傳女方婚前偷食童顏張彥博同裕美婚事撻Q
1 :
GS(14)@2016-07-13 05:15:44裕美背住人夫偷食大台藝員黃子恆，事隔近一個月，女嘅話要冷靜吓，兩個男嘅亦封口潛水，偷食事件算係告一段落。前日裕美29歲正日生日，佢冇陪新歡，咁更加唔會見舊愛啦！壽星女反而約咗王君馨同楊明一班藝人，一齊食飯慶祝。講番裕美嘅情史，佢除咗同過E-kids嘅阮民安拍拖，亦試過同陳柏宇行埋。不過最經典嘅係，大台呢期熱爆嘅「廢青」張彥博(亦係前組合「赤子」成員)，原來亦同裕美有個一段情，裕美仲幾乎做咗張太㖭！喺5年前，張彥博喺教會識咗仲未做人妻嘅裕美，二人仲影埋結婚相，盛傳好事近。當時裕美喺微博貼圖寫道：「我們的結婚相。」2011年2月，兩人出席教會活動「Love is.....Concert2011」，甜蜜拍照，又大談婚事及性事。裕美當時話婚期未定，但應該唔係今年嘅事，又直言：「信主後，我啲貞潔返咗嚟，雖然之前已經冇咗！」至於張彥博都甜絲絲謂：「追咗佢(裕美)好耐，05年首次見面，佢對我一直都忽冷忽熱。」點知婚照曝光冇耐，裕美就俾人撞破同鼓手鄧應祈喺車廂激咀，有指當時裕美仲同記者求繞，不過一腳踏兩船事件，令佢同張彥博嘅婚事撻Q，而激嘴男就扶正變做男友，佢哋拍拖兩年分手。裕美接二連三同「偷食」扯上關係，張彥博作為第一代受害男，今日佢就喺電話回覆傳媒話：「其實到o依家都有同裕美send message聯絡，我都有叫佢諗嘢正面啲！」問到佢係咪差啲同裕美結婚，張彥博就有啲隱晦咁話：「總之我哋係friend底！」至於嗰張「婚紗相」，張彥博解釋：「嗰次同裕美着婚紗禮服，係幫祖藍首歌《祢永遠不會改變》拍mv。」
來源:
http://hk.apple.nextmedia.com/entertainment/art/20160713/19692329
張彥博自爆與裕美戀情內幕
1 :
GS(14)@2016-08-03 02:19:032016-07-20 HJ
無綫新劇《一屋老友記》收視、口碑同樣咁標青，令到劇中演員人氣急升，當中演「細寶」嘅張彥博，呢排都人憑劇貴，忽然冒起終於有人識。
其實，佢早喺〇五年以赤子樂隊身份出道，今年已經三十五歲，不過佢仍然keep住一臉童顏，成塊「小鮮肉」咁，真係完全睇唔出佢嘅真實年紀。而且，佢就連心態都好young㗎，睇番佢喺社交網嘅相，見佢成日扮萌、瞇眼、嘟嘴玩自拍，真童星都唔及佢咁kawaii呢！
佢喺呢個圈浮沉咁多年，識彈琴、打鼓、彈結他兼唱得，多才多藝，但就苦無發揮嘅機會，之前成日匿埋喺屋企唱好多cover，最近趁住「細寶」個勢，仲喺尖沙咀街頭，搞咗個快閃表演，算係小小哋滿足咗佢嘅歌星夢。
東姑見到佢，就順便問埋佢當年同裕美拍拖嘅陳年舊聞，嗰時仲傳出，裕美偷食另一音樂人鄧應祈添。張彥博解釋話，從來冇同裕美拍過拖，只因兩個人嗰時做婚紗代言人先影婚照，後嚟又喺MV客串做兩公婆；同埋因為將自拍照放上網，所以先會惹來誤會。而且，佢仲喺東姑面前，暱稱裕美做MayMay維護佢話：「我同MayMay好好感情，當正佢妹妹咁，因為大家同期出道，仲返同一個教會。嗰時傳三角關係，大家誤解咗，其實我同應祈都一樣係好兄弟。」終於真相大白喇！
Next Page