【專題籽】唔做補習天王 半打學生夠晒數
1 :
GS(14)@2015-11-02 00:09:48Ryan高考3A，於科大主修計量金融學，曾在中學教DSE數學，所以熟悉考試範圍。
【專題籽：胚芽故事】香港教育唔得掂，loser成群。邊個贏？補習名師sure win！如果求學不是求分數，8,500萬年薪的公開招聘書根本不會出現。在大型補習社廣告前，chok得來帶兩分真誠的曾兆韜（Ryan）有狀元才，要成為廣告中的天王其實唔難，但他選擇開一家細過豆腐膶的補習社專攻數學，裝修、派傳單一腳踢，只為堅持半打學生夠晒數的教學模式。「想見到佢哋笑到好開心。」天價vs無價，數學尖子梗識揀。
香港學校一班有成40學生，同老師的距離怎會如此親近？
走進Ryan與拍檔Stanley在旺角的補習社，我的眼睛變得很廣角，因為一眼睇晒。然後我發現Ryan與學生都脫了鞋。他解釋，「我想大家舒服啲，好似返屋企咁。」這300呎的「家」，零廳兩房，可讓二人同時教學，每次最多一對六。因材施教，是教育的應有宗旨，他也把程度相若的學生安排在同一班。看他上課，發現教的多是應試技巧：如何最快用計數機得出答案、用口訣記公式等等，講真咪又係坊間的DSE雞精班。可是當他問問題，同學細聲到爆佢聽到，計數機按錯佢睇到，我就知less有時真係more。這的確不可能發生在大型補習社，更遑論看video的一群。「我唔會捨棄小班呢個方針，想直接在堂上幫佢哋『診症』。」
非純為賺錢 無視利誘挖角
「學生回家後也可WhatsApp問我問題。」有學生說Ryan會錄音、拍下寫在黑板的公式然後回傳。全天候服務，係吸引嘅，難怪一年多前在葵涌開業，月前能在補習社百家爭鳴兼出名貴租的旺角插旗。「為慳錢，自己裝修、砌傢俬。好多中型補習社都會豪使幾十萬裝修，我們整盤生意的本錢，只有五位數。」補習社剛起步，Ryan口輕輕說：「對大型補習社挖角冇興趣。」當然沒包袱。他日如闖出名氣，補習社利誘，誰能寫包單不動心？「我唔係生意佬，唔係純粹為賺錢。坦白講，我係一個典型的香港學生，我只識考試。我夢想係創業，所以我搞補習社。如果我喺其他補習社，所有嘢都要跟佢哋系統，我冇話事權，但呢度係我孕育，我只需同拍檔交代。」乍聽覺得香港學生好悲哀，好像窮得只剩考試技巧。考試主導人生，他的理念是，既然制度如此，就戰勝它吧。「幫佢哋考好公開試，他們手上起碼有多啲籌碼，人生選擇權會更多。」
放棄教中學 為帶給學生歡樂
Ryan大學畢業後曾任職中學老師，之後放棄教職流浪歐亞多個國家，踏足西班牙時曾跟寄住家庭到學校參觀，發現人家上課時笑聲笑聲滿載溫馨。「同香港真係好唔同，我都想帶畀學生呢種歡樂。」他會喊學生花名，學生又會笑他post上facebook的相太chok，好明顯沒有所謂的師生觀念。原來他們大部份都是他以前的日校學生。出去補習，你揀番以前的學校老師？一係儍咗，一係……佢真係幾好囉！
除鞋上堂，讓氣氛更輕鬆。
課堂一直有說有笑。Ryan說會一直留意學生的進度，看到他們「頹頹哋」，會適時幫一把。
補習社裝修絕不花巧，自己動手砌傢俬，慳好多。
學生講兩句
顏健聰：同我哋好close
「佢係個另類嘅人，同其他老師唔同，跟學生嘅關係好close、好friend，同佢相處好似朋友嘅關係。」
余嘉傑：唔使對住電視
「喺度補習唔似大型補習社只睇電視機咁疏離，對住電視機，感覺唔好受，而且佢哋教嘅針對唔到我嘅問題。」
譚海夆：WhatsApp即刻覆
「夜晚做數有靈感啲，做做吓有問題唔識，我WhatsApp佢，佢即覆。其實都冇諗過會唔會阻住佢，哈哈。」
楊梓煒：有教學理念
「佢好熱心關注每個學生的難題，我相信佢真心想實踐教學理念。」
問黎則奮如果有補習社高價請他出山，會否應承。他大笑說：「唉！我out啦，咁老，邊個會buy呀。」
第一代名師Q爺：李吳羅范係垃圾
「教育制度荒謬絕倫，那班『大帝』李國章、羅范椒芬、吳克儉全部垃圾，根本不知問題出喺邊。」教改，令人反枱，搞到時事評論員Q爺黎則奮忍不住數落。他看不過眼學校竟因怕公開試合格率低影響校譽，把學生送到補習社集體補習，完全本末倒置。「只有香港咁畸形。」
30年前教英文 年薪過百萬
教育制度的漏洞，造就補習行業變成上市生意。早在三十多年前已有人看到商機。原來Q爺在七十至九十年代曾是英文補習名師，他任職的「英訊」，是香港首家以英文會考不合格原銀奉還為噱頭的大型補習社，極有市場觸覺。「七十年代末，英文唔合格，畀你九優都冇用，沙紙變廢。由於當年作文佔最多分，我哋主攻作文，先教grammar再教expression，篇文攞唔到A，最少都唔會肥佬。」「當年好多學生冇心機讀，讀到一半走咗，根本唔使賠。」其餘堅持讀畢課程的，七成都能合格。1982年他跟舊同事一起開辦類似的補習社「新英訊」，一做就是10年。「第一個月已賺錢，從冇蝕過。」試過年賺過百萬，當年來說即係幾多先？「我記得1983年，康怡花園開售，當時一個590多呎的單位，只售30萬。」嘩，補習果然是一門生金蛋的生意，但他心底裏明白，這行業根本是教育失敗所形成的「毒瘤」。「加拿大、美國有冇補習學校呀？冇呀！」現在的制度就是不斷製造失敗者，而學校也普遍認為失敗者就要放棄，要差的學生退學。「只接受叻嗰啲，叻嗰啲你唔教佢都叻㗎啦。」文法中學唔係人人啱讀，想當年有很多實用中學、工業中學，讀不成書，也有辦法成為對社會有貢獻的人。他說：「而家或者就要等到考完DSE，衰咗讀IVE。」個個中學生都補習，當然有原因。
廣告片搶攻YouTube
相信「扮明星」是大眾對於補習社名師廣告的一致評語。ABCDE公司的廣告根本好似樣，特大招牌無法建立特色，所以都在社交平台針對性宣傳，包括上載到YouTube的宣傳短片。理工大學設計系助理教授曾錦程認為最近遵理學校似乎在賣理想、強調前途，例如有影片sell旗下老師，怎樣由屋邨仔變成哈佛都要用他文章作教材的成功例子。「短片製作認真，有度過，營造到較有深度的形象，應想吸納成績好嗰批學生。」現代教育則相反，短片感覺年輕但膚淺，製作參差。「主力係拉關係，想跟學生打成一片。影片把DSE比喻為喪屍病毒，搞到啲學生變喪屍，idea出位，但劇情毫不吸引。」
曾錦程認為現在的廣告都一定要「真心」，虛情假意易被年輕人拆穿。
當年的當代書院的電視廣告，名師穿古裝宣傳，實在前無古人，被笑稱「當代三儍」，希望後有來者派花生。
橋段有kai有肉麻
很多宣傳短片都採用「動之以情」的手法。例如遵理會在放榜前推出打氣片段，睇過覺得唔老套。曾錦程認為而家啲學生個個挑通眼眉，太造作他們會看出來。「在他們最脆弱的時候用這手法係高明的。照理他們不會再讀DSE，出這種片好像沒企圖，其實暗藏希望你製造口碑的動機。」其實每間補習社都會強調摘星數字，但網上短片千奇百趣，都會跟市場走向變來變去。有時你kai有時我肉麻，很難有「通殺」的廣告橋。
《從華富邨走到哈佛大學的故事》 遵理的Band5屋邨仔受哈佛賞識的短片賣成功例子，雖然真實、正面，但曾錦程認為年輕人也不一定受落。
《中文作文無難度》 活學教育一向sell理想、遠景，但近年強調摘星。近日生招牌Amanda竟走去扮學生妹，想點？
《俾DSE喪屍追點算好？》 現代教育算認真製作，不過太早穿橋，冇乜人想睇落去。
記者：葉青霞攝影：劉永發、許先煜編輯：謝慧珊美術：吳子豪
來源:
http://hk.apple.nextmedia.com/su ... t/20151031/19353805
【最強五虎】湯鎮業半打仔女
1 :
GS(14)@2017-03-23 06:51:1380年代「無綫五虎」劉德華、梁朝偉、黃日華、苗僑偉和湯鎮業是史上最出色的五虎，四大天王之一的華仔更成為亞洲巨星。08年他與朱麗倩結婚，12年誕下女兒劉向蕙，家庭美滿。
黃日華
黃日華88年與拍拖8年的梁潔華結婚，兩年後誕下女兒黃芷晴。大前年梁潔華患壞血病，如今已經康復。
苗僑偉
苗僑偉82年拍《飛越十八層》時認識戚美珍並拍拖，二人婚後育有一對子女，大女苗彤在91年出世，兩年後再誕下幼子苗俊。
湯鎮業
湯鎮業有兩段婚姻，93年與年輕13歲的中日混血兒姜坤結婚，育有一女和一對孖仔，01年離婚；00年他與女友誕下一子；08年再與青島女子文靜再婚，生下一對雙胞胎女兒。
梁朝偉
梁朝偉多年來醉心演戲，終在08年於不丹迎娶拍拖20年的女友劉嘉玲，雖然婚後傳出嘉玲求子心切，惟她曾表示現在很開心，享受二人世界。
來源:
http://hk.apple.nextmedia.com/entertainment/art/20170323/19966844