|
||||||
|
英超、西甲、意 甲、德甲聯賽大局已定，曼聯、巴塞隆拿、AC米蘭、多蒙特四隊攞聯賽冠軍，下屆歐聯睇嚟又係英超對西甲嘅局面，德甲水準次一皮，意甲球員開始青黃不接，國 際球星鍾意去西甲或英超，乃大勢所趨。今個球季餘下來嘅高潮，就係五月二十九日星期日凌晨二時四十五分在溫布萊球場舉行嘅歐聯決賽，曼聯大戰巴塞，好彩時 間啱啱好，大家睇完後仲可以上牀睡覺，唔駛返工。曼聯與巴塞幾乎已穩奪聯賽冠軍，在餘下國內賽事，可盡遣副選上陣，主力養精蓄銳，準備決鬥。 巴 塞照計牌面贏晒，恩尼斯達、沙維、美斯呢個鐵三角，世界第一，連摩連奴都怕咗佢地，唔敢搶攻，只敢死守等反擊博懵。費格遜話打電話向摩連奴請教噃，唔通又 學死守求突擊呢一招？以往美斯對住英超球隊，表現較為失色，原因係英超隊嘅體力與氣力相結合嘅快速打法，最好用來應付美斯呢類細細粒，腳法美妙嘅球員，而 曼聯有鐵衞組合雲達沙、費迪南、維迪治有足夠防守力抵禦巴塞一段長時間，但能否守足九十分鐘，係有疑問嘅。無論如何，呢場波，唔睇係球迷損失。
名 氣球員老化，對球隊有好大傷害，車路士今季好明顯啦。NBA方面，上季冠軍湖人隊竟然俾達拉斯小馬橫掃，大敗到兩位球星要撞人洩憤，被趕出場，羞家到極。 湖人與車路士面對同樣問題，老去球星打到五月就開始疲累，不能保持水準，除非有良好年青後備球員可以發揮作用，等啲老人家可以唞一唞，但車仔與湖人都冇 噃，成為死症。呢兩隊班霸來季要大換血嘞，湖人只應留下一位拜恩，一位拜林；車路士就要賣走好多球員，如杜奧巴、卡奴、費拉拿、保辛拿、艾辛、林柏特等等 皆巔峯已過，但買番乜嘢球員呢，煞費思量。湖人方面因美國球壇只准交換球員，不准單純買賣，技術問題多多，要重建湖人，需時三四年，仲有排搞。企業大公司 要從車路士、湖人、阿仙奴吸取教訓，用人唔可以太老，亦唔可以太年輕，要不時培養真正有前途嘅新血（如韋舒亞），又要留住真係有用嘅老家伙（如傑斯），此 乃一流CEO嘅責任。 |
||||||