📖 ZKIZ Archives

唐安麒： Hard sell不如 Heart sell

1 : GS(14)@2011-02-13 13:39:37



見識過日本人的職業道德，唐安麒希望在美容界開闢清泉。

開美容院，她押上自己的名聲。業務擴張至台灣，她親身帶着美容師跟台灣黑幫周旋。客人在 Blog留言，她親自回覆。早已「上岸」，她繼續進修鞏固專業形象。她說，「世上只有兩種人，一是不斷學習，一是被人淘汰。」她是前者，她是唐安麒。
記者：陳皓怡　攝影：羅君豪

「美容院有樣嘢叫『劈場』，唔理你用乜手法，總之有客拎張卡出嚟，就碌爆佢為止。」中學畢業後，唐安麒在美容院做學徒，做的正是她口中的「劈場」。曾被客人投訴產品、療程沒效果，十來歲的唐安麒不懂回應，向老闆申訴，換來一句：「儍妹，我教精你，無奸不成商。」豁然頓悟，辭職另覓「正派」美容院，但原來天下烏鴉一樣黑。毅然到日本修讀短期課程，回港開有良心的美容院。
選擇日本，因舊同學提供住宿，來自單親家庭的唐安麒，僅靠做兼職模特兒的薪金積蓄留學，「唔使憂住都要食。」並不豐厚的積蓄僅夠 3個月課程。時間雖短，卻令她見識到日本人的職業道德，從商不一定奸，「日本售貨員，見唔到你有需要就唔行埋嚟，埋到嚟亦唔會一直逼你。」

只有前路無退路

回港創業，沒有資本開美容院，先由開 model agency公司開始，母親將積蓄 5萬元，全數給予唐安麒創業，「嗰一剎那，我只有一句說話提醒自己，『我只有前路，無退路』。」透過之前做模特兒的人際網絡， model agency業務為她累積開美容院的本錢， 19歲開第一家美容院，「當時只有兩張床。」
沒有生客，顧客全來自親戚朋友，及小時教跳舞的學生家長，「冇錢賣廣告，我試過自己畫傳單周圍派。」但效用不及顧客口碑相傳，「口碑就是活廣告」，唐安麒賣力服侍顧客，又以湯水、糖水客，「我同個客講，『 Angel希望有多啲新客，如果唔係下個月都唔夠錢交租，如果服侍得你哋好，可唔可以介紹啲客畀我』。」靠口耳相傳方式唐安麒迅速擴張。
口碑就是活廣告

打開門做生意，當然希望客似雲來，但唐安麒為保名聲，寧揀客。首先，做熟客不做生客，「以前我做一啲回饋年輕人嘅療程，有啲客好似審犯咁，『係咪呃人 o架？係唔係真係呢嚿錢？會唔會 hard sell o架？』」其次，思想錯誤的不接，「身高 5呎 4吋 105磅，話要減肥，我話減乜，一係你玩嘢，一係思想錯誤。如果你思想錯誤，接咗仲大鑊，因為你冇得畀我減，我收咗你錢，你話冇瘦到，仲麻煩。」
至今她仍堅信「 hard sell」不如「 heart sell」，「顧客來源調查，『朋友介紹』永遠係最多。」廣告效用不夠口碑大，「串啲講句，靠口碑啲客都做唔晒，我仲做咁多廣告做乜。」
唐安麒簡歷
放大圖片

12345678910

家庭狀況　香港出生，已婚，育有一女
1985年　美容院學徒
1986年　日本修讀 3個月短期課程
唐安麒美顏瘦身專門店發展

1987年　唐安麒美容中心開業
1993年　業務擴展至台灣
2005年　業務擴展至內地
在公在私女兒成群

80年代，唐安麒憑媽媽半生積蓄 5萬元創業，打造自己的美容王國，並未有辜負母親的寄望。今天她亦是母親，明知創業艱難，守業更難，但她希望女兒長大後繼承自己的事業，對女兒寄望甚殷。不過，若女兒希望創一番事業，希望你全力支持，你會嗎？「如果個女好似我當年咁識諗、咁成熟，又係一個努力工作嘅人，我一定會支持佢。但如果係啱啱出嚟做嘢，工都未打過，世面都未見過，就『媽，畀晒你副身家我』，五巴掌就有！」
口裏雖說得嚴厲，但唐安麒笑言現在正職是主婦，工作是湊女，兼職才是房地產及美容事業。在家中有一個 4歲的女兒，唐安麒是慈母；在公司她同樣有一班「女兒」，下屬都稱呼她「皇阿媽」。
「我要佢哋當呢度係第二個家，第二個家就唔好喺度講是非，同事間相處，你可以講『佢今日着條裙好襯佢』，唔可以講『佢今日條裙完全唔襯佢，着咗上嚟都唔知似乜！』我哋盡量講正面嗰邊，大家都會開心。」唐安麒重視公司的系統性，「我有一套 Angel Law」其中一個戒律，就是「講是不講非」。
「我有一套 Angel Law」

生意易得，人才難求。唐安麒開設美容學校，對員工有很高要求，「我哋啲女仔好乖巧，同出面啲蒲妹唔同。」她要求每個員工都具備專業知識，「出面嘅美容院畀你學兩日就落場做，我哋呢度要兩三個月，成日都要考試，產品唔識點介紹畀啲客？」
她認為學習永無止境，不進則退。不過，能捱過此關很多時都會做下去，故不乏年資深的員工，「我哋公司拎到 20年服務金牌嘅大有人在。」
踩入台灣　要同黑幫講數


由僅得兩張床的「蚊型」美容中心，到今天，美容王國早已衝出香港。唐安麒說，一生中總有黑暗時刻，但最黑暗的時候，往往就是破曉之前。
唐安麒遇到最黑暗的時刻是何時？「應該係台灣嘅時候。始終我係外來人，冇背景、冇家境，但又後生、又單身、又有啲錢，所以一去到就好受當地媒體歡迎。」但樹大招風，尤其在陌生地方。唐安麒不欲多說在台灣的經歷，但與旗下美容師跟江湖大佬講數的一幕，記憶猶新。
「我一個女人，帶住幾個女仔同事，去同一班黑社會傾偈、講數。我喺現場講，『我一個女人嚟做生意，如果有踩到大家地盤，原諒我就原諒我啦，我冇背景，你要去搞我間舖即管去，我冇辦法。我只係一個女人嚟做生意，希望你畀條路我行。』我夠膽咁去同人講數。」
開舖 3個月回本

外闖遇黑幫，在熟悉的香港，唐安麒則一帆風順。她自言，創業後首 10年，傳媒要求做訪問，談創業過程，她無言以對，因順風順水得不值一談。「有啲人鍾意搵財團合作，或者搵多幾個股東，累積一嚿錢。或者先喺創業板上市，之後就有一大嚿錢任你花，通常冇幾耐呢啲公司就沉晒，對我嚟講，呢啲唔係生意之道。」
唐安麒寧願「一步一腳印」，每開一間舖都先預計首 3個月要見紅，話雖如此，但蝕錢 3個月的情況從未出現，「我做生意，開每一間舖，第一個月就會收支平衡兼賺錢，通常都係 3個月回本。係『回本』呀妹妹，聽清楚係『回本』呀。」唐安麒自豪地說。

---