📖 ZKIZ Archives

李華倫，是擁有魔鬼上市編號（666）的禹銘前主席馮永祥及前董事總經理馮耀輝的「首徒」；自「馮兩老」辭職搞環保後，便由他接棒出任禹銘主席。

禹銘曾提出的每股一仙收購疊水上市公司、向經紀送佣金力谷私有化，及將上市公司自願清盤等種種奇招，都是由他想出來；金融界給他起了一個稱號——股壇壞孩子。

對此李華倫反駁：「蝙蝠俠都不是蝙蝠，蜘蛛俠都不是蜘蛛，所以股壇壞孩子，都不一定是壞的！」

對於那些「鑽空子」想出來的絕橋，他解釋說：「無人鑽空子，監管機構又點發現條例有漏洞，社會又點有進步！」

九九年壹傳媒由禹銘籌備上市時，孩子臉的李華倫只是跟在馮永祥及馮耀輝身後，傳遞文件，執頭執尾，並向員工講解股份分配事宜，未想到九年後他已上位成為股壇響噹噹的禹銘集團主席。

所謂「強將手下無弱兵」，在禹銘，身為股壇元老馮景禧兒子、擁有龐大富豪網絡的馮永祥，負責找尋客路，而負責落實執行的馮耀輝，就最愛「下放權力」讓徒弟度橋。

李華倫在九二年加入新鴻基證券後，直接跟隨馮耀輝專責收購融資，其後馮耀輝與馮永祥在九七年成立禹銘，李華倫跟隨過檔，直至去年雙馮離開禹銘為止，這師徒關係長達十七年。

Why and why not

說起李華倫，馮耀輝笑言這徒弟跟隨他多年，已潛移默化，學到其九成精髓：「佢最學到我孤寒、尋根究底及鍾意挑戰現狀嘅精神……哈哈！孤寒當然唔係好啦，佢學嘢學得全面……」

「講 真我有好多徒弟，佢算係首徒，亦係我『開門封門』弟子。我咁多年最主要教佢兩句：why and why not。咁就打天下o架啦！點解我哋要食飯？點解我哋唔食薯仔？點解要用電？點解唔用空氣？哈哈，why可以尋根究底，why not就可以刺激創意。」馮耀輝一派廣告口吻說道。

李華倫盡得師傅真傳，將「why and why not」發揮得最淋漓盡致，要算是○二年提出的一連串一仙收購。當年禹銘提出以每股一仙，收購上市公司太平洋興業，創下股壇創舉。

禹銘投資開業時星光熠熠，到賀者包括長實主席李嘉誠（左四）、新世界主席鄭裕彤（右四）、董事總經理鄭家純（左二）及澳博行政總裁蘇樹輝（右一）等。右三為馮永祥，左三為馮耀輝，當時李華倫（左一）已能上台「靠邊站」。

首創一仙收購

「當 時我知道太興大股東蔣麗莉要賣盤，並與第二大股東、挪威的投資公司Kistefos不和，於是我哋主動聯絡Kistefos，希望教路如何阻止對方賣盤。 遇到呢啲情況，當時市場用開兩招。第一招是出injunction（禁制令），但有效期只一、兩日，法官可以唔批，對家亦可以上訴，而且成本要四、五百萬 元，實在太貴。第二招，是要求召開股東會撤換董事局，但董事局亦可以反出招拖延，一搞就四、五個月。我就諗到第三招。」

李華倫想到要在短時間內實行又合乎經濟效益的，是由禹銘啟動收購，「一提出收購，證監會就會『目及』住，公司管理層就要煞停想做嘅嘢。而收購條例中又有一個漏洞，就係無為收購價設限，所以我就想到以每股一仙進行收購。」他還笑言：「零點零一仙都得o架，論盡啲啫！」

他 將這條橋「sell」給馮耀輝，馮即時拍板：「Why not？有無犯法先？有無錢賺先？係咪一單好生意先？得就做啦！」結果橋推出後令市場譁然。雖然失敗告終，但引得另一上市公司中巴的股東要求禹銘代為「出 招」，此後這招用於另外兩、三間上市公司，但都失敗告終。李華倫坦言其中最大漏洞是：「小股東唔配合，例如怕醜、怕得罪人、怕麻煩，最後都係會唔夠票通 過。」

李華倫檔案

86年：畢業於英國The University of East Anglia，並取得理學學士學位。

88年：取得倫敦The City University Business School理學碩士學位

88-92年：香港荷蘭銀行任職

92-97年：新鴻基國際任職，跟隨馮耀輝

97年：馮永祥及馮耀輝成立禹銘，李華倫跟隨過檔。

04年：升任禹銘董事。

09年3月：升任禹銘主席，為免與馮兩老的私人公司禹銘投資混淆，禹銘改名為新工投資。

夥拍光頭神探

不 過這條「一仙收購」絕橋，卻奠定了禹銘的「魔王」地位。李華倫說，若非雙馮不是如此開通，也不能將這些鬼主意推行。現時馮耀輝離開禹銘，李華倫與他仍有聯 絡，其快意節能亦是聘請禹銘為財務顧問。李華倫亦不忘在訪問中硬銷快意節能「勁到爆」！而「股壇」金句王馮耀輝，亦教曉李華倫不少道理。李華倫說：「好多 我而家教下屬嘅嘢，都係跟佢學嘅！例如『think out of the box'、『Don't put no for an answer'等等。記得九三年要做中國糧油注二十億資產入世貿中心集團嘅收購，牽涉金額歷來最大，第一次開會有律師會計師等二十幾人，馮耀輝敲門入來後 劈頭第一句就說：『今次係呢單deal最後一次咁多人！』佢認為多人就無效率。而馮生要我哋寫報告，亦唔可以多過三張紙，因為好的idea一個就夠，否則 『it's not worth the paper you are written on!』」

這種「less is more」的作風亦見諸禹銘的公司架構上，這間市值六億的上市公司，負責股票及企業融資的部門只有六人。公司業務主要投資環球上市證券及對沖基金等，有時為其他上市公司任財務顧問時，偶有佳作。

○ 五年，上市公司南太集團主席顧明均，想將上市不足一年半的南太電子私有化，身為財務顧問的李華倫又創新猷。他破天荒向經紀提出，一旦遊說客戶交表接納私有 化，而最後私有化成功的話，可獲百分之一佣金。「咁多年來，我覺得呢個最有創意。但當經紀獲『鼓勵』，替啲揸重貨嘅股東去投票，私有化成功嘅機會，又會大 大提高嘞。」而證監會關心的，是經紀會否非法回佣給小股東，李華倫說，最後解決辦法非常簡單：「經紀喺份表格度，白紙黑字交代唔會俾回佣股東，咁就過關 了。」

對著李華倫，相信證監會只有無奈，但他說雙方都有得著：「同監管機構招來招往的過程，我對收購的認知，深入咗好多，而證監又會知條例有咩漏洞，就好似打仗咁，唔係真打，點知啲子彈係點射出來嘅？出招試嚇，證監、大股東，同小股東，都會有好處。」

自動清盤再闖關

這 次南太私有化，因出價低而不成功，但就令李華倫與「做事有自己一套」的南太主席顧明均關係更密切，李其後更離開禹銘，到南太母公司出任行政總裁。直至去年 雙馮離開禹銘，身為大股東的李明治家族入主，並拉李華倫於今年三月回禹銘出任主席。李華倫回巢後的第一擊，就是創出「自動清盤」。

今年二月 初，南太電子曾提出以每股一元五角私有化，最終因接納股數不足九成而告吹，理應一年內不能再提私有化。但李華倫想出將公司自願清盤，再由母公司買回資產， 這就不算私有化；而根據公司法，只要七成半以上的股東投贊成票，便可通過議決。李華倫解釋：「當時提私有化後，因股東、股票經紀及中央結算間出現溝通問 題，導致部分接受私有化的小股東未能投票。我哋想申請延期，但證監會唔批。當時要再做一次私有化要等十二個月，到時又要證監批准，所以即時要諗橋。」此招 令證監會發火，公開譴責顧明均，但同時破例批准讓南太即時再提私有化。顧開心得請傳媒飲紅酒，李華倫笑言：「其實我仲有另一條橋，但要賣錢的，所以唔講 得！」

來自警察家庭

鬼主意多多的李華倫，今年四十五歲，父親是已故總督察李汝賢，母親亦常活躍警界，李華倫說母親常對他說： 「你不用做美國總統，但千祈不要做刺殺美國總統嗰個。」李小時候曾轉校十三次，喇沙小學、新法書院及利瑪竇都有他的腳印，成績每況愈下，而且只愛踢波，曾 兩次踢斷腳，最後被送到英國唸書。「當時原本修讀電腦，但有感出來後最叻也只是做到電腦部主管，後來他修讀金融碩士，再轉到荷蘭銀行由見習生開始做起。」 李華倫自認有不眠不休，隨時作戰的能力；其後出任主管的梁蔚賢退休，將李華倫介紹予好友馮耀輝。「佢肯介紹我，因為我做事一向要求自己超越老細對我嘅期 望，要令人覺得『你喺度做，嘥咗你呀』！」有現時成就，李華倫說在此要多謝這兩位恩師：「唔係咁多人會咁做，因為講咗多謝，對方就可以要求回報，you have to pay for it！但我覺得呢啲先係人生應有態度。」他說馮耀輝還教他：「千祈唔好信律師及會計師！」不過李華倫的太太正是律師，兩人結識已二十五年，結婚十三年，有 一子一女；雖然做人做事都沿用師傅的教誨，但似乎李華倫其實也有自己的一套。

而家日日都有專家出來估樓市走勢，小宗搵來真正投資老手馮耀輝（Peter Fung）問吓，估唔到佢好決斷咁話：「冧！冧硬呀！」他預測樓價必大冧，而且起碼五成以上，主要因為美國加息。他並以「單車」比喻樓市，「而家個市叫呆滯，好似一架單車唔踩、停咗喺度，但單車係一定要向前或向後，否則停得耐都會冧低。」他認為現時的投資策略，是儲足資金，等大跌市時掃平貨。

數吓馮耀輝啲威水史，佢拍檔馮永祥（Tony Fung），喺九七年金融風暴前，高價賣走新鴻基證券，兩人合組禹銘，再喺○八年金融海嘯前賣走禹銘，只留下旺角中心、銀城廣場等地產項目。○九年佢同小宗講：「升！樓市升硬呀！」呢幾年樓價真係「巴巴」聲咁升，「馮兩老」隨之將大部分物業善價而沽，現時預留現金準備大跌市。馮耀輝對樓市辣招亦有意見，佢認為香港係自由市場，尤其金融，係「管不得」，「『設』辣招容易，但『撤』辣招就好難。到樓市冧先撤，只會冧多幾錢重。我認為金管局，亦唔應該對樓市有咁多措施同意見。」馮耀輝對政經時局牢騷多多，但要佢積極參與就耍手擰頭，寧願「隱身」投資，他打趣說：「哈，我最想俾政府嘅意見，係納妾合法化，我會拉埋老婆一齊支持！」

Give me a break直擊Social networking

晨早六點，當條街仲係小貓三兩隻嘅時候，斷估唔到油麻地城景國際酒店宴會廳入面，已經成個墟咁。個個化晒靚妝、著好西裝，拎住杯茶四圍social。在場者目的只有一個：識最多嘅人。呢個香港BNI（Business Network International）活動嘅負責人張國恩（Alex）話，與會者來自五湖四海：醫生、律師、會計、以至氣功師傅、臘腸店老闆、殯儀佬等等都有。每次聚會，會員都會有三十秒賣廣告兼「求助」。小宗呢日一早起身要聽五十幾人輪流發言，咪話唔眼瞓；會員為加深大家印象，奇招盡出，律師、醫生「舉牌」已係小兒科、做孕婦護理嘅帶埋假B上陣、攝影師出動巨相宣傳，有啲會員仲夾埋其他人一齊嗌口號。有旅行社老細拿起咪，即一輪嘴說：「去泰國，住四星酒店都係$1599，想要愉快假期，快啲搵我！」小宗開宗明義，話要搵「一盤生意」，手頭收咗幾十張卡片，當中有傢俬店老闆、晝廊負責人等等，有無用未知。出席呢個早餐會，盛惠一百八十元；想長期出席，入會費連首年會員費盛惠八千大元，相當揦脷。坊間仲有EGN（Executive Global Network）及香港天使投資脈絡等組織，前者模式同BNI相似，後者則透過座談會識人及搵投資者，個人會員一年會費千六元，另有其他要求。要識人建立網絡，最緊要目標為本！

橋唔怕舊最緊要受

上禮拜太子鉅龍酒家嘅老闆吳伯恩（恩記），放生咗隻玳瑁，引來全城哄動，仲上埋報紙頭版。上報嗰幾日，鉅龍日日有人圍觀，生意因為咁仲多到爆添！恩記夫婦向小宗回憶起玳瑁之來歷，當日一個手指緄晒黑邊、狀似地盤佬嘅人帶來玳瑁，要求劏咗來食，恩記話佢一向唔劏「龜」，故要求買落來放生。跟手，仲打埋去報館報料添！放生，一向是恩記「搶鏡」的招數；有「龍躉大王」之稱嘅佢，早年不斷放生巨型龍躉做善事，見過唔少報，宣傳效用之大，可謂一舉兩得。呢條橋，循環再用，用到佢由劏龍躉變咗全港最大海鮮批發商之一、用到佢喺太子開酒樓，喺上環開分店、最近佢哋仲購入荔枝角兩個鋪面，再開多間分店！此為「橋唔怕舊，最緊要受」嘅最佳明證！

本週金句王

有日小宗上大律師陸偉雄之辦公室，赫見這個由陸大狀門徒送予師傅的卷軸。睇睇，原來陸大狀平時講嘢，「字字珠璣」，年輕人想牙尖嘴利，學嘢啦！

金牙大狀講嘢新盤買家唔俾面

金管局攞命陳同埋財爺鬍鬚曾雙雙發警號，話花旗開始退市，資金遲早外流，打擊資產市場，樓市不難因此「下行」咁講。誰不知班買家唔俾面，上個週末兩個新盤異常熱賣。何也？一個可能性，班買家係非洲爵士烏蛇蛇，唔似得兩大官人咁高瞻遠矚，佢哋唔識得乜嘢叫退市，更加唔知資金外流會有乜後果；佢哋淨係見到樓價抵買，本於一貫執輸行頭慘過敗家嘅香港精神，紛紛入市。另一個可能性，係佢哋同所有香港人一樣咁消息靈通，知道乜嘢叫退市，明白資金外流嘅後果，但佢哋更加睇到樓市貨疏，再唔落疊則蘇州過後冇船搭矣。實情係乜，冇人知。但二手樓基本上零成交，即係未有人肯劈價。若果個樓市真係似得兩大官人言之鑿鑿會「下行」，你估啲人會唔會咁老定啦？

無風不起浪，要搵錢不單是大隻的對沖基金猛寫報告，聲線微弱的小股東亦開始蒲出來維權。從事裝修及翻新工程的創業板股仔艾碩控股（8341），其幾個小股東竟罕有地召開記者會，指公司業績走樣，要求撤換所有董事。坐在他們身旁的，是幫手打仗的「股壇壞孩子」、禹銘投資董事總經理李華倫（Warren Lee）。李華倫接受《壹週刊》訪問時笑言：「通常主動搵我都係衝動消費，我收得唔平，但保證物超所值！」

李華倫代表作，遠的有一仙收購、迫使中巴（26）派八億元特別股息，近的亦有為翠華（1314）、聖馬丁國際（482）、及丹楓（271）對手做財務顧問，通通都有打交場面。今場最新的戰役，按股數勝算幾近零，但李華倫的葫蘆裡，其實賣緊幾種藥。

最近無論外國還是內地的沽空機構，都游來香港搵食。既有「葛咸城」打殘瑞聲科技（2018），又有「烽火研究」狙擊科通芯城（400），加上本地薑如「亞皆老街基金」搞㷫中巴（26）、丹楓（271），要搵錢就要主動出手，攻其不備。艾碩一批小股東，亦深明此理。

「禹銘咁出名，我哋點會唔識搵佢幫手。過去九個月，艾碩收益真係慘不忍睹呀！」艾碩小股東曾憲海，對《壹週刊》記者無奈地說。配售上市不足半年的艾碩，在二月公布第三季業績，九個月虧損約八百三十萬元，收益按年減少三成四，毛利更大跌達四成四，而且無披露毛利跌幅超過收益跌幅的原因。曾憲海及另一小股東陳癸波等共五人，輾轉間相識並得知大家共持逾一成股權，決定召開股東會，要求撤換七名董事︰「作為小股東，我哋愈來愈擔心公司營運。我哋唔係要做正義先鋒，只係希望透過召開股東大會，引起其他小股東關注公司營運，亦令公司更加了解小股東對公司的憂慮。」

這五名小股東都是專業投資者，當中曾憲海及陳癸波有超過二十年投資經驗，各自持數隻創業板股仔，亦有投資藍籌股、物業。因為艾碩有政府工程，業務吸引，且價錢唔貴，故以配售價0.84元認購艾碩，上市後股價曾高見5.02元，較配售價升接近五倍。即使現時股價回落至2.6元，但他們賬面仍賺兩倍，請得起李華倫出手有餘。食埋創業板轉主板這條水，屆時又較易出貨，相信是他們忍手不沽的主要原因。

不滿通函內容

李華倫收到柯打，熟悉條例的他，想到這一條「行使股東權利」，要求撤換所有董事。當艾碩收到此書面提議後，亦作出「反擊」。公司於上月二十四日發出通函指，是五名小股東拒絕與管理層見面，只安排禹銘與公司顧問會晤，公司並已經申請將股票停牌，疑似「阻嚇」他們表達意見。李華倫理解為何公司感到他們有敵意，但他不滿意該十二頁的通函、只有半頁呼籲股東不要罷免董事︰「其實都無解釋點樣不利公司發展，應該花多少少篇幅去解釋，咩人離開會對公司有害，通函對股東才有用。淨係得一面話你反對，因為有害，我覺得唔夠。」至於小股東拒絕直接與公司會面，李華倫解釋，是防範與管理層單獨會面會構成內幕消息交易，小股東便不能買賣股份。而且小股東希望不單止他們，而是所有小股東都能聽到公司解釋業績倒退的原因。

開股東會如飲茶

只佔一成股份的小股東，顯然勝算不大，但今次開股東會，李華倫另有收穫。艾碩公司通函提到，第一大股東陳少忠反對小股東的提議，但第二大股東、持有36.75%股權的廖掌乾，拒絕表明其投票意向︰「之前完全唔知大股東同第二大股東可能不是完全一致，現時是否一致都未知，要舉手當日才知道。」屆時每項章程議決的支持及反對票數，將成為他們行下一步棋的「大數據」。小股東陳癸波認為，今次未投票「已經贏咗」，因為已帶出小股東對股東權利的關注。李華倫解釋，今次行動有更高層面的意義，希望藉此改變市場風氣︰「如果市場接受了要求開會好似約你見面咁、好似飲茶咁，好平凡，小股東要求開會就開會，甚至大家可以傾哪裡開、通函書仔要不要顏色等，很友善開個會，大家變了有互動。若做到這效果，對香港資本市場有很大基本上的改變，股東跟管理層關係也會更好。」

識英雄重英雄

過去李華倫有「股壇壞孩子」、「證監煞星」的稱號，最鍾意打交，例如為翠華（1314）股東不和引發的全面收購、為聖馬丁國際（482）處理證監會查詢及為盈德（2168）抵抗敵意收購等等。他笑言：「來搵得我的，都係好implusive（衝動），而且打交要短時間作決定，唔似IPO慢慢磨。呢啲打交我最鍾意，我收得唔平o架，而且無得分期付款，但保證物超所值。」在訪問中他罕有盛讚證監會最近做得好，尤其是去年才上任、曾任職加拿大法規執行部的香港證監會法規執行部執行董事魏建新（Thomas Atkinson），認為近期證監會在對付老千股上有進步；最近發出的執法通訊（Enforcement Reporter）也提到，將重點打擊上市公司做假交易、及是否胡亂發新股等等。李華倫認為可令市場對細股恢復信心︰「以前有很多公司，市值很低、很抵買，你未必夠膽買，因為我一買，明天又一供十、大折讓供股。點抵，都愈來愈唔抵。但依家證監會出咗預告︰『邊個亂來，我會睇住，甚至唔俾你做！有人會保護小股東！』」對李華倫來說，也會發掘到另一條財路吧！

撰文：黃嘉慧攝影、攝錄：關永浩、林金展[email protected]