📖 ZKIZ Archives

人稱「Ba叔」的陳達志因捲入洗 黑錢案，罪名成立被判監三年，做階下囚已成事實，不過平日做慣黃大仙的他，入獄前不忘執手尾。去年底，他透過契女胡敏珊前度龐維仁，認識了金牌大風的新人 鄒文正（Terry），一手促成金牌賣盤的Ba叔，將唱片公司新人視為親生仔，更於入獄前先後將新仔Terry託孤給大契仔劉德華以及好友許冠傑，叮囑一 班圈中好友，幫手睇住細契仔。同歌神夾band

早年有內地演唱會之父稱號的Ba叔，前年一手促成金牌大風鄭東漢，以接近一億賣盤給龐維仁做主席的基金公司後，雙方關係一直密切，早有契仔劉華以及社交界 契女胡敏珊的他，在龐維仁撮合下，又跟金牌的新人鄒文正上契，入獄前仍帶住契仔周圍介紹給圈中人認識，幫他打通娛樂圈人脈網絡。

「胡敏珊雖然同龐維仁分開咗，不過Ba叔一直都有同龐維仁有來往，佢幫手搞成個deal（金牌大風賣盤）後，龐維仁仲特登帶Terry去見Ba叔。Ba叔 覺得Terry好有心做呢行，又知道Terry爹哋生前係band友，佢細細個已經開始聽阿Sam啲歌，所以特登帶Terry去見阿Sam；而家 Terry好多時都會去band房同阿Sam夾歌，Ba叔明知自己嚟緊段日子照顧唔到佢，就託阿Sam睇住呢個世姪。」Ba叔身邊人透露。

胡敏珊勁喊

有歌神幫手外，今年五月，Ba叔亦將Terry介紹給劉華認識，更叫大契仔劉華睇住今年競逐新人的契細佬Terry。據了解，並未適應監獄生活的Ba叔情 緒十分低落，曾探監的圈中友人，尤其是每星期都會陪他打牌的契女胡敏珊，更喊到收唔到聲，雖然自身難保，不過Ba叔依然記住兩個契仔。「Ba叔喺咁嘅情況 下，仲叫我哋幫Terry，佢話呢生人得兩個契仔，一個係劉華，一個就係Terry，話點都要幫佢。」有份探監友人透露。對於契爺在獄中依然記掛住，鄒文 正說：「佢好錫我，之前煩緊官司，Ba叔都幫我鋪排事業，又介紹好多音樂人俾我識，雖然有一段時間見唔到佢，不過我會好努力做好自己，唔會令佢失望。」

翻版郭富城

貌似郭富城的金牌大風新人鄒文正（Terry），現年24歲。由於父親在內地夾band，自小耳濡目染，細細個已經鍾意音樂，識玩唔同樂器包括結他、鋼琴、爵士鼓，亦曾於上海接受過聲樂及舞蹈訓練。獲陳輝虹欣賞，簽約金牌大風入行，上月推出處女派台歌《我是人》。

有求必應

樂於助人Ba叔，出咗名係娛圈拆彈專家，專門做和事老排難解紛，加上性格疏爽，不計賺蝕都照幫歌手搞個唱。他亦曾豪氣說：「邊個無嘢撈，我俾嘢佢做。邊個無飯食，我俾飯佢食。你哋（指記者）無工開無飯食，都可以搵我，我一定幫你！」故被稱「黃大仙」。

幫吳京拆彈

08年底，吳京在電影《狼牙》的宣傳活動上一時失言，對宗師葉問有不敬之嫌，令詠春門人冼國林等不滿，甚至下戰書擺擂台向吳京挑戰，幸得Ba叔和徐小明出面調停，設宴邀請雙方「坐低慢慢傾」，最終握手言和。

科水許冠傑搞演唱會

04年，Ba叔成功游說闊別樂壇12年的歌神許冠傑復出開演唱會，甚至「越境」透過人脈網申請內地演唱會批文。其後演唱會嚴重超時，晚晚要交罰款十數萬元，Ba叔亦先行墊支，連許冠傑在台上亦打趣道：「Ba叔晚晚都去『撳機』俾錢o架！」

代鄭中基追訂

04年，鄭中基向汽車經紀黃百榮訂購一部綠色平治E55 AMG旅行車，價值138萬元，並支付20萬訂金。其後鄭發現車款貨不對辦，入稟追討。05年7月，與鄭、黃素有交情的Ba叔出面擺平事件，並在庭上供稱，指出黃曾親口答應親自退回16萬元。