蝴蝶裙陳法拉為君子拉頭馬
1 :
GS(14)@2014-10-20 08:21:26
雷神早前停賽，呢期復出為咗追數，冷熱照贏大小通吃，勝出頭場大熱呂廐「執子之手」、第五場告廐冷門「馬主光輝」起孖後，第七場三班1200米佢再贏大熱門葉廐「君子協定」，復出首日未到尾場，已經大演帽子戲法，幫三個不同馬房建功，氣勢之盛一時無兩。紳士會團體名下之「君子協定」之前跑谷草最叻第二，呢鋪由雷神新接手，跑法一反常態，不留而放，結果由頭帶到尾，中段開始唔貼欄，走出中檔蝕位放頭，照樣可大勝兩位半，進步驚人，敲響谷戰勝鼓之餘，更創出跨季四戰兩冠兩亞全入Q，而二、三名分別係「有醒」及「爪皇盛水」。其中「有醒」臨門一步追過「爪皇盛水」，搭「君子協定」呢瓣3.5倍大熱Q開出，救番唔少熱門客。屈指一算，葉楚航喺近四季共六次谷草日賽都有馬贏冇斷纜，現役馬房只此一家。賽後拉頭馬時未見其中一位團體成員，即「甜蜜蜜」馬主潘志遠，但卻有馬場版陳法拉驚艷亮相，上季「君子協定」贏馬後，她曾以一身藍裙拉頭馬，呢日換上白衣黃色蝴蝶裙，一樣省鏡。葉楚航表示，賽後原本想邀請梁漢文和劉浩龍拉頭馬，不過未知兩人怕羞或趕不切落凱旋門，未有出現。葉楚航指「君子協定」雖大勝，但今場對手弱，加上本身排3檔及磅位輕，暫未可過份高估。
來源:
http://hk.apple.nextmedia.com/sports/art/20141020/18906115