|
||||||
|
同樣來自拔萃女書院嘅港姐冠軍麥明詩和亞軍龐卓欣，在娛樂版明爭暗鬥，盡顯拔萃女子好勝之特質。要 數女拔萃在政、商、文化，甚至娛樂界名人，真係數唔晒，好似前運房局局長鄭汝樺、郭炳湘老婆李天穎、賭王個女何超鳳、莫文蔚、作家王迪詩，不過最「把炮」 嘅係讀書時花名叫「周海豚」嘅TOM.COM大股東周凱旋。 讀書時貴為校內泳隊成員的她，唔單只游得快，依家更加係水喉充足。五年前，母校要斥資四億重建佐敦道校舍，舉行籌款活動，周小姐率先承諾作為校舍重建嘅 「underwriter」，為籌建校舍包底，此善舉本可以名留千古，但佢又唔學得誠哥咁，要求有個牌匾，難得佢極之低調，連籌款晚宴都唔見影，喺周凱旋 基金會網址，都只係輕輕提及○八年曾捐款予DGS Education Foundation Ltd.。咁大手筆都係圍內校友先知咋！梗係，咁早揚開晒，影響其他校友捐錢熱情嘛。 金融逍遙客：抵飛之選Round the world 游走於中港台併購、私募投資的金融多棲動物，現為多間上市公司主要股東及董事 逍遙客慣常同班中環友有雪茄局，雖然個個都身經百戰，但仍因股市搞到垂頭喪氣。好多人羨慕喺股票上搵到錢嘅人，但更多人低估喺股票搵到錢嘅難度。逍遙客都 算個老戰士，至今經歷過87、97股災、2000年科網股爆破、03沙士及恐怖的08風暴。呢幾個月已減倉七成，揸住嗰三成亦算實力股，但呢次急跌下亦不 能幸免，心仍難免有滴血感覺。想起那句：「價值投資只會遲到，但從不缺席。」安慰吓自己。經重創的港股，今年餘下日子肯定只有反彈，唔會有持續性升勢。諗 起無甚作為，逍遙客在吞雲吐霧中，盤算點好好俾自己一個逍遙之旅。諗起幾年前充實的環球旅行，的起心肝，再享受吓round the world超抵機票。呢種機票嘅超值程度簡直匪夷所思，但又唔係太多人知道，國泰機票出名貴，香港飛洛杉磯頭等15萬，商務也要6萬，但一張香港出發飛美 國，轉飛歐洲（多站亦可）、再返香港頭等round the world 亦同樣只收11萬、商務6萬。有時間嘅話，喺巴黎、巴塞玩埋，經中歐落馬爾代夫曬太陽，再返香港都係同價。唯一條件係航線須完全順時針或逆時針，唔可以飛 返轉頭，即係美洲去就歐洲返，歐洲去就美洲返。看着手上國泰股票已由$19碌落$14，惟有快啲訂番張round the world，就當報番少少仇！ 中環寸嘴：6:00pm後食全港最貴菠蘿包 工廈大王楊耀松長子，是各大有名食肆之VIP，喜歡研究城中有錢佬對食之要求，透過美酒佳餚，察看人生百態，讓讀者「嗒」落有味。 唔使等到下個禮拜三秋分，去到食肆已經一葉知秋啦！踩上去朱太（金利豐老闆）喺銅鑼灣間Sharp 18食晏，成個場計埋我都係兩枱客，靜英英，淨係得set lunch揀，嗰味煎䱽魚前菜有水準嘅，話晒朱太來自鴨脷洲，對食魚更有要求，主菜揀咗碟焗豬扒飯都唔錯，啲飯粒有口感。唉！市道唔好氣氛差啲，隔籬枱鬼 佬客似朱太代理，「秒秒撥」嘅名錶Franck Muller伙記；睇電視見到朱太都冇咁容光煥發，咁又係呀，依家仲有人要殼咩？所以話，此一時不同彼一時。不過咁，我都係要食名牌，但態度要改變。嗱！ 嗰日走去尖東搵個賣酒老死吹水，就校啱時間，六點鐘去帝苑酒店，買佢全港最貴、原價$18嘅菠蘿包，六點後有六折，盛惠$10.8，不過佢衰衰咁收埋喺櫃 位入面，慌死俾人搶晒，都有好多西裝友、OL嚟買o架，蛋糕有八八折嘛。我都教啲老友，呢啲時候咪飲「Mouton Cadet」（武當契弟）囉，話晒係法國酒，Market Place做特價$158兩支，買夠六支有八五折添呀。呢啲時候一定要適應吓，早排我都將棺材本（股票）掟晒貨套現，正所謂留得青山在，哪怕冇柴燒。I don't see the end of the tunnel yet，我都好驚o架，經濟唔好，驚啲租客走咗，我好寂寞呀。 老人斑襲小超 小超李澤鉅講解長建和電能合併時，以「化妝」來比喻公司裡面借貸多，拆晒化妝為之「素顏」計法；出名數口精嘅佢亦以素顏示人。年僅五十一歲嘅小超，唔知係 咪去得澳洲巡視業務多，吸收過多紫外線，面上啲老人斑仲多過佢老豆喎！有相為證，大家對照吓喇。去斑並非女人專利，唔少金融界男士都會去做激光去除老人 斑。出嚟見人，呢啲錢唔慳得嘅。 鐸叔強勢出擊 正是有人辭官歸故里、有人漏夜趕科場。正當紙媒一片哀歌之際，《華爾街日報》亞洲版呢個禮拜起擴充版面，回復大報（broad sheet）規格；更又一分而為A、B兩疊，加強週五消閒、地產內容。據其老總講，加料達五成之多也。梅鐸買咗《華爾街日報》後銳意改革，此趟擴版加料， 莫非佢老人家睇到紙媒已經到咗個轉角市，由是強勢出擊？我哋梗係望佢啱啦！ | ||||||
689使出兩招——統戰兼分化，拉攏自由黨主席張宇人入行會，為自由黨製造內部矛盾，激到田少扎扎跳；一班拔萃仔喺舊生會聚會時，內部討論張宇人和田北俊兩位知名校友，爆響口謂田少以往貴為自由黨大佬，都扶持過張宇人，位於銅鑼灣新地旗下的世貿中心會（World Trade Centre Club），五、六年前就係由田北俊穿針引線，推薦張宇人嘅公司擔任會所飲食顧問，收三球一年㗎，如果唔係張宇人又點喺立法會飲食界別出線呢？ 對此田少的回應是：「你繼續去了解吓。」仲俾個伸脷嘅emoji做反應。但班拔萃佬又謂，既然田北俊已退任自由黨主席，咪俾機會「後生」上位，唔好學得以往田少做自由黨主席咁，一王兩后（註：劉健儀及周梁淑怡任副主席）頂住啲位，搞到啲細嘅冇上位機會，畢竟年屆六十七歲嘅張宇人入到行會，可能係佢政治生涯嘅高峰。 大火船釣泥鯭闖禍 新加坡九架裝甲車由台灣返國途中「滯留」香港，引發諸般猜測；包括阿爺唔妥李顯龍手指拗出唔拗入，喺南海糾紛企錯位，撐海牙法庭裁決，非要懲戒不可，由是吩咐特區海關做嘢。是耶？非耶？當事人唔出聲，外人無從得知。但中環資深觀察家睇過隻船嘅航程，發覺佢由高雄開出，先去廈門再嚟香港，路線奇怪。按理隻船載住啲敏感軍事物資，冇理由唔兼程趕返新加坡啫。兜兜轉轉，直情慌死冇人發覺咁嘅款，何也？無他，生意淡薄，為咗維皮，即使係APL嘅大火船亦要學的士釣泥鯭咁，逐處埋站接貨，以致闖禍。照計新加坡大把儲備，專船送啲裝甲車返歸都得啦，何苦坐泥鯭船呢？有啲錢係唔慳得o架，李生！ 中環寸嘴一雞三味冇得輸 同我識咗廿幾年嘅滙豐退休banker由溫哥華返咗香港，大家都喺番邦同洋鬼子外匯traders周旋過，一於去家全七福聚一聚，憶起洋鬼子banker好×寸，有錢搬去都仲要受氣，講明we are flooded with money，好似呢排外匯上落咁大，喺銀行佬面前要有台型先得！嗱，我作為精明投資者，揸住本位係美元，去做carry trade，借錢去short Yen，再long高息貨幣，咁就一注本錢做三單生意，氣勢都拋死銀行佬，佢哋都係見生意開眼！好似一雞三味咁，第三味係有雞雜內臟嘅，咁就保證係新鮮雞，唔係好似依家乜乜中學雞、大學雞，又專業小雞！家全七福梗係要搵招呼開「大劉」嘅大家姐「阿文」嚟同我點菜，徇女士要求，叫招牌薑米蛋白炒飯，吖，食落都唔係我平時食開嘅style，唔夠薑喎！不過我心情好唔彈佢鐘，即刻問個「阿文」究竟，啊原來要好似Facebook Like咁，打單時打三粒星——「加薑粒」，仲要話明乾身，好，咁就來多一碟；「阿文」不愧服侍慣大劉，我輕輕噏吓：「吖，對面枱嗰碟馬仔好似幾靚喎？」佢即刻同我去廚房撲碟出嚟！ 楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 大劉個朵先夠響 以往有賣車仔推銷手頭二手七人車時，透露上手是「大劉」的，立即就賣得出，可見大劉魅力猶在，「梁英偉」名字未必人人識，但講係「大劉」愛美高舊拍檔就令人另眼相看。上月中，梁英偉發展的旺角希爾頓花園酒店開幕，焦點去晒來剪綵的香香公主岑麗香身上，主人家梁英偉伉儷恍似靠邊站；但最近「大劉」當紅，梁英偉以「大劉舊拍檔」身份再曝光接受訪問，才達到宣傳其新酒店公關效果。其實梁英偉在愛美高與大劉共事時都有其「小鱷」本色，八五年二月，有班基金佬以高價接咗大劉手頭愛美高股份，大劉辭去主席一職，由梁英偉接任愛美高主席，靈魂人物一起身，愛美高股價三個月狂插五成，大劉趁機以低價買回愛美高股票，初嘗做金融大鱷滋味，七個月之後重新入主愛美高，梁英偉亦退出董事局，二人其後分道揚鑣，但三十年後，梁英偉仍脫不掉「大劉舊拍檔」呢個朵。 | ||||