2010-12-11 AD
|
||||||
|
傳媒老友記梁家 權日日睇「G G細語」，甚至連左丁山講馬俾貼士，佢都夠膽照跟，有一次俾佢中正三重彩，講足成年，左丁山聽見都面紅。大抵佢唔抵得左丁山自認未能深入市井餐廳（見星期 三追星飲食），於是趁佢本新書出版之便，送來新書，就是「跟我搵食港島篇─庶民美味指南」。 呢本書在今年十二月出版，啱啱與米芝蓮宣佈星級餐廳撞到正，可以證明梁家權並非抄米芝蓮。原來依家出書可以送埋飲食優惠券，譬如一星餐廳恆河咖喱屋之九折優惠券（先要光顧一百大元），而呢本書只賣六十八元，計吓數，有着數噃。 梁家權唔係米芝蓮評審，選擇餐廳有何標準？據佢講，第一就係啱佢個人主觀口味，一定要好食，至於啱唔啱讀者口味，另計啦；第二就係一餐花費以一百五十蚊為上限，貴價餐廳唔係庶民嗰杯茶；第三，全部佢親自去試過，拒絕餐廳請客。 既 然如此，呢本「跟我搵食」唔係米芝蓮飲食指南，而係梁家權搵食指引，一共有一百一十八間，遍及中西區、灣仔區、東區及南區：粗看之下，梁家權之選擇與米芝 蓮上榜有雷同嘅，就有蛇王芬、MIST、何洪記、恆河咖喱屋。呢本搵食書仲要為每區推介一日幾餐搵食路線，譬如中西區嘅路線就係早餐生記粥品，午飯永合成 茶餐廳，零食陳意齋，下午茶勝香園，晚飯牛記茶室。老實講，左丁山一間都未去過，或者搵一日請埋梁家權到中環，跟佢去行街搵食至得。 有時搵 食都唔係咁易，譬如中午寫稿，唔出街，打電話去威靈頓街翠華叫外賣，一百蚊係最低消費，否則唔送，唔通一個人要食兩碟飯咩，只得幫襯其他，例如黃枝記嘅外 賣最低消費就係六十元，故此辦公室助理阿美話食唔起，要出街幫襯大家樂/大快活。呢日就有食神嘞，公子C請去星級餐廳Sevva吃午飯，以為應景，set lunch要火雞，一入口就皺眉頭，惟有當食減肥餐，食少少啦。 |
||||||