📖 ZKIZ Archives

做得上市公司高層，幾時都應該兩脇插刀力撐公司，口講都未夠好，最實際係自己扲荷包增持，之不過，增持都要揀啱時機，搵個靚價位！

話說和黃（013）上星期四派中期成績表，3G業務否極泰來，出年仲可能自負盈虧，超人主席講明前景都秀麗，第二日和黃股價即刻升咗近一成。

只得開市見過吓54蚊

根據聯交所資料顯示，嗰朝早，超人兩隻頭馬──大班霍建寧同埋掌櫃陸法蘭，原來都有出錢撐老細，老霍豪掟5675萬（大概係佢年薪一半喇）買咗100萬股，而老陸就用咗810萬買咗15萬股。

再 睇睇兩位嘅入貨價，一向精明嘅老霍，平均入市價係56.751元，但係原來老陸先至係真正嘅「精明眼」，平均價只係54蚊，而嗰日和黃除咗喺開市嗰陣見過 吓54蚊，之後就一直有升無跌，絕對係超抵價……唔係話老霍俾唔起錢，之但係執輸行頭慘過敗家，嗰朝佢到底做乜咁遲出手？唔知醒？抑或部iPhone 「hang機」，落唔到盤呢？

李華華

[email protected]

賣衫嘅同農夫一樣，大家都要望天打卦！如果嗰排多打風落雨，咁就梗係少人行街買嘢啦；又或者嗰年唔夠凍，啲大褸、厚衫就唔使旨意賣得出！不過，畀個天玩嘅唔單止服裝零售商，仲有零售股分析員！

話 說喺舊年12月中，波司登（3998）嘅首席財務官麥潤權就曾經同華華講過，覺得一開始啲天文預測話今年會有「千年一遇」嘅寒冬，真係有少少吹大咗，佢希 望到1月真係會凍番啲。華華喺香港，就覺得1月已經幾凍嘞，大陸好多地方仲落晒雪結晒冰o忝。高盛原本係以為今年會「超凍」，1個月前先估波司登羽絨銷售 可以按年升40%，仲叫人買；o依家就發現信錯咗個天氣預測，將今年度羽絨銷售增長大減去到得番13%，又要降番級去「中性」，仲將波司登剔出埋亞太區買 入名單……唔怪得波司登呢幾日急插，噚日仲跌咗8%啦！

上市公司每年一度嘅股東會，除咗俾公司管理層同股東見吓面，接觸一吓，好多上市公司都好識做，會預備定茶點畀小股東享用。不過，噚日恒基地產（012）嘅股東會就出現唔夠點心派，搞到股東喺傳媒面前發難嘅場面，出手一向闊綽嘅四叔恒地主席李兆基今次真係失威。

其實恒地已經有幾好嘅分配制度，股東只需要拎住張飛，就可以去換點心，但失策在四季酒店竟然唔夠貨，又唔即刻加碼，反而叫股東第二日再嚟過。

至於發難嗰位股東，亦唔係善男信女，明明已經離開會場，但因為換點心不果，所以折返喺傳媒面前「告狀」。眼厲兼心水清嘅記者行家，一眼就認出，佢曾經出現喺電盈（008）股東會，同樣係用各種方式引傳媒注意，可能呢位股東志不在區區點心。

其實近年上市公司股東會嘅「膳食」安排已經比以前改善，華華記起當年金融風暴，唔少上市公司嘅股東都變咗「大閘蟹」，於是將不滿化為「食」量，所以偶然都出現小股東鬧唔夠點心場面。

03年沙士，由於衞生問題，好多公司先行將茶點打包，股東每人一份，乾手淨腳唔使爭。

萬邦招呼好港鐵水都冇

據華華多年出席股東會經驗，最抵讚係萬邦投資（158），可能股東人數唔多，所以每年都喺中環翠亨邨招呼股東食餐晏。仲有就係超人李嘉誠嘅長和系，會喺自己嘅酒店請股東食自助餐。至於最慳家嘅應該係港鐵（066），皆因咁多年股東會，水都冇杯畀小股東飲。

李華華

[email protected]

距離無綫《萬千星輝頒獎典禮》不 足兩個半月時間，暫時被睇高一線做新科視帝、視后人選，只有鄭嘉穎、謝天華、陳法拉以及鍾嘉欣，相比兩屆盟主鄧萃雯、黎耀祥，差太遠。唔想頒獎禮失色，無 綫立即「做嘢」，於台慶月推出四套由一線花旦小生擔正的重頭劇，包括黎耀祥、張可頤主演的《法政先鋒III》，陳豪、林保怡、佘詩曼擔正的《天與地》，宣 萱、胡杏兒雙旦出擊的《萬凰之王》，以及由阿姐汪明荃同福祿壽合演的《荃加福祿壽探案》，製造視帝、視后爭崩頭話題。據了解，愛打穩陣章的無綫，為保持視 帝水準，大有機會再捧黎耀祥、陳豪做視帝，令大熱Laughing Sir謝天華空歡喜一場。變陣捧大熱

踏入九月份，無綫至今僅得《潛行狙擊》一劇成為視迷話題之作，即使《怒火街頭》和《點解阿Sir係阿Sir》有口碑，但收視點卻未能創歷史新高，導致視 帝、視后大熱人馬，是根本未坐穩一線的謝天華與曾經做過視帝的鄭嘉穎，以及鍾嘉欣、陳法拉之爭。「到現時為止，只係得Michael（謝天華）同嘉穎叫做 突出啲，但又未至於夠料做視帝，已經有高層開聲，話佢哋兩個攞獎唔夠noise。」一名無綫幕後人員透露。唔想頒獎禮暗淡無光，無綫內部急忙對策，決定在 台慶月前夕，陸續推出四部由正宗一線小生、花旦主演的劇集，務求在短時間內捧出視帝視后大熱。

最後衝刺

打頭陣有阿姐汪明荃和王祖藍、李思捷、阮兆祥領軍的《荃加福祿壽探案》，十月三日晚上八點半播出；至於被指有機會三度問鼎視帝的黎耀祥，同張可頤主演的 《法證先鋒III》，安排在十月十日緊接「Chok王」林峯的《不速之約》九點半檔上場。《荃加福祿壽探案》之後，就有《金枝慾孽》加《宮心計》混合版， 由宣萱、胡杏兒擔正的《萬凰之王》，十月三十一日播。至於原定今年五月出街，由陳豪、林保怡、佘詩曼主演，講人食人的《天與地》，最後變成台慶月壓軸劇， 於十一月二十一日緊接《法證先鋒III》檔期推出。

全 抄 宴

無綫劇集經常被指抄襲，近作有林峯的《不速之約》，被指明抄《死亡筆記》加《情約今生》。而即將播出的四套台慶劇，同樣欠新意，《法證》、《天與地》繼續 「老翻」西片，而《萬凰之王》、《荃加福祿壽探案》則翻炒無綫舊劇。

《法證先鋒Ⅲ》抄《CSI》演員：黎耀祥、張可頤《法證III》講述警方從科學角度破案，利用指紋、鞋印、血漬、毛髮等證據，作為破案關鍵。查案期間，又 加插男女主角愛情支線，內容橋段似足外國電視劇集《滅罪鑑證科》（CSI）。

《天與地》抄《天劫餘生》演員：佘詩曼、陳豪、林保怡、邵美琪以人食人具爭議性話題作賣點的《天與地》，擺明車馬抄西片《天劫餘生》。《天與地》講述四個 主角去旅行，在雪山遇險，最後為充飢，迫不得已人食人，後來地球暖化，雪山溶雪發現屍體，令人食人事件曝光。

《萬凰之王》《宮心計》mix《金枝慾孽》演員：宣萱、胡杏兒、陳山聰、陳錦鴻講述後宮妃嬪惡鬥的《宮心計》、《金枝慾孽》，女主角個個「奸到出汗」深受 觀眾歡迎，《萬凰之王》重抄舊橋，飾演皇后的胡杏兒，出陰招陷害宣萱，二人在宮內明爭暗鬥，完全是《宮心計》和《金枝》混合版。

《荃加福祿壽探案》演員：汪明荃、陳茵媺、王祖藍、阮兆祥、李思捷《荃加福祿壽探案》以60年代做背景，講述開偵探社的阿姐，聘請了福祿壽三人扮鬼扮馬合 力查案。無論故事背景、手法都同98年由羅嘉良、張可頤合演的《難兄難弟之神探李奇》相似，兩套劇亦同樣加入扮嘢元素。

法拉中空寶

無綫變陣迎接十二月的《萬千星輝頒獎典禮》，有視帝黎耀祥坐鎮，又有戀情帶旺人氣的陳豪，謝天華、鄭嘉穎隨時由大熱變大冷。至於視后，有指陳志雲歸位，會 恩賜迷雲黨成員陳法拉上位做視后，但據知在陳志雲涉貪污案期間，陳法拉一度變節暗投樂易玲，令封后機會存在變數。「法拉係醒目女，唔會好似 Bernice（廖碧兒）咁擺明車馬同陳總劃清界線，其實陳總出事無耐，法拉已經過檔樂易玲馬房，每次樂小姐吹雞搞飯局，都會俾面出席，好多時仲會帶埋男 朋友去添！」一名幕後人員透露。

黑馬胡杏兒

陳法拉的忠誠度，陳總心裡有數，憑Madam Jo一角爭視后的她，攞獎機會大打折扣。至於《點解阿Sir係阿Sir》的鍾嘉欣，雖然跪喊羅Sir陳豪一幕感動唔少觀眾，但有指無綫高層嫌她未夠火候， 非視后最佳人選，勝算大減。相反，被指演技一般，冏樣纏身的胡杏兒，卻被讚在尚未出街的《萬凰之王》中有脫胎換骨表現，大有可能以黑馬姿態跑出。「有份拍 過《萬凰之王》嘅導演同幕後，都話胡杏兒今次收埋晒冏樣，演技好似變咗另一個人，不過佢唔算好有觀眾緣，都要睇套劇出咗街嘅反應同高層口味，先知有冇機 會。」幕後人員說。

預測視帝視后五甲

每年的台慶頒獎禮，無綫一眾小生花旦為視帝、視后爭崩頭。今年暫以演「Law霸」的鄭嘉穎及「Laughing Sir」謝天華，被捧為大熱人選，至於視后，做「Madam Jo」的陳法拉和「Miss Cool」鍾嘉欣，同樣被看高一線，但仲有四套「台慶劇」未出街，預計十二月頒獎禮，以下十位人選，最有牙力角逐視帝、視后寶座。

港股投資氣氛慘淡，以往每日成交近千億的記錄，俱往矣。今年頭八個月，每日成交金額已萎縮至只有四百多億元；但全港經紀卻有近四萬個，僧多粥少，無單開又點算？

做了五年股票經紀的Tommy，每月只賺三千元，要在假日到博物館做看更；而算是儲了一批熟客、做了逾二十年的林德明，亦要節衣縮食，早餐併午餐，靠老婆 撐起頭家。這些故事，在瀕臨淘汰邊緣的證券界中，比比皆是；從前「身光頸靚、魚翅撈飯」的股票經紀，早已風光不再。新丁

一個月搵三千

上星期五，三十歲的Tommy帶記者到他工作的證券行拍照；千餘呎的大廳內，坐了近三十個經紀，每個人對著面前的兩、三部大螢幕電腦，全神貫注。望一望 Tommy的電腦，原來他正在用看股票的電腦專注玩online game「Dream World」，其他經紀則上團購網打發時間，亦有經紀一邊聽歌，一邊閉眼養神，「日日都係咁，無生意，上年紀咪睇報紙，後生多數拎電話出來打機。」 Tommy見慣不怪地說。

Tommy在這間證券行已「掛單」快兩年，原來因為近年成交大萎縮，證券行已不再以底薪連佣金請新人，改為找來「自僱人士」分租行內的股票機及地方接客， 亦即經紀要「拆傭」當交固定租金，餘下才是自己袋。「不過市最淡時，拆傭後一個月只袋千八蚊，今個月叫好，有三、四千蚊。唯有自己炒埋一份搵食，每個月搵 多四千蚊左右啦。」他隨即打開即月恆指一分鐘圖，指半小時內上下波幅不足三十點，「個市根本無人炒，而家每日四百幾億成交，其中六成係基金左手交右手，散 戶落盤唔多，我哋根本無咩傭收。」

《大時代》啟蒙

近半年來，Tommy每個月都有五至十日完全無生意，結果在朋友介紹下，他在週末到中環的孫中山紀念館兼職做客戶服務員，但工作性質與看更無異，每個月做 三至五日，朝九晚七點半，時薪三十五元，每個月幫補到千多兩千元，「其實係巡館，搬嚇枱，有人問路咪答嚇囉！」但計及這份兼職，Tommy每月總收入仍不 足一萬元。 Tommy當初入行，全因為九二年熱播的電視劇《大時代》，他說這套劇令他對股票產生了興趣，「細個睇丁蟹炒股、指數上上落落覺得好得意，好想知道係點賺 錢。」大學畢業後，他就在銀行做落盤，每日至少二、三百個成交，「○七年真係做唔停，月入三四萬，公司出雙倍人工、送埋飯盒，想你食晏都坐喺度做埋！」不 過其後他的經歷，就反映了港股近年的起伏。○八年金融海嘯，Tommy每日成交由三百個大跌至四十個，銀行要求額外幫手推銷保險，「開市落盤，收市就打俾 啲客sell保險、sell債，嗰時爆完雷曼無幾耐，邊有人買，老細捽數捽得好勁，最後頂唔住壓力走！」Tommy轉到華資證券行做了一年多，但又因華資 行加薪不及大行，最後決定自己在證券行「掛單」。

無錢拍拖買樓

Tommy現時單身，和家人同住，坦言自己份糧，計落低過洗碗，別說買樓、連拍拖都難，閒時落街踢波，放工便回家打機，慳得就慳，「以前每個月儲到四千 蚊，間中去食自助餐！而家餐搵餐食，搭車食飯上網及電話費都三千，家用又俾三、四千，每個月剩番一千蚊，儲唔到錢o架！」他說家人不時勸他轉份有底薪的穩 定工作，但他仍然想捱多兩年，搏股市由谷底反彈，「今年頭半年，每日得二百億成交、一百點波幅，日子真係好難捱！我都曾經心灰意冷，我有學位又有證券、期 貨牌，搵份銀行客戶經理，月入都過兩萬啦！」他說，掛牌前的目標，就是在三年內賺到五十至八十萬，可惜做了近兩年，事與願違，「咁我自己盡咗力，個市差都 無辦法；但自己仲後生，搏個市成交量升番、波幅多啲，我就一定有得做！」

老經紀瀕「死」上街反擊

Tommy對前景仍抱有一絲希望，但做了二十多年的老經紀林德明，卻認為前路艱難矣。早上九時半開市，本應很忙，但林德明卻買份早餐，在證券行施施然地 吃，「你睇，個個都喺度睇報紙咋。」他說未遇過如此艱難境況：「唉，自由行，樓價升，唔關我事；股市成交愈來愈少，我哋收入仲少。」他說以往差極都搵三 萬，今年開始連公司每月給予的數千元車馬費，收入最多只有一萬，養的是一家四口及八十歲母親。他的慳錢招之一，是一份早餐當午餐吃，「慳得就慳囉！」這天 記者請他吃大家樂的牛扒早餐，他說：「譁！多謝你塊牛扒，好耐無食。」隔籬同事搭嘴，「嚇，我食杯麵咋。」整個早上，林德明就只有一宗成交，還要是前一 日，有熟客落「柯打」要求在三十元沽出二千股中國神華，今天一到價，他將這單交易寫落空白的交易簿上。計一計數，他與公司四六拆賬後，這個早上有六十元傭 金落袋；生意淡薄，怪不得吃個早餐都要計數。記者跟他由開市傾到臨中午收市前，他枱頭電話終於響起，林德明興奮地說：「嗱嗱嗱，終於有電話喇。」收線， 「哦，原來係你同事喺reception想入嚟。」他無奈地說。

經紀只一滴傭

林德明本來在地盤做管工，當年地盤老闆開證券行，帶他入行做出市代表，他穿著背心畫黑板，就是《大時代》的經典場面，到了九十年代初正式轉做經紀，高峰期 月入廿萬，他憶述：「當年電話響唔停，有成八百幾個客跟我o架，同事講笑話：『德明，你咁多客不如自己開舖啦。』」○三年，政府取消最低佣金制，「間間行 大劈價，我哋算好喇，有0.25%，有啲經紀得一滴（0.01%）咋。」但還要與公司六、四分賬。客人買一手滙豐，他只有二十多元落袋。佣金大跌，但山大 斬埋有柴，客多的他，月入也有三至五萬元。直至去年開始港交所分兩個階段延長交易時段，現時交易時段為上午九點半至十二點，及下午一點至四點，即午飯時間 只有一小時。他說這就如在市淡下向經紀踩多一腳：「李小加（港交所總裁）話要同內地睇齊，但攤長時間波幅就因此收窄，少咗好多即日鮮客。」以往午餐可相約 客人吃日本菜，交流股票心得，客人可於下午入市，現在要一小時內一來一回，已經無時間，林德明說：「唔通等收咗市先傾咩？聽日開市又唔同曬環境啦！」

作曲抒發鬱結

林德明不平則鳴，取消最低佣金制後，他把林子祥的《似夢迷離》改編，他開金口：「在歲月中我們繼續籌旗。」金融海嘯，滙控供股，他改編許冠傑的《天才白痴 夢》：「人皆沉重，滙控股海失寵；半百關終失去，害得苦命捱窮。」他把作品傳給經紀行家，大家自嘲一番，抒發情緒。延長交易時段後，他說有次搭的士，遇見 以前相識的同行竟然轉行揸的士，他深感火燒後欄，認為齋唱無用，於是組織示威遊行，竟一呼百應。今年二月，千多名經紀放下身段，湧上港交所門口，最終獲李 小加接見，林德明透露：「當時佢都話唔覺得第二階段（即下午一點便開市）咁有迫切性要執行。」李小加答應他會跟港交所管理層商議，但大前提是要求林德明： 「你先不要跟傳媒說。」林德明相信李小加，照做。結果是，在一片反對聲音下，港交所堅持延長交易時段。為了發聲，他走去參加今屆的立法會選舉，出選金融服 務界，最後「只得五票」落選，輸給張華峰。「無辦法，支持我嘅經紀係無票喺手o架，預咗輸嘅。」最痛苦是，「兩萬五蚊按金無得攞番，好肉赤o架！」幸好他 有做會計的太太支持，「我諗我走水貨可能仲好搵，不過我五十五歲喇，仔大女大，得老婆體諒，幫手撐住頭家先啦！」

證券行吊鹽水

Tommy和林德明的個案，在在反映現時經紀及股市的慘烈情況。歸根究底，環境經濟不明朗，令股市低迷，成交萎縮；加上有財有勢的銀行及大行劈傭，甚至多 年免傭，以及網上交易的興起，令中小型證券行非常難撈。據港交所的資料顯示，今年已經有十間證券行結業，當中如韓資的三星證券，已經向百名經紀「派大信 封」，沒有結業的證券行，亦不過在「吊鹽水」。一名不願透露姓名的華資經紀行老闆透露：「而家個個月都蝕錢，要引入新股東先捱得住；仲要節流，以前喺中 環，間行要俾十幾萬租金，根本入不敷支，而家唯有搬入上環，幾萬蚊一個月，希望捱得住。」他說，整間行現只裁剩一個經紀。而本來位於中環環球大廈高層的永 富證券，亦為節省開支搬到灣仔富通大廈。據知除了小型證券行，近日連投行都加入裁員行列，如Jefferies，有員工透露：「我哋公司股票嗰組已裁咗一 半人。」事實上，即使日後成交反彈，這些替客人電話落盤、靠與熟客維繫感情的股票經紀，在時代的巨輪下，亦難逃被淘汰的命運。

貴為HIT董事總經理嘅嚴磊輝，年薪千五萬，一個水上姑爺要做一百年先有咁嘅薪水，但佢老哥仲同老友呻，家陣搵嘅錢唔及以前咁和味。嚴磊輝咁值錢係有原因嘅；九十年代，佢喺Jardine Fleming跟羅慧娟老公，來自新加坡嘅劉志敏學師時，正值怡和系內公司大重組，繼遷冊百慕達之後，怡和再分別轉到倫敦同新加坡作第一及第二上市，從九四年起怡和撤銷香港上市地位。當時金融市場上搞遷冊，到海外上市嘅人才唔多，就係咁嚴磊輝成為搶手貨。

和黃港口信託前年喺新加坡上市，公司即從希慎翻兜嚴磊輝坐鎮，除咗睇中佢熟悉新加坡金融市場，會唔會仲貪佢來自Jardine Fleming呢？在新加坡掛牌的置地，九七年曾一度獲誠哥垂青，掃貨至4%；如果誠哥對置地未死心，嚴磊輝應該仲有運行喎。

Give me a break最豪廁 「去」得奔放

香港高級食府唔少，但肯揼本整靚個廁所卻唔多。好多中環人去食飯嘅尖沙咀半島酒店廿八樓Felix Bar，可以話係全港最豪華嘅廁所，呢個出自法國設計師手筆嘅男廁，尿兜由雲石打造，小宗站於落地玻璃前如廁，可俯瞰九龍景觀，實在有「大地在我腳下」嘅氣派，仲有「飛流直下三千尺」嘅暢快之感。不過酒店都有考慮客人私隱，所以加番高身少少嘅板遮擋。英國作家Luke Barclay寫咗本《廁所景觀大全》，世界第一廁係美國華盛頓北喀斯特國家公園，用家喺開放型馬桶上如廁，同時欣賞巍峨雪山嘅山脈。香港嘅Felix Bar有幸排第六，難怪小宗方便時，見到有遊客係咁影，鬼死咁尷尬。廁所級數有番咁上下，所以酒店規定，如廁者，拖鞋背心免進！

永泰廿億賣祖屋

永泰去年賣殼予萬科後，令市場譁一聲。近來又有傑作，鄭家三公子鄭維強叫天價三億坡紙（約廿億港元）放售鄭氏祖屋。永泰亞洲創辦人鄭翼雄，喺深水埗做製衣起家，後來到星洲發展地產，離世前一直住在這大屋，直至○四年在家去世，鄭家更跟足當地習俗，為防先人「迷路」在家設靈。對於香港人來說當然「大吉利是」，不過當地經紀話鄭翼雄乃星洲巨富，就算喺屋內離世亦無人怕，啲人最驚嘅都係鄭維強嗰口叫價。雖說Nassim Road好近植物公園，而且轉個彎就到購物熱點烏節路。之不過去年二月的成交價，都係二千銀呎坡紙，但鄭維強的叫價卻逾三千五百銀坡紙，貴足七成七！仲有，好似呢啲別墅，喺星洲叫free-hold land，係唔賣得俾非星洲公民，咁又少咗一批潛在買家嘞。下月截標，若有願者上釣，真係嚇死唔少坡佬喇。

燈神決戰金價之「癲」

塞浦路斯話要賣金還債，美國又嗌收水，嚇到金價一個星期內跌咗成千蚊港幣。另一邊廂，日本「紮行馬」印銀紙，好多「o架妹」即刻賣曬屋企嘅金條，換番啲Yen傍身及消費。白銀戰隊隊長孫柏文就話：「人人都賣金，係見底信號，買！」佢覺得白銀會跟黃金在三年內升四倍，仲話佢屋企有成三個大喼嘅白銀。之不過，佢老友沈振盈聽到，就標曬汗：「你同我祝佢好運啦，我好擔心佢，黃金已經進入熊市，會跌到去千一美金，佢今鋪真係好大鑊！」之但係，兩位都係出曬名嘅燈神，今鋪信邊個好呢？

金牙大狀講嘢永遠的空櫈

林奮強卒之就佢行會成員地位開聲，表示冇時間表復職，亦冇打算請辭，即係維持原判無限期休假。咁都得？試問香港有邊份工係一開波即無限期休假，更莫說係行會成員咁吃重嘅任命。林奮強喺舊年七月一日加入行會，四個月後喺十一月二日開始無限期休假，於今五個幾月矣。即係佢休假時間已經長過佢服務行會嘅時間矣。呢五個幾月嚟，行會繼續每個禮拜開會，林奮強休假顯然並無對其運作造成負面影響。此又不禁令人要問，行會係咪真有需要林生嘅參與先？如果係，咁點解俾佢無限期休假？如果唔係，咁又點解俾林生孭住個行會成員括弧無限期休假嘅招牌喺江湖行走？行會成員從來只有一個功能，就係為香港人嘅福祉出謀獻策。無限期休假中嘅林生顯然唔可以履行呢個責任，既唔填補林生嘅空缺，又唔叫林生借歪等第二個人頂上，梁振英真係有心幫香港人做嘢？唔似囉！

每個小朋友都曾夢想自己住在一間色彩繽紛的糖果屋中，各種糖果任食。隨着年齡漸長，很多人把糖果屋拋諸腦後，除了今年廿六歲的林汛展（Jeffi）。Jeffi為了吃甜，走到葡萄牙，花半年時間學做手拉糖。回港後，在糖果店再磨劍三年，去年十月，與學生兼拍檔Manie在荃灣工廠大廈開設糖果店「Hey Candy」。曾在糖果公司打工的Jeffi，知道逐粒逐粒賣糖，有排未回本。因此他們決定為品牌策劃「糖果活動」，並開班授徒，連同零售三管齊下，現月賺五萬元。Manie定了下一個目標：「租地鋪、開門市！」

上週Jeffi和Manie，帶着他們的糖果，來到城市大學的Mega Sale擺檔。他們的糖果色彩繽紛，除了手拉糖外，還有小熊、兔仔、鴨仔形的波板糖，成功吸引不少女同學的留意。Manie說：「我哋每個星期會出嚟擺三次檔，唔同場合都擺。因為我哋喺廠廈，較少街外客，所以盡量爭取出街擺檔嘅機會。」記者見Manie不停主動讓客人試食糖果，「我喺Häagen-Dazs做咗七年店員，習慣晒面對客人。啲客要試食過，覺得好食先會買。」其實一粒糖，零售價平均才五毫子，請人任食拉生意，根本無需吝嗇。記者見Manie以左手把糖送到客人手上時，會以右手有意無意輕托客人接糖果的手，「手與手之間有接觸，可以增加親切感，仲可以拉住佢哋傾吓偈，sell耐啲嘛！」Manie指其男友都是sales，兩人經常分享sell客之道。不過，身為糖果師傅的Jeffi當日就無用武之地，只能密密切糖，「今日場地無電提供，否則我可以表演整糖，仲多客睇呀！」

替品牌搞活動搵銀指數：＄＄＄＄＄

事實上，這種手拉糖店，市面上已經有好幾家。包括元祖手拉糖店Papabubble，本欄多年前訪問這店時，Jeffi就剛到那兒任職，至去年儲夠錢，才自立門戶。做這門生意，他認定賣糖競爭激烈，而且他們是新店，市場佔有率在短時間內，一定不夠其他龍頭高。他計過數，一樽糖果才七十五元，要賣多少樽才夠交租？故與曾做活動統籌的Manie商量後，決定以糖做主題，替品牌籌備活動。「我哋會幫客人set好派糖嘅活動內容，仲會主動要求到現場幫手派糖。除咗幫個客手，其實仲可以係現場撈客！」開業後，他們接的第一個活動，就是在婚紗雜誌公司的活動上，派發印了「囍」字的糖。Jeffi回憶指他們的第一次並不順利：「喺太陽暴曬之下，啲糖都溶溶哋，搞到啲途人都話我哋啲糖唔得！」Manie則接着說：「下次識得同客講明，夏天室外搞活動會有問題，室內就唔會咁。嗰次係朋友介紹，我哋唔收錢，賣大包；雖然有小小意外，但對方都好包容，喺雜誌某個廣告位，免費俾我哋賣廣告。」現時，Hey Candy每月平均接到最少一單活動大單，客人包括NARS，City'Super及Chocolate Rain，Chocolate Rain老闆Prudence說：「佢哋係好有心好年輕，很有創意。」每單生意平均收費達兩萬。如果計零售，幾乎要賣夠四萬粒糖才可做到此數。上月他們幫夜店Dizzi搞活動，為他們度身訂做四千支細波板糖，「今個Halloween，又會幫一間酒店嘅宣傳活動做兩萬塊波板糖。」Manie興奮地說。為了爭取宣傳機會，只要客人願意讓Hey Candy在包裝上留下公司名字及聯絡方法，便可得到折頭，他們則當是宣傳成本。而有時Jeffi又會應客人要求，在會場表現整糖。他說：「只要有電，我帶啲小型工具就得，氣氛比齋派糖高興得多。」

開班搵外快搵銀指數：＄＄

不過，一個月得一單活動，其餘日子都不能坐以待斃。事關開設糖廠，對於他們來說，成本甚高，因此必須要物盡其用。Jeffi指：「張工作枱溫度會去到一百度，咁先可以保持糖的溫度，以做出不同形狀。而張枱每日至少要用六個鐘，所以用電比平常工廈多幾倍，要申請『大電』先夠用。單是處理工作嗰啲供電，便花了十萬元。」因此，Jeffi及Manie更會開班授徒，Jeffi會一星期開兩班教學生，每位收費二百九十八元。好多人擔心開班授徒，將手技外傳，會惹來更多競爭者，「所以我哋淨係教整波板糖，因為較為容易整，好似人哋整紙黏土咁，學咗都唔怕。」上週五，來學師的莊生莊太，希望整熊仔及免仔波板糖，送給三年級的女兒，亦順便拾回童真，做家庭主婦的莊太說：「真係幾得意，好特別，香港好少有呢啲咁嘅機會，價錢又唔算貴，好啱一家大細嚟玩。」兩人跟着Jeffi，先把三公斤的糖漿，水和砂糖煮熱至百多度，然後再倒在發熱工作枱上，把色素加入糖漿之中。再把處理好的糖漿拋在牆上的鈎，來回拉三十下，將空氣注入糖漿內，令口感變得較脆，顏色較有光澤。「整塊圓形的面，原來都咁難控制嘅，不過整完都幾有滿足感，下次帶埋阿女嚟。」Hey Candy一星期約有兩班，每班四至八人，一個月約有萬多元收入。始終要待假日才開班，亦因為要把桌子發熱至攝氏一百度，故不可以「跳出糖廠」，相比搞活動，此做法較受局限。

開地鋪「響朵」搵銀指數：＄＄＄

現時零售生意只佔營業額兩成，但Jeffi一直希望可以開拓多一點零售市場「響朵」，「Jeffi對味道要求好高，試味都試咗兩個月，起碼用咗十萬。因為每試一種口味，都要用三公斤的材料，整三個鐘先得，所以每日最多都係試到三種味。」Manie說。Jeffi接着說：「其實葡萄味我都試咗十幾種，有的像黑加倫子，有的像巨峰提子。經過朋友試味後，結論是巨峰提子最適合香港人口味。因為相對上唔甜，甜中更帶點酸。我哋仲研究緊西瓜味。」現時，Hey Candy零售主要靠在Mega sale擺檔及網購。為了吸引更多人網上買糖，除了口味，其實糖果的創意及外形更重要，「好似『厚多士』字樣，高登膠樣，要多啲款式，做到塊面咁大，先有人留意我哋！」Jeffi說。由於分散投資、兩人要搞活動、開班，顧及零售及做糖，不時做到一頭煙。難得有空，Jeffi環顧八百呎的糖廠說：「做生意真係好多嘢煩，我試過唔記得交水費，被水務署停咗一個月水，搞到我日日都要抬兩公升水返廠。」為了長遠發展，他們正打算多請一個學徒。Manie說：「多個人幫手整糖，我就可以全力出去搵客，目標係接到酒店單，每間房都有我哋嘅糖去迎接住客。咁不單可以幫到零售收入，客人對我哋嘅信心都會大好多。建立咗品牌形象之後，賣幾多粒糖就唔係困擾啦。」他們希望有一天，能夠由廠廈走到地鋪。

開業資料（10/13）

租金：$50,000^裝修：$250,000入貨：$10,000器材：$150,000流動資金：$250,000總共：$710,000^兩按一上

營業資料（9/14）

營業額：$75,000租金：$7,000入貨：$7,000雜費：$8,000盈利：$53,000

行家點講？Sticky創辦人Jen：賣得太便宜

與Hey Candy一樣，Sticky同樣是賣人工手拉糖，開業短短三年，已在尖沙咀K11和天后擁有兩間門市。其店內更有師傅表演即時拉糖，深受年輕一族歡迎。Sticky負責人Jen認為荃灣工廠的位置偏遠，而且沒有門市，較難成功建立品牌。同時，Hey Candy出外擺檔時，一包四十克的糖果賣緊二十元一包，平均五毫子粒。Jen認為對方的糖果定價偏低，起碼要賣約七毫子一粒。「賣貴啲，可以幫補番零售收入。我嗰啲糖七十克都賣緊四十八元一包。」