林家棟x河國榮 教港人苦中作樂 2015-10-13
1 :
GS(14)@2015-10-18 23:26:27http://www.skypost.hk/feature/%E ... %9C%E6%A8%82/192777
那天林家棟為新片《死開啲啦》宣傳，適逢當時電視深夜重播他的代表作《大鬧廣昌隆》，觀眾晚晚追劇兼大呼很掛念他。聽罷，家棟即以「大隻廣」的口吻說：「幾好啊！這個重播來得合時，像是送給我的生日禮物，當年河國榮就是Mr.Robinson囉！」今時不同往日，14年前離開無綫進軍電影圈，現在貴為電影監製，你說，幾好啊！
2010年，林家棟首部監製的電影《打擂台》，橫掃香港電影金像獎四個獎項。事隔五年，他監製的新片《死開啲啦》同樣本土味十足，請來林德信、J.Arie（雷琛瑜）、河國榮和吳浣儀主演，論盡土地不足下香港人的居住苦況。入場觀眾大讚河國榮喜劇感十足，他歸功於家棟教導有方。「是他給予我機會，演一些以前無做過的角色，甚至教我怎樣去演。他選角方面亦很有眼光，兩位新演員很投入！」
安居樂業不易
近年，土地不足已成熱話，港人想安居樂業不易，林家棟早察覺此問題。2011年拍攝《寒戰》期間，常光顧的舊式茶餐廳因負擔不起貴租而結業，激發他撰寫劇本探討港人出路。「劇本方面，我的參與度很高，創作期間聽到香港可申請海葬，骨灰要倒落海，就覺得問題殺埋身，戲中盧覓雪有句話：『啲人一出世就要諗住邊度，樓未供完，我哋就要諗死喺邊度喇。』雖不至於有很多人流離失所，但市面上常有煽動消息傳出，大家都被迫上車，我想大家睇完戲，想想生活是需要甚麼。」
做演員要有火
戲中每位主角均有點題精句，河國榮飾演的「鬼佬」表面風光，實質住劏房，遇上舊樓被收購，終日與屋主想辦法抵抗地產商。現實中，27年前他帶着五千蚊港幣由澳洲來香港追歌星夢，曾寄住朋友家中，被友人父親視為不事生產的流浪漢，到如願在電視台工作，卻都是演閒角，難得他對演戲的熱誠始終如一。他形容：「我的角色是想帶出，以前外籍人士在香港是有優越感，現在都淡化了。戲中有句對白：『邊度氹得我開心咪留邊度囉！』人喜歡的可以去移民，覺得開心就留在這裏。鬼佬有很多情感，為了演到那種情緒，我晚晚去郊野公園大聲讀對白練習。」
家棟從旁補充：「和他認識多年，我認同他的心和熱誠，做演員要有團火。今次構思時，很多對白都有雙重意思，主角一家雖然面對很多生活難題，但懂得苦中作樂，希望港人聽到這些港式幽默，可以輕輕鬆鬆番，有時不用講得太沉重呢！」
服裝：agnès b.（林家棟）
鞋：New Balance（林家棟）
髮型及化粧：Jessica @ Oasis Studio
撰文：何綺娜
攝影：Lego
編輯：黃寶恩
設計：鄧俊明
【《蘋果》專訪】講身份認同 戥周子瑜唔抵河國榮：我係香港人
1 :
GS(14)@2016-01-19 23:05:29■澳洲人河國榮昨日在深水埗舊區的大牌檔接受訪問，表示超愛香港、超愛香港人。攝影：陳志嵐
港人愛張國榮，但來自澳洲、現年50歲的河國榮卻超愛港人，他87年發歌星夢來港，至今28年，對於近日台灣藝人周子瑜和羅志祥連環爆出身份問題，遭網友插爆，河國榮寄以同情。他昨日接受本報專訪，就直呼：「我係香港人。」河國榮不但愛港，更愛港人，希望新一代能救香港。
藝人近日因為身份問題連番爆出兩岸風波，韓國女團TWICE的台灣成員周子瑜被指是「台獨分子」遭內地網民抵制，她拍下道歉片段仍未能平息事件。台灣的羅志祥上周四在內地出席電影首映，爆出一句：「我們都是中國人。」又再燃點中台兩地網民和粉絲爆衝突。對於國籍和身份是否要掛鈎，土生於澳洲，87年發歌星夢來港闖天下的河國榮，在這彈丸地居住了28年，娶了港妻組織家庭，昨日他在深水埗大牌檔接受本報專訪，對自己的身份高呼：「我係香港人。」
明顯係被迫道歉
對於周子瑜和羅志祥因為身份問題遭網友鬧爆，河國榮表示有留意報道：「如果台灣人話自己係中國人，好明顯係怕中國政府，暫時嚟講，台灣真係唔係中國，但香港真係中國，香港同台灣係兩件事，香港人承認佢係中國人係OK，但台灣未係，但逼佢哋講出其實係唔啱，佢哋講出嚟，幾乎全世界都知佢哋係被迫講，唔會有人信。台灣有個女仔（周子瑜）係被迫道歉，因為佢揮緊台灣旗，明顯睇到佢間公司突然喺內地冇得撈，逼佢唔好揮台灣旗，就話佢係中國人，錢係萬能。」河國榮曾說過香港絕望指標達八十巴仙，但經過毛記《分獎禮》，這個指數有下降到七十多巴仙，他說：「畀到好多香港人新嘅正能量去面對將來，本來大家幾乎放棄，但而家大家仲有少少希望。」河國榮又說：「香港仍然有希望，下一代可以救香港，但係唔好用以前方法，要用新方法，新一代要認清楚問題喺邊，諗方法去解決，將社會提升，大家開心啲，生活搵到食，解決樓價、地產同租金問題。」他自爆早年差點做業主，但跟賣家往簽約期間，對方收到一個可多付30萬的電話，簽約告吹，所以他非常關心樓價問題。談到無綫，他又不後悔離開：「佢哋政策係唔會擺資源喺老外身上，我留低最多做甘草。」
■河國榮上周在毛記分獎禮中連中兩元，演繹《真．香港地》時更感動觀眾。資料圖片
■河國榮87年買了張單程機票來港，就沒想過離開。
■河國榮（左）去年應邀任何韻詩演唱會嘉賓。資料圖片
唔想廣東話絕種
反而河國榮擔心廣東話會絕種：「好多人話教中文要教普通話，香港人移民咗美加，佢哋仔女係識聽識講，但仔女再生嘅仔女就唔識，三代不保。如果香港幼稚園或小學實行用普通話教學，亦會三代不保，我好鍾意廣東話，我唔想見佢消失咗，我覺得廣東話非常重要，有佢特色同文化，希望可以keep好耐好耐。」河國榮在《分獎禮》當晚以廣東話流利rap出《真．香港地》，回想收到毛記電視安排他挑戰這首歌時，河國榮反覆練習了四百多次，他邊唱邊感動萬分：「當中寫到『我同你同一種人』，我哋都係真港人。首歌唔係我揀，係香港人揀畀我，我起碼有十次，我一路練，一路眼濕濕，首歌意思真係無得頂。」他愛香港，更愛香港人：「可能講緣份，同香港人係夾，我87年5月31日嚟到就冇走，我都好鍾意香港人，人先最重要。」而最終他在「《分獎禮》連中兩元奪得「曲金曲獎」和「最受歡迎男歌星」獎，與MC仁壓軸獻唱《真．香港地》時又掀起全晚高潮，大團圓結局。採訪：戴彩煥
來源:
http://hk.apple.nextmedia.com/entertainment/art/20160119/19457266
河國榮《為你鍾情》饗眾
1 :
GS(14)@2016-01-19 23:05:34■艾美琦和黃夏蕙（左）異口同聲表示支持器官捐贈。
河國榮、艾美琦（Amy）、黃夏蕙、邵音音和鄧英敏等，昨日在西九龍中心出席「延續生命大行動」，宣揚捐贈器官訊息，Amy和契媽黃夏蕙支持器官捐贈，Amy說：「整過容嘅部位唔捐得，器官就可以。」早前在網台「毛記電視」舉行的《分獎禮》中連摘兩獎的河國榮，則演唱張國榮《為你鍾情》娛賓。《分獎禮》後河國榮獲澳洲的媒體採訪，光宗耀祖，他說：「佢哋打電話畀我都有啲奇怪，感覺有少少超越現實，澳洲電視台出埋新聞，邀請父母做訪問，非常開心。」他謂從來沒後悔來港，即使生活多困難都喜歡香港，談到這次奪獎，人氣急升工作量增加，他說：「會加少少價。」採訪、攝影：張俊銘
來源:
http://hk.apple.nextmedia.com/entertainment/art/20160119/19457272
河國榮挑機做司儀
1 :
GS(14)@2016-02-02 15:58:08陸詩韻、河國榮、陳昭昭及馮家俊等，前晚在九龍灣出席「2015中華才藝小姐國際大賽（全球賽）」，陸詩韻擔任評判，昭昭就贊助佳麗珠寶首飾。與馮家俊齊齊做司儀的河國榮笑言忙於記台詞，沒關心過佳麗的樣貌：「始終我都係鬼佬，有啲音調唔明都要問老婆，而且我要講國語、廣東話同英文，背台詞對我嚟講都算係一種挑戰，好彩身邊有馮家俊做拍檔。」他笑謂雖然要負責三種語言，但只收取一份酬金。陸詩韻談到個人審美觀：「要大方，唔好有咁多小動作，靚女好多，最重要係氣質。」她又透露會做一個睡衣品牌生意，會充當生招牌拍攝品牌照。採訪、攝影：黃曉妍
來源:
http://hk.apple.nextmedia.com/entertainment/art/20160202/19475362
方健儀河國榮踩《毛記》年宵六八犬龍蝦精做手信
1 :
GS(14)@2016-02-03 14:43:27■河國榮與方健儀昨日去到維園年宵，與一班毛記主播合照。攝影：沈健程
年宵昨日開鑼，現年50歲的河國榮和39歲方健儀落區到維園，直踩《毛記》的攤檔，主播東方昇、盤菜瑩子、黃慘盈、利君牙、羅若Off和銀紙彤，見到兩位香港區最受歡迎男女歌星，好似馬騮上身飛撲selfie，還送上「六八犬」和「龍蝦精」妖魔夫婦公仔做手信，方健儀獨愛「鍾樹妖」衝口而出說：「我要樹根！」
河國榮和方健儀在毛記電視《第一屆十大勁曲金曲分獎典禮》上，各分得香港區最受歡迎男女歌星獎，昨日兩人落主場香港區維園行花市，大受市民和檔主歡迎，不停被邀selfie兼收禮，成功測試受歡迎程度完勝過關，之後更直踩毛記的年宵攤檔打氣，吸引40多人包圍，場面墟冚。
河國榮方健儀踩旺100毛場。
■河國榮與盤菜瑩子selfie，叫對方唔好再喊。
■河國榮與方健儀首先去花檔睇蘭花。
利君牙羅若Off爭攬
方健儀見人頭湧湧即說：「呢度超級多人。」而毛記揸弗人之一林日曦（腦細）用大聲公維持秩序：「各位觀眾行埋少少。」方健儀見到笑說：「你好！腦細，我哋嚟呃like。」林日曦亦雀躍說：「最受歡迎歌王歌后，呢次真係要呃like，你哋喺晒度。」利君牙和羅若Off爭相抱抱河國榮，河國榮對盤菜瑩子笑說：「唔好再喊啦，好掛住你哋。」而戴馬騮頭套的東方昇喪跟兩人selfie，眾主播送上五隻妖獸公仔，包括「六八犬」、「龍蝦精」、「鍾樹妖」、「鼠王獸」和「麒麟怪」，方健儀衝口而出：「我要樹根（鍾樹妖）！」羅若Off抵死介紹六八犬：「呢個同龍蝦精係最受歡迎嘅，因為佢哋係夫婦。」還揭起六八犬的衫展示：「佢係太監嚟！」之後眾人圍着兩人大叫攞利是，河國榮笑說拜拜，他們又一輪嘴講恭賀說話，腦細忍唔住開聲：「你哋係咪以為自己係無綫？都話媒體多咗人留意就迷失自己，隨波逐流。」
呢張相扼到好多like啦一定。
一講利是，耍手擰頭。
果然係最受歡迎男歌手。
採訪辛苦慘被扑頭
河國榮表示已十多年沒行花市，方健儀則說：「以前逢年三十晚嚟呢度拍外景，鏡頭前笑容滿面好好氣氛，但其實好慘不停俾公仔打頭。」她坦言出街多了途人認得：「有時冇化妝戴晒帽都認到，不過啲人話我一出聲就認到，我要毒啞自己。」河國榮笑說：「咁你收聲啦。」林日曦被問到年宵銷情？他說：「真係唔知，書賣咗幾百本，我啲書一直都好賣，係全港最top2000本入面。」採訪：盧妹、譚倩宜髮型：Vincent Yeung of Salon Osmosis服裝提供：Marella
腦細簽書簽到手軟。
■最受歡迎的六八犬（圖）和龍蝦精是一對夫婦，惟六八犬真正身份是太監。
龍蝦精
來源:
http://hk.apple.nextmedia.com/entertainment/art/20160203/19476471
河國榮方健儀玩轉年宵遭廢青瘋狂集郵
1 :
GS(14)@2016-02-03 14:43:30有檔主一見河國榮，即時唱出《香港地》。
年宵今日開鑼，方健儀同河國榮呢兩個真香港人當然要快人一步率先去維園年宵逛下啦！一去到維園門口，河國榮呢個香港區最受歡迎男歌星就歌興大發，忍唔住將《香港地》再二次創作Rap返幾句，搞到方健儀都頂佢唔順，叫佢唔好再唱，快啲行年宵好過。
不少檔主找河國榮和方健儀做「生招牌」。
方健儀和河國榮所到之處，都有FANS舉機自拍。
方健儀祝福香港人「風生水起」。
來到100毛檔攤，當然第一時間找林日曦自拍。
佢兩個先行濕貨攤檔，見佢哋好似對啲年花好有興趣咁，河國榮仲同方健儀走咗入檔蘭花店慢慢研究，其間又問花店老闆點揀靚花。問到河國榮係咪想趁機買花送俾老婆？佢即話：「如果我買貴咗會俾佢鬧，其實自己冇買開年花，因為屋企冇位擺。」過年唔少人都會喺屋企擺桃花，方健儀話以前都有擺過，仲話擺完之後桃花運真係好咗好多：「嗰一年都真係幾多，之後嗰年冇擺又真係冇晒，不過依家自己唔需要喇。」行完濕貨檔，方健儀同河國榮就殺入乾貨區，沿途有唔少市民截停佢哋要求合照，佢兩個咁nice，當然無托手㬹啦。行到攰攰地，方健儀就見到檔懷舊小食檔，即時去買咗兩塊麥芽糖餅同河國榮開心Share，方健儀搞笑咁同河國榮講：「你結咗婚，我就唔會派利是畀你啦，請你食塊餅啦！一食真係童年回憶返晒嚟！」
河國榮自從唱完《真·香港地》之後，《香港地》呢首歌又再hit過，佢同方健儀行年宵嗰陣，唔少人見到河國榮都會即場Rap返幾句，有啲仲係拎住大聲公去唱，方健儀聽到就扮嬲嬲豬話：「下次你哋要唱《中東與綜》！」相當搞笑。今年年宵有唔少公仔檔，其中賣馬騮公仔同另一檔賣豬仔錢罌嘅攤檔就最得方健儀同河國榮歡心，佢兩個玩完一輪啲公仔之後，檔主仲送咗個福袋同斜孭袋俾佢哋，認真大豐收。一場嚟到年宵，兩位最受歡迎男女歌星當然要去廢青集中營踩下場啦！想睇佢兩個同班廢青有咩交流？睇下一條動新聞啦！
來源:
http://hk.apple.nextmedia.com/entertainment/art/20160203/19476514
河國榮投票講心唔講金
1 :
GS(14)@2016-03-06 16:12:14河國榮、王灝兒（JW）及樂隊Kolor，昨日於荃灣出席「2016選民登記運動」啟動禮。本身已經是選民多年的河國榮說：「以前有時係冇得選擇，而家會投啲對香港市民有心嘅人，而唔係淨係對錢有興趣嘅人。」他又指剛過去的新界東補選，因他剛巧不在香港，所以沒有參與。此外，同場的JW被問到好姊妹何超蓮被傳和吳克羣復合一事，她代好友澄清：「係朋友，冇其他。」至於另一好友鄧紫棋（G.E.M.）則跟內地歌手華晨宇傳緋聞，JW表示只知道G.E.M.近日忙於瘦身，其他事就不太清楚。採訪、攝影：譚倩宜
來源:
http://hk.apple.nextmedia.com/entertainment/art/20160306/19518186
河國榮回應被代言「我都覺唔妥」
1 :
GS(14)@2016-03-31 14:49:02■河國榮在拍攝當日已察覺不妥。資料圖片
「真．香港人」河國榮前晚在fb公開留言表示有人以《蘋果日報》名義邀約他做訪問，結果刊登後變成廣告，無端端被代言一間曲奇專門店，所以他立即澄清自己並非代言，留言一出，隨即在網絡瘋傳。河國榮昨日接受本報電話訪問，對於本報發出聲明，印刷分類廣告部涉事員工昨日即時解僱，河國榮說：「我當然唔希望會去炒人，始終經濟都好差，份工都好重要，但係好多嘢我哋都唔知，所以冇得去評語。我寫呢件事係因為啲人以為我係代言人，我只係想澄清，嗰日我都覺得有啲唔妥，問咗幾次都話係訪問而唔係廣告，我冇諗過、亦都冇要求《蘋果》去做任何嘢。」《蘋果日報》社長葉一堅表示，《蘋果》會將合理的工作酬勞給予河國榮，不過河國榮說：「我不要了。」對於事件經過，河國榮表示：「其實係我自己儍先，第一唔係《蘋果》直接去搵我，而係一個中間人話《蘋果》有人想搵我，佢仲話係我一個朋友嘅同事。」他說拍攝當日已經覺得有點問題，經常要他手執產品兼擺出各式各樣誇張的甫士，他說：「拍完之後我都有問返《蘋果日報》同《飲食男女》，佢哋都話冇同事負責呢單採訪，我亦都有再問返中間人，佢都話係《蘋果》嘅訪問，直到噚晚有朋友喺佢哋舖頭見到張海報，先知發生乜嘢事。」河國榮表示他在自己fb留言，like人數比預期破了紀錄，心情難以形容。採訪：唐琛悠
來源:
http://hk.apple.nextmedia.com/entertainment/art/20160331/19550924
河國榮《西遊記》做講古佬
1 :
GS(14)@2016-08-16 06:28:12河國榮跟王梓軒稍後會一起做歌舞劇《西遊記》，河國榮做「講古佬」，負責講解劇中故事，所以沒有對白，昨日二人到商台接受訪問，劇中他們的服裝像馬戲團造型，河國榮說：「啲衫好重而且厚，但相信小朋友會鍾意。」雖然綵排都會一身汗，但河國榮指自己沒因此消瘦，更笑說肚腩仍然像火車般大。而王梓軒一直也希望跟當代舞蹈團合作，以前更曾在此學跳舞，所以今次如願合作很興奮，更包辦當中一些樂曲創作，他在劇中需要又唱又跳舞，飾演玉皇大帝一角，他說：「據我所知劇中扮馬騮嘅小朋友們會爬晒上我身上，唔知有幾多個，會量力而為，怕到時唱唔到歌。」採訪、攝影：王連連
來源:
http://hk.apple.nextmedia.com/entertainment/art/20160816/19737466
Next Page