大家有無遇過以下情況，上司有個新主意想實行，你睇到潛在問題，指出如果搞唔到個新主意係無法推行的，但係果一刻你老板會覺得你撥冷水，於是一係就當你意見無到，一係就會鬧勻你祖宗十八代。總之無好結果。
但係個新主意推行期間，有人提出相同憂慮，老板就會覺得個同事好有見地，仲會覺得佢救左個計劃一命，將功勞歸功於佢，你話幾唔公平呢。
呢個現象，並唔係現代職場先會發生的事，遠在古代，講得廣義少少，自人類有文化的年代起就已經有呢個現象發生，古人有句諺語去描述呢個事情，就係「曲突徒薪無恩澤，焦頭爛額為上客」。
先講解下呢句說話背後個故事，就係話說古代有個人見到有戶人家間屋個煙囱好直，收集到的柴枝又好近個爐頭，於是就提議該戶人家將個煙囱整曲一點（曲突），同埋將柴枝放遠些少（徒薪），點知個主人家覺得果個人多事幹，就當佢的說話無到。
之後有一日，果戶人間屋失火，有另一個人就見義勇為走去救火，搞到皮膚都燒傷晒，主人家就好感激呢位見義勇為人士所為，仲擺幾圍請呢位勇士為上客。有人看不過眼就同主人家講：如果你聽之前果個人勸，你屋企就唔會火燭，亦唔駛擺幾圍多謝幫你手救火的人，如今你竟然唔多謝勸你果個人？主人家聽到後就請埋勸主人家果位。
呢個曲突徒薪的故事是否真人真事就無從稽考，因為係漢朝的大臣引用的一個故事，事原當時漢武帝有個驍勇善戰既將軍叫霍去病，佢有個同父異母的細佬叫霍光，呢位霍光在霍去病死去後受到漢武帝的重用，當時徐福就係覺得呢個人相當嫌疑，就勸諫漢武帝去限制霍光的權力，可惜漢武帝無聽到徐福的勸諫，之後既劇情都估到，雖然霍光真係無作反，可惜佢既子孫有，最後都被漢宣帝鎮壓了，宣帝賞賜鎮壓有功的功臣，但係就忘記了有位叫徐福的大臣曾經勸諫過先帝漢武帝（這也難怪，兩位皇帝不會傳達被遺忘的勸諫是可以理解的）。於是就有人上書借呢個曲突徒薪的故事去轉達當年徐福是一早勸諫過的。最後徐福都重賞同埋追封為郎中。
正所謂針唔拮到肉唔知痛，好多人只會為意眼前發生的事，對眼前可能發生甚至不會發生的事大多抱「真的發生才算」的心態，所以我們要把握適當機會去表達意見，否則一係被遺忘，一係就好似某些財演咁，成日睇淡後市，直到發生的一日為止，總有一天講中市！