前商交所主席張震遠拖欠員工薪金案本週四判刑，辯方本週一向法庭披露，張家四口已從淺水灣道大宅搬到跑馬地，租金由任職地產代理嘅太太駱晶瑩負擔。本刊追查發現，早年喺美國任職物業代理嘅Josephine，近兩年重操故業，喺「經緯物業」專攻豪宅租售，服務範圍包括半山、山頂、跑馬地同九龍塘。有地產業界人士話，以張震遠嘅人脈關係，佢太太應該唔難搵到生意。 記者週一致電駱晶瑩，但可能丈夫仍未宣判，佢拒絕回應：「我唔方便講任何資料，（你出番嚟做地產代理幾耐？）我唔方便講呢啲資料，唔好意思，我真係唔方便講、唔想講。」之後匆匆掛線。 記者翻查資料發現，駱晶瑩多年前曾任職美國最大地產經紀公司Coldwell Banker，入職翌年獲頒最優秀房產代理金獎，但回港定居廿多年來，不彈此調久矣，只係丈夫財困，必須重返職場保生計。 根據經緯物業網頁嘅代理簡介，Josephine多年來只係家庭主婦，但因曾租住八個居所，認為她充分理解物色合適居所嘅難度和有豐富經驗解決問題。事實上，單係成功說服淺水灣道大宅業主湯君明減租續約，以及之後無條件退租，可見張太係一個有料嘅agent。 覃家棄《成報》搞電影 香港電影金像獎頒獎禮上，《黃金時代》成為大贏家，囊括五個大獎，包括最佳電影同最佳導演許鞍華。出品人覃宏上台攞獎，雖然旗下嘅星美出產唔少中港合拍電影例如《如果‧愛》、《中國合伙人》等，但他對香港人嚟講較為陌生。但講到佢阿哥覃輝，就早已同香港傳媒有淵源，因為佢曾經係《成報》大股東。覃輝○四年初入主《成報》，但兩年後發生欠薪事件，搞到被勞工處票控。當時覃輝被指捲入建設銀行前行長張恩照賄賂案。覃輝沉寂咗一段時間，呢幾年重出江湖，除咗進軍大陸戲院、拍電影，舊年同香港英皇集團主席楊受成宣布合作，之前又收購黃宜弘太太梁鳳儀嘅「勤＋緣」，睇中黃太寫嘅中港商界背景小說同電視劇。○九年底楊家誠幫覃輝接咗《成報》火棒，入主無幾耐被控洗黑錢，舊年被判監六年。《成報》輾轉落入大陸富豪手上，今次係喺大陸搞礦業嘅鼎和礦業控股老細谷卓恆，上週《成報》又被申請清盤，似乎接親手嘅都有啲運滯。 蘇慶和現身反對派甩底 市建局上月底爆出嚴重人事衝突後，被指向管理層施壓嘅主席蘇慶和（Victor）上週五終於露面，出席荔枝角道桂林街及醫局街重建項目竣工儀式。儀式最初安排行政總監譚小瑩出席，及後Iris（譚英文名）劈炮，自然唔肯亮相。局內第三把交椅嘅執行董事鄭啟華，原本答應出席，唔知係唔係因為喺董事會會議炮轟過Victor，儀式舉行前佢忽然話唔得閒no show，結果只得兩名總監林偉能和黃偉權撐場。 身處「撐蘇」陣營嘅林偉能，當日十分風騷，不單露出四萬笑容，頻頻望向心事重重嘅Victor；當他接過本刊記者遞上卡片時更笑說：「啊，《壹週刊》，我睇過你哋篇報導，好精彩，好引人入勝。」既然咁誇獎，咁市建局就要繼續鬥落去，我哋爆得仲精彩！ 民記工聯印書進貢中聯辦 本刊早前踢爆中聯辦透過大陸神秘空殼公司，迂迴持有聯合出版集團，即係話你行入三聯書店、中華書局同埋商務印書館shopping，等同間接進貢中聯辦。講到進貢，點少得建制派政黨？翻查資料，民建聯研究部一○年、一一年分別出版兩本政經研究論集；為咗慶祝創黨二十年，一一年、一二年亦出版文集同黨史。無獨有偶，四本書都係由中華書局做出版商。工聯會一一年同一三年亦幫襯中華，出版政策研究論集同史冊。正所謂肥水不流別人田，維穩費左手嚟右手去，左手再接番，可唔可以當係「促進」香港經濟發展呢？ |