|
||||||
|
||||||
上周五真熱鬧, 呢邊廂記協舉行周年晚宴,港交所(388)行政總裁李小加出席撐場。另一邊廂,證監會亦喺同一晚舉行周年聚餐兼歡送下月底離任嘅行政總裁韋奕禮 (Martin Wheatley)。華華聽聞,證監各個部門各自拍咗條短片送畀韋奕禮留念,幾位執行董事都有粉墨登場。不過唔知點解,惟獨被視為下任CEO候選人之一嘅 副行政總裁林張灼華就冇拍片,難免令人無限聯想。 張灼華唔畀面有因 據講,證監新CEO遴選已進入直路,同林太爭嘅主要係老外,Martin嚟自英國,英國嚟嘅會唔會着數啲?聽講唔一定。證監俾人話有澳洲幫,唔通係澳洲嚟嘅人做?華華未有答案,煩請消息靈通人士告知。 講番歡送晚會,相比起記協晚會喺金鐘五星級酒店舉行,證監都算慳家,揀咗喺大會堂美心酒樓度搞。咪睇證監人員平時咁嚴肅,原來玩起上司上嚟都好放,聽講法規執行部班執法先鋒拍嘅短片內容就非常「大膽」,條片嘅內容係咁嘅…… 話 說法規執行部阿頭施衛民工作至夜深,突然有批「雷曼苦主」衝入嚟示威,叫韋奕禮返歸。跟住到法律服務部門接力拍「續集」,佢哋整咗個模擬法庭,受審嘅係 Martin,佢被控保障香港投資者同維護金融中心地位不力,被即時裁定罪名成立,將佢遣返老家倫敦。唔知林太係咪唔想咁樣攞Martin嚟玩,所以冇拍 片呢。 李華華 |