| ||||||
逢星期六晚12:05am，由五十八歲資深藝人歸來兮主持近乎清談式節目，鄭丹瑞都自嘲：「似羅蘭姐講鬼古！」當然不是，這叫《勁歌金曲》——比《歡樂今宵》更長壽的鎮台之寶，但排到「請將音量收細」的時段，如何「勁」播呢？九十年代近千元一張卡拉OK《碟聖》不愁客路，現在只餘碟仙，做DJ打碟卅年的鄭丹瑞稱得上碟仙。詭異是，當實體唱碟比鬼怪玩意更顯得out dated時，阿旦說：「前景可能真要問問碟仙至知。」本篇並非旨在幾點收視的《勁歌金曲》，寫的是樂壇，讀者有權連樂壇也不關心（如果人人關心便唔會淪落至此），《勁歌金曲》其實似香港，而鄭丹瑞是曾經賴它以名利雙收的香港人，如今福地到了最危急的時候，拿什麼來拯救……上船 是有點臉紅的。鄭丹瑞描述得像被星探力邀而無心插柳的僆模：「數月前入TVB，遇上監製說：『旦哥，正話開會才講起你，非你莫屬嘞，請幫手主持《勁歌金曲》！』」接下來卻很現實。「我答：『那是年輕人節目，我太老了。』監製說：『你有經驗。』我話：『係，近三十年前嘛。』」自蔡楓華講錯「剎那光輝」，阿旦便接手。人和事一樣，歲月已足以神偷一切，等如不可能蔡楓華三十年後做番《勁歌金曲》。鄭丹瑞這天說：「我份人唔懷舊，但those good old days，我的新人拍檔叫周慧敏。」睇到未？何止巨星雲集，是本身便能產生出巨星。「但那時巨星不遙遠，《歡樂今宵》，《婦女新姿》也上，市場大競爭大，個個抵得諗；是有段時期受經理人制度過分呵護服侍，新人也扮大牌挑肥揀瘦，節目和歌手雙輸了。」其實像香港縮影。好景時，好在百業興旺、大小通吃；及至年輕人溫室長大，製造業不幹，沉悶工作不幹，只願高科技高回報，但高科技非個個做得嚟……說到惋惜處，阿旦動心了。「監製接着說：『時段就差啲，十二時，播半個鐘。』我說：『時段可以接受，反而我有套新方法，你給每集一小時吧。』咁我就答應了。」 掌舵 首先要問，真係要咁夜播？戲碼最弱的一集《勁歌》，歌手們加起來總夠開一場售票show，吸引力真完全敗於黃金時段的飲食節目、寵物節目甚至BB去買嘢的節目嗎？其實大家心知肚明，飲食節目call到廣告贊助，寵物和BB call到相關商品；《勁歌》呢，理論上可接唱片廣告，但唱片滯銷，唱片公司出唔起錢。鄭丹瑞說：「盡量不想問，再問就因為樂壇有病。我來是試試醫病，不應一埋手便埋怨點解你病得咁嚴重。「早年做港台DJ，忽然被調去深宵開咪，我覺得燉冬菇。那時年少氣盛嘛，想深一層，有心聽音樂的人偏愛夜闌人靜；時至今日生活繁忙，有心睇音樂的人可能都要深宵才有閒去專注。我甚至想不如擺在收視台播，目標觀眾，你係有心人才好 來看。「這一兩年，兩個女兒先後畢業，負擔輕了，我常說：『爸爸終於可以揀喜歡的工作去做。』首集播出，記者問：『旦哥，得三點收視喎。』我說：『我甚少咁有機會可以將一個節目收視倍增！』基數低吖嘛。」但肯定流失兒童觀眾，而兒童是未來消費力的棟樑……「別傻啦！擺在七時他們都唔睇，唔睇就唔睇，由當下已有消費力的觀眾做起先吧。」鄭丹瑞畢竟並非蔡楓華和戀棧舊夢的港人，他面對現實。「以前開口埋口『更加輝煌』、『最高榮譽』。報喜不報憂我講唔出了，寧願實事求是。」他的新方法，是與嘉賓討論樂壇發展、經理人制度利弊之類，中間穿插唱歌。音樂節目也要思考？「不經大腦、狂玩遊戲的模式，試過了，唔work，咁又不如試吓經經大腦。上次我的嘉賓……Crystal……係，HotCha嗰個，我面對現實，不可能和她彼此年輕人了，但uncle可以有uncle的親切，傾落，小妮子也是肯用腦的。行業到了存亡之秋，怎會不認真呢？」 怒航 鄭丹瑞幾乎噏唔出Crystal，對「巨聲」們的名字也幾次如此。筆者何嘗不是？「於是每次輪到新人唱live，我都唔休息，瞪大眼豎起耳留意，曲語不俗，唱功不差，怎能一味鬧新不如舊呢？「一定要批評的話，他們欠缺阿倫阿梅的魅力和自信，《中國好聲音》也比他們顯得大氣。」而人的魅力和自信，多少來自金錢。有錢或生逢盛世預期將會賺大錢，真係講句嘢、唱句歌都響亮啲。「點解錢流不到新人手裡？以前並非人人帶walkman，現在每部手機都有walkman功能，聽歌人口未必少過以前。只是MP3形式之下，收益回不到籠。如果直接回籠，搞網上版報紙雜誌唔使咁頭痕啦。」我問不下去，人害怕面對自己。除盜版，除因循陋習，任重道遠。但忘了一個沉重比喻，文革毛澤東講吐故納新講破舊立新，根本最老人政治正正是本主席。巨星大齡化，因為青黃不接，那麼，由音樂節目主持人開始年輕化又如何？周處除三害，最終要除自己。「我第一反應也是《勁歌》係年輕人節目。歷年試過很多年輕主持，直至今次，我還提議過讓兩個報榜的女仔吃重些，以舊帶新嘛，但監製怕沖淡阿旦式的風格，還是先讓節目風格穩定好。「我來到現階段，無所求，完全放手我也試過，十年無掂音樂，所以認唔出新人。正如離職商台營運總裁時，俞琤叫我與蔡東豪交接，我話：『我可能係你嘅寶，可能係你嘅障礙。我告訴你經驗證明咗乜乜唔得，但鄭丹瑞唔得，唔一定蔡東豪唔得。』適當時候便放手，不用講太多。」 彼岸 周處不用自殺，因為他會改過。鄭丹瑞自言心境年輕，因為他會更新。最新動向是林建岳打本開戲。「我廿年無做導演嘞。」人生到了動輒以十為單位。「怎能不提醒自己與時並進？」男主角用鄭伊健，女主角周秀娜，加埋鄭導演，老中青打盡，包容共濟。可惜永不回來的是中產，曾經，阿旦主演的小男人電影系列，代表中產文化。「不可能了。中產就是優雅，社會愈來愈忙亂，幾千蚊買部電話面不改色，但買得像走難又搶又炒，不再有型。」由同胞繼承？「內地人也開始講究生活品味，但現行政治下，更不敢說了。中產另一特色是良知，法國大革命時的中產階級，要改變一個國家的。」這才是今夜怪談。 遠遠近近 鄭丹瑞帶備六副眼鏡配色拍照，藝能專業得無可挑剔。我讚他似Elton John，同時感慨：「仲有幾多僆仔知道Elton John的音樂？」他說：「有責任要知的。」娛樂都要問責，言重了。鄭丹瑞曾自嘲，同一張台詞，年輕時拿近來睇（近視），現在拿遠來睇（老花）。遠近之間，彈指數十年。今夜他便如此褪下眼鏡端詳拍出來的數碼相。我問：「何不索性配老花鏡？」阿旦說：「鏡片厚疊疊不好看，而且長戴頭暈。」人老了，連飾演眼鏡怪，都難。 | ||||||