千色店由女婿打骰 率先注入恒發李兆基部署分家
1 :
GS(14)@2014-09-08 23:25:27■手握千億商業王國的恒地主席李兆基，其家族分家的安排暫見眉目。 資料圖片
【本報訊】李兆基（四叔）部署分家！手握千億商業王國的恒地（012）主席李兆基，過去對交棒一事只說不做，上周五踏出「分家」第一步，將過去一直由長女婿李寧主理的千色店百貨，注入系內「空殼」恒發（097），市場憧憬李寧掌管的酒店業務，或會下一步注入恒發。記者：吳永強 吳綺慧 孔雪茵
與傳統大孖沙一樣，四叔重男輕女，雖早已示意中國業務將交長子李家傑，細仔李家誠則負責香港生意，但就未交代家族其他成員的安排，成為市場對其接班計劃較其他家族透明度低的隱憂。直至恒發上周五宣佈注入千色店，金額不足十億元，惟象徵意義大，因為千色店由長女李佩雯的丈夫李寧打骰，似鋪路分家。
女婿李寧也負責酒店業
據接近恒地人士則不同意「分家」說法，「冇咁嘅事」，又稱分拆千色店純粹是四叔不想恒發「無所事事」，單為杭州收費橋而影響公司運作，注資是想「回饋股東」。李寧雖是千色店董事之一，惟暫未在恒發有職位。據了解，李寧由加入恒地第一日開始，就負責千色店、麗東酒店及四季酒店業務。這位行事低調的千億女婿，家底不弱，是浙江第一銀行創辦人李銘的孫兒，畢業於南加州大學，與李佩雯結婚後，92年開始擔任恒地執行董事，妻子則在恒地負責租務，未加入董事局。李寧即使現身公開場合，只會坐埋一邊，不搶風頭。有接觸過他的地產界人士形容，李寧在商場上表現不算進取，「這是他醒目之處」。該人士又指，四叔三個女婿，包括順豪資源（253）主席鄭啟文，都在地產界出沒，但給人感覺都是「唔休做」，「佢哋次次沽貨開價都高到無朋友，根本唔似想賣咁款」。
市場或憧憬繼續有重組
今年年屆85歲的四叔，兩年前曾透露希望利用3至5年正式交棒，他指「就好似打麻雀咁，希望有滿糊食……財富可以上一、兩倍大咗分就容易」。現時距離四叔最早「食糊」目標時間僅剩一年，恒基系內6間上市公司經過兩年發展，市值兩年內由約2,600億元增至現時約3,880億元。今次分拆千色店，即使不視為「分家」，在商言商也是一單絕刁。有市場人士分析，恒地既可一次過套現9.35億元，亦在未來3年保證從恒發收取股息每年逾8,400萬元，令資金運用更靈活。「市場仲可能會憧憬系內繼續有重組動作，炒恒發仲有注資概念。恒發炒得起的話，對恒地本book亦有好處」。對於恒發獲恒地注入零售資產，有基金經理亦分析，四叔是次注資為保住恒發這隻「殼」，將來進可攻、退可守，「四叔一向都好少出售資產，賣殼唔似係佢作風，可能佢覺得『少少錢』唔志在，所以情願搵啲嘢注入咗先，留番隻殼將來有多啲靈活性」。
來源:
http://hk.apple.nextmedia.com/financeestate/art/20140908/18859178
中環在線：四叔唔做大嘥鬼荃灣千色店吉舖開12蚊店
1 :
GS(14)@2015-05-18 08:29:21■荃灣千色店嘅12蚊店只開兩個月。 高淑嫻攝
近年市面上越來越多12蚊店出現，大家最熟悉當然係永旺（984）旗下Living PLAZA by AEON，仲有今年高調加入戰團嘅759阿信屋，做慣大生意嘅恒基地產（012）主席李兆基（四叔）都有開12蚊店，實行大小通吃咁話呀。四叔一直有經營百貨公司千色店，千色店旗下有6間千色Citistore。華華最近行經荃灣Citistore，就發現地下有個1,600方呎地舖由食肆轉為12蚊店「選の樂」，呢間12蚊店仲係由千色店自行經營。
■李兆基都有開12蚊店，實行大小通吃。
■選の樂賣平價家品。
新租客未到
其實，千色店多年前已經喺大角嘴Citistore開12蚊店，舊年底再喺將軍澳店開多間，馬鞍山店之前都有，不過最近閂咗，將個舖位租畀其他客。荃灣呢間12蚊店係兩個月短期舖，因舊租客關門大吉，新租客未到，千色店本身擁有大量家品貨源，於是咪利用呢個吉舖開間12蚊店擴闊客路囉。有趣嘅係，四叔賣樓做生意，吓吓講緊幾十億、幾百億；四叔舊年底將千色店由恒地賣畀同系上市公司恒基發展（097），翻查恒發年報，千色店舊年單係12月嘅營業額都有1億元（包括租金收入與零售銷售），點解會去開生意額好似細眉細眼嘅12蚊店呢？不過老實講，12蚊店真係幾有吸引力，尤其係對女士，女人最鍾意濕平，買到平靚正嘅嘢就最開心，唔信？大家不防得閒走去各大12蚊店望望，經常人頭湧湧㗎，如果唔係有得做嘅話，四叔都唔會做埋一份喇，用間12蚊店吸引人入去百貨都抵喇。李華華
mailto:
[email protected]
來源:
http://hk.apple.nextmedia.com/financeestate/art/20150518/19151185