專題：快樂Freelance全職阿媽
1 :
GS(14)@2013-07-11 01:28:26http://hk.apple.nextmedia.com/news/art/20130710/18329491
美甲師Shirley：享受仔仔黐身
現時34歲的Shirley，本身是月入三萬的製衣公司OL，2011年懷孕時已心大心細，到底是繼續工作還是留家湊仔，「本身份工時間穩定，收入又唔錯，諗住生完繼續做，但個仔出世後總係唔放心工人湊」。和朋友分享經驗，原來她們每日要上網透過閉路電視監查，心掛掛又無法專心工作，「嗰刻我就決定辭職，錢係搵唔曬，費時兩頭唔到岸」。
兒子出世後，她不後悔花多了時間陪伴，但又總想為家庭增加點收入。一直愛好美甲的她，早年已考獲美甲證書，於是膽粗粗以此創業。「初初幫朋友修甲扮靚，佢哋又再介紹，慢慢就變成一份freelance喇」。雖然現在每月得幾千蚊收入，但她覺得能夠看著孩子成長，兼且擁有自己的事業已經很滿足，「老公都叫我唔使做，但我唔想靠老公，好易會自卑」。
她笑言freelance令她EQ提升，還學懂不少執生技倆，不像以前做寫字樓般死板，「試過差啲成盆洗腳水倒瀉，又試過喺劏房咁細嘅地方美甲，功具逼到要放喺大脾」，她說有些客人家中突然走出上半身赤裸的彪形大漢，還有女仔左手整甲右手吸煙，「惟有低頭默默工作，好彩我每次都帶口罩，腳臭都聞唔到」。她說怪人雖多，但由於是靠口碑介紹，故遇上壞人的機會很低。
兒子現在已經一歲半了，她也成為一個快樂的freelance阿媽。「阿仔每日起身第一個要見嘅人一定係我，好黐身，有時星期六出外工作，老公就幫手湊仔，關門嗰刻佢實喊，所以我每次工作完就趕返屋企見個仔，如果做全職肯定唔得」。
植睫毛師Win：陪上堂進步神速
同樣是OL出身的Win，今年才27歲，也在生仔後轉做freelance，「因為冇人幫我湊仔，所以三年前一知自己有咗嗰刻，已經決定辭職，仲選擇咗上門植睫毛嘅freelance嚟幫補收入，起碼賺多個錢去補習班呀」，為實現這個目標，她大著肚便去考化妝和植睫毛的國際證書。
如今她慶幸自己當時作出這個決定，由於工作時間自由，才有時間參與家長會，和陪兒子去各種興趣班，「而家學校仲要求家長逢星期三下午陪同子女上潛能訓練班，如果唔係做freelance，邊抽到時間上堂吖」。她說多了時間相伴，孩子上學後表達能力也進步神速。
「有時知我出去工作，個仔即刻嗱嗱聲自己著衫要跟我出去，仲叫『媽咪帶埋我去街』，每次聽到心都軟」。她說做母親的，時時刻刻都想聽聽孩子的聲音，回程時也會不斷打電話回家，這種狀態，已不可能做全職女性了。
胡孟青：子女成長不能用錢衡量
47歲的獨立財經分析家胡孟青便是典型freelance媽媽，自2004年小產後離任滙豐金融副總裁一職，轉職做freelance股評家，「嗰陣個個星期飛大陸睇廠，就喺北京到天津嗰程車，將我肚裡面八週大嘅BB跌咗出嚟，嗰陣反思錢係咪真係咁重要呢？有好多嘢唔係用錢計算到」，2006年終再度懷孕，「一知道再有時就即刻辭職，因為我已經係高齡產婦，唔可以再出事，加上我唔鍾意屋企有陌生人，所以我唔會考慮請工人」。
她深明孩子10歲前的成長期好快就過去，「生得出就要教好佢，工人只係幫你睇實個仔，唔會幫你教好，聽見朋友個仔問『媽媽你係咪真係識照顧我㗎？』真係好心酸㗎」，她承認從小身教對孩子的品德發展非常重要，也感激丈夫的體諒和配合，才能成為成功的freelance阿媽。