財經評論：銀行工零首期上車無望
1 :
GS(14)@2018-03-19 04:40:07■獅子行員工可以借足十成按揭上會，但貸款額上限為月薪120倍。資料圖片
上回提到，樓市癲升下，唔靠父幹上車最容易就係打銀行工，貪其員工可以借足十成按揭上會，只要過到供款佔入息比率，按揭成數不受限於金管局限制，簡單而言可以唔使畀足首期。不過，只係事隔兩個月，樓價比起年初又再升多一轉。筆者同一位banker傾開，佢係獅子行出身，做咗幾年又升咗幾次，之前一直想上車，但礙於用staff mortgage等於同銀行簽賣身契，前途要緊唔敢輕舉妄動。過了幾年到了適婚年齡，眼見樓價乾升，把心一橫賣身就賣身，終於成功催眠自己，突破轉工無謂、樓價係唔會跌的心理關口，打算用10成按揭上車自用，私己錢再密密儲起，萬一變負資產都有錢還。前陣子banker去沙田第一城睇了三個盤，問題來了，原來400實呎不夠的兩房單位，開價要570萬。獅子行雖然可以做十成按揭，但貸款額上限最多只可借月薪120倍，都未去到計下供款佔入息比率有無超標，原來賣身都要講資格，月薪唔夠5皮其實賣身都無咩用。可能大家會反駁，有份銀行工已經好好，係自己心頭高，怕死唔肯出少少首期，又要揀沙田，仲要買個兩房咁大的單位。不過筆者始終覺得，單係肯簽30年賣身契已經勇氣可嘉，試想像未來幾十年都要披星戴月喺中環返工，宜家只係想喺沙田買個唔夠400呎、樓齡30年的單位，都未為過吧？樓價不斷升仍有人接貨，或許的確曾有一批揸住鐵飯碗、薪高糧準的專業人士，真係去少幾次日本就可以上車。不過，若然連這班少數人的上車希望也破滅，港人的購買力究竟是否真是無盡？記者：陳洛嘉
來源:
https://hk.finance.appledaily.co ... e/20180314/20331467