📖 ZKIZ Archives

沙膽彤大手買入佐丹奴，引發無限遐想，令人以為佢遲早會食起整間嘢。但喺新礦資源投資者推介會上，佢老人家親自解畫，話絕冇咁嘅意思。只不過佢好欣賞佐丹奴嘅管理，覺得現任主席皮蛋‧劉國權做得好好，以實際行動支持佢。

換言之，彤叔即使沙膽，對運作良好之佐丹奴佢亦唔敢去碰，故此佢做咗大股東都唔會派人入董事局，費事諸多干預，而只係做個被動嘅投資者咁講。鬼佬話齋，If it ain't broke, why fix it? 皮蛋‧劉放心啦！

彤叔大晒冷

皮蛋‧劉管佐丹奴，沙膽彤完全放心，新礦資源就唔同啦。呢間內地公司早前喺香港上市，而表現乏善可陳。後來俾彤叔睇中成間買起，進而分拆上市，搵前壹哥曾 蔭培（即係特首弟呢？）做主席，可惜鎩羽而返，搞到要第三次上市。不過近排多新股上市，要脫穎而出亦非易事。有乜計？佢再用恒大招股群星拱照呢一招，搵咗 L君‧劉鑾雄、楊受成、張松橋、朱太、林建岳、恒大行政總裁夏海鈞、長實葉德銓等大晒冷。得唔得呢？

范太不棄故國

王光亞未落香港，人大常委范太已一早吩咐定，叫佢到香港之時千祈唔好講邊個做特首。王主任又果然聽話。記者以此問佢，佢第一時間作反應：「你又唔會選 我！」醒！王主任都要聽范太話，可見其quali。呢個quali又非一朝一夕建立起嚟者。范太做女之時，已精忠愛國，六三年佢仲讀緊聖士提反初六之時， 只不過十八歲女啫，已經寫咗篇題為《天地的不朽精神 —— 屈原》嘅鴻文，結語曰：「屈原是我國愛國者中一顆彗星，他不屈不折，任勞任怨而不棄故國的精神，值得我們學習。他一生為國為民的忠直，更值得我們敬仰。」 六三年饑荒大逃亡潮剛過，而范太歌頌「不棄故國的精神」，此又怎不難得？冇咁嘅quali又點得王主任掂乎？應該者。

法律行動唔止瀉

早前敝刊寫超大，五月廿六日見報之時，佢哋嘅股價即時跌咗接近三成，係插水式。一個星期後佢哋出咗封一頁紙長嘅律師信俾我哋。向敝刊「採取法律行動」之 說，更廣為宣傳，上晒各大國際通訊社，可惜對股價似乎冇乜幫助，股價再跌多十零個巴仙，此後繼續滑落，近兩三日至有番些少起色。見到此番局面我哋都唔識得 講，由表面證據睇嚟，「法律行動」似乎唔多止得瀉囉！Lomotil得唔得呢，又？

貨櫃先驅領獎

六月十一英女皇官式生日，頒咗個CBE俾和黃旗下之國際貨櫃碼頭副主席John Meredith，以嘉許佢對國際航運之貢獻。佢老哥有何貢獻？差唔多四十年前佢開始咗香港第一個貨櫃碼頭。當時貨櫃係新鮮事物，大家都唔知呢味嘢得定唔 得。故此佢嘅工作之一，係測試唔同顏色貨櫃對裝載嘅貨物有乜影響。邊樣測試法？佢將一個櫃髹黑色，另一個櫃髹白色，分別裝滿安全套運去澳洲。前者運去墨爾 本，後者運去雪梨。佢話雪梨現今人口多過墨爾本，原因即在其中。信焉？

本週鏡頭

特赦AM車？高官自煲呔打落，莫不以鏞記為飯堂。食晏時分，成條威靈頓街由是AM車川流不息，包括喺雙黃線上落。林鄭話堅持法治精神，僭建冇得特赦，即使鄉親父老一樣冇面俾。貫徹法治精神，AM車有冇得雙黃線上落呢？可惜林鄭唔管交通法呢。

中環人語迷你版

“實行剪咗佢。”估中邊個中環人講呢句說話，送你dexim CYL Premium Silicone Case for iPhone 4 (DLA 155)一件有意參加者，請於六月二十日24:00前將答案電郵[email protected]小宗只接受電郵，郵寄免問。本刊員工及 直系親屬不得參加。為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。超過一位讀者估中，先到先得，恕不接受上 訴。答案及中獎者姓名將於一一年六月二十三日本欄揭曉。

上週人語揭曉

“六四只係小小的沙石。”答案：謝凌潔貞得獎者：C.K.LAM中獎時間：1:00pm 8/6/11

金牙大狀講[!84C5]

王光亞君臨特區新科港澳辦主任訪港，一改城府甚深之前主任廖暉嘅高壓作風，非但作前所未有之公開演講、同年輕人對話，更加去街市擦燒肉、食蛋撻，態度開 放，形象上得分唔少，不在話下。不過咁有咁弊。肥彭去旺角飲涼茶、去擺花街食蛋撻，冇研究之致，事關佢係港督，形象親民，香港人受落，公關贏晒。王光亞唔 係港督，但擺出成個港督咁嘅款，咁又置煲呔 —— 及未來之特首 —— 於何地？江澤民都去旺角巡，佢係主席，做乜都得，但王光亞唔係。再者，過渡後，假假哋，特區都叫話實行「港人治港」，外交、國防以外，照理中央一切唔管。 家吓王光亞落到嚟，左一句香港資產泡沫化，右一句物價漲升，再又話支持香港人做解放軍、萬萬要搞好國民教育等等，大佬，家吓究竟邊個管治緊香港先？係煲呔 定係王光亞？觀乎煲呔以降嘅高官對王光亞之卑躬屈膝，邊個係真老細則又清楚不過。咁搞法，仲有「港人治港」乎？不如北京接管啦，笨！起碼王光亞形象親民過 煲呔呀！

上環永樂街順興行，是享負盛名的「皮蛋大王」。其招牌溏心皮蛋與鏞記出自同一師傅之手，六星級酒店都跟順興行入貨，就連前華探長呂樂、利孝和夫人、新地郭氏三兄弟都是它的老顧客。 順興行由郭榮輝和李煥苦心經營，兩夫婦胼手胝足，由鐵皮檔做到買入地鋪。一家八口由草根變成富豪，溏心皮蛋是名副其實的金蛋。 郭榮輝四年前病逝，遺下市值三千多萬元的舖位。結果錢作怪，家人分成兩派爭產，各出奇招，骨肉相殘。 不變的，只有皮蛋的味道。現年七十多歲的李煥， 縱使中風後步履蹣跚、神志不清，依然日日開舖，默默守護「皮蛋大王」的金漆招牌。

這宗溏心皮蛋爭產案，五月中在高等法院開審。順興行創辦人、亦即「皮蛋大王」郭榮輝，與妻子李煥共育有兩子四女。自從郭榮輝病逝後，以兩名男丁為首分成兩派，展開遺產爭奪戰。 「阿爸只講過一樣嘢，好仔不論爺田地，我淨係記得呢樣嘢！」三弟郭德成在庭上，誓神劈願說，父親遺願是將財產分予六名子女，自己並非處心積慮謀奪身家，他更激動地說︰「我都唔想將家事放上法庭，今日嘅訴訟都係想保護爸爸嘅遺產！」 他的兄長、二哥郭德明卻一聲冷笑，反駁指弟弟立心不良。父親在生時，弟弟不斷中傷他，父親彌留時，更阻止他與母親探病，因此連父親最後一面，甚至喪禮，二哥都沒有出席。他不齒弟弟所為，直說為了公義才加入戰團，「我淨係想平靜過生活」。

三千萬舖位

兩兄弟在庭上互相指罵，直指對方欲賣掉三千多萬元的舖位。事緣九一年，父親郭榮輝以金禾投資有限公司名義，斥資三百七十多萬買入上環永樂街地鋪和閣樓。此外，公司亦曾持有四個物業，包括柏景臺、匯景花園等。郭榮輝持有金禾五成股份、妻子李煥持有兩成、兩名兒子各佔一成半。四年前郭榮輝因肺癌過身，三弟卻爆出，父親死前兩個月曾立下遺囑，重新分配自己的金禾股份。根據遺囑，父親將五成股份，各分一成予四名女兒，餘下一成由兩名兒子平分。 三弟郭德成與四姊妹連成一線，要求法庭頒令父親臨終時的遺囑有效，因為遺囑一旦生效，他們共持有順興行的六成股權，操控鋪頭買賣權。母親李煥則與二哥郭德明聯手，質疑遺囑的有效性。

孤獨老人

兩兄弟爭認是父親最信任的兒子，一時間難辨真假，兩兄弟的親母李煥成為關鍵證人。滿頭白髮、身材略胖的她，這天輪椅代步，由印傭推上證人台。郭老太花盡力氣，跟著法庭書記逐字逐句地宣誓，但一開口嚇呆在場人士，「我，郭榮輝，謹以至誠……」郭老太把自己的名字說成亡夫的名字，再試幾次後情況依然。法官質疑郭老太的精神狀態是否適合作供，辯方最後決定放棄傳召李煥。「你唔好諗咁多，我知你想攞番間鋪，啲女講咩你唔使理o架，保重身體！」審訊當天湊巧有街坊經過高等法院，一見李煥便肉緊地握緊她雙手，李煥不懂反應，卻眼泛淚光。數日後，記者跟隨李煥到中醫診所覆診。這天她精神不錯，但心中似有無數鬱結，縱然口齒不清，仍然拉著記者用力地說︰「牛仔（三子）個死人嘢，唔俾番間鋪我……佢哋無嚟睇我，個個唔掛住我……間鋪唔賣！」李煥說時拳頭緊握，突然淚如雨下。 自從丈夫郭榮輝一○年過世後，李煥便過著獨居生活。好景不常，她一年後中風，同時患上抑鬱、語言障礙、偏癱等，起居飲食由印傭負責，只有每星期兩次的中醫覆診是由二哥郭德明接送。 自從爆出爭產糾紛之後，順興行便全盤交由三弟郭德成打理，李煥則在兩條街外自立門戶，用自己名字開舖。由於她中風後不良於行，因此請人看鋪，但仍然堅持每星期會有一、兩日落鋪親自賣皮蛋。

鴨蛋街情緣

對李煥而言，皮蛋就是她的一生。李煥出身貧苦，十六歲在上環永勝街打工。她替酒樓倒垃圾、幫洋人倒夜香，由於性格開朗、做事勤快，經常收到打賞。李煥與一群姊妹經常聚集一起，因為她們「又惡又嘈」，令人以為她們是「死飛女」，避之則吉。李煥的大情大性，卻吸引了郭榮輝。郭榮輝是鐵皮檔「順興蛋檔」的老闆，她對李煥展開熱烈追求，不出十七歲，李煥便下嫁郭榮輝，從此夫妻合力打理皮蛋店。 順興行的皮蛋是出自皮蛋師傅楊位謀之手，軟滑香濃，深受顧客歡迎，當時最頂級的酒店，如半島、喜來登等都向順興行入貨，順興行很快便成為皮蛋「一哥」。「我記得我小學時，阿媽話有個姓利嘅夫人嚟蛋檔買皮蛋，仲踎喺度同我阿媽一齊揀，到俾錢抬頭一望先知嗰個係利孝和夫人！」二哥德明憶述，母親每天都說有某某名人幫襯，但許多都是自己一人前來，打扮得平平無奇，就如前華探長呂樂，每次買完半打皮蛋還會「吹陣水先走」，「因為大家都係汕尾海豐鶴佬人，同聲同氣，特別親切。」

月亮惹的禍

順興行由鴨蛋檔做起，從永勝街租鋪、租貨倉，到九一年買入永樂街地鋪。郭家兩名男丁，中學畢業後亦順理成章一同打理店舖，郭榮輝亦漸漸脫手不理。 終日遊手好閒的郭榮輝，沒有跟糟糠妻享福，反而在鄉下包二奶，更買樓給對方。李煥與丈夫關係決裂，拒絕與丈夫共用餐具，怕染上性病，更經常以淚洗臉，「老太係惡死啲，佢係成日嘈嘅，有時飲茶佢都有講o架！」皮蛋師傅楊位謀的女兒透露，自從郭榮輝有外遇，李煥心情很差，對著客人惡形惡相。 想不到郭榮輝包二奶，間接令整個家四分五裂。一次李煥跟三弟德成爭吵，吵到面紅耳熱，德成拋下一句︰ 「妳唔係我阿媽，大陸個女人先係我阿媽！」此話一出，即傷透母親的心，李煥立即更改自己的遺囑。其遺囑原定將名下金禾兩成股份平分予六名子女，但事後她剔走三弟，遺囑內更寫明︰「本人特意不分發任何遺產予兒子郭德成，因在我生平中，他否認我為他的親生母親。」後母親又與四女有爭拗，再剔走四女。郭家自此家嘈屋閉，他們亦懶理街坊目光，在店舖內互相頂撞，街坊笑稱這是「月亮（皮蛋）惹的禍」。

偏心二哥

自從李煥與三子關係勢成水火，更加偏愛二哥，令其他子女看不過眼，「媽媽一直都對二哥好偏心，由細到大要咩有咩，係好離譜o架，幾百萬幾百萬咁俾！除咗大家姐無喺鋪頭幫手，我哋其他兄弟姊妹個個都喺鋪頭大，二哥成日都下晝先返到嚟，嗰時都賣完啦，仲使佢幫手咩。」孻女淑瓊說，兩位哥哥幫手打理順興行，但各有副業，九七年二哥在母親資助下，發展中藥研究的生意，全身退出順興行。三哥則一邊打理順興行一邊炒樓，成為父親「理財顧問」，父親時有斬獲，九七年更成功避過金融風暴，深得父親歡心。久而久之，形成母幫二哥，父幫三弟的對立局面。 「係阿媽覺得我哋睇唔起佢（二哥）囉，但事實擺在眼前，你都聽到啦，用咗八年去搞個咩臨床（中醫藥臨床實驗），結果搞到啲咩出嚟吖？」五女淑華不屑地說。於是三弟與四姊妹連成一線，與母親、二哥對著幹。

不賣物業

○九年郭榮輝證實患上肺癌，病情急轉直下，需要長期住院。二哥稱，弟弟一方不但隱瞞父親病情，更請來二十四小時看護，慎防有人埋身，「探親阿爸一定會有人喺度睇住你，唔係阿妹就係啲女婿，總之唔俾埋身。但阿爸一早已經用鶴佬話同我講定一定唔可以賣鋪！」 三弟一方經常守在病房，父親臨終前的兩個月，更召來律師前來醫院訂立遺囑。律師在庭上供稱︰「當日情況係有啲混亂，因為有好大棚人哄埋嚟，似乎好有興趣想聽到郭生指示。但最後死者覺得唔方便，話自己未定主意。」但兩天後，郭德成再與律師單獨前往醫院，成功為父親訂立遺囑。 遺囑以外，三弟一方亦稱，父親已簽訂一份生意轉讓合同，以一萬元將順興行生意全權轉讓予他，連內地物業也一併轉到三弟名下。 父親逝世，二哥與媽媽不但見不了父親最後一面，德明亦指摘有人激到媽媽爆血管。一一年年初，李煥與四女淑貞為小事爭吵，淑貞向母親連珠炮發：「你黐線！精神有問題，無資格喺順興話事！」兩人你一言我一語罵個不停，最後李煥走出店外抖氣時跌倒，爆血管送院，事後證實中風。 法官本週二宣判，直指李煥一方，與郭榮輝關係一般，而次子一直專注個人的中藥事業，無意繼承，裁定郭榮輝遺囑有效，李煥與二子敗訴。郭家兩派更勢成水火。李煥自怨自艾，丈夫不忠，子女不孝。但其實，郭榮輝訂立遺囑時，曾在備忘上寫下「不賣物業」四字，但最終沒有寫在遺囑上。縱然郭榮輝臥病在床，依靠氧氣罩維持呼吸，徘徊喺垂死邊緣，但最記掛的，仍是與妻子打拚半世紀的心血。

溏心皮蛋是這樣煉成

四、五十年代，許多漁船停泊上環沿岸，因漁民需要鴨蛋的白漿搽魚網絲以增強韌力，故皇后大道中至永樂街一帶的鴨蛋牌檔，開到成行成市，永勝街因而得名「鴨蛋街」。順興行早年將舖位一個小角落，分租給「開源蛋行」的楊位謀。開源承包了鏞記的皮蛋，有次鏞記要求楊做出「啱心水」的皮蛋，令楊苦惱不已，順興行老闆娘李煥主動幫手逐缸逐缸試食，終試到一試難忘的皮蛋。楊遂向鏞記老闆推薦，對方大為讚賞，順興行亦採用了開源的皮蛋，溏心皮蛋就是這樣煉成。開源蛋行於七十年代交由楊位謀兒子接手，青出於藍，將蛋黃的溏心醃製成金黃色。而自郭榮輝死後，順興行由三弟全權打理，皮蛋不再由開源供蛋。記者曾向順興行查詢，對方只說是從內地入貨。李煥另起爐灶「李煥糖心皮蛋」，堅持繼續向開源入貨，楊位謀兒子會親自為李煥挑選靚皮蛋：「識咗幾十年老朋友，我一定俾最靚嘅佢，最緊要係份情！」

皮蛋大比併

本刊請來曾在多間六星級酒店擔任大廚的周中師傅，試食順興行和李煥皮蛋。周師傅大讚李煥的皮蛋「好多松花，食落又香又軟滑」，順興的皮蛋則輸一大截：「從外表睇有松花的皮蛋就係靚嘢嚟，呢隻無，無花紋嘅，同埋一切開睇你見到個心流出嚟就係溏心囉，但啲死實實就唔靚喇，食落又揦口，澀啊！」總結李煥皮蛋在各方面無得輸！