| ||||||
入行十年,三年前轉戰電影圈的Juno(麥浚龍),有老豆揼水開戲自己捧自己,又同前成龍經理人陳自強上埋契合組公司,搵對方搭通天地線拍cult片攻日本市場,但hea足兩年有多,Juno認為契爺「幫唔到手」兼倒水,早前已將每月袋十萬的陳自強炒魷。冇乜聯絡 上週一(十月二十一日)晚,Juno籌備兩年,投資二千萬的新戲《殭屍》首映禮,新戲參加了多個國際電影節,Juno又被提名金馬「最佳新導演」,當晚有不少圈中人俾面撐場。 頭威頭勢,初做導演兼老闆Juno全晚風騷拖住日籍監製清水崇滿場飛,反而兩年前跟他合組公司的陳自強卻姍姍來遲。 過去幾年,Juno不時孖住契爺陳自強出席活動,就連加片酬、拍危險場面都問過老人家,但近日做新戲宣傳時大多單拖出現,亦甚少提及對方。原來自從有日籍恐怖片大師清水崇做扶手棍後,這一年來,Juno已經鮮有跟陳自強聯絡。 月薪十萬 「Juno幾個月前已經炒咗Willie(陳自強)魷魚!當初搵契爺一齊搞電影公司,都係想借佢老人家嘅人脈網絡同打入日本市場,不過過咗兩年,拍咗套《保衞戰隊之出動喇!朋友!》,之後話會搵關錦鵬監製一套同周冬雨合作嘅文藝片,結果又冇曬聲氣。其實○七年冇再幫成龍之後,Willie今時不同往日,就算佢親自出馬去日本,都冇乜嘢搞到出嚟,所以呢兩年都冇嘢做到;就算今次係Willie嗌惠英紅、鮑起靜同陳友幫Juno拍《殭屍》,但Juno見每個月出成十萬蚊糧俾契爺,又幫唔到幾多,梗係cut啦。」知情者說。契仔用完即棄,有過幫成龍開山劈石,到頭來不歡而散的創傷後,跟Juno只得幾年「感情」的陳自強,已不似當時,晚晚借酒消愁,首映禮當晚,更刻意悉心打扮,好頭好尾。「嗰晚Juno有dress code,叫大家著黑色襯番套戲嘅mood,Willie同佢咁少聯絡,梗係唔知,所以咪著到成身紅咁去睇首映。」Juno身邊人說。 曾經風光 72歲的陳自強,90年代被稱金牌經理人,一手將成龍由香港打入日本市場到躋身國際。事業輝煌期,手執張曼玉、鍾楚紅、張學友、王祖賢、鄭裕玲、關之琳等巨星;後期亦有為吳彥祖及陳冠希出過力。07年成龍不顧恩情,將一手打造他成為巨星的陳自強踢走,難以承受炒魷打擊的他,一度意志消沉,終日借酒消愁。11年,陳自強獲金像獎頒發專業精神獎,表揚他在業界的貢獻;張學友更在紅館個唱為他獻上一曲《My Way》,藉以感激對方。 |
| ||||||
雄心壯志,想自己做埋電影公司老闆的宇宙最強甄子丹,去年三月被林建岳收歸旗下,合組開設「Super Hero超級英雄電影」公司,並敲定以郭子健執導的《九龍城寨》,作為公司頭炮作品。埋牙一年,礙於宇宙最強堅持開戲預算要一億五千萬,林建岳認為投資風險太高,難以回本,雙方拉鋸多時仍無法達成共識,甄子丹見金主咬極唔入,索性轉投荷李活最大經理人公司Creative Artists Agency(CAA),正式和林建岳分手,疊埋心水繼續搵街外錢。企硬億五打頭炮 林建岳愛廣收天下兵器,甄子丹又發夢要自己做埋老闆,雙方一拍即合,合組「Super Hero超級英雄電影」公司,投資開拍電影,並確保宇宙片酬由三千萬(人民幣)起跳。去年三月,新公司成立的記者會上,甄子丹透露將會「一年拍兩至三齣戲」,其中包括有馮小剛執導的動作喜劇,鄭保瑞執導、講述美國一個武術家如何成為一代宗師的《大師》,以及由郭子健操刀的《九龍城寨》三個項目。甄子丹的如意算盤是以預計今年開拍的《九龍城寨》,作為公司頭炮作品,電影雖以龍蛇混雜的九龍城寨作為背景,宇宙最強亦曾聲稱不會花錢重現九龍城寨:「搭景唔會啦,電腦特技搞掂就算。」話雖如此,但宇宙好胃口,預算愈計愈大,最終投資額高達億五。 有數得計蝕硬 據瞭解,雙方經多月磋商,最終林建岳以億二作為投資上限,但甄子丹依然企硬,不肯讓步。「部戲當大陸可以收得,收一億返三千三百萬,以子丹開億五嘅預算,要收五億,先叫做打和;仲未計宣傳發行嗰筆,投資過億嘅戲,宣傳費郁嚇幾千萬,子丹嘅《葉問》雖然有好口碑,啱啱賀歲嘅《大鬧天宮》亦收過十億,但靠佢自己孭嘅票房,隨時唔過兩億,億五開《九龍城寨》,幾乎蝕硬!」知情者說。 搵定靚位落台 搓波一年,《九龍城寨》最終胎死腹中,林建岳拒開水喉,令宇宙最強老闆夢碎;撞正美國經理人公司Creative Artists Agency(CAA)搵上門,有埋靚位做下台階,甄子丹決定同林建岳分手。唔做老闆,甄子丹六月中先開袁和平執導的《臥虎藏龍II鐵騎銀瓶》,緊接再拍《葉問3》,片酬四千萬人仔,新高!搵街外錢,免煩! |