📖 ZKIZ Archives

而家時興講「成功須『父』幹」，不過小宗認為，「成功須苦幹」仲係一啲都唔老土，有辦你睇。○九年先開第一間店嘅點心鋪添好運，由四季龍景軒嘅點心師傅麥桂培（培哥），拍住前好彩酒樓師傅梁輝強（強哥）創辦。憑住一味「酥皮叉燒包」，五年間由深水埗店，開到去北角、中環、將軍澳等，今年更衝出香港，開到去台灣、甚至越南！

多勞多得，銀行戶口自然反映咗出來。睇番土地註冊處資料，培哥同強哥未搞添好運前，只係報住深水埗福榮街舊樓以及將軍澳居屋唐明苑。但就喺過去五年間，培哥竟然用咗九百多萬，買入長沙灣新盤海峰等兩個大單位。而佢拍檔強哥仲勁！不單用咗六百幾萬，買入牛池灣樓盤峻弦單位，仲用咗合共一千八百多萬元，買咗將軍澳豪宅天晉共三個單位！做點心師傅都咁富貴，真係至威係你！小宗查過公司註冊處資料，所有添好運分店都幾乎係培哥同強哥做大股東，兩人落手落腳密密做，無話有大財團support。小宗對呢種獅子山精神，又豈有不salute之理！

踢竇「中出會」過口癮

在中環食飯出名難訂枱，如果不介意行多兩步，可以到上環長達大廈的中出會所，由上環地鐵站出，行一分鐘就到。中出會全名「香港中華出入口商會」，唔好諗錯隔籬。雖然係食粵菜偏順德菜，但選擇非常多元化，連西班牙黑毛豬都有得食，一邊飲普洱，一邊食黑毛豬片伴菠蘿，實在過癮！中出會至今已經有六十年歷史，當年聯合國對中國實施禁運，香港都列入禁運行列，搞到全港出入口生意大減三分之二，呢班出入口商人唯有團結起嚟組成商會，互相幫助，又去無對中國實施禁運的國家入口，先解決到難關。講到個會嘅餐廳有咩好食，會長莊成鑫就介紹欖角骨，師傅將一字骨炸到鬆脆，再撈埋冰梅醬炒。聽落好簡單，但小宗試過，食落酸酸甜甜，表面脆口入面肉質嫩滑多汁，真係一啲都唔嚡口，攤凍咗都仲係咁好食。其他出名嘅撚手小菜有野生魽魚煲同龍門米粉，都係傳統嘅順德菜，比較少油少鹽，食完唔會成日想飲水。令小宗比較驚喜嘅係，中出會所都有幾多創新菜式，好似脆皮牛坑腩同燕麥蝦球，前者用蛋漿炸牛坑腩，食落牛肉味濃；後者就用燕麥炸蝦球，再撈埋千島醬，蝦球爽口又食到一粒粒硬的燕麥，兩種口感都幾夾。中出會所走中高檔路線，大部分小菜都過百蚊，不過師傅話分量都比人多，一個例牌夠六個人食。會所話就話只招待會員，或者要透過會員訂枱先可以嚟食，不過小宗試過，以非會員身份都可以訂枱。就算要入會，要求都唔係好高，會長話無咩特別要求，亦一定唔需要做進出口生意，唯一要求就係要有會員介紹。普通會員入會費一千蚊，每年續會三百蚊，如果做永久會員，就一次過俾三千蚊。

罷免失敗李華倫寸爆：打仗無帶槍？

幾期前本刊講到信義玻璃（868）有意追擊正美（8135），仲想踢走正美創辦人夏路。夏路曾激動回應：「我要打好呢場愛情保衞戰！」上週五，就係股東會日子；終於，夏路打贏咗第一仗。支持罷免的票數四成八，反對的有五成二，夏路保得住職位。由於票數接近，相當牙煙。幫正美打仗嘅「股壇壞孩子」李華倫，對賽果都嚇一跳，奇怪信義竟有咁多街貨支持：「根本冇可能搵到咁多理念同佢一致嘅獨立股東，除非可能係一早安排嘅人頭！」信義今次計錯數、唔夠票奪權之餘，仲出現蝦碌情況，原本想安排兩個人入正美董事局坐正，但竟然唔記得跟公司章程，喺召開股東會前七日以書面確認，犯下低級錯誤。李華倫暗寸信義：「打仗前都唔記得帶槍？」不過佢都唔敢鬆懈：「打完八號風球，都要做足準備迎接十號風球啦！」

《財富》死踩A股

大陸股市升個不亦樂乎，但最新一期《財富》雜誌則開宗明義，叫人避之則吉，事關大陸經濟放緩而打貪令生意難做，故此投資者萬勿染指咁講。未過渡，《財富》判定香港死梗，今趟睇死大陸股市又靈唔靈呢，又？

金牙大狀講嘢聽經濟學家支笛會有難

馬雲呢頭話自己好尊敬經濟學家，跟手勁力反抽：「春江水暖鴨先知，我們企業家最能夠感受到時代的變化、經濟的變化；如果這個時候還去聽經濟學家的預測，你的災難就大了。」中國首富莫非係衝住雷公咁大把聲嘅教授而來？相信大家仲記得，把聲好似雷公咁大嘅教授預言，佔中會帶來一萬一千億銀嘅經濟損失。誰不知，非但遊客繼續嚟香港，零售額仲係咁升，甚至樓價都不斷破新高。聽教授支笛，一睇見佔中就賣樓嘅人，係咪好似馬雲話齋有難呢？財爺鬍鬚曾一度執雷公咁大把聲嘅教授口水尾，話佔中會對經濟造成結構性嘅影響，依家修正口風，話睇唔到佔中同樓價有乜關係。聽經濟學家支笛真係會有難o架，小心！

入伙只有兩年的將軍澳樓王天晉爆出冷氣機故障潮，管理處記錄顯示，全部一千個單位，超過四成住戶需要維修冷氣機。業委會主席質疑，發展商新地附送的珍寶分體式冷氣機，剛過保養期即故障屬不尋常，住戶還要承擔搭棚維修費用。專家指如此大規模壞機實屬罕見，估計與製冷零件質量有關。本刊介入後，新地及珍寶立即承諾延長全屋苑冷氣機保養期十八個月，並向自費維修冷氣的住戶退款。

周先生（化名）一三年一月以四百六十萬元，買入天晉一期實用面積五百三十九呎的兩房單位，發展商新鴻基地產附送三部珍寶分體式冷氣機，分別安裝於主人房、客房及客廳，並有兩年免費保養。 今年四月尾周先生啟動主人房的冷氣機後，發現只輸出暖風，「一開始淨係出風，以為係太耐冇開，但好奇怪，第二朝起身都係冇冷氣。」由於冷氣機的兩年保養期剛過，周要自費六千元搭棚維修，「講真，我用咗咁耐冷氣，冇諗過（冷氣機）咁短命，我而家唔係買二手樓。」他於是向管理處查詢，驚聞近期有數十戶業主均有相同問題，「咁大動作去維修，但可能唔知幾時又壞過。」他曾去信新鴻基要求免費維修，惟對方一直未有回覆。

跟進：近四百單位須維修

天晉一期位於將軍澳港鐵站上蓋，六幢共有一千零二十八個單位，一二年尾陸續入伙，由港鐵負責物業管理，現時實用呎價高見一萬五千元。記者曾到天晉平台實地視察，發覺每座平均有兩至三個單位正在搭棚維修，其中第二座更出現「一座五棚」的奇景。天晉業主網上討論區，近日亦有關於冷氣壞機的討論帖，近三十位苦主留言，「徵狀」同樣是冷氣機只出暖風。本刊獲得天晉客務處發出的文件，證實單是過去一年，已經有三百七十七個單位報稱要維修冷氣，即近四成單位受影響，而單是今年首五個月，則有六十多單搭棚維修冷氣機的個案，數字非常驚人。天晉業委會主席黎兆聰表示，若連同自入伙後維修冷氣機的個案，兩年來累積個案肯定超過四百宗，尤其近兩個月天氣愈來愈熱，很多單位同時申請搭棚維修冷氣機，認為事態不尋常，「係以倍數上升，reported case成五十個……仲要之前其實已經執過幾百部（冷氣機）。」他直言珍寶冷氣質素固然有問題，但發展商新地亦難辭其咎，「好多業主火都嚟埋。」他又擔心太多搭棚工程影響外觀之餘，亦會令外牆結構損壞，促請新地及珍寶代理第一電業盡快交代。

專家話：零件質量或有問題

本刊邀請驗樓師賴達明到其中一位苦主單位檢查冷氣機，即使將溫度調校至最低，即約攝氏十八度，紅外線測溫器卻顯示出風溫度高達攝氏三十度，比室溫還高，冷氣機啟動後十分鐘情況依舊，熱能掃描器則顯示，單位外的製冷機處於停機狀態，賴估計其內部零件質量有問題，發展商應檢討當初驗收程序。「好大機會同冷氣零件質量有關，供應同發展商應該盡快檢查。」理工大學電機工程學系教授鄭家偉了解事件後推斷，冷氣機突然只送熱風，可能是壓縮機或連接的電子板有問題，一般情況下前者壽命長達十年，後者亦達五年，估計電子板失靈的機會較大，但天晉單位冷氣機兩年即壞屬非常罕見。「好少兩年就壞機……電子板線路失效，連帶會影響壓縮機感應器，自然冇製冷……可能係批次或質量問題。」他建議小業主收樓前，可將冷氣機調校至最低溫度，並長開半日，以測試冷氣機性能，如發現製冷能力差甚至只送熱風，應即向發展商反映。

回應：新地即時延長保養期

本刊向新地及第一電業質詢，兩公司即時「補鑊」。新地回覆，第一電業將會為天晉全部單位的冷氣機，由單位兩年維修保養期完結日起計，延長十八個月維修保養期。保養期內進行的相關維修費用及保險，毋須業戶支付，至於已自費維修或正維修冷氣機的業戶，將會獲退款。但對於自費延長保養期業戶可否獲退款則沒有回應。新地又指出全屋苑超過四千五百部珍寶牌冷氣均由第一電業供貨及安裝，全部均有合格證明。對於冷氣機短短兩年便出事的原因，兩間公司並無回覆。（陳君沛）

壹判官

劣劣劣劣（五個劣為最嚴重）新地肯第一時間補救抵讚，但係入伙短短兩年就大規模壞機，兩間公司都要盡快查明真相，否則叫消費者點再信你哋。