2000-8-11 NM
▲梁雅婷大學期間主修市場學，副修英國文學，她自言愛閱讀，直認不是一個愛創作的人，「所以我做COO ，執行別人的意念。」
本地網站的喪鐘已經敲響了，有裁員有清盤，有點人人自危。 身為本地最早一批財經網站的Finet Online ，最近卻動作多多，除了改名「財華社」外，還創辦了免費財經晚報《財華速遞》，未來三個月會增聘廿人，更揚言會按原定計劃，於今年底或明年初在 Nasdaq 及創業板上市，儼如網界奇葩，卻予人「最後一擊」之勢。 Finet Online 創辦人之一梁雅婷，自言籌集資金從來不是經營中最困難部分，「我哋搵資金係為咗擴充業務，而唔係cover burn rate 。」
當
▲財華社董事總經理虞堂根說，他們的衣著有別一般IT 公司，連程式員 也恤衫、西褲一度。「始終我哋做財經資訊，formal 啲好啲。」
同期的財經網站寬網（Quamnet ）借殼富華上市尚未有定案之際，財華社（前身Finet Online ）繼今年三月獲《讀者文摘》及通用金融入股後，近來再高調宣揚，今年九月前會落實第二輪融資，再次引入另一名策略性股東。究竟財華社有何能耐，在如斯市況 下，依然惹來垂青？
「我哋一直都想長線發展，成日諗住點樣建立生意，所以我哋吸引唔到VC （Venture Capital 創業基金）。」身為財華社創辦人之一，現任營運總監的梁雅婷說。
「我哋個個日日做十四個鐘，就係想盡快建立多啲產品。你愈build （建立）得多嘢，人哋咪信你囉；你成日得把口噏，梗係搵唔到錢返嚟。」
「但你推出愈多產品的同時，亦會使得更多錢！」記者說。
「所以我哋成日都好tight control ！我哋個網站上年二月出街，一直要到十月廿一號先賣第一個印刷廣告。
「人哋網站燒錢速度（burn rate ）講緊每月幾百萬，但我哋上年嘅burn rate ，可以低到十萬、十幾萬一個月。而家公司有一百人，每月burn rate 都未去到三百萬。」
梁雅婷直言，她跟另外兩位創辦人，負責技術的區兆倫和負責經營策略的行政總裁余剛，要到今年二月，網站面世後整整一年，才開始支薪；而公司創辦初期的十多名員工，大部分人工每月不過一萬，主要用公司認股權證（share options ）搭夠。
而剛於今年初遷入，位於上環金龍中心的辦公室，財華社雖佔用兩層，租金加起來每月不過十五萬多，他們的慳儉程度可以想像。
積極開源搵錢
▲ 董特首特別顧問葉國華擔任主席的興科融資，也是財華社股東之一。
節流以外，梁雅婷自言公司亦不斷開發搵錢渠道。除了出售網站內容予雅虎香港，AOL 香港等入門網站，替東亞、京華山一等證券行建立網站外，今個月開始，還會出版有廣告收入的財經報紙《財華速遞》，逢星期一至五傍晚時分，在十四個地鐵站免 費派發。事實上，未出版《財華速遞》前，財華社已經出版投資書籍，再加上今個月開始易名「財華社」，難免令人覺得他們正極力淡化本身網站的形象。
「我哋一路冇諗過自己係dotcom （網站公司），網站上年二月出街，我哋四月已經出第一本書，出得仲早過網站中文版，我哋唔係轉方向。」
訪問期間，梁雅婷不斷強調財華社一直沒有資金壓力，不過觀乎財華社計劃招聘的廿人當中，其中一半為市場銷售員工；而新近上任的董事總經理虞堂根，亦會專責研究公司的賺錢途徑，種種跡象反映，財華社正積極搵錢。
「做任何生意，你都係想盡快搵多啲賺錢途徑㗎啦。好似李嘉誠而家都咁多錢，佢都唔會話唔做嘢。
「我哋一路都想投資快啲有回報，唔想依靠單一收入途徑，先至不斷開源。」
三十未到女強人
架着金絲眼鏡，蓄着長髮的梁雅婷，外表溫婉，然而一提到公司業務時，則儼如一副女強人模樣。香港出生的她，三歲時跟家人移民加拿大溫哥華，至九三年英屬哥倫比亞大學商業系畢業後才返港，一直從事市場推廣工作，其間修畢中大工商管理碩士課程。
九六年，她加入一間台灣及大陸背景的企業融資公司（名字拒絕透露），任職項目融資經理，負責替國內電廠、公路等項目找資金。九七年金融風暴後，公司結束生意，她搵工期間，遇上朋友找拍檔搞洋酒貿易，她就「斟」了一把。
九八年一月在一個試酒會上，遇到當時還在港大就讀金融學系的區兆倫，再加上余剛的資金，Finet Online 就這樣成立。
由一間原本只有兩個人的小型財經網站，發展至擁有一百名員工的財經資訊供應商，還未滿三十歲的她，可有滿足感？
「有一部分係自己努力，但大部分係公司整體成果。我哋唔似其他競爭對手，公司冇一個star ，完全冇明星效應。我覺得好幸運公司有一支咁嘅team 。」這位營運總監，答得一貫大方得體；而訪問過程中，對公司經營前景亦語態輕鬆，恍如置身事外於漫天烽火網劫中。
財來自有方
梁雅婷自言，今年三月入股的《讀者文摘》，以及下個月就會落實的另一名股東，都是主動找上門的。「我哋叫做幾lucky ，有好多人主動搵我哋，你睇我哋都唔叻㗎，又唔識玩上市又乜又物，又冇 connection 。」
Finet Online 去年初面世時，只得四十幾名網上讀者，其中一個就是《讀者文摘》董事總經理Tony Rees 。四、五個月後，他主動致電Finet Online 要求入股。「我哋冇乜點睬佢，因為當時唔係好需要資金，亦唔想一開始就賣出一大截股份俾人。」梁雅婷說。
去年尾《讀者文摘》再次提出入股要求，據梁雅婷所言「時間啱啱好」，結果今年三月完成入股交易。
「資金會否是因素之一？」記者問。
「會係，不過當時搵資金嘅同時，亦想搵一個可以幫我哋發展海外業務嘅拍檔。」梁雅婷由始至終，未有正面承認財華社資金是否曾經出過問題。
撰文：盧遂如 攝影：何少忠[email protected]