📖 ZKIZ Archives

由閒轉莊的生存方式 渾水

因為寫到乾塘，我只好找一些生活小事來寫一寫。

每個在股票場上搵錢的人都有不同的生存方式，股票場給我的感覺就是一個賭場，有莊有閒。最基本的賺錢方式是打響名頭，吸一些街外錢來投資又或者開下班教學；也有一些是潛心研究，收下風咁，一支公去搵食。這些都是閒家的賺錢方式，兩邊都賺到錢。我是依從後者的那條路，好處在於避免被標籤和競爭的麻煩，壞處是賺少很多也既不穩定。

我的股友圈有兩位可以稱得上是師兄的炒友。第一位梅君，二十多歲的有為青年，放棄會計師的工作，轉了出來炒股，後來有驚人際遇，現在有不錯的財力，更是兩間上市公司執董，由炒家的散戶閒家成為了莊家。這是因為他本身有會計師的專業資格，又熟讀上市條例，合併收購條例。聞說詹培忠雖非會計、法律專業，但對相關法例也是熟到不得了，如果我要由閒轉莊，終有一日我也把那幾份厚到喊的法例吞掉。

第二位是靚仔炒家，算是我炒股的師兄，非常年輕，而且又有幾幢物業收租，可算是生活無憂。這位人兄現在的財力也是靠炒股炒出來。

好像我這一派人，以炒股為生，但其實我地都好唔相信股票，因為股票是一張紙。透過不同的財技操作，這張紙是可以隨時增加，換言之，這張紙是可以無故貶值。因此，靚仔炒家就把一部分的資金拿了去買樓，靚仔炒家本身也是交際小生，佢在股票搵錢的方式好多元化，也認識好多人。最近也找了幾個有錢朋友開始去玩啤殼了，試試自己做莊的感覺。靚仔炒家雖然非專業人士，但憑著人脈和自己的實力，也走上做莊的路。

閒家終是閒家，炒股的分析功力終究不及落場知道點操作的莊家。如果他們再做返閒，功力也一定是幾何級提升的，這是我追不上的境界。各有際遇，相對之下，渾水真的是我這輩朋友當中最無用最頹廢的一個。

渾水

https://www.facebook.com/muddydirtywater

雋泰控股 (630)，賣殻／轉莊？ fatlone's investment paradise

前言：如果唔係公司同事兼好炒得的「姐姐」提醒我WHATSAPP我主要股東兼執董梁美嫺賣曬14.23%股權，我唔會重新留意兼即日買返630，如果贏到錢，真係要請佢食餐好。

其實之前都炒過，諗住2014年10月31日每股0.118配過股，我在呢個位咁上下都應該有尐「安全邊際」，結果是插到落0.082先停，配股價再插多3成，渣到今日（1月26日）先返配股價啊⋯⋯

其實出完執董賣股消息後股價急升，我諗大家都係同一個諗法：「易手」／「賣殻」。

令我更相信佢是賣，是因為佢在無耐嘅兩星期前，公司發盈警之餘更公佈「終止經營塑膠模具業務」。公告提到「／／誠如本公司截至二零一三年十二月三十一日止年度之年報及截至二零一四年六 月三十日止六個月之中期報告所披露,塑膠模具業務所產生之收益分別佔本集 團截至二零一三年十二月三十一日止年度及截至二零一四年六月三十日止六個 月之總收益約72.3%及76.1%。／／」佔7成幾營業額嘅業務都唔要，正常推論都是要「淨身」準備要搞下嘢吧？配合埋主要股東賣股，好難唔估佢是易手。

睇到唔做主要業務，我聯想起周顯佢2014年8月寫過630嘅一篇文，我相信呢一著是按佢所講咁行（所以我擔心緊周大師會出嚟唱好，唔好搞630住先啦周大師⋯⋯）。篇嘢提到「／／如果由我操刀，去當公司醫生的話，我會把工廠廉價賣掉，甚至以免費贈送方方給別人，也不介意，反正虧本的生意，一毛錢也不值，但必須保留銷售隊伍，代售貨品以賺取差價，目的是繼續維持業務和上市地位。這樣子，最少可以保全殼價，令到上市公司的市值提升，就是配股，每股配售價也可以拉高一點。／／」依家做緊相似嘅嘢啊，唔做膠之後嘅人力資源業務都其實都是好虛無嘅嘢，至少唔使整幾億去買廠買地好花本錢先搞到嘅嘢。

再睇返遠一點，其實在2014年6月都話要買醫療業務，都有報紙佬吹過，聽咗跟入就又中伏鳥，後尾告吹埋，2014年3月尾集咗嗰4千萬又唔使用了。

簡單講，過去呢一年左右，就是抽咗兩次水，話買嘢又無買，之後在財年完結前CUT埋主業，最後就是主要股東賣股走人。

所以，易手是合理估計。

咁有易手潛力又不等於要大炒嘅，咁呢個股市無嘢是「一定」架啦⋯⋯

其實股價都非常低殘，連0.1都穿過，最後嘅配股價都成0.118啊。其實我覺得0.1呢尐位係好特別嘅位，點解特別？我都無乜好strong嘅ground，只係見到多數供股都是用0.1去供，咁我估0.1是一個可以被市場視為底嘅特殊價位吧，股票估票，都是估架姐⋯⋯

仲有一點好重要：市值。630以今日0.117收市價計，市值只是1.79億，是好細隻。而經過近年被各傳媒嘅教育，大家都會聽過「殻價」呢個terms，依家好似吹到是5億。而就算大股東葉偉倫，換曬尐期權，都是印多6億股，以現時15.32億股本計，印埋都是市值2.5億左右。

如果我要用財演TONE去寫，只要用1.79億市值再提埋殻價5億再講加埋執董賣股＋結束主業，已經足夠寫篇稿去唱好一下，HAHA，我都有些潛質做財演吧～

最後，再請周大師唔好咁快出嚟住⋯⋯

提外話：
其實我都有睇返尐「正經」尐嘅股嘅⋯⋯有心機再上嚟寫下吧，但越正經好似越難COVER曬。我嘅心水暫時有135昆侖能源