2010-9-30 NM
人流如鯽的旺角登打士街,租金高昂,向來是街頭小食店的「木人巷」,搶客求存的生死戰天天上演。用「死過翻生」來形容今集兩位主角,最貼切不過。首先是風靡一時的愛爾蘭瘋薯,短短一年,由月賺二十萬急插至蝕錢,老闆余家榮急急節流劈價,才保住命仔。其次是在銅鑼灣開業不到一年,主打吉列小食的嵐山料理,原月賺三萬多元好過打工,卻遭裝修公司拖累而執笠。
終於,今年七月,嵐山進駐瘋薯,展開「同居」生活。兩個老闆陣前聯手,互相借力,誓要在這條「木人巷」殺出一條生路。
上週三下午五點,旺角登打士街人頭湧湧,不時出現人車爭路的驚險場面。位於街道中段,開業兩年的愛爾蘭瘋薯,店外聚集十數人,或排隊等下單,或等候領取食物。這時,收銀員高叫:「五百號,取蜜糖芥辣薯條同嵐山芝士。」你沒聽錯,細心留意店名已換上「嵐山料理@Ireland's Potato」,櫃面上的餐牌燈箱,亦加入炸蠔及炸軟殼蟹等食物,而側面領取食物的吧枱上,則寫着嵐山料理。
一鋪兩棲,在登打士街可謂絕無僅有。原在銅鑼灣開業、主打日式吉列小食的嵐山料理,今年七月進駐瘋薯鋪位。老闆阿嵐將每月營業額的二成,交予瘋薯老闆阿 Wing作為租金,展開「同居」生活。聯手出擊,過去兩個月已初見成效。瘋薯生意沒有被搶,更淨袋二、三萬元分紅,分擔高昂的租金,嵐山營業額更勝銅鑼灣舊店。新生得來不易,不如先由兩位老闆親述各自「死過翻生」的驚險歷程。
主角1瘋薯老闆余家榮
我叫阿Wing,三十五歲。○八年,我和朋友用六位數向台灣的愛爾蘭瘋薯買下港澳代理權,同年七月在銅鑼灣開鋪,豪擲三十萬做宣傳,結果一炮而紅,日賣六百至一千杯。趁熱打鐵,半年內連開兩分店,包括在登打士街插旗。香港人貪新鮮,瘋薯以蘸上芝士、肉醬等十多款醬汁的新吃法作招徠,一到旺角就成為新寵。一杯二百五十克的薯條賣逾三十元,仍日賣過千杯,每月盈利二十萬,所以即使鋪租要八萬二,都覺值得。
可惜,熱潮來得快去得快,去年夏天,生意額急降至高峰期的三成,不但沒錢賺更要每個月蝕三萬元。蜜月期那麼短,一時很難接受,無奈已簽下四年代理權,以及三年租約,八萬二的租金要硬食,惟有收拾心情諗計救亡。
節流劈價保命
最初只在服務質素下藥,制定極之詳盡的守則,培訓員工主動出擊,如見到有客人在店鋪外四圍望,或者忽然轉頭看,都要有不同的反應,更拍埋短片做示範。半年後,生意額仍無起色,至冬天小食旺季,都只是收支平衡。於是我出馬訪問客人,發現在這條街生存,服務再好也沒用,最實在還是價錢。
要減價先要節流。薯條及醬汁入貨商因代理合約所限,不能改。我便將用支票逐星期找數的薯條,改為日日以現金清數,說服供應商減價一成,而裝薯條的紙杯原由台灣入口,一個要五毫,現在內地訂造,一次過訂十萬個,成本減至三毫。最後是用鮮果及糖漿打成的飲品,改成用濃縮果醬沖製,每次入貨一百箱,可便宜兩成,令成本由每杯六元減至三元。
尚未度好減價幅度,隔籬的小食店hot.com今年四月開始賣薯條,每份十元,搶走不少生意,唯有「焗」上馬,即時劈價至十元。薯條分量減至一百七十克,飲品由十八元減至十五元,跟餐只要八元。幸好節流工夫收效,毛利只略跌一成至六成幾。
吃過一輪驚風散,盈利總算翻生,回升至高峰期的一半,即九萬元。我上了寶貴一課,更加明白要在登打士街生存,鬥平之外,亦要保持客人的新鮮感。今年五月,嵐山料理的阿楠主動找上門傾合作,不但可為瘋薯注入新意,更可分擔昂貴租金,應付一年後續租時的加租危機。在知會過台灣總公司後,合併大計立刻上馬。
主角2嵐山老闆方偉楠
我叫阿楠,二十九歲。年幾前,我和同是廚師出身的拍檔合作學做生意,投資二十萬在銅鑼灣中央圖書館旁開設街頭小食店嵐山料理。
我們曾在日本餐廳打工,覺得香港人鍾意日本菜,而日式炸物在街頭又較少見,就以西式材料結合日式做法,如炸芝士、炸生蠔及炸鵝肝等,配以黑加侖子汁、威士忌醬、他他汁等,由食物到醬汁全部自家製作,希望藉新鮮感突圍。由於食材較貴,炸物售價平均要二十元以上,為留住客人,鋪頭每星期推出二至三款新產品,保持超過二十款食品。開業初期十分順利,每日賣出過百盒,扣除我和拍檔共萬五元人工,仍賺兩萬元,更有傳媒走來採訪。
正想大展拳腳之際,卻被裝修公司拖累。開業時,找間一條龍包裝修及拿牌的公司,我和拍檔沒創業經驗,不懂要簽合約,結果該公司不但遲了兩星期完工,還因工程未達標,只申請到半年的臨時食牌。今年四月,眼見食牌就快到期,多次催促下,裝修公司採「拖字訣」,最後更申請破產。惟有忍痛和業主協商,一年租約未完就要提前結業。
吸收教訓後,我更加自信,一心想到人流更旺的地區另起灶台。但來到旺角才發現,沒八、九萬租金都難插旗,風險太大,便開始考慮分租或寄賣。一眼便相中瘋薯,我賣炸物與他賣薯條,都是油炸食物,一起也不會突兀。馬上託朋友介紹,再拿着自己設計的餐牌,飲食網站「開飯喇」的食評及雜誌的報導去找阿Wing,他睇中我嘅食物夠多元化兼全部自家製作夠獨特,隨即開始討論鋪位布局細節,我亦讓步,嵐山的招牌擺在側門,但餐牌就可佔據正面燈箱,合併正式實行。
新店誕生:聯手出擊求存
瘋薯和嵐山花了兩個月來籌備合併,採用「同住但分家」的原則,從出單開始,就分開計算各自的營業額。阿Wing參考瘋薯其他分店在百佳寄賣的抽佣形式,每月收取嵐山營業額的兩成為鋪租。「嵐山嘅招牌喺巷仔內,間鋪始終俾人覺得係賣薯條的。」忙着接單分單的阿嵐,雖表示兩成抽佣公平,但語氣仍透出幾分「酸味」。瘋薯騰空了一個雪櫃予嵐山,阿楠只須添置兩個新炸爐,及聘請三名員工,已可開業,同時可借用瘋薯位於銅鑼灣總統戲院附近的貨倉來調製食材。
槍口對外共同進退
為配合瘋薯的減價戰,嵐山亦將食物減價逾兩成,如最好賣的炸芝士及炸生蠔,每份分別從二十二元和二十五元減到十八元和十九元。此外,兩店合作推出特價套餐,一份瘋薯搭配一客吉列手指魚或吉列豬扒,原價二十五元,套餐價二十元。「毛利跌咗一成至六成左右,同瘋薯一樣,但根據阿Wing嘅經驗,價錢太高冇辦法喺呢條街生存。」阿嵐表示。至於怕不怕引狼入室反被搶客,站在一旁的阿Wing一派淡定地道:「兩邊食物同價位都定位唔同,佢哋嘅餐都會搭幾條粗薯條,只要賣相同瘋薯有區別,影響亦不大。」
過去兩個月,合併一招初見成效。「呢區人流夠旺,比起以前喺銅鑼灣,營業額增加咗近四成,盈利亦多咗逾萬元。」阿嵐表示。至於瘋薯,營業額維持平穩,每月更淨袋嵐山兩成營業額,上月約兩萬六千元,盈利由九萬升至十一萬六千元。不過,阿Wing表示加租壓力龐大。「租約兩年死一年生,今個月滿兩年時,業主已加盡了之前協議的一成二上限,據聞下年續約要加到十一萬。」阿Wing說。最近,廚師出身的阿嵐提出推出吉列漢堡包,阿Wing就建議搭配瘋薯的不同醬汁,希望集合二人力量,繼續為店鋪注入新鮮感。「撐得幾耐得幾耐。」阿Wing說。
瘋薯(旺角店)
開業資料(08年9月)
租金* $328,000
裝修 $300,000
工具 $100,000
入貨 $100,000
雜費 $50,000
總投資△ $878,000
*3個月按金1個月上期
△不包代理費
營業資料(10年8月)
營業額 $380,000
嵐山分紅 $26,000
租金 $82,000
人工 $55,000
入貨 $133,000
雜費 $20,000
盈利 $116,000
嵐山料理
開業資料(10年7月)
裝修 $5,000
工具 $5,000
人工 $28,000
入貨 $25,000
雜費 $3,000
總投資 $66,000
營業資料(10年8月)
營業額 $130,000
人工 $28,000
入貨 $48,000
瘋薯抽佣 $26,000
盈利 $28,000
*包括阿嵐人工$10,000
二十元一份的套餐有一客薯條加吉列豬扒,跟餐加八元即有一杯飲品。
萬家燒餅王
現況:開業4年半
租金:$65,000
盈利:$30,000
經營情況:「原材料成本上漲得太快,一年前,一箱雞蛋一百元,現升到二百四十,盈利足足少咗一半。明年八月租約到期,若加租太多,會考慮撤離。」
反對合併:「我自己唔會考慮,食物類別咁相近,萬一對方生意好過我,咪引狼入室,抽佣多少亦難計算,太少冇着數,太多對方生存唔到。」
日船
現況:開業6年
租金:$81,000
盈利:蝕$25,000
經營情況:「呢條街小食選擇越來越多,生意被攤薄好多,幾乎是冬天搵來夏天蝕。租約兩年簽一次,次次都加一萬五,出年二月約滿再加的話就唔做了。」
合併可行:「有人分擔租金梗係好,不過我唔會考慮,反正都等執了,無謂拖累人。」
輕鬆飲
現況:開業3年
租金:$50,000
盈利:$50,000
經營情況:「原本在街頭嗰間總店,約滿時業主要從五萬加到十萬,唯有結業保留街尾呢間,好彩個業主信得過我嘅品牌,肯用五萬租金簽下三死三生嘅合約。我哋做台式飲品嘅,租金超過六萬都搵唔到。」
合併可行:「最大好處是減輕租金負擔,亦可增加食物選擇性,但同賣炸物可能會出現互相搶客,須考慮保持現有差價距離,宣傳及減價亦要同步。」
椰汁大王
現況:開業2年
租金:$85,000
盈利:$35,000
經營情況:「呢條街台式飲品多,競爭大,賣得越來越平,搶晒生意。租金從原來七萬升到八萬五,生意越來越難做。」
|
||||||
二十四歲的李家偉及三十歲的梁忠榮,做過美容產品傳銷,做過雜誌推銷,三個月前放棄三至六萬元月薪,從港島返回天水圍老家,頂手小食店自己做老闆。 誰料圍城內鬥同樣險惡,兩名昔日的Top Sales,繼續利用銷售員本能見招拆招,開業第二個月已賺六萬元。 天水圍新北江商場一樓的「原宿地帶」,劃成一間間細鋪,廿步之內有四五間小食店,平日下午三、四時是人流最多的放學時間,最近學校考試,十二時左右學生人 潮已出現。各店一邊忙着做生意,一邊你眼望我眼,觀察對手。「日昇小食甜品」的招牌下,家偉拿着鐵籤密密反着章魚小丸子,額頭冒着汗,眼尾卻瞄着等食物的 人愈來愈多,擠在通道內開始逼近對面食店,罵戰隨時又一觸即發。 訪問當日,商場保安多次阻撓拍攝,第二天又有一批消防員指收到投訴說他們阻塞通道,「係人都知咩事啦。」家偉與關係良好的珍珠奶茶鋪頭阿姐說笑:「哦!原來係你報寸!」對被對手投訴一笑置之。 拒割喉減價互耗 阿榮和家偉以廿五萬頂手小食店,經營兩個月才發覺,買來搵食架生外,還附送食店的恩怨。前老闆五年前開始賣冷麵、章魚小丸子、雪糕等小食,一年前對面滷味 店突然拉閘關門,一個月後重開,變為賣冷麵及雪糕,旁邊一間賣牛雜的,又兼賣小丸子,擺明打對台。前老闆遂開始與他們進行減價戰,一元粒小丸子,五元兩個 雪糕球,只有毛利約六、七成的冷麵維持原價兩元一包,小丸子減價後仍有七成毛利,但雪糕來貨一桶近百元,售價已接近成本價。雖然每月盈利仍有六、七萬元, 但抵不住壓力,決定離場。兩名年輕人接手後不敢輕舉妄動,一切照舊,他們深明熟客緊要,索性招牌都不換,價錢、食物全部跟足,直接開檔。但對面店鋪見新手 上場即聯手圍攻,幫襯冷麵店加三元可買另一間店的小丸子七粒,「賣得咁平,邊度做得住?」阿榮越說越激動,加上食物成本不斷上漲,短短兩個月雞蛋升一成, 海蜇升兩成,他們計算過後,決定不參與割喉式減價戰,轉而靠「足料」吸回頭客。他們每板煎模可以做十八粒小丸子,比對手每板廿八粒大得多,而且椰菜、粟 米、章魚等材料分量充足確保口感,結果熟客捧場,兩星期前加價至六元五粒,仍維持日賣最少二千五百粒,無損生意額。 攤牌換和平 不過並非每次都成功,他們接手後加入新元素,顧客買雪糕加一元可自選Oreo餅碎、木糠等配料,大受歡迎。第二天對面鋪頭即以免費脆筒狙擊,日昇第三天便 要把配料變成免費,「就算係天水圍,個價都平到唔合理!」家偉沒好氣地說。面對競爭對手挑戰,阿榮和家偉認為大家「搵食啫」,多一事不如少一事,阿榮笑 言:「有時行家同啲客講我哋嘅小丸子唔好食,我會話各有特色囉。」但求息事寧人,直至兩個星期前,對手走到他們鋪前拉走正在揀冷麵的客人,才真的吵起來。 拿着菜刀在廚房切椰菜的阿榮,說起那次爭執雖然激動,但他強調只會動口不動手,「上手老闆就係沉唔住氣搵人嚟搗亂,結果報警收場,搗亂的人仲要守行為。」 他笑言,這次爭執後順手攤牌,大家協議把價錢提高一點,無謂「攬住一齊死」,現在起碼換來「表面和平」。 口花花冧街坊 雖然兩位老闆相差六年,但經營上無分大細,開鋪分工,一切有商有量。阿榮性格相對沉實,預備材料、入貨、會計等工作由他負責;比較油腔滑調的家偉,主要時 間都站在店面。訪問當日,一位阿姐買兩球雪糕又要杯又要蓋又要膠袋,家偉要求加一蚊,阿姐即時反面鬧「有無搞錯?」家偉楚楚可憐表示現在雪糕又加價,膠杯 又加到八毫一個,做唔成生意,阿姐火氣全消,但實情是所有食材都加價,唯獨雪糕和膠杯沒有加,只是家偉見阿姐發嬲,扮可憐搏同情。他們互相吹噓對方是 Top Sales,沒一種客人未見過,阿榮負責冧師奶,家偉則是女學生殺手。家偉弟弟家豪閒時也會來幫忙,有學生問家豪電話,家豪一句「公司電話要唔要?」即笑 死街坊。他們圓滑的個性亦用到同行關係中,除了打對台的鋪頭,他們與其他食店都關係良好,有時甜品店會來借碗碟,他們用光了膠杯又會向另一間小食店借。就 連店員阿姐都笑說:「佢把口好鬼衰,但係咁先好玩。」 蠱惑老闆留幾手 阿榮和家偉都不諳飲食業,創業只為不想打工,本打算賣衫,但賣衫毛利低「無肉食」,一心想賣手板眼見功夫的車仔麵,但無人出讓,輾轉之下找到這間等人接手 的小食店,知道新北江人流多,租金平,而且「頂手費」不過廿多萬,便立刻「扑槌」。他們先在店裡實習個多星期,學包裝冷麵、整小丸子等,務求接手後運作暢 順。初時以為自己「執到寶」,但原來上手老闆教路故意留幾手,就像開小丸子的粉漿,沒有傳授令粉漿更香口的木魚精,幸好前朝員工看不過眼爆料,才開始發現 這個「筍盤」問題處處。實習時一切順利,但接手後,打漿機又壞,夾餅機又壞,沙冰機又結不到冰,一問之下才發現前老闆在他們接手前將機器都換成舊機, 「Contract係寫好包咩,但無寫有壞包換嘛,俾我係老闆都會咁做啦。」家偉無奈說,幸好機器不算太貴,如打漿機不過四百多元,首次創業唯有當交學 費。阿榮和家偉在傳銷公司認識,當時十八歲的家偉付了六萬元入會,向身邊親友推銷,最厲害一次在巴士上游說兩個十七歲男孩入會,一張單賺了近三萬。雖然賺 到錢,但卻眾叛親離,甚至母校在早會提醒學生若家偉致電不要接聽;有一次,他的舊同學一直聽他推銷都說沒問題,到差不多成事才說「想睇吓你有幾 cheap」,更被冠以綽號「傳銷大魔頭」,於是放棄傳銷,跟隨一早過檔推銷國際雜誌的阿榮到港島上班。當時他們一個住屯門一個住天水圍,便一起搬到灣 仔,「條team其實得我哋兩個sell得,九成都係我第一佢第二。」家偉說,阿榮立刻補充:「但係佢好假,我就sell真誠。」說罷阿榮自己都忍不住 笑,當時他們月賺約三萬,家偉最高曾賺六萬,但後來和上司不和辭職。現在兩人搬到天水圍租住七千元的栢慧豪園,阿榮強調:「我哋同居但唔同房,記住寫清 楚,如果唔係啲女唔搵我點算?」兩人還養了一隻哥基,家中有一大堆狗玩具,阿榮一回到家,即要抱抱愛犬,「Money! Come!」,連狗名都叫Money,果然搵錢為本,環顧他們家中沒什麼擺設,書桌上的太陽能搖錢樹卻搖個不停。 開業資料 (04/11)租金:$75,000*頂手費:$250,000 # 雜費:$30,000開業成本:$355,000*兩個月按金,一個月上期 #包裝修,第一批貨 營業資料 (05/11)總營業額:$150,000租金:$25,000人工:$20,000* 入貨:$40,000雜費:$3,000盈利:$62,000*兩名全職,兩名兼職 |
||||||
|
||||||
韓國籍的Lim(林泰榮,三十三 歲),○六年來港當廚師,娶了在餐廳任主管的香港老婆Jim(詹倩瑜,二十九歲)。他一直希望擁有自己的餐館,年初有鋪找他頂手,遇啱太太正懷有身孕。年 輕夫妻積蓄有限,但機會當前又不想放棄,唯有乜都親力親為,死慳死抵,以最低成本在尖沙咀「小韓國」開設食店「北口韓國地道小食」。兩人男主內(廚房), 女主外(樓面),並找來好朋友入股支持,捱了四個月,上月穩袋六萬元。 (你好)、(謝謝)北口位於有「小韓國」之稱的金巴利街,近二百呎的小店內,開放式廚房已佔三分二地方,擺上五張摺枱和十多張櫈,通道僅夠一個人通過,孭 住兩個月大囡囡的Jim,不停在當中穿插招呼客人。一對中年食客推門進入即時大呼:「嘩,你咁快瘦到身?囡囡仲咁乖添。」熟客盧太剛坐下便與Jim聊起 來,「係呀,好彩佢唔扭計,我先可以有時落嚟客串幫下手咋。」Jim一邊上菜一邊和盧太大談湊仔經。那邊廂,負責出品的Lim,則在廚房無停手,一時切椰 菜,一時包紫菜粉絲卷,盛起一碟炒年糕,又快快手拆開一包辛拉麵放入鍋中。前兩天被滾水燙傷右手,包着紗布敷料,仍然不敢怠慢無停過。 自家醬汁夠地道 「香港有好多韓國餐廳,燒烤、湯、飯、麵都有,地道嘅小食專賣店就比較少,既然係咁,我就賣啲特別小食,有新意啲。」說着半鹹半淡廣東話的Lim,對食店 定位自有一套,小店沒有接駁煤氣,Lim認為電爐不夠鑊氣,不能做小炒,於是北口主攻韓國地道小食,魚片串、甜辣雞球、涼拌粉絲等韓國常見但香港沒有的街 頭小食,傳統炸物韓國餐館多做炸蝦,Lim就改用番薯、餃子、粉絲紫菜卷等平民式炸物,有新鮮感,成本亦較低。為了做到食物選擇多,又不壓貨,Lim想到 從醬汁入手。北口提供十多款食物,但醬汁數目亦有十多款,全部由Lim以不同比例的辣椒粉、蒜頭、韓國糖漿等親自調製,例如韓式炒年糕及年糕串,分別用上 不同醬汁,轉一轉製法,一款材料,便有兩道菜式。「我喺香港食過好多韓國餐廳,發現唔同食物味道差唔多,就係因為個sauce甜同辣程度變化唔大,我整咁 多sauce,就係想滿足香港人鍾意多嘢揀。」小食款式亦會不時轉換,得知首爾興起炸熱狗,Lim馬上在餐單上加入迷你熱狗,水冷麵是一個月前推出的夏日 新品,預先冰鎮蕎麥麵,待有柯打才泡在牛肉湯中,再加入幾片牛肉、青瓜、醃蘿蔔做配料,一碗四十五元,已經是全店最貴。為求正宗,年糕、魚片串、公仔麵和 飲品等都向附近韓國供應商入貨,其他常用蔬菜則用本地新鮮貨,而且不會因應香港人口味作調整,深得韓籍食客捧場,佔整體客人三成。 自貼招牌 省開支 鋪仔細細,門面不及其他韓國菜館顯眼之餘,位置夾在設計公司與回收站之間亦較遜色,原來該鋪是朋友投資失誤主動出讓的。湊着囡囡的Jim稱:「佢舊年租落 依家呢個鋪,裝修好晒做日式燒烤,原本想再租埋隔籬回收站嘅鋪打通來做,點知個鋪係人哋自己物業,梗係唔肯租啦,佢覺得鋪面太細就問我哋有冇興趣頂嚟 做。」她憶述,「我哋覺得個位咁僻都唔夠膽頂,對方就話俾我哋只交租試業兩個月,免卻頂手費風險。」當時Jim剛懷孕,家庭負擔增加,應否這個時候創業, 兩公婆都經過一番掙扎,但開鋪是老公心願,機會在眼前,便決定搏一鋪。年初試業,兩人一切以「慳」為大前提,自己設計中韓對照的簡易餐牌,食物用手機拍下 自行列印貼在牆上,連門口招牌都是自己剪紙逐個黐上,再在門角位插支韓國旗,寓意食物地道、正宗,「佢仲識去上海街買齊煎炒煮炸各式爐具,更用半鹹淡廣東 話成功同老闆講價,真係好搞笑。」Jim指着老公一臉得意說道,自己當時亦腹大便便在店內招呼客人。為擺多張枱多做生意,Jim將原本放在門口位的收銀台 移至鋪尾,「唔嘥位之餘,收銀也更順手。」有多年餐廳樓面經驗的Jim,對小店管理可謂手到拿來,在店內一眼關七,也很了解食客心理。她笑說,剛開業正值 冬天,見門口有人客等候,便送上熱辣辣的魚片串湯,小小一碗湯能留着客人,亦令客人感到窩心,「客人同我講,『呢間食店好warm呀!』」賣小食,又設堂 食,夫妻二人將韓國的街頭小食搬入小店,價錢亦很街坊價,大部分十至三十元有交易,毛利保持約七成。過了兩個月試業期,Lim邀請他在韓國當廚師的好友金 相勳(三十三歲)合資,攤分頂手費,六月完成工作簽證來港幫忙。 以柔克剛磨合差異 廚房經驗豐富的Lim,18歲開始便在韓國打廚房工,又賣過魚及豬肉,從而學懂分辨食材好壞。○六年在來港多年的姐姐鼓勵下,到香港的韓國餐館狎鷗亭打 工,其間先後被集團派往韓一館及金麗韓國餐廳當「開荒牛」幫手開業,邂逅同是先頭部隊的樓面主管Jim,「當時餐廳只有我識用簡單韓文落單,佢就以為我係 韓國人主動撩我,人哋問佢係唔係鍾意阿Jim,佢又好鬼直接咁話『係呀,係呀。』」Jim一臉甜笑地回憶道。「但畢竟兩人不同文化背景,我同佢又都是唔輸 得嘅人,試過幾次嘈到除戒指執包袱返娘家,只能不停磨合,互相遷就。」主理廚房的Lim性格急躁,Jim則較圓滑,一個主內一個主外。今年五月囡囡出 世,Jim全職在家湊女。採訪當日,Jim專程到店鋪拍攝,隔籬廣告公司老闆一見到即捉住她說:「林太你來就好啦,要同你講水費嘅事,你老公說話又講唔 清,道理又唔聽人講,同佢溝通唔到呀。」原來兩鋪共用水錶,Lim堅持水費一人一半令廣告公司老闆大感不公,語言不通又理論不果。Jim聽完即爽快答應, 「我哋做食肆用水肯定多啲,一人一半的確唔合理,我會同老公解釋啦,實會解決嘅,放心!」安撫完鄰居,Jim才自嘲說:「鬼叫自己嫁個廚房佬咩,係咁盟塞 o架啦,我返屋企好好哋氹吓佢就冇事。」雜誌訪問亦一樣,Lim擔心採訪過程影響生意,多次打算中止,同樣由Jim在中間斡旋,「佢就係咁,講嘢硬繃繃, 諗嘢又唔識轉彎,但其實佢都是太緊張生意,畢竟依家成頭家都靠呢盤小本生意孭起,我明白佢嘅壓力。」Jim善解人意地說道。 鄉里試食 1 魚片串是韓國最常見小吃,但在香港只在紅磡韓點食過,北口連湯一起上更正宗。湯底清甜,吃得出是用鹹魚仔、海帶等材料熬出來。 2 年糕串口感有點乾,可能係迎合港人口味,偏甜。 3 甜辣雞球很有家鄉風味,在香港還是第一次吃到,心機與手工十足。 4 炸豬扒飯醬汁味道清新,賣$30好抵食。 5 烤雞肉飯也不錯,醬燒汁酸酸辣辣,很惹味。 總體評價 食物做法夠傳統,口味地道,全部十幾二十蚊有交易,價錢實惠。 開業資料(3/2011) 租金:$42,000 *頂手費:$260,000 #入貨:$15,000工具:$20,000總投資:$337,000*兩個月按金,一個月上期#包裝修,律師費 營業資料(7/2011) 營業額:$128,000租金:$14,000入貨:$40,000人工:$8,000△雜費:$5,000盈利:$61,000△一個全職 |
| ||||||
在旺角花園街附近的水渠道,是繼登打士街以外,最多小食店創業的起點之一。這些食街,人流多、新鮮感強,不少店鋪在「蜜月期」內一開即賺。然而,隨着時間過後,他們都逃不過──加租、過氣及意見不合這三大魔咒。如早前曾風靡不少年輕人的「瘋薯」,最近也相繼結業!今次《壹盤生意》的主角,是賣多款不同薯仔小食的「叁薯」,老闆林建彬(Pan)就選擇進駐水渠道,今年二月才開檔,月賺十萬。Pan無懼小食檔魔咒,更揚言:「三年內要開夠三間分店!」但做了十多年小食、現有兩間串燒檔的「串皇」老闆Wingo,大潑冷水,認為現階段開分店無用,要企得穩須先破解小食店之三大魔咒。 今次小食店老闆Pan,是八十後,但在不同餐廳做廚已有近十年經驗。有過一次做老闆經驗,去年終於儲夠錢,與在舊公司認識的Andy及Chris一同創業。三人在飲食界打滾多年,對西餐所用的食材特別熟悉,想過做雪糕、意粉,最後卻以薯仔做主題:「我哋覺得薯仔一直只係配菜,但係佢可以千變萬化,地位唔應該咁低!」將鋪名定為「叁薯」,就是將三款不同種類的薯仔,做成三款不同口味的小食:「我哋用咗美國焗薯、本地番薯同紫心番薯,用咗焗、煎同炒嘅方法去做。」而薯仔供應多,更不愁貨源:「咁多年廚房經驗,同供應商一直有聯絡,我哋都keep住入到啲靚薯仔。」翻開餐牌,「壹薯」是三色芝士焗美國薯仔,「貳薯」是香煎鴨肉薯餅,「叁薯」是香葱炒三色薯片,甚為趣怪,價錢每樣三十元樓下有找。 三人希望進駐旺街,但登打士街租金太貴,只能退而求其次揀水渠道,月租五萬。開業以來,小食店獲得不少傳媒青睞,生意尚算不俗,但Pan也知道單憑熱潮帶來的「蜜月期」,生意難長久。加上同址前身的「那些年炸雞」、「泡菜媽媽」及「太子燒」等,紛紛經營不久就結業。故本刊特邀曾為「太子燒」教路,「串皇」老闆Wingo分享經驗,令「叁薯」得以「延年益壽」。 魔咒一:加租 加租可算是致命「死症」,生意差,營業額不足以維持租金;生意好,又恐怕業主大條道理加租。Pan和Andy兩年前曾一起頂手一家意大利餐廳,經營一年,生意算是有聲有色,最後卻因業主加租而被迫轉手,Pan說:「當時租金足足升咗一倍,賺到嘅錢都用嚟交租,咁啱有人對間鋪有興趣,於是頂手俾佢做。」現時小食店租金約五萬,但Pan恐怕三年租約期後會大幅加租,故現在已籌備開分店:「除咗同業主維持良好關係之外,我哋而家希望盡快開分店,將投資盡量分散,如果呢度真係加太貴租嘅話都未至於會無咗盤生意。」Wingo千叮萬囑Pan,開分店要三思:「而家啱啱起步,唔使咁急開分店。因為一間鋪賺十萬,到第二間未必係賺雙倍,但係燈油火蠟就肯定要雙倍計。而家三個人做,開分店人力就分散。而家請人難,好多人做做吓唔做,食物質素會好難維持,我就建議喺度穩定咗先。」Wingo建議Pan兩年後才開分店:「最好喺同區搵鋪位,一嚟有咩事兩邊都控制到,二嚟可以俾到業主壓力,加得多就唔續租。」「我一直租人哋鋪十幾年,試過同業主打好關係,中秋送吓月餅,結果仲衰!你愈同業主好,佢哋就知你愈緊張間鋪,第日傾租約加得仲多!」Wingo認為只要準時交租就可以。他亦表示如果租金提升得多,加價亦在所難免:「無辦法,樣樣加,啲師奶都同我講菜價加好多,但係都要照買,客人會理解。」 魔咒二:潮流沒落 「叁薯」以「大件夾抵食」為主,主打的美國焗薯及香煎鴨肉薯餅,才二十八元。而餐牌亦有不少大玩綽頭的小吃,如「爆糖」,即蜂蜜炸饅頭配忌廉芝士及糖漿,大玩crossover。就現場所見,午飯時間間中有上班族買芝士焗薯當午餐,惟人數不算多;但到了放學收工時間,顧客明顯增多,當中以焗薯及「爆糖」較受歡迎。有顧客向記者稱自己是「芝士迷」,經網上食評後放工前來一試芝士焗薯,亦有不少學生放學後,買雞翼及炸小饅頭充當小吃。事實上不少新潮食店,開業不久就吸引傳媒採訪,年輕人更不時到網上share,形成熱潮。有老闆會順勢搞特許經營擴充。但隨着有更新的食店開業,舊有的小食店統統變out,最後難逃結業命運。Wingo說:「開小食店,最緊要係熱潮過後,維持到食物質素。最初以為薯仔唔吸引,睇過幾款產品之後又比我想像中好。我覺得間鋪之後就要開始諗轉型,將自己嘅產品分為街頭小食同埋正餐。好似『壹薯』咁,其實加幾粒炸饅頭,咁就可以當一個套餐賣,收多啲錢。既可以保留到班當正餐食嘅客,又可以提高生意額。」他又建議用現有資源研發更多新菜,以不增加成本為原則滿足貪新鮮的顧客。另外,Wingo同意特許經營限制太大,亦建議日後不應以加盟店的方式來擴充:「多數想嚟做嘅人都係想做老闆,一俾加盟費就想賺錢,無諗過會咁辛苦,有時唔同分店賺嘅錢相差太大,又有排嘈。」 魔咒三:合夥人爭執 「多個人多把口」,有時候合夥人意見出現分歧在所難免,但往往最能左右公司命運。以往《壹盤生意》曾報導有店鋪因涉及錢銀問題,兄弟都無情講!Pan說:「我之前做餐廳,兩個負責廚房,兩個對客,有時都有唔同意見,所以嗰時我哋選咗個代表,就喺律師樓簽咗協議書,如果四個人出現重大分歧,我哋會由代表舉行投票嚟決定,再唔得就可能有一個人要離開公司嘅行政同策劃,淨係做投資。但係而家我哋分工比以前精細,我主要對客,Chris負責廚房,Andy負責會計,暫時嚟講都OK,未需要簽協議書。」 Wingo坦言,「食店魔咒」有很多種,但其中人為因素至為重要,亦至難控制,「而家好多做後生仔飲食,頭幾個月賺到錢梗係落力,但係呢行好困身,日日要做十幾粒鐘,長遠嚟講未必人人頂得順,最後要結束。我見佢哋都係做開呢行,知道有幾辛苦,亦都睇得出佢哋好有心思去搞呢盤生意。如果佢哋三個真係做到一條心,唔好俾團火咁易熄,第日想擴充,要搵啲相同理念嘅投資者,咁就唔怕做做吓執笠!」 開業資料(01/15)租金$158,400*裝修$190,000牌費$100,000入貨$50,000雜費$6,600總投資$505,000*兩個月按金,一個月上期 營業資料(03/15)營業額$260,000租金$52,800人工$42,000#材料$46,000雜費$12,000盈利$107,200#2個全職,2個兼職 |