| ||||||
花店，一向是女人天下。位於元朗市中心的「藝意花坊」，門口擺着幾盆幽綠的盆栽，店內放有繡球、蘭花，紅藍綠紫，顏色鮮艷。出入的都是腳踏高跟鞋、手挽名牌袋的闊太、OL。但這間花店的老闆，竟是一個「貨車佬」﹗ 三十八歲的鄭耀龍（Bell），十多年來都揸貨車搵食，九七年炒燶股票欠下一身債。往後十年，他除了揸貨車，更做保險、送貨，捱到不見天日。辛苦還清債務後，他決定找尋自己的理想——學插花。 兩年前，憑着這門手藝，Bell在元朗開設花店，除了賣花，更設計盆栽、園景，植物保養一條龍，冧掂區內闊太，月賺六萬元，「依家唔使再汗流浹背，個人仲平和咗添。」Bell駕着他的兩門Audi，自信地說。 「飲汽水定果汁呀？」Bell帶記者走進元朗錦綉花園其中一個單位，熟練地打開花園旁的木櫃，從裡面的雪櫃拿出凍飲，「我不嬲自己招呼自己。」他笑說。原來這間逾二千呎的單位，是他的熟客梁太的，這裡共四百多呎的花園，盆栽及園景布置都是出自他手筆。大大小小共有數十盆盆栽，中間放置了幾隻瓷器公仔，花園右邊的牆上插着幾枝向日葵，「仲有呢棵金枝玉葉同鐵骨海棠，都係梁太鍾意嘅品種，而佢對仔女好鍾意熊仔，所以擺埋喺中間。」Bell指手畫腳說。 布置這個花園，Bell收費二萬五千元，每個月更會到梁太的花園兩次，替植物施肥、修剪及杜蟲，額外收取二千元的保養費。梁太說：「三年前，去元朗經過見到就問吓嘢，間間花店都『係咁意』答吓，只有佢（Bell）答得好認真，咪幫襯佢買吓嘢。之後我搬入錦綉花園，就叫佢幫我打理個花園。」留有鬍鬚的Bell，外表如一個麻甩佬，但說話時斯斯文文。接到梁太生意，亦甚識做，「有時見佢啲植物唔靚，枯乾咗，會免費換過啲新嘅俾佢囉。」近日，梁太又正準備找Bell為他重整花園，Bell乘勢說：「今次會加價o架！」 口甜舌滑賣人情 住在屯門青山公路附近獨立屋的武太亦是Bell的熟客。武太信風水，房間內放了一排鐵樹，Bell能將鐵樹種到開花，令武太大讚不絕。武太說：「佢好落力施肥、杜蟲，好難開花嘅鐵樹，三年來年年開花，真係好意頭。」Bell很會說話，記者見他跟武太說：「武生簡直係我偶像，上次見佢戴住黑超，揸住林寶堅尼，轟轟聲，唔知幾型！」氹得武太笑逐顏開。Bell說除了武太，這兒有六間洋房都是其熟客：「三年前新年，其中一間屋嘅太太買咗一棵桃花擺喺窗台，鄰居喺佢幅落地窗見到，覺得好靚，大家就開始幫襯我。」Bell知道太太們喜歡與眾不同，因此這個太太最近買了這種花，他就不會叫其他人買。必要時用「是非當人情」，Bell續說：「呢度其中兩個阿太幾好感情，我知其中一個阿太屋企有白事，咪做個人情，提吓另一位阿太關心佢。有個阿太最近買咗層樓，我知佢唔想俾其他阿太知，我就一定要保守秘密！」Bell說做闊太生意要記性好，他如數家珍地說：「武太鍾意白色、青色。梁太就鍾意市面少見、有特色嘅花。佢哋唔係最在乎價錢，你貴過街外兩、三倍無問題，但一定要最靚，最好獨一無二，令佢哋覺得物有所值。每到新年，我都好緊張，如果佢哋去對方度拜年時，發現自己啲花唔夠人靚，我就大鑊喇。」事實上，Bell的花及盆栽都是從花墟入貨，成本不高，一盆小盆栽只是十多元，他再從深圳及廣州買入成本三十多元的花盆，重新「包裝」，如把四種來自荷蘭、不同顏色的肉蓮，排列在兩排細竹條之間，高高低低，又找來銀色碎石、繡球乾花及紅色小山果點綴，零售價可賣四百多元。闊太客佔花店的生意額逾六成，Bell指除了闊太，他不會忽略任何一個客人，他回憶道：「元朗真係臥虎藏龍，有個鄉紳著人字拖、背心走入店內，睇都唔睇就大聲叫『呢個、呢個、嗰個我都要！』」Bell正在質疑是否惡作劇時，他在鋪頭門外見那人的車，「我唔識嗰牌子，但我知一定好貴！」他慶幸自己禮貌對待該客人，最終這鄉紳亦成了他的熟客。 中環名店偷師 現時Bell出入的是元朗闊太圈，但數年前他仍是個一身臭汗味的貨車司機。中二已輟學打工，九七年港股狂升，他以為遇上一個發達機會，於是把揸車賺得的整副身家押注買股票，賬面速賺一百二十萬，「但愈賺愈心雄，幾個月後個市係咁跌，就咁炒燶晒，變成爭人八十幾萬。」為了還債，Bell日間身兼三職，包括送貨、拆櫃、賣保險，夜晚繼續揸貨車，「只要搵到錢又唔犯法，咩都做。」這種不見天日的生活，過了近十年。其間Bell不時替一間位於中環的名人花店Greenfingers送貨。那時候，他望着那些五顏六色的花，感到很輕鬆，才發現自己喜歡花。直至○七年，他還清所有債務，剛巧Greenfingers請雜工兼送貨，但人工只有六千元，他亦毅然到那兒打工。在那裡他邊做邊偷師，放工亦花時間看花藝的書本，更學懂跟貴客打交道，「Greenfingers好多名人，好似霍英東太太呂燕妮教我插劍蘭，佢話佢舊時都係賣花維生。」那時開始，他亦觀察到一班闊太，花費闊綽。當時，他亦不甘被比他年輕的同事點他工作，故萌生自己創業的念頭。 改善脾氣 老父安慰 本來住在柴灣的Bell，○九年聽朋友說元朗競爭較小，他便立定心意，由柴灣搬到天水圍住，在元朗開鋪，不過最初一樣乏人問津，「零收入」之餘，更被收幾千元保護費，他總結問題：「花店周街都係，好難做！」為令一年四季都有收入，他開始兼賣自家設計的盆栽，反而有市場，吸引一班太太幫襯。Bell認為自己在盆栽配搭有點天分，「綠色盆栽原本唔起眼，但只要配其他不同高度及顏色的植物，加上一點配飾，就靚晒啦。」但令他意想不到的，是這班太太除了時常幫襯他買花外，又為他帶來一些公司客，為辦公室添置盆栽，佔其收入另外三成多，故他兩年前在灣仔開了分店。設計盆栽得到別人欣賞，為Bell打下一支強心針。去年初，濕地公園大堂的園林設計工程招標，他膽粗粗入標，竟然中標：「打響咗知名度，但其實成本都幾高，賺得唔多，所以今年冇再做！」早前他派發宣傳單張給一些中小企及連鎖店，本來打定輸數，以為宣傳單張會石沉大海，怎料Pacific Coffee竟幫襯他買盆栽，令Bell開心不已。最開心還有他父親，上週，Bell抽時間回柴灣跟父親飲茶，鄭伯說：「以前佢脾氣好暴躁，而家份人變咗，講嘢好斯文，我好安慰囉！」 開業資料（2/09） 租金：$60,000^入貨：$20,000裝修：$1,000雜費：$2,000總投資：$83,000^三個月按金，一個月上期 營業資料（6/13） 營業額：$126,000租金：$19,000人工：$12,000入貨：$30,000雜費：$5,000盈利：$60,000（元朗店資料） | ||||||