|
|||
|
當今流行「同居不結婚」，同居對象稱為「拍拿」（partner），男士有男拍拿，女拍拿；女士有男拍拿，女拍拿；最近更有男士變為女士，要與男拍拿結婚，總之今時不同往日咯，男女關係愈來愈複雜。如果加上第三者（不分男女），更加審死官。 好多人以為搞婚外情，嚴守秘密，老婆或老公會唔知道，但正如一句老話，天網恢恢，疏而不漏，譬如一男一女往菲律賓旅行，點知碰上意外，太太在港睇電視新聞，赫然發現老公與另一位女士一齊入院；智利發生礦難，三十三名礦工大難不死，返上地面，竟然兩位「老婆」同時迎接一位礦工，大婆從來懵然不知有此事；以前有一位大學圖書館長突然逝世，太太自美國回港收拾舊物，先至發現老公一早在深圳秘密包二奶，有信件為證。又有一位男士過身，遺囑交代得非常清楚，老婆仔女份額分配得妥妥當當，靜待律師會計師辦理結算工作，分配家產之時，突然有北方靚女上門求見，要求分番一份，老婆與靚女邊會有好傾o架，先而口角，幾乎繼而動武，唉，仔大女大咯，一齊住，趕靚女出門。不久之後，就收到律師信，可能要法庭相見。呢位老公似乎好乖，但原來靜靜雞在東莞，後來又在九龍設下金屋藏嬌o忝，收埋一位靚女好幾年，而且出手闊綽，每月寫張支票十萬銀畀靚女，仲送埋白金信用卡o忝，每個月可簽賬十萬八萬。老公以為只係一種生前交易，死後便乾手淨腳，遺產當然冇預靚女一份。但靚女o依家要求維持以前享有的生活，根據就係以前同居過幾年，後人怎麼辦？ o依家講求同居亦是夫妻關係，要畀贍養費，邱德根第七子邱達文，43歲，一九八五年在英國讀書時與女學生同居，畢業後各自回家，一九九七年在拉斯維加斯結婚，二○○○年分居，○五年離婚，法庭判妻子可分三千七百萬元，即係邱達文聲稱身家之四成，因為上訴庭話兩人共同生活要計埋同居年期喎！邱達文上訴到終審法院，終審法院之判決將有深遠影響，成為「平分財產」重要案例。律師Ｃ對左丁山講：「香港有好多男士有得震，冇得，包外遇做齊人，唔好以為唔結婚，只係叫做同居就冇事，分分鐘冇副身家！」 |
|||