大藍籌股息高 夠穩陣
1 :
GS(14)@2016-02-09 12:08:52■人民幣料續貶值，不應博反底。
【無懼波動】羊年股市由牛市變熊市，曾淵滄和湯文亮兩位專家都認同股市已見底，猴年可轉揸穩陣藍籌股收息。而人民幣將持續貶值，不應博反底。曾淵滄指出，雖然自己並無水晶球，可以預計全年股市升跌，「但現時用任何角度去衡量，股票都係平，而家唔可以跌到去邊，好難再被炒家質落去」。目前買大藍籌有6至8厘息收，無懼股價短期急速上落。「買股票同去澳門賭大細最大分別係，如果你買大，一開蓋開細咁就冇咗！但你50蚊買股票，跌到30蚊你咪揸住收息，一直唔開個蓋，等到升番至放」。而他手中股票平均持有逾15年。他較看好港鐵（066）前景，因政府落實將有一批鐵路上蓋土地會在未來數年推出，擁有龐大土儲，「打算揸到小濠灣車廠起好」。
人民幣料持續貶值
湯文亮亦指，猴年股市不宜看得太淡，很多股票的市盈率已去到合理水平，宜集中買派息慷慨、成交量大、無隱藏債務的藍籌股。以其愛股港交所（388）為例，「之前200蚊放咗，180蚊買番，雖然現價跌咗落去，但今次打算儲好耐，因為港交所係壟斷嘅生意」。此外，湯文亮估計，人民幣未來三年都會貶值，但幅度只會在10%左右。曾淵滄則相信，由於人民幣今年10月1日會被納入國際貨幣基金組織（IMF）的特別提款權（SDR）貨幣籃子，此段時間人民幣都難有得升，「人民幣升過龍對中國好不利，應該要畀人民幣貶一貶，日後納入SDR後，幣值升跌由市場決定，中國政府冇得再操控，現時跌未來先有得升」。
來源:
http://hk.apple.nextmedia.com/financeestate/art/20160209/19484378