（$50）網址：http://www.ooosh.hk 撰文：劉耀祥攝影、攝錄：廖健昌插圖：劉志誠[email protected] | ||