隔牆有耳： 江湖飯局2之 夢熊大師數臭狼
1 :
GS(14)@2013-08-06 23:32:34http://hk.apple.nextmedia.com/news/art/20130806/18365815
一年幾前搞到滿城風雨嘅「流浮山小桃園飯局」，一年後竟然有續集。飯腳幾近原班人馬，包括時為梁營馬前卒嘅Dream Bear劉夢熊、十八鄉委會主席梁福元，同屏山鄉鄉委會主席曾樹和等人，噚日再次喺流浮山一間酒家聚首一堂。俾狼英狠撇嘅Dream Bear大鬧限奶令、雙辣招好荒謬；又指近日炒車嘅發展局局長陳茂波當全香港市民「係白癡」。
鄉事派想同民記割席
流浮山皇庭花園酒家噚日新張誌慶，由新界鄧氏家族鄧宗偉、鄧裕平等人做老闆，請咗Dream Bear、新界王劉皇發同一班鄉事派人馬剪綵。雖然飯局冇預「上海仔」郭永鴻，但呢班飯腳亦令八方想起舊年嘅江湖飯局。不過時為忠實梁粉嘅Dream Bear，今日已變成爆出狼英黑材料嘅夢熊大師。佢同八方慨嘆，一年前後「政治環境好大變化，當時係特首選舉，我欣賞CY，而家認為佢貨不對辦」。
夢熊大師話「以為CY穩中求變，點知佢執政一年，關鍵位錯晒方向」，限奶令、樓市雙辣招荒謬至極，梁班子「做事似蝸牛，決而不行」。而謬波喺東北囤地問題上，「租據明明自己簽，點可以話同自己冇關係」，當香港市民係儍仔。八方問囤地波係唔係狼英用人不當嘅例子，夢熊大師就笑言「公道自在人心啦！」
佢又用CY曾問「地從何來」為例，認為東北發展計劃「快快收返高爾夫球場咪有地囉」；又話舊年飯局係討論新界僭建，至今梁班子「仍未解決」。席間亦有鄉事派同八方講，今次飯局係要杯葛民建聯喺堆填區嘅爭議，要同民建聯割席，仲揚言以後會支持民主黨喎。