📖 ZKIZ Archives

已跳槽到王維基香港電視的綠葉王艾威，今年書展推出處男作愛情小說《情聖賭神之終極一注》，跟其他才女才子拗手瓜，艾威將鑽研十五年的個人秘笈傾囊而出，隨書附送做綽頭。為測試是否有料到，早前艾威到澳門賭場挑機，結果不消廿分鐘，將庄家KO。不宜磨爛蓆

艾威書展出處男作，隨書附送的《賭神秘笈》妹仔大過主人婆！「呢種投注策略唔係一鋪一注去定輸贏，而係設定十二鋪之內嘅注碼同投注方向。一開始就不能停，唔使思考，只須跟從方式指示去落注同緊守幾時收手規則。十二鋪之內，必定分出勝負。」艾威說。絞盡腦汁研究賭術秘笈，但艾威強調自己不是賭徒。「我唔鍾意賭o架，只係鍾意計數，所以有興趣研究投注方式，而百家樂就最接近一對一輸贏法。」秘笈公諸於世前，「臨床實驗」當然不可少！九五年，艾威帶住以「計出有九種機會輸，故用十注本錢贏一注」的秘笈初版，遠赴美國拉斯維加斯賭場實戰測試。「嗰次我喺拉斯維加斯三星期，每日出動一次，每次玩十二鋪就收手去行街；一來因為我條formula唔適宜磨爛蓆，二來賭錢其實好悶，玩一陣就想走。」結果，艾威以一萬元賭本贏近十萬。

做賭術顧問

凱旋回歸後，艾威保持一年去一次拉斯維加斯做秘笈測試。直至第三年，他連輸三set，痛定思痛的他決定返港閉關改良。「經改良後，變成十四注贏一注嘅保險法，只有八種機會會輸，即係只有4.15%。」艾威一副專家口吻。再次赴美國「戰場」測試成功後，艾威從此將秘笈封存。「自己好似瘋狂科學家咁，產品測試成功後，就唔再留戀，因為已經滿足咗我對數學嘅追求。如果唔係出書，條秘笈唔會再有重見天日嘅機會。」

估佢唔到

他除了演戲亦好唱得，有指當年他在訓練班畢業禮表演一曲《柔道龍虎榜》，一鳴驚人。早前他在新書發布會上大唱Mr.的《黑色狂迷》，聽到大家拍爛手掌。

澳門挑機險勝

為一試秘笈實力，本月中艾威應邀到澳門Banyantree酒店賭廳「卡利會」挑機，而接受艾威戰書的，是在該賭場打滾十年，任職經理的前無綫藝員李衞民（前藝名李煒棋）。公開挑機，背住秘笈失靈壓力的艾威，神色凝重在VIP房花了十五分鐘埋首在「路紙」寫下記號，之後雙方以十五萬籌碼下注，用四副啤牌對賽。艾威一開始便連贏四注，但他反而說：「牌風太順，令秘笈顯唔到實力！」話口未完，對手迎頭趕上，艾威輸人不輸陣，繼續淡定按秘笈下注；並大部分時間以「黐開買黐，跳開便跳」的下注方式進行。玩到尾段，艾威連環中注，結果只花二十分鐘，便將對手的十五萬贏走。勝出後，他劈頭第一句說：「賭錢真係好悶，嘥精神嘥時間！」勝出的艾威說沒有絕對致勝術，只有理性規律，絕不能自亂陣腳；敗在艾威手的李衞民亦說：「喺賭場做嘢十年，見盡唔少賭客，好多時都輸喺情緒上，衰一鋪就動氣亂晒。但艾威由頭到尾都好相信自己條方，所以佢都處變不驚，結果反勝。」

政府攔路港視開台一波三折，一批由無線過檔投王維基的藝人被迫到走投冇路；當DaDa的前度、大隻仔李雨陽已轉行賣雞！由藝人變雞販，送貨派傳單一腳踢。至於開曬聲要賣錶賣車賣樓套現的艾威，已決定以半百之年拍全裸戲，賣埋身！拖喼送貨

唔想人停口停，李雨陽早於今年初已鋪定後路，聯同三個圈外朋友，合資搞網上雞檔，出售一款叫「原味雞」的有機冰鮮雞。為減低成本，轉做雞販的李雨陽放下身段，親自做埋送貨，希望借自己僅有的明星效應招客。「初頭開檔，李雨陽為咗賺得一蚊得一蚊，客人訂一隻雞佢都照送貨。因為要慳，所以唔租貨車，每次送貨都係自己攞住啲雞去搭港鐵。」知情者爆。還未拍完港視劇《大眾情性》的李雨陽，上週六（三月十五日）趁無通告，即抽空返去位於觀塘區工廈的冰鮮雞工場幫手。過不久，便見他拉住個大喼行去附近港鐵站。原來當日李雨陽約了客人在港鐵站交收，其間又主動教客人如何煮雞，有紋有路。

目標回本

送完貨返工場，轉個頭又攞住一大疊宣傳單張，出動到附近的瑞和街街市派。其間有接過傳單的師奶覺得眼前這個高大「雞佬」相當熟口熟面，一臉疑惑，但李雨陽不單沒有尷尬，反而食住上，落足嘴頭推介。記者上前訪問，李雨陽說用了六位數字投資，包括做宣傳及買密封包裝用的機器。至於一日究竟賣到幾多隻雞？他說：「而家一日賣六、七十隻，今年目標係一日賣四百隻，咁先回到本。每日香港市場可以消化二十萬隻雞，我哋希望將來可以做到佔市場百分之一，即係每日賣二千隻。」轉營做雞販，李雨陽放下自尊還要犧牲健碩身形。「自從做咗賣雞，我成日要向朋友推介搞試食，食到自己都肥咗廿磅。」

名廚代言

有機飲食大行其道，有名廚周中師傅做代言的「原味雞」來自東莞有機雞場，強調無激素之餘，賣點是「雞有雞味！」，售價每隻要八十八元，價錢比市場上普通冰鮮雞貴一倍。

艾威狂操等剝

李雨陽賣雞，身為港視烈士的艾威，在前冇去路之下，亦一股作氣。已經五十五歲的他，決定於下月開拍，與周柏豪合作的新片《陰陽大酒店》中全裸上陣，一脫求生。因為要剝，艾威近日更的起心肝搵老友錢小豪做教練狂操，銳意在一個月內減十磅踢走豬腩；每日操三粒鐘，包括跳繩、跑樓梯、踩車呔及打拳。年過半百仲要賣肉，艾威說：「我要用最佳狀態去面對一生最壞時刻，唔想全裸見大肚腩，我決定狂操展現肌肉，同時亦想話俾人知，有啲嘢係唔受年齡限制。」