| ||||||
上星期五，記者喺元朗做完嘢去酒樓醫肚，估唔到嘆嚇一盅兩件都有奇遇，居然撞見十八鄉鄉委會主席梁福元，跟住元朗區議會正、副主席梁志祥同王威信都嚟咗。一眾侍應非常識做，急急腳將幾位主席帶入貴賓房。 記者坐近一睇，門口寫住「新世界」名牌，莫非人稱純官嘅鄭家純搞咗個鄉紳飯局？只見餸菜推出推入，食足個幾鐘先至散席。記者數一數，呢餐午宴原來有近廿名元朗區議員出席，唔係鄉事派就係建制派，雖然最終見唔到純官，但記者認出，代表新世界嘅原來係聯席總經理兼執行董事陳觀展。陳總係猛料之人，曾經喺廣州市政府辦公廳做處長十年，又做過越秀交通執董，擅長地產及物業投資，三年前由純官親自力挖過檔，被視為心腹。近年各大地產商紛紛喺新界收地插旗，此時此刻有呢趟飯局，實在令人有無限聯想。記者事後致電梁福元求證，佢例牌否認，更聲稱當日飯局只係遲來的「春茗」：「春茗嚟咋嘛，好似中電、煤氣公司咁，年年都有o架喇，俾面派對之嘛！」清明都過埋先食春茗，記者都係第一次聽，佢仲誓神劈願話飯局從無傾過發展收地。梁志祥更索性話唔知邊個係陳觀展：「佢哋有新同事、有啲我都係第一次見……佢哋經理姓陳下話？都係介紹嚇啫。」記者問過無出席嘅元朗區議員，本來地產商宴請全體區議會成員食飯好正常，但新世界無按照慣例，向秘書處發邀請信，而係由公關逐個打電話問區議員出唔出席，點解要咁鬼祟？新世界解釋，由於飯局無特定議題，所以只係電話私下邀請議員，而唔經區議會秘書處。 范太前公關助趕六四館 六四紀念館終於開幕，紀念館所在地嘅大廈業主立案法團主席巢國超上週三蒲頭，話會繼續採取法律行動，釐清支聯會有無違反富好中心嘅公契，誓要趕絕紀念館。自稱「普通商人」嘅巢生經常前言不對後語，一時話自己負責律師費，一時話法團會俾番錢佢，轉過頭又話要開會傾嚇先，直至佢身邊嘅白衫男子教路，先至話係自己出錢，夜晚仲發新聞稿話「願意支付一切有關律師費用，毋須其他業主承擔」。呢位白衫軍師潘錦全原來來頭不小，佢係資深傳媒人，又係俊念傳訊顧問有限公司創辦人兼董事總經理。一一年唐英年醜聞纏身時，盛傳全國人大常委范徐麗泰隨時入閘參選特首，范太就喺嗰陣請佢做公關。九六年，潘錦全仲幫過前特首董建華助選，似乎同建制派關係相當密切。一個普通商人請到公關猛人助陣，錢從何來？潘錦全本週一回覆本刊查詢，話俊念受董吳謝香律師事務所委託及聘用，一切費用由維雅製衣廠，即係巢國超找數。 中西區再益自己友 政府大派四百五十萬俾十八個區議會宣傳《基本法》，呢啲明益自己友嘅活動陸續舉行。攞咗十一萬元嘅基本法推介聯席會議（基推會）聯同中西區區議會，本週日喺卑路乍灣公園搞填色比賽、攤位遊戲、歌舞表演、專題講座等，街坊反應麻麻。專題講座嘅主題係《基本法》賦予的權利和義務，主講嘉賓係律師衞珮璇。當日反對撥款而被抬離議會嘅區議員許智峰到場挑機，問衞珮璇喺法律基礎下如何保證普選冇篩選，點知衞話問題同活動主題無關，又話係咪良心律師應由自己評價，總之不停遊花園。現年廿八歲嘅衞珮璇係一一年區會選舉許智峰嘅對手，佢係有份批出撥款嘅區議員李志恆嘅姨甥女，兩人同屬由中聯辦港島工作部部長吳仰偉擔任首席榮譽顧問嘅建制組織「中西區發展動力」成員，衞當年參選曾被指舉家種票。李志恆話冇利益輸送亦唔覺尷尬，聲稱演講屬義務性質，活動細節由基推會安排，佢聲稱當日先知係姨甥女衞珮璇主講，真係信不信由你。許智峰質疑即使冇金錢輸送，但可能有延後利益，包括為衞珮璇下屆區選鋪路。 壹週圖片：曾鈺成伉儷豪遊京都 唔少香港人對京都情有獨鍾，立法會主席曾鈺成都唔例外。本刊同事目擊，上星期三曾主席夫婦把臂同遊京都嵐山，仲set機玩自拍，太太伍嘉敏乘機「搔首弄姿」，可惜曾主席搞咗成十分鐘先set好部機，真係辛苦曬。同事之後仲見到兩人去咗溫泉旅館「花筏」。據講旅館一客懷石料理最平都要七千日圓，即港幣五百三十蚊，一晚住宿接近港幣四千蚊，不過對曾主席嚟講，濕濕碎啦！ | ||||||