平買風水新屋再贏大錢曾志偉行大運
1 :
GS(14)@2017-02-12 15:32:182017-01-26 NM
搬入新居大埔海景山莊後，曾志偉用2,600蚊成本買馬，結果扑中一條三穿七，大贏1,600萬，即時四圍請食飯，又廣邀一班圈中好友組團去日本旅行，開心share！原來行運有條路！15年底，曾志偉購入海景山莊風水屋，買入價已比原價低兩百萬，入住第一日買馬更贏大錢，行運行到落腳趾尾。業主自動減多兩百萬
曾志偉以二千四百多萬購入的大埔海景山莊，花費數百萬裝修一年，去年十二月底才正式入伙，新居向正吐露港，有水有景，曾志偉第一次睇屋，已經決定扑槌買。
「個單位前面（屋前）有水，後面又有水（小溪），志偉一睇已經好鍾意，仲要賣方願意平成兩百萬俾佢，即刻買啦！到舊年搬入去間屋，第一日買馬就贏咁多錢（1,600萬），好風水到呢！啲朋友笑志偉咁多年都俾錢鋪草皮，而家一次過贏番晒！贏馬嗰日佢拎住啲飛不斷同人影相，仲話影晒相，係人都知係曾志偉贏馬，冇人敢偷佢啲飛去攞錢。」身邊朋友說。
新屋寫曾寶儀名
自己贏大錢，而入行多年的大仔曾國祥亦終於捱出頭，早前執導電影《七月與安生》攞咗唔少獎，令他放下心頭大石；至於囡囡曾寶儀，年前同志偉合作內地真人騷《極速前進》，玩遊戲時不慎令盆骨受細菌感染要休息兩個月，但曾寶儀一個月就復工，還被老豆挖苦「係咪好等錢使」。「志偉知個女做嘢辛苦，所以海景山莊個單位寫咗個女個名，話俾佢有個保障。其實唔只對親生仔女好，好多圈中人都叫志偉做阿爸，佢一向好幫啲後生，好似葉蘊儀當年離咗婚去澳洲讀大學，學費都係志偉負責。仲有，盧David（大偉）有病，志偉幫手俾醫藥費。「不過志偉幫人唔鍾意大鑼大鼓，好似黃精甫做到導演同《一念無名》拍得成，都係因為佢幫手穿針引線，所以大家都話志偉做得好事多，抵佢贏大錢。」身邊朋友說。
撰文、攝影、攝錄：娛樂組