📖 ZKIZ Archives

風水佬呃你十年八年 人在中環

http://manincentral.blogspot.hk/2013/07/blog-post_25.html
今日報紙報導咗，風水師俾人找侮氣既案件。屬粹以剝住花生睇戲既角度去睇，其實娛樂性幾高的。

時不時都有朋友問我：「CK，生意佬通常都信風水，咁查實你信唔信風水命理呢樣嘢？」

呢個問題，我總覺得唔能夠三言兩語就答得到，因為乜野叫做「信」，每個人既解讀都唔同。相信風水，同相信一個宗教，呢個「信」字，其實已經係好大分別。（當然我認為有人係會將風水當係一個宗教咁去信。）就我自己而言，我不能否定風水命理既存在，亦認為每個人既命運，多少係被某一些複雜既規律所牽引住。呢種咁既心態，我算係相信風水，還是唔相信風水？

好耐之前，我都曾經搵人睇過一次家居風水。果陣我剛買樓，一家人開開心心搬入去住。點知入去住既頭大半年，全家人一家大細病痛不斷。進出醫院既次數之多，大概係做咗咁多年人都未試過的。中醫、西醫都睇過，醫生亦換過好幾個，但總係不斷咁大病小病。後來有朋友提議我試下幫屋企睇睇風水，我心諗反正我冇更好既辦法，那就試下無妨吧。風水師睇完一圈，提議我將某些家居陳設既擺位稍作改動，並叫我去精品店買幾件普通不過既家居小擺設，放響家裡某幾個特別既位置。奇怪既事情係，改動了陳設同擺好那幾件小擺設之後，那個病痛不絕既情況真係停止咗。

風水師離開之前，睇住我既八字，贈咗我兩句：「先生，明年年尾左右，會添丁喎，應該係個男仔來的。當然，風水命理敵唔過科學發明既，你如果堅決避孕既話，呢件事就唔會發生架啦。」

聽既時候，我還是應下就算，冇太過認真去諗。不過之後果年既冬天，光頭仔就真係出世了。

係咪巧合？

*****

兩件事情都讓我覺得有點不可思議，好奇之下，我買咗好幾本有關風水書，好想study一下，呢套冇乜科學根據既古代學說，究竟係乜頭乜路。

世上有好多神棍，但係當一個算命師算得唔準既時候，係因為佢存心想呃你錢，還是另有原因？

聽過有啲朋友，睇完風水掌相之後，會同你講：「我好信阿乜乜師父」，講到風水師好神好神。但係從我所理解既風水命理學說，風水師，其實都不過係平凡人，冇咩特異功能的。或者嚴格一點講，風水師其實係讀書人，只不過佢地所讀既書，唔係響中小大學裡面所讀既學科，而係源遠流長既一套古老學說。風水師幫你批命看相睇風水，佢地其實都只不過係依書直講。書本記載係咁樣，佢地頂多可以加點現代化既adjustment，再去講俾你聽。問題係，果套已經流存N年既古代命理學說，並唔係一套百份百可以幫你預測未來既學問。響某一啲範疇，佢地憑住複雜既計算，可以係幾準確的。一個人既命生得好唔好，出身、家底如何，我自己覺得，命理既計算其實幾準確的。呢啲計算，亦可以模糊地算出，一個人去到某一段時間，運氣起落大概會怎麼樣。至於一個人到底會響某些時間，實在地遇上甚麼事情，那個嘛…我就傾向相信係算命師自己憑著手頭上既資料「推理」出來的。這個「推理」很難百份百準確，但我有理由相信，一個算命師如果人生經歷豐富一點，學識廣博一點的話，他所推理出來既預測，就會有機會更接近真實。

唔係想幫風水師講說話，但係當一個客人去睇相算命既時候，佢自己既態度，我覺得其實好緊要。你總唔可以話，人地算唔準就等於係神棍。客人要明白，風水命理可以做到既事，並唔係好似好多三姑六婆所諗咁，有神怪力量可以讓佢地未卜先知甚至改變世界。我比較相信，風水命理所反映出嘅係，呢個世界運行既部份規律，而根據呢啲規律，作為一個額外既參考，其實還是有一點價值的。

曾經聽過有個研習風水命理既前輩講過一個比喻，一命二運三風水到底係乜嘢：一個人既「命」，就好似一架車副引擎咁，天生的。好命既人，生響大富之家，又或者天生聰明過人諸如此類…你副引擎係法拉利抑或係corolla，冇得改的。「運」呢，則係你架車所行緊既道路，係平坦？還是崎嶇？崎嶇既路，每個人都總有機會要行，你條「命」好既話，即係你架車性能好啲，行響一條崎嶇既路上面，自然比較容易捱得過。至於「風水」呢，極其量只係你架車裡面既一啲潤滑油，幫你架車行得暢順一啲咁解。

呢個「開車」既比喻，其實我覺得幾中的。不過呢個比喻仲有一個重點未講，就係不論你架車既性能如何，你行緊既果條路路況係點，你有冇加入足夠既潤滑劑俾你架車都好，有一樣嘢比呢啲都更重要的，就係呢架車要郁，係要有一個「人」去充當司機的。司機點樣去揸呢架車，佢駕駛既技術同態度，可能先係勝負既關鍵。

至於今日新聞裡面所提到既「批詞」：「你個仔會勁過特首…」

我覺得，冇呃人的。以今天政府既標準嚟睇，「仲勁過特首」，其實也不知是福還是禍。

呃你孖孖

當「文化商人」遇上「以為自己是文化人的企管人」

今期開文化中國 (1060)。

公元2014年3月12日，天方夜談，文化中國溝阿里巴巴，諗住變變變，芝麻開門，一嘢變咗呃你媽媽，幾毫子炒上幾蚊，文化中國市值一度炒到超過700億（港銀，下同），跟手一路派貨，越派越有，全日55億成交，撲入散戶非死即重傷，全城坐艇，媽媽有聲。

搭個棚、作個故仔、再剥師奶條底褲的股壇大龍鳳，每日上演，講緊做得有幾過份，食到有幾盡咁解。文化中國一場大茶飯，聽講有大戶賺咗十個億計，不過盲衝衝高位接貨，家陣蟹綁在文化中國的游資，大大話話亦有十幾廿億，殺孽咁重，搞到唔少細價股炒股都冇啖好食，累街坊。聽講唔少中環古惑仔，㷫過火屎，四出刮料，好想知道文化中國呢舖大茶飯背後，是何方神仙過路，竟爾寸草不生。

文化嘅嘢，財經茄哩啡識條春咩，不過，有一位財技高手，乃「文化人」加 投資銀行家再喪搭事事評論員的混合體，深諳文化中國管理層的思路套路，講到品評呢場文化大龍鳳的資格，掉佢其誰，呢位財技高手就係... 就係...

登登登登！各－－位－－觀－－眾：精電(0710)行政總裁，蔡東豪哥哥！

Yeah。

是咁的，文化中國主席，叫董平，阿董生好威，堅威。如果將大陸電影分為國營同民營兩邊，國家隊的大佬叫韓三平 （啱啱被退休），另一邊的教父式人物，就係董平，冇在董平的電影出現過，都唔好叫自己做大導或者一線，董生的杰作包括《臥虎藏龍》、《讓子彈飛》，仲有同周星馳爺爺合作的《西遊》咁。有人叫董平做「中國民營電影教父」，不過董生好謙，只係將自己定位做「文化商人」。

大陸電影商業化，唔夠廿年，文化喪溝股票，經驗更青澀，十年前唔係咁多人識玩。將文化工業同資本市場結合，打破意識形態禁忌，董平乃第一代推手，帶呢位「文化商人」登陸香港股市，授以搭棚秘術、財資技法的，正正就係蔡東豪哥哥。

話說2004年底，阿蔡生去咗友利(0419)呢隻經典殼股做董事總經理，月薪一皮，打破香港上市公司最低工資記錄，才子賤價下海，全城跌碎眼鏡。原來東豪BB忍辱負重，重要任務幫董平間華億，借殻上市。於是「友利」變身「華億新媒體」，蔡東豪哥哥作為財技高手的金身罕有閃現，領銜演出財經大戲，單嘢幾個月搞掂，2005初東豪BB收返埋個金身，閃咗去佢老闆的另一隻殼精電做行政總裁，犒賞人工暴跳到10球一年。呢場十年前蔡東豪哥哥一手策劃的文化大龍鳯，仲有董平同保利文化(3636)的瓜葛，早排「文化大拍賣（下）」已經寫過，唔重覆。

阿蔡生去咗精電搞工業革命，佢在「華億新媒體」董事會，一直保留非執行董事的職務，直至2008年初，「華億新媒體」隻殼搞完一輪後，再賣俾另一個文化界財資高手，前網通CEO兼中國寬帶產業基金創辦人田溯寜，「華億新媒體」再變身「華億傳媒」，蔡東豪哥哥同董平一齊撤出華億董事會。

一個人有兩塊臉，唔出奇，蔡東豪哥哥做財經評論員，都警訓過小投資者，上市公司股價經常失驚無神大起大落，而董事會又次次同你講「不明股價升跌原因」，多數有古怪，唔知點解，蔡東豪及董平，在「華億新媒體」董事會，共渡近兩年零八個月歲月，期間在港交所發出的「不明股價及成交波動原因」通告，又足足發咗20次；同樣，眾所久知，阿蔡生好痛恨大陸大鱷混水漠魚，破壞香港「核心價值」，不過又可以同董平合作無間，教曉「文化商人」股市的藝術，社會主義中國的文化藝術界，從此染滿資本主義香港的銅臭，呢啲咪叫一國兩制囉。歷史上的財經「Hi」story會記住，當「文化商人」遇上「以為自己是文化人的企管人」時拼發的火花。

學滿師的董平，玩完「華億新媒體」後，好快揾到另一隻殼，叫做「上聯水泥」，亦即係今日的文化中國，幾年來股價彈吓插吓，同樣搞完一輪再揾科網猛人（今次係馬雲）落搭，金蟬脫殼，套路似足十年前華億場戲。文化中國在2013年7月，透過高盛射咗批貨出街，價值約2.7個億，每股成本唔使5毛，當高盛收半個佣，做呢單刁都係賺得百零萬，一球佣竟然請得郁高盛，當有仙人指路，大雞唔啄細米，原來大大大茶飯在後頭，不過高章到冇人識睇咁解。

如果在蔡東豪哥哥檔主場新聞，用「阿里巴巴」做關鍵字搜索，新聞加評論冇一千條都有幾百，今次阿里巴巴收購文化中國搞到全城炒仔坐艇，David Webb都叫證監去查，平時好配合股壇長毛發功的蔡東豪哥哥，竟然又一粒字都冇提過，咁大個位都唔入，留手咗啲囉，阿蔡生將佢十年前同董平合作的經驗，拎返出嚟同投資者分享吓就好喇。

好多人都問緊，文化中國大龍鳳，究竟係咪騰訊（0700）及阿里巴巴的孖孖「馬馬」呃你媽媽？呢個問題，全香港最有資格評論的，只有蔡東豪哥哥了，聽講阿蔡生及董平，兩位文化人的辦公室，都在香港金融中心的一座土豪色寫字樓，蔡生撞到故人的時候，唔知會唔會順便幫香港散戶八掛吓呢？又唔知蔡東豪哥哥會唔會繼續監察大陸大鱷的風格，出嚟主持正義，帶蟹民出苦海呢？

好緊張，好緊張，好緊張呀！

關連文章:
1. 財經林峯
2. 文化大拍賣（下）

伸延閱讀:
1. 信報：中國電影幕後推手
2. 財富人生：文化商人的資本遊戲
3. MediaInfo: Meet the boss！Johnson Ko

呃你做家務大法洗碗真係可以減壓？

1 : GS(14)@2015-12-16 19:22:43

不少人喜歡烹飪及享受美食，但卻討厭事後要洗碗，只想吃飽飯後舒舒服服坐下休息，但被工作壓力攻陷的上班族可有想過，單調的洗碗工作原來可以減壓，令腦袋暫時停一停，唞一唞。精神科醫生指出，因洗碗時要專心以免打爛碗碟，又要細心留意是否仍有餸汁飯粒留下，所以能將煩惱暫時放一旁，清潔完碗碟後又有成功感，有助「洗」走煩惱，如不喜歡洗碗，可以嘗試做其他家務減壓。記者：陳沛冰精神科專科醫生李德誠表示，都市人工作壓力大，放工後仍不停要為公事煩惱，甚至越想越不開心，但其實很多勞動性不高的家務，都有助減壓，洗碗是其中之一，最重要是過程中需專注每一個步驟，分散注意力，令人不需再鑽牛角尖。李舉例簡單的洗碗工作，過程中其實要專注留意碗碟是否已徹底清潔，煮飯則要留意火候，加入不同材料的次序，都需集中注意力，令人暫時從煩惱中走出來。若不喜歡清潔類的工作或不懂煮飯，可以考慮執屋或執衫。執衫時要考慮放置衣服的前後或先後次序，又要將衣服摺得整整齊齊，或要考慮哪些衣服需棄掉，都需集中精神。李稱，執屋時則要搬開東西，又要小心不能打爛或弄傷自己，執拾妥當後有成功感，都可令腦袋暫時停下休息。曾有高官藉擦鞋減壓，因要細仔留意落鞋油是否平均，及鞋面是否夠光亮，又不可操之過急。但若上班一族覺得放工後仍要煮飯或洗碗是負擔，便應選擇其他減壓方法，李建議這些人可考慮如種花，藉換泥、淋水及修剪花葉紓緩緊張情緒；又或清潔座架也可減壓，做運動如瑜伽或跳舞，都可放鬆緊張情緒，最重要是將洗碗等減壓方法變成習慣，「每日都可以排毒，清一清個腦」。





來源: http://hk.apple.nextmedia.com/news/art/20151216/19414169

---