📖 ZKIZ Archives

立法會議員莫乃光呢個星期三動議引用權力及特權法，要求政府交出審批免費電視牌照決定嘅機密文件。唔想死得不明不白嘅香港電視網絡職工會已重返立法會紮營，向議員施壓，希望動議得以過關。不過，香港電視主席王維基早已預告唔會參與包圍立法會，似乎唔想因此得失阿爺同西環，保住最後攞牌希望。

自從兩星期前開記招高調反擊梁振英後，魔童無再搞記者會，港視發言人亦講明佢暫時唔接受傳媒專訪。不過，咁樣並唔代表佢放棄同思歪打輿論戰，呢段時間佢主打報章專欄，撰文反駁政府或者左報嘅攻擊，或主動向思歪政府挑機。另一樣進可攻、退可守嘅武器，就係選擇適當時間出席公開活動。事有湊巧，港視不獲發牌後，唔少機構邀請魔童講talk，尤其係各大專院校。除咗早前三千人撐場嘅中大講座，王維基之後仲出席咗中大新聞獎講座、理工大學學生會搞嘅講座，本週一、二仲分別去埋浸會大學同埋樹仁大學。據瞭解，主辦浸大嗰場講座嘅傳理學會，係喺政府公佈發牌決定後先至邀請王維基，但失牌事件後，王維基答允出席活動，惟講座謝絕場內採訪，只限師生參與，明顯唔想太高調。不過，風頭火勢，佢依然答允出席，似乎都預咗政府會出招，隨時喺場外接受訪問反擊，並趁立法會表決議案前發功。曾自言已不奢望政府發牌嘅王維基，其實大把後著打呢場輿論消耗戰。

一九七九年，維港兩岸電視機播着《獅子山下》。十七歲的王維基，以高考1A2B3C成績準備由九龍城民生書院跳到中大。畢業前，同學製作紀念冊，如此描述王維基：「此人甚熱衷於工作，做事認真有衝勁，常常達無我，無人之境界，可惜怕孭鑊。是一個很好的雜務員，也是校中響噹噹的大人物，是現代的『趙高』。為人很有才幹，可惜付出能力之外，總希望能得回一些名與利。但不失為機智、聰明，現實世界中甚有前途。」旁邊配了一張王維基跟人拗手瓜的相。趙高是成語故事「指鹿為馬」的主角，王維基的老同學說，他細細個就跟趙高一樣，有將死拗翻生的求變本領。同學說他愛名利，王維基的確由細到大都諗住賺錢，搵銀之道就是一個「變」字。由中學搞補習社、大學走水貨書、廿七歲做IBM Top Sales年薪過百萬元、移民後又回流搞長途電話，三十五歲做上市公司主席、再由寬頻走入電視的花花世界，王維基從來都不滿足。九二年返香港，王維基到車公廟，求得八十七號上籤。解籤佬話過：「你要面對比你大千百倍的敵人，不過，十年後，對手將如強秦一樣，隨歷史消逝。」王維基記住這支籤，在人心惶惶的香港後過渡期，憑一招「睇餸食飯搵路行」將巨敵殺得片甲不留，而且，唔單止十年更一直行到二○一三年……然後他重重地跌了一跤，但他知道，只要「搵位走」就無有怕，這是他的強項，也是香港人由來已久搵啖飯食的特質。結果，新一年來臨前，王維基親自示範，如何將香港人見招拆招的本色，變成擊破梁振英的最佳武器。王維基體內有無限復活的基因，因為，他是香港人。五十二歲的王維基，由六十年代至今的歷史巨浪中不斷走位為求上位。由細到大，他都沒有爭取民主的宏大夢想，我們不會見他出席六四燭光晚會、也不知道他對普選的立場。他雖然做過浙江政協，但到今天仍然手握一本加拿大護照。所謂魔童，只是個識變通的地道香港仔。

七十年代他是王維

一九六一年王維基在贊育醫院出世，七十年代家住紅磡信用街首利大廈靚洋樓，是其母七○年以四萬七千元買入。王爸爸行船是上海人，王維基到今天仍不知道自己個名有何意思，但就遺傳了上海人的認叻特質。他小時在街坊名校民生讀幼稚園，六七暴動時九龍城區遍地「菠蘿」，王媽媽擔心便將兒子轉校到何文田培正中文小學。後來土製炸彈被掃走，王媽媽希望兒子讀好英文，於是在王維基升小六時又將他轉回民生。民生不是拔萃喇沙，校園無有錢公子哥兒，他們是穿人字拖，在滿布魚骨天線的舊樓天台，仰望過飛機翱翔、盼望天空海闊的基層小子。民生歷年出過的名校友包括：指揮女將葉詠詩、中電公關阿頭莊偉茵、明星就有彭羚、林志美、艾威等。七十年代民生的上課鐘響，王維基走入課室就多多嘢講，成日舉手又膽粗粗問教經濟及公共事務科的關永圻老師（邵善波中學同學、前中央政策組全職顧問）：「關Sir，你係咪追緊Miss X呀？」關Sir到今日仍記得呢個多口仔。口水仔畢業前，關Sir在他的紀念冊留言：「要問自己到底想活在一個怎樣的世界，想想要為這個世界建造些什麼。」關Sir到今天仍記得：「我當年覺得佢有好多諗頭，係會抓緊機會的典型香港式叻仔，但我覺得佢無乜目標、無乜方向。」

王維基的班主任則贈他四個字：「戒驕、戒躁」，同班同學蕭潮順（黃霑生前拍檔、前無綫監製）聽到就笑。蕭仔記得，王維基細細個已經係校內風頭躉，唔係因為讀書特別醒或者溝女戰績彪炳，而係靠把口、寸寸貢一副招積相令同學記得，「大家都覺得佢醒目、有腦。同學個個叫佢王維——琴棋書畫都精的唐代詩人啊，作嘢得，橋又得。」蕭仔與王維都因為生得細粒被人叫孱仔（王維基身高五呎六），但佢兩個話之你點都要踢波，做唔成波牛都唔可以衰俾人睇。「某年，學校話唔准打橋牌，王維就大大聲問點解來挑戰老師。死纏爛打兩個月，他最終搞咗個橋牌會又做埋會長。佢乜都唔怕，講嘢又老積，同學都覺得佢成個師爺，似方唐鏡。」蕭仔說，王維在中學做過最出位的事，是十七歲暑假跟兩個同學，在旺角奶路臣街搞了一間有四百名學生的無牌補習社，叫「學聯教育中心」，個名無乜新意，但就賺了四萬元足夠當年買層樓。王維先問垃圾婆借架木頭車，再煮兩大桶漿糊，然後推車由紅磡家走到尖沙咀沿彌敦道貼街招，再洗樓到界限街以南的所有公屋派十萬張宣傳單。「王維仲搵埋學校的英文老師Miss Luk去自己檔補習社教，話反正Miss暑假無嘢做，你話佢去得幾盡。」王維細細個就識得搵錢，如同學所言「好名利」，「係呀，呢個王維，香港仔、醒目仔，最識走位。」「我哋民生出嚟嘅人無含住金鎖匙，都要靠自己雙手向上爬。王維，早就行先過我哋好多步。」

無嘢我係唔得

中學畢業後，王維上中大、蕭仔升浸會，兩人各有各忙無聯絡，至九十年代王維從加拿大回流，重返民生書院的校友聯誼，與蕭仔又再於球場碰頭。蕭仔與黃霑搞製作公司，自己拍過《江山如此多Fun》、張國榮《日落巴黎》特輯等，霑叔叫蕭仔諗諗搞上市，他就捉住當時已經做了上市公司主席的老同學問個究竟，點知王維成盆冷水將他照頭淋：「你唔使諗啦，唔掂呀你，你搞創作，人死咗就乜都無，唔同我，日日有人俾錢我賺。」王維無面俾將蕭仔由頭數到落腳，點知幾年後科網熱，王維就叫蕭仔幫他的城市電訊搞個iChannel，製作有如當今動新聞的Video Magazine，蕭仔找劉德華撐場，又搞噱頭造勢：「我搞鬥曱甴比賽、沙灘偷拍三點式女郎，王維話去馬啦。佢呢個人，唔悶得。」

「王維做寬頻之前已來問我，搞電視好定網絡好？我叫佢千祈唔好搞電視，燒銀紙呀。」王維唔死心，二○○九年出擊投電視牌照前，約了蕭仔在福臨門問意見，蕭仔有碗話碗說搞電視無前途，王維卻看到三色台獨大代表機會在眼前，他要像當日打低電話巨人一樣成功。他，要再變再贏。「當時王維同我講：『邵逸夫都係六十歲先搞無綫啦，而我依家只係五十歲，無嘢我係唔得。』」說罷，王維叫蕭仔看電影《魔球》（Moneyball），講述一隊沒錢沒資源的美國業餘棒球隊，如何靠畢彼特飾演的打不死教練，變成冠軍隊。「佢成世人唔怕輸，因為佢信，有困難，見招拆招就搞得掂。」正如古代詩人王維也是憑機智，被安祿山俘虜後扮啞作詩，才逃過「安史之亂」劫數。

王維基簡歷

年齡1961年12月13日出生，現年52歲家庭上海人；已婚，妻子唐靄玲，育有一子一女學歷1979年︰民生書院中學畢業1985年︰中文大學電子系乙等二級畢業2008年︰中文大學行政人員工商管理碩士畢業物業王維基夫婦持有︰中半山嘉樂苑低層B室連2個車位 西半山輝煌豪園高層B室妻子唐靄玲持有︰馬鞍山聽濤雅苑1座中層E室總市值︰$1億2,690萬

八十年代踢走愛國戲

一九八○年，維港上空出現香港政局陰霾，王維基由九龍城跳入沙田中大升讀電子系，那是他的第三志願，首選次選是經濟和工商管理但都無佢份，唯有見路就行。八十年代的大學生，有強烈精英心態要講愛國講社會大事，唔愛國都要扮吓嘢睇愛國電影，偏偏王維基話之你扮都費事扮。他依然被同學叫做王維，百足咁多爪搞學生會負責「群育」聯誼，而當年他的莊員，包括陳健民（佔中三子之一）、何安達（曾蔭權年代的新聞統籌專員）。王維基開學生會時，就開宗明義講到明，他入學生會只求搞好同學福利，國家大事嘛，留番俾大家。「我當時都好奇怪，點解一個無乜政治意識，唔係好理香港前途的人會來搞學生會。」陳健民和何安達，當年分別出任學生會的外務及內務秘書，他們都忙着抗議示威，反對大學部署四年改三年，又開始討論香港去向。而王維基當年讀書以外只想做好一件事——搵錢。那些年，許鞍華《胡越的故事》、徐克《蝶變》揭開了港產片新一頁。陳健民記得，不是文藝青年的王維基也嗅到潮流氣息，跟同窗說：「依家無人睇愛國電影啦，咁老套。」然後二話不說找來一批新浪潮電影，在中大邵逸夫堂播放。當時陳健民和何安達都心想：「得唔得呀？有無人睇呀？」結果大排長龍，王維基替學生會賺了一大筆。陳健民憶述：「王維覺得，學生會唔可以脫離群眾，同學是他的市場。」他深信，市場變了，學生會也要變。中學搞補習社食過翻尋味，王維在大學繼續幫自己搵銀但要搞搞新意思，訂購平價台灣版教科書，再「走水貨」賣給同學來賺差價。而掛住賣書的王維可不是書蟲，他的畢業成績嘛——乙等二級。

不再返大陸

王維基雖然沒有像其他同學般，額頭綁紅巾上街，但原來他廿歲時對中國已有自己的睇法。一九八一年的《中大學生報》，王維基投稿「我懷疑我走錯了地方」，甫開首他便寫道：「四年前，從內地探親回來後，我就再沒有興趣，也沒有想過要再回去，探親也好、遊覽也好，無論如何，也不再去；原因或許是自己忍受不了他們的生活方式，或許是不願再看見他們這樣的生活。當時，感覺到的只是『討厭』。」王維基又在文中，敍述當年參加「省港大專生交流團」跟中山大學學生交流經歷：「偏偏你談鄧小平，他卻說四人幫如何罪孽深重，你談四個現代化，他卻說文化大革命的禍害。對於過去，他們會酌量談談，對於未來，他們卻沒膽子講了……「我真懷疑為什麼他們可以如此馴服，從小學、中學、大學，甚至未來的工作崗位，都由國家支配，他們的反應竟可以如此冷漠，如此平靜，默默地承認了這些『必然的規律』。」這篇稿，可能是王維基對中國最有睇法的公開文章。那是改革開放後三年，王維基沒有像其他同學般高舉愛國旗幟，卻直率地抒發了心底對大陸無改變、無進步的不滿。王維基一九八五年中大畢業，即獲電腦巨頭IBM聘用，入職月薪有七千五百元。三年後成為Top Sales年薪過百萬，當時他只有廿七歲。他在跨國公司飛黃騰達，天空的陰霾也漸漸變成黑雲，戴卓爾夫人在人民大會堂門口跌倒後，開補習社搞電影會走水貨書永遠快人一步的王維基，也搶先向加拿大領事館遞上他的移民申請表，獲批後卻捨不得百萬薪水。

六四後即走

直至八九年六月，王維基這個傑出「Sell屎佬」獲IBM獎勵環遊世界，六四當日他在美國佛羅里達州玩，知道北京開槍立即回港，得知大學同學、時任《亞洲週刊》記者張結鳳，六月三日晚在北京被塑膠子彈所傷而有感受。他說過：「剎那間，我感到開槍鎮壓之類的事，好像忽然與自己距離很近，我覺得很恐怖，於是賤價賣樓、辭職，六四事件後個多月，便離開了香港。」此後，王維基在商場長袖善舞，我們也沒有再聽到他對六四的立場。九七年六月四日，不單維園點起了燭光，原來也是王維基兒子出世的大日子，但他為了籌備公司上市，整日和律師會計師開會，無法親眼看到兒子出世，「世上任何東西都有代價。」中學同學預言王維基追逐名利果真應驗。為了自己盤生意，王維基甚至改變自己，由一個唔關心社會大事的人，變成自由黨黨員，九八年更出選立法會資訊科技界功能組別，但當他知道要放棄加拿大國籍時，就寧要楓葉。社會巨浪湧起了是非黑白，我們看不到王維基有他的個人立場，皆因他願意隨時走位、隨時改變。二○一三年十二月二十日，我們聽到王維基搭上國企巨頭中國移動，他亦做過浙江省政協。曾幾何時，他是六四後走都走唔切的香港人，到今天那本楓葉護照仍在他身邊。

九十年代加國Hutchison

與其說王維基創意無限，說他鍾意玩嘢其實更加貼切。王維基跟喬布斯有十萬八千里距離，他甚至未曾創作過一項新產品，但他有個「特異功能」，就係香港仔最叻的食腦，更加玩到出神入化，就算翻兜大家都唔覺唔覺。王維基移民加國後，靈敏的生意嗅覺聞到當地開放電訊市場，加上移民潮下長途電話生意有得做，於是和表哥張子建開公司。翻查加拿大政府記錄，原來九一年九月，王維基在當地開的公司，名為Hutchison-Whampoa Telecommunication（Canada）Inc.。而神通廣大的李嘉誠和黃知道後出手興訟，結果王維基九二年被迫將公司改名City Telecom Inc.。城市電訊這個名，跟當年他的補習社學聯教育中心一樣，都唔見得好特別。開完公司，王維基就看到人心惶惶的香港其實充滿機會，九二年帶着城市電訊個名、帶住加拿大人長途電話回撥的橋回流，成功抗衡老大哥香港電訊殺出血路。回歸後，長途電話市場開放又遇上科網熱，王維基要再贏一仗，決定帶頭打廣告戰。但他是個生意佬唔識度橋，講創意得找個廣告人，結果找上阿西（馮偉賢）。

好cheap好賤

阿西記得，1666將王維基變成「魔童」後，王老闆下令要更加出位的新一輯宣傳——要Draw、易明、顛覆、破格、有幾盡就去到幾盡。阿西眼見同事的橋被王老闆彈到一文不值，抓爆頭之際，突然間讀音樂出身的他靈感到，無無聊聊想起《幪面超人》主題曲，自己填埋詞哼出：「CTI殺價，殺到英美澳加，美國Canada三毫八……」王老闆聽完之後話：「嘩，好cheap、好賤呀。」然後，王老闆哈哈哈，阿西就此搞出個街知巷聞的殺價超人。王維基要食住個勢，殺價超人之後是一系列報紙廣告，大玩食字估價遊戲，阿西諗到畫兩隻鹿一隻追過一隻叫人估，答案係每分鐘「六個六」。王老闆聽罷即刻按計數機：「得喎，我就改個價六個六來就你條橋。」王維基終於憑連串變完又變的出位宣傳成功，去得最盡是影住著短裙女人的「任你上」廣告。當他的生意要由長途電話變成寬頻，他又找來阿西搞搞新意思。這次，已打響名堂的王老闆講明唔再要cheap嘢，搞寬頻是另一個品牌要與別不同、要昇華至有深度有意思，總之無得食老本。阿西又抓爆頭。寬頻的寬，令他想到「人不可以改變生命的長度，卻可以改變寬度」，諗吓諗吓個腦就出現一句：「生有限，活無限。」然後，他成輯個廣告就變成sell死人——戴安娜王妃、喬宏、德蘭修女、李小龍，再加埋黃家駒首「今天我，寒夜裡看雪飄過……」「其他客人好多顧忌未必接受到，王老闆係一個例外。佢會俾我哋去得好盡、好放、好癲。佢肯變，就係尊重創作。」王維基鍾意玩嘢，因為他知道，有嘢玩，才有機會。上週五，他拿着一個接收器，給大家介紹什麼是流動電視，網民高喊：「嘩，好型呀，佢成個Steve Jobs上身。」而其實那個接收器，淘寶大把。

現在Goodbye燒味飯

步入知命之年的王維基，仍然要變、變、變，唔可以悶、唔可以停，因此搞出香港電視、搞咗部街知巷聞的電視劇《警界線》。但其實王老闆除咗計數之外好多嘢都唔識，向來寸嘴牙擦的他，對住創作人卻要收起棚牙。《警界線》總導演蘇萬聰記得，兩年前收到王維基的挖角電話開出條件：「你嚟到，可以揀自己演員編劇班底、題材任你做。」蘇萬聰在無綫由低做起做足廿年，拍過《刑事偵緝檔案》、《歲月風雲》、《富貴門》等師奶最愛劇集。他每日大喊「開麥拉」的地方其實是間工廠，所謂拍戲，演員選角要視乎珍姐和樂小姐捧邊位阿哥阿姐、劇本又要有收視保證啱師奶口味、更加做到無停手日日開兩組「飛紙仔」趕工。創作？果真如夢一般觸不可及。見完王維基，蘇萬聰不禁問自己：「再喺舊世界做落去又點？」

王維基給他開更高人工（但不願透露王老闆有幾闊綽）更多自由，蘇萬聰決定搏一鋪。點知返新工無耐，王老闆劈頭就對住佢話：「你有廿年經驗又點？如果你唔變，就係負累和包袱。」蘇萬聰即感到陣陣由上而下的壓力。究竟要點變？王老闆開員工大會，叫大家學習美國電視劇拍攝手法，兼又再發揮他「食腦借橋」本色話要買美劇劇本，激起蘇萬聰和一班創作人群起反對，認為唔尊重本土創作，向來寸嘴的王維基，對住一班性格巨星都要舉手投降。但王老闆個性改不了，他要落場睇拍劇，有導演狠心對王老闆say no，蘇萬聰無所謂由他看，結果王維基在片場大叫：「我唔要見到穿崩唔連戲、我唔要劇情無真實感、我一定要你哋盡快拍完交貨。」蘇萬聰暗暗叫救命之際，王老闆又叫蘇萬聰給他看《警界線》的毛片（即未剪輯片段），蘇萬聰又由他看，點知王維基唔識睇睇唔明即發惡大罵他拍得差，蘇萬聰被谷得有氣無定抖。

著agnes b孭Haglofs

《警界線》剪輯好後，王維基再睇片，今次態度一百八十度轉變大讚，然後對蘇萬聰話：「你估我真係信你？我信成績，套戲出街就知輸贏。嗱，你可以唔聽我講，當正自己係杜琪峯話乜都得，但輸咗就入你數。」「王維基成日要變，跟住佢，有好大自由度。」蘇萬聰最記得，有次王老闆話自己想學編劇，叫同事開會傾古仔時俾佢坐入去。「點知班編劇因為唔想大老闆在場有壓力，聯手反抗。然後，我見到佢一個人好謝咁坐喺度，仲問我：『點解佢哋唔肯俾我坐入去？』」「那一刻，我覺得，平日聲大大的王老闆，其實係個幾可愛的凡人。」「我聽聞佢以前管班Sales，又爆粗又飛快勞，剷人完全無面俾。有人話，佢而家謙厚咗好多。」「對住我哋，王維基成個人，都在變。」王維基依然係著西裝、戴Prada粗框黑眼鏡、有司機駕着凌志LS 600載他返工的王老闆，但對住班電視創作人，他現在會著agnes b T恤戴cap帽、又會孭Haglofs背囊，比三十五歲戴金絲眼鏡時更年輕自然。蘇萬聰說，他喜歡替王老闆打工的另一個原因，係唔使日日食燒味飯：「他下令公司的廚師，日日要煮三餸一湯給我們，又規定多菜少肉，外景隨傳隨到。」王維基連手下食乜都要變，魔童，就係咁。

「香港仔」之路

1979年17歲中學畢業，與2名同學在旺角奶路臣街開設補習社「學聯教育中心」，一個暑假賺$4萬

1980﹣85年大學時做「水貨書」生意，替同學訂較平的台灣版書賺取差額。做學生會時又引入新浪潮電影放映會，替學生會賺錢

1985﹣89年任職IBM電腦公司，3年後成為金牌銷售員，27歲年薪過百萬元

1989年六四後移民加拿大多倫多，在跳蚤市場賣女裝睡衣，但失敗結業

1990﹣92年創辦ADI System公司售賣個人電腦

1991年與表哥張子建創辦城市電訊，提供長途電話服務

1992年回流香港，成立城市電訊（香港）有限公司（簡稱城電），經營廉價回撥長途電話業務

1993-98年自由黨創黨黨員，98年退黨。同年打算角逐立法會資訊科技界議員，因加國國籍不能參選，目前仍持有加拿大護照

1997年城電於香港聯合交易所掛牌，35歲的王維基（中）出任上市公司主席，得「魔童」稱號

1999年成立香港寬頻；城電在美國納斯達克上市，集資淨額約$4.12億，盈科數碼動力認購已擴大股本約8%股權

2008年出任亞洲電視行政總裁，揚言「亞視不做中央台」，但上任12天便被辭退，後來戲劇性地轉任亞視顧問

2008-13年浙江省政協委員

2009年城電向廣管局申請免費電視牌照

2011年8月城電租用將軍澳工業邨一幅地皮，預計斥資$6億興建樓面面積30萬平方呎的多媒體創作中心搞電視

2012年4月王維基持有的城電宣布，以$48.7億將香港寬頻及所有電訊業務售予美國私募基金CVC Capital Partners，城電獲淨利潤$37億

2012年12月王維基率領188名藝員宣布將新電視台取名為「香港電視」，城電亦改名為「香港電視網絡有限公司」（簡稱港視）

2013年10月15日港視不獲政府發免費電視牌照，觸發大批市民連日在政總集會及上街抗議

2013年12月20日王維基絕地反擊，宣布斥資$1.57億收購國企龍頭中移動旗下子公司，發展流動電視和網絡電視，明年7月1日啟播。港視曾因不獲發牌而股價插水。復活後，香港電視在美國的股價由拒發牌翌日的US$4.98升至上週五US$6.62；在港股價由$2.03升至$2.32，港視現時市值$18億

後記魔童的秘密

王維基的故事，欠了一個重要人物——他的太太。九三年他回流創辦城市電訊時接受《翡翠周刊》訪問，提及其妻會陪他香港加拿大兩邊飛，體會到成功人士背後有個女人的重要。此後他的訪問都鮮有提及妻子。記者想知王維基的愛情故事，但魔童公關只回覆一句：「對不起，王先生不想談私人事。」記者唯有從公開資料入手。九○年，王維基從加拿大回港結婚，妻子原來叫唐靄玲，比他小五歲，結婚時是行政秘書。唐靄玲（Helen）現在是IT人，主理Domain Extremes Inc.（DNME）旗下網站「香江食評」。DNME ○六年在美國成立，業務是開發營運互聯網站和手機應用程式，顧客集中在香港和大中華區，旗下兩個網站圍繞吃喝玩樂，其中唐靄玲的「香江食評」專點評香港特色餐廳。唐靄玲畢業於九龍塘德雅中學，曾是風紀隊長（Head Prefect），現為母校舊生會主席。她去年競選校董會的政綱，沒有提及丈夫是王維基，也沒有提到香港電視，只說自己有份創辦一間上市公司。記者曾經到唐靄玲的公司但找不到她，於是拿着她政綱上的照片向王維基公關求證。今次的答案係：「對，這是王太，但王生問，可唔可以唔出？」王生，《壹週刊》同你一樣都搏到盡，而記者其實仲有好多嘢想問。

香港電視落實以流動電視形式7.1開台後，主席王維基繼續向外招兵買馬，鎖定搵吳鎮宇拍鄧萃雯開寫實劇外，再進一步向無綫小生花旦埋手。去年一直採取拖字訣，唔肯再加簽長約的黃宗澤成為頭號挖角目標，據了解王維基開出無綫八倍酬勞等黃宗澤離巢。鬥命長

香港電視不獲發免費牌照，無綫以為坐定粒六，豈料王維基死唔去，宣布成功收購中移動旗下的流動電視牌照，以大氣電波及網絡雙線廣播先行開台，吊住命等一五年免費電視牌照再洗牌。

有了生存空間，王維基再次啟動挖角潮。如意算盤是搶走將約滿的陳豪，但有指經理人陳嘉莉決定留低無綫，陳豪、楊怡離巢自組公司計劃出現變數，王維基於是再出招，為搶人成功，即使目標小生花旦仍有合約在身，一樣有得傾，當中包括和無綫仍有兩年約的黃宗澤。

「唔理同無綫仲有幾長約，王維基都好落力去傾，仲講明港視可以等，反正呢場係持久戰，有排打！」知情者說。

八倍價錢

眼見同期出道的陳鍵鋒在內地狂賺人仔，黃宗澤對無綫根本再無留戀，只等約滿走人，即使去年公司一直想他再加簽年期，黃宗澤亦想盡方法，避開樂易玲。「無綫知同Bosco嘅合約年期唔長，一年前已不停叫佢加簽多五年，搞到佢唔敢聽樂小姐電話，有時仲驚唔小心撞到，專登兜路行。港視嗰邊好積極，就算目標未約滿，同樣有得傾。王維基知Bosco剩番兩年約，所以講明可以等，仲開到好高價錢，一集嘅錢係而家無綫八倍，工作時間每日亦唔會多過八個鐘。」黃宗澤身邊人說。

避開前度

黃宗澤唔想留低，另一原因是與前度胡杏兒有關。「Bosco同杏兒分手已經做唔番朋友，之前台慶節目巡禮佢哋喺化妝間各據一方，Bosco黐實Niki（周麗淇）玩手機，氣氛好尷尬；杏兒亦講到明唔想同前度再合作，Bosco咪一樣！」知情者說。

招兵買馬

香港電視落實七月一日正式開台後，重整旗鼓繼續招兵買馬，王維基重生令不少對無綫心淡的藝員重新燃起希望，密斟過檔。鄧萃雯與無綫關係鬧僵的鄧萃雯是港視目標之一，有指雯女要求不拍古裝劇；為表誠意，港視搵專人為她度身寫劇本，開寫實劇。

吳鎮宇去年吳鎮宇俾面出席《萬千星輝頒獎禮》，偏偏連豬肉獎都無，被無綫玩爆的他直認有興趣喺其他平台包括港視同觀眾見面。

陳慧珊王維基落實開拍類似《陀槍師姐》題材的新劇，目標人選是離開無綫的花旦；包括早前已經和港視傾約的陳慧珊，條件是四萬蚊一集，還要跟學校假期方便湊女。