週末廢語 人在中環
http://manincentral.blogspot.hk/2013/06/blog-post_6063.html我得承認，我係好膚淺的。我查實覺得，TBB《求愛》真人騷，幾好睇又幾好笑的。
係咪因為喜歡睇人仆街？可能係丫。但果班男仔同女仔，我其實覺得，現實社會的確係有唔少咁樣既人。真人騷既製作手法，多少係將一個人既性格缺點，刻意放大咁呈現響觀眾既眼前，以收到像戲劇般既效果。然而呢班「演員」所擁有既人性缺點，其實或多或少都存在於我地每個人既內心深處。只係聰明既人，總會懂得運用理智去壓下果啲人既劣根性，令呢啲潛藏響內心既陰暗面，唔能夠輕易散發出嚟。
善良同智慧，某程度上我覺得係不能分割的。
*****
呢個星期，讀過幾篇有關名校轉直資既文章。
我以前讀果間中學，早幾年都轉咗，學費仲好x貴。朋友問我，諗唔諗住俾個仔入去讀，話晒old boy既子女，應該有啲優勢。
「優勢？你講吓好。」我苦笑：「我呢亭窮old boy，捐個尿兜俾學校都唔夠錢啦，有咩優勢可言？都未計，有N個人同你爭入學。」
好多年前，我仲響果度讀緊中學既時候，我記得我既同學仔之中，好有錢既又有，基層既亦都有。當然，亦有好多係中產既同學仔。同學仔來自不同階層，我覺得某程度上係擴闊咗我既眼界，讓年少無知既我，起碼清楚認識，唔同階層既人，生活會有點樣既分別。學校轉成直資，最窮果個既老豆都係醫生律師…小孩子入到去讀書，見嚟見去都係社會上層，眼界無形地被收窄。同我果個年代相比，學校既學生或者響公開試攞A既能力，可能有過之而無不及，但對社會各階層既理解同體會嘛…我其實幾悲觀的。
我其實相信，一個人既所謂「競爭力」，對世界同真實社會既認知，遠較學術上既能力來得重要N倍。從來都唔知「民間疾苦」為何物既後生仔，我偏見地認為，叻極都有限。
「咁你真係唔諗住俾你個仔試下？」
「到呢一刻為止，我既答案，都係No。」
仲有一個理由既，我估按依家咁既形勢，我個仔如果「有幸」入去讀既話，怕且都必定係最窮果幾個。太多有錢同學仔同佢一齊成長，我總係覺得會唔係好妥。
祝大家有個愉快既週末。