綠葉王你認得邊個？羅樂林一日死5次
1 :
GS(14)@2017-01-14 07:54:30大台實為臥虎藏龍之地，唔少綠葉王，好似李國麟一樣，喺大台捱足多年，個個身懷絕技，就算只係芝麻綠豆角色，都可以演得出神入化，套套劇有佢哋，就有戲味，好多時，等嘅，就只係一個機會！羅樂林 一日死5次現年68歲無綫甘草演員羅樂林，喺5年前嘅某一日，威過晒所有一線小生，因為佢喺短短24小時內，於大台播映嘅5套劇集中，同一日連死5次，唔單止成為城中熱話，更創下香港電視史紀錄，甚至連歐美同澳洲等6國傳媒都廣泛報道，蜚聲國際。就連羅樂林覺得「真係不可思議！」李家鼎 做大廚上位今年71歲李家鼎，武藝騎術樣樣得，由《香港八一》做到《香港八六》，喺「銀禧小食店」做伙計「李威」為人熟悉，但喺大台做足幾十年都係做綠葉陪襯，點估到佢喺古稀之年，竟然憑一手隱世了得廚藝，拍《阿爺廚房》落兩手，大受觀眾歡迎，令佢人生嘅演藝事業去到頂峯？！李成昌 奸狡諧趣乜都得同樣喺《香港八一》至《香港八六》有份演出嘅李成昌，喺劇中演大陸新移民康仔，結果「康仔」個名用到今時今日。今年59歲李成昌早年多做諧趣角色，到近年就做精明陰險、幕後師爺之類嘅角色，做乜似乜！鄭子誠 完美奸人有陰謀今年54歲、憑《真情》中嘅無敵奸角李子浩上位嘅鄭子誠，早年喺高登人氣高企，成為熱門搜尋關鍵字，有網民好有心機剪輯咗佢從影以嚟奸到出汁嘅代表作嚟「歌頌」佢，一股「鄭子誠現象」喺討論區籠罩。網民甚至認為，凡有鄭子誠出現嘅地方，必定有陰謀存在。余子明 御用太監今年73歲余子明，因喺早期大台綜藝節目《歡樂今宵》入面飾演「大眼雞」，之後「大眼雞」呢個暱稱就跟足咁多年。除咗「大眼雞」呢個角色令大家對佢留下深刻印象，亦因為佢有好重潮州口音，不時喺電視劇入面見佢飾演「潮州佬」嘅小角色。喺《金枝慾孽》入面，做陰險太監亦相當出位。
來源:
http://hk.apple.nextmedia.com/entertainment/art/20170113/19895612