| ||||||
一二年的《壹盤生意》，除了講「橋」講新意，還突出不少老闆的個性和經歷，因為輸贏很多時候不在生意本身，而在老闆自己。回顧五十二盤生意，有人歡喜有人愁，其中三盤終告結業，而打入最佳進步獎首十名的生意，盈利升幅由三成至八倍半不等，十分鼓舞。贏家中，有兩位女老闆表現出色，包括粟米汁工場怡加新的周建華，以及明茶房的麥蕙蘭（Vivian）。她們都憑着一份堅持，將生意扭轉乾坤，成功改變命運。另外就是NATKIEL的駱正道（阿道）和拳館搏藝中心的唐壹孚（虎Sir），一個賣飾物，一個教泰拳，生意模式並不新鮮，但二人卻甚懂變通，及時改變經營策略，賺盡過肥年。粟米汁阿姐一哭成名 天水圍師奶周建華，○八年投資六十多萬開設怡加新，生產自家品牌「2+3粟米汁」，結果幾年來虧蝕過百萬。去年五月的訪問，標題為《錯信肥佬黎「秘笈」師奶搾出淚》。當時記者代她向偶像——壹傳媒老闆黎智英請教，黎老闆指解決不到問題就不要堅持，令她哭成淚人。訪問出街後，周建華一哭成名，不少客人主動搵上門，「有客人拖埋架車仔，走嚟工廠入貨，買咗成千蚊。」周建華笑得合不攏嘴。 轉虧為盈開門市 去年中，周建華在有機食品店点点綠擺檔做宣傳，創出一日賣四百支的紀錄，店方決定引入其產品，在旗下十多間分店上架。另外，周建華亦定期在千色店擺檔，今年新年後會擴展至沙田的一田超市。去年暑假高峰期，公司月賺五、六萬元。現時，產品的銷售點增加至六十多個，但因網絡分散，周建華怕小店未必長期訂貨，不利營銷。心雄的她希望將怡加新打造成鴻福堂般的品牌，擁有自家分店。於是，去年十一月尾，周建華將過去半年所賺的十多萬元，用於在銅鑼灣開設首間門市。「呢度上手賣果汁，一直有代理粟米汁，但老闆話唔做，我見鋪頭最好賣係粟米汁，就膽粗粗試開鋪頭。」她解釋道，開店兩個月，月賺萬多元。 樽頸再現難做大 其實，不少大型超市如city'super、吉之島及惠康等，都主動聯絡怡加新上架，但周建華卻不喜反愁，因為工場只有五名工人，包括她和兩名拍檔，要連續廿四小時開工，一日才能生產五千支粟米汁。過去工場會於冬天停工，今年首次生產，但盈利由夏天的數萬回落至五千。「無辦法，冬天粟米來價貴咗三成，加上訂單較少，唔似夏天咁日日開工，但人工就要照俾。」周建華皺着眉道。另外，現時粟米汁的保質期只有兩星期，在大型超市上架，怕難控制品質。她堅持不落防腐劑，希望改用無菌灌漿技術，以延長保質期，但投資額高達一百萬，公司未有足夠資金。記者將周建華的現況及煩惱，以電郵告知黎智英，他回覆指：「有錢賺質量堅持尤其重要，做生意往往欲速反而不達。」周建華也表示認同，更掛上滿足的笑容道：「見到黎生都選擇離開台灣，我知道做生意唔可以盲目咁堅持，要開心地做，一對仔女見到媽咪咁辛苦都變得好生性，我覺得已經係最大嘅成功！」 明茶房振翅高飛 明茶房女主人麥蕙蘭（Vivian）去年六月底接受訪問，主題是「浴火重生 」，講述她的人生與明茶房一同經歷起落。半年過去，品牌愈做愈大，零售、批發加上和其他企業合作，盈利暴增八倍半。Vivian成功走出婚姻及生意失敗的陰霾，做隻真正的浴火鳳凰。 限量版俘虜Gucci 擁有設計及廣告底子的Vivian，深明噱頭對產品形象的重要性，便於去年推出限量版龍井茶，「舊年三月廿九日到四月三日，我逐日同農夫上山採茶，再用人手炒，做咗五十罐限量版龍井。」Vivian的心機獲Gucci買手睇中，得到十萬元訂單。「個買手係以前星街鋪嘅舊客，覺得啲茶夠矜貴，買咗三十幾罐送俾VIP。」Vivian驕傲道。之後，她連續四個週末在Gucci店內舉辦品茶工作坊，每位客人收費二百五十元，生意額雖不大，但卻有助提升品牌的格調。之後中環GRI時裝店亦主動找明茶房合作，其市場推廣助理經理劉家敏表示：「依家做時裝愈來愈需要呢啲有噱頭嘅市場推廣，農曆新年要有中國特色產品，Vivian將茶同時裝混合一齊，既傳統又有時尚氣息。」 事業得意愛情空白 Vivian經常參加社交活動，擴闊人脈。去年，她於慈善活動上認識法國餐廳老闆David，雙方合作推出甜品茶餐。由於反應甚好，她現正和其他數間餐廳傾談合作。近期最大單生意是出口往菲律賓的廿萬訂單。「兩年前，澳門美高梅賭場用明茶去招呼VIP，個負責人後來過檔去菲律賓嘅賭場，再來找我買茶。」Vivian滿足地笑道﹕「明茶已喺惠康上咗架，仲有人搵我做樽裝飲品，不過我覺得依家未ready。」事業得意，但問到有沒有追求者，她即笑言：「未離婚前好多，依家反而無。我好滿意依家嘅狀態，有咩可以同身邊嘅朋友傾訴，夠了。」 自強女子 周建華年齡：45歲學歷：中學畢業家庭：已婚，育有一子一女經歷：雲南出生，後嫁到香港。02年在天水圍頌富商場開店賣童裝，至08年領匯收回鋪位，她剛巧看到黎智英一篇名為《不許成功見白頭》的文章，自問能做到文中提到開果汁店的三大要求，便大膽再創業。 麥蕙蘭年齡：45歲學歷：大學畢業家庭離婚，育有兩子經歷：中六時與藝術科老師關仲良發展師生戀，後一同赴美就學並結婚。夫婦99年創辦明茶房，產品曾獲選入02年奧斯卡的官方禮品包。05年豪擲三百萬在灣仔星街開鋪，卻因投資太大而周轉不靈，丈夫更愛上第三者，最後生意、婚姻皆失敗收場。08年痛定思痛，在太古的工廠大廈重建明茶房。 變通男食腦上位 配飾店轉戰內地 飾物店品牌NATKIEL老闆駱正道（阿道）原主打香港市場，去年更邀請藝人阿Bob（林盛斌）成為加盟商，增加品牌名氣。無奈租金飛升，阿道發現香港鋪「冇肉食」，遂轉戰內地，發展加盟店﹐在重慶、昆明、廈門等內地城市密密插旗，現連同港澳、台北、吉隆坡在內，共有十五間專門店及四個專櫃。密食當三番，每月盈利由一一年底的十八萬增至廿四萬。 主攻加盟店 十九個分銷點中，直屬阿道的分店只有淘大商場店、旺角新之城店及廣州越富商場店。「零售有八成毛利，但賺嘅錢無可能追到租金升幅，續約最起碼加五成，我無可能將件產品加價五成，邊有得做？」阿道指香港兩間分店今年租約到期就會結業。「廣州都無得做，因為太近批發市場。」阿道知道內地無人脈難開店，於是想到開加盟店，他解釋﹕「好似租商場鋪，外地人要俾成三萬月租，本地人只要幾千蚊。批發給加盟店嘅毛利得五成，但可以專心做好產品質素及品牌管理。」 兩年換七廠 找合適的內地廠生產飾物仍是NATKIEL最大的難題，兩年來已換了七間廠，現在的製造廠在山東，「有時係間廠出品太差，有時係我哋成日轉款，訂單量又少，間廠唔肯做。所以開多啲加盟店，賣多啲貨，可以幫我哋搵到好嘅廠來造，到時可以煩少樣嘢。」他說。做NATKIEL的加盟店需要十萬元，包括五萬元加盟費及五萬元按金，簽兩年約。「內地太多可以攞十萬蚊出來做生意嘅人，部分加盟商係行街見到NATKIEL後，主動飛來廣州搵我。」阿道表示，在內地做加盟店要懂得「打關係」，不用跟足規矩做事。「好像昆明店，舊年交咗加盟費後，無喺限定時間內開鋪，根據合約，我可以沒收佢嘅訂金。如果佢再開鋪，就要再俾。但佢今年話開到鋪，我無再收佢錢。大家留一線，好做生意。」他亦很少過問加盟商的營運，「所以傾第一間加盟店時，都係成個地區簽俾佢，再由佢去同其他加盟商協調有關開店地點、減價促銷等政策。」 元朗拳王盈利三級跳 廿八歲的唐壹孚（虎Sir）在元朗經營拳館搏藝中心，經學員Daniel注資後在朗屏開設新館，加強宣傳吸客。去年四月受訪時月賺八萬，後受惠於無綫劇集《拳王》的熱潮，會員急增五成至一千五百人，二人大半年前，再投資三十多萬開設第三間分館，不設冷氣機及訓練器材，力谷特訓減肥班，吸引瘦身一族。 教識徒弟無師傅 拳館發展如日方中之時，有三名教練突然離職，並帶走三百名學員，在同區另起爐灶。「嗰幾個教練係我一手訓練出嚟嘅，真係幾唔開心。」虎Sir慨嘆。為免事件重演，他改變宣傳策略，過往廣告都印有全部教練的相片，現只有虎Sir及女教練Teresa，他解釋：「費事其他教練用搏藝個名同我個樣出去爭生意，Teresa靚女，有助吸客。」為求穩霸元朗地盤，拳館每月豪花四萬元做宣傳，包括在人流多的街道擺放易拉架，早前又搞抽獎，以泰國旅行套票作招徠吸客，並將過往的巴士車身廣告改為小巴廣告，「八條巴士線登廣告十星期要九萬，但一架小巴每月只要千五蚊，二十幾條路線包括元朗各大屋苑，連屯門、上水及旺角嘅跨區客人都見到，只係三萬幾蚊，抵好多！」虎Sir興奮道。 套票推高盈利 過往中心的課程按月收費，每月四百二十元，共四堂。三個月前，虎Sir加入十堂及不限堂數的大額套票，「只係上一個月堂，話停就停，客人好易走，套票堂數多，方便建立感情箍客，就算客人之後唔嚟，我哋已經收咗一筆數。」他計算着，現時盈利激增三倍半至三十六萬，虎Sir正準備推出加盟制度，他自信道﹕「搏藝有名氣，多人識，我相信四年內可以開十五間分店，變成一個拳館品牌！」 希望在轉角 一二年本欄目曾採訪數盤僅可「維皮」，甚至蝕錢的生意，當中有人仍抱着希望繼續捱，有人已斬纜離場，展開新生活。 堅守者 富貴師奶繼續揼水來自台灣、揸Benz出入的富貴師奶彭慶梅，在鰂魚涌經營「一葉台灣料理店」，堅持選用台灣材料，成本大，食物毛利不到五成，雖然贏得口碑，但兩年多來已蝕超過二百萬。記者重回小店，發現午市仍極旺，兩小時內翻五次枱，更帶旺芬尼街這條倔頭巷，引來兩家新餐廳。如今生意已收支平衡，但去年十二月多假期，失去辦公室客源，生意即時插水，倒蝕六萬元。既是樓面又是收銀的彭慶梅堅定道：「我要堅持到最後一刻，鋪頭依家有名，好快就有利！」 打死不離三兄弟位於佐敦白加士街的六座雲吞麵，由馬氏三兄弟合力經營，去年三月接受訪問時，月賺僅九千元。之後推出十六元粉麵，日賣二百多碗，每碗只賺兩、三蚊，希望薄利多銷。大哥馬志成無奈道﹕「我哋無名氣，唔靠平就無人嚟食，大家都去同街嘅澳牛、麥文記或者沾仔記。」為節省成本，不做牛筋等功夫多、利潤低的食物，同時減少大地魚的分量，每日湯底成本由四百元減至二百元。開源節流，但盈利僅增加至一萬多，三兄弟每人只得萬多元人工。如今，尚未有家室的三哥和四哥仍「死慳死抵」晚晚在鋪頭睡覺。鋪頭租約尚有年半死約，三人未想過約滿後怎做，但異口同聲道：「已經洗濕個頭，唔可以丟低兄弟！」 結業者 餃皇蝕到執笠餃皇之皇去年四月接受訪問時已經虧蝕，當時仍抱希望的老闆鄧智偉，已決定於二月底結業。「做咗一年，每個月都蝕錢，連投資前後蝕成六十萬，十二月有四千蚊盈利，今個月又蝕番，仲做嚟做乜？」他慨嘆錯選慈雲山好運街市的鋪位，客人消費能力不高，又指天氣過熱，令產品無市場。記者見他一如以往，花心機挑蝦腸、水餃即包即製，他不服氣道：「有啲嘢一定要堅持，我寧願高調拉閘，都唔可以做壞自己個名。之後會搵工，希望遇到有野心有膽識的老闆。」 健身室老闆再做編劇去年十二月，本欄直擊新蒲崗工廈內的健身室Devilcoach的執笠過程，老闆鍾正龍（阿龍）更在鏡頭前淌下男兒淚。曾在無綫任編劇的他，有份編寫大熱劇集《絕代商驕》，自覺有商業頭腦，但做生意卻只懂紙上談兵，在選址、宣傳及營運上，連環出錯，結果失敗收場。阿龍已於一月中重回無綫做編劇。 註：位於西貢，售賣派對及BBQ食物的Partymate，○九年開業，一一年底接受訪問，現已結業。原店址已變成物業代理行，老闆胡逸鳴（Nik）的手提電話亦已停用，記者到Nik的家拍門，工人指他離港工作，至截稿前仍未回覆。 | ||||||