屈臣氏 Money Cafe
http://moneycafe-icable.blogspot.hk/2013/10/blog-post.html拒再見記者，超人2013年下半年真係「的」起心肝搞DEAL，而且仲相當密手。
由報道所見，似是由和黃中人放料，特別是講到霍大班英明神武，好難相信不是局中人所為?
百佳的真命天子仍未出現、和黃已經將焦點，放到分拆零售業務旗艦屈臣氏身上。
以經濟日報報道，和黃考慮在12至18個月內分拆屈臣氏上市，初步集資介乎80至100億美元、以出售25%權益推算，屈臣氏市值超過3000億元!!
大行一直認同，和黃零售業務是系內最有潛質增長業務，瑞銀及大摩就估計、和黃零售業務每股資產值介乎46.8至48元，佔整體資產比重近三成，遠高於系內電信及基建業務各佔15%比重。
不過分析員亦關注、索價30倍市盈率分拆，是估值偏高，雖然屈臣氏業務遍佈歐亞、與其他零售集團業務難以比較，但以亞洲為主的牛奶公司及美國藥房及零售集團Walgreens、市盈率亦只有23至26倍，仍遠低於和黃要求估值水平，反而毛利率就高於屈臣氏。
又幫誠哥計下數、如果三項計劃成功，出售百佳的意向價約300億，電能分拆港燈，上限集資390億元；而分拆屈臣氏上市，又套現最多780億元。
加加埋埋、長和系最多套現共千五億，等同和黃市值近四成!! 誠哥好等錢使?
未必等錢使，但減債目標明確!!
李嘉誠早前曾透露，集團要進行全面減債。大班霍建寧更講明、未來幾年要將淨負債比率控制在25%以下，而家一分拆，瑞銀估和黃負債比率，已經由32%降至20%左右
當中又以分拆港燈的減債目標最明顯，根據電能分拆建議，港燈將承擔400億至500億元負債，而由於電能實業減持至50%以下，故港燈債務不會併入集團的綜合負債內，成功減輕負債率。
努力減債，好似沈大師所言、不排除是誠哥睇淡經濟前景，不過更肯定是隨着加息預期升溫，一旦利率持續上升，高負債將帶來利息支出上升，將拖累集團的盈利能力。
高盛提出一個問題、在今早開市埋位都有討論過，就是零售業務在系內的EBIT 回報，是目前系內最高，去年達18%，估計到2015年更會達22.8%。
分拆之後，和黃會失去增長最快業務，除電信外，幾乎成為一間控股公司，股東會問，套現資金會點用先?
其實分拆固然可令資金回籠，亦可改善系內資產負債表，從中減債，但點解個個都話誠哥係為日後的潛在收購鋪路?
趁高位減持資產、留番錢在自己口袋，呢類野一向都係誠哥最「洒家」，點解一定要使出去先?
分拆 Money Cafe
http://moneycafe-icable.blogspot.hk/2013/09/blog-post_30.html電能拆港燈，豈止一個「拆」字，咁簡單?
口痕友話，從建議中分拆保密程度、涉及財技、名義集資最多四百億，實際集資隨時過五百億，背後話事人非霍建寧莫屬。
是否高下立見言之尚早，但撤資疑雲，隨著誠哥路經飯局兩星期過後，又再升溫。
一，分拆等於賣啦，最少可以賣夠七成。二，論業務重要性，電比百佳更重要。
三，八五年，和黃向置地買入港燈後，結果置地!!! 難道？？
二千年，誠哥本港直接持有上市公司跟今日比，數目肯定少過現在。
因此分拆一方面有違誠哥提過，上市公司唔想多構想，但貫切誠哥沒有撤資講法，始終，名下本港上市公司資產愈做愈大，不會越少!!!
分析電能分拆港燈，與其重點體現價值，瑞銀、里昂報告似乎最具功力，題外話，里昂公用股分析師，幾乎里昂唯一最有叫坐分析員。
按兩大行說法，分拆難掩集資之餘，舉傾效應軟集資，其實最具影響。
一，電能現金流在額外多最少五百億，呢個數足夠收購一間企業價值五百四十億美元公司，遠超長建、電能收購英國項目涉及九十億美元企業價值。
撇除電能有錢無地方使涉及問題。市場忽略一件事，就係長建一直屬於鉅哥BABY。經此一拆，兼強調日後港燈僅按比例入帳，太簡單了!!
電能債務大減，從而令長建債務亦減，技術上財務狀況就更容許印公仔紙再做收購。
明顯，由早前拆件賣雍澄軒，以及是次大比例分拆港燈，巧合之處是，前者主管範圍屬於茂波局長，後者則為錦星局長管轄。
誠哥對當今政府有保留，又會繼續城中討論。
惟外界同一時間忽略一件事，誠哥今年以來三番四次強調要減債。從長和系債務睇，和黃一定最多，有趣今年發生幾件事；一，長實更換核數師、二，今年正正一月一日，會計準則廿七條，有關附屬公司綜合債務入帳規定生效。
按此計算，長實會由淨現金公司，變為因應要綜合反映和黃債務，令公司負債超過九百億。
而更有趣是，如果翻查長和中期報表，上半年長實帳目仍然無需要做CONSOLIDATE，換言之，PRICE領軍之下，俾佢地揮底左。
但分析員指，即使電能拆港燈跟新會計準則無關，長和系連番動作，似乎證明誠哥無講大話...佢的確好想減債，而背後原因似乎在於，一，息會升、二，經濟未必一如預期的地，等機會執平貨，預留現金，就大把機會!!
利潤管制協議目前准許回報為百分之9.9，檢討過後再提升，機會是零、維持近百分之十，機會低於一半，而准許回報每跌一個百分點，港燈盈利額外受影響8%。
似乎順理成章，是否投資於呢間過百年老店，當然視乎派息比率，而當年二公子分拆電盈搞出個香港電訊信託，今日回看表現，似乎股價已說明一切!!
但更甚係，誠哥行先，「小米高」情況更為尷尬，中電更受利潤協議影響，而中電海外業務亦相當不滯。
誠哥今次原單出題考起市場、考起錦星局長、更考起「小米高」!!!
科網股 Money Cafe
http://moneycafe-icable.blogspot.hk/2013/10/blog-post_7.html現市況之下，科技股值幾錢，等於賭檯估開牌一樣。
雲遊話值錢，網龍又話值錢，金山騰訊全部都話好抵!!
當傳統業務公司廿倍市盈率嫌貴，科技公司三十倍合理，到不久將來，求其一間去到八十倍，咁七十倍一間就變成好抵。
市盈率係咪用作科技公司估值衡量，從來備受爭議。要老實的話，科技公司真正估值推算建基於三個元素：人，平台，以及想像空間。
TWITTER上市，觸目之前除上市地屬紐約交易所，或納斯達克之外，更實在為估值問題。
最新講法，TWITTER值一百廿八億美金，一百幾十億到底數字遊戲，抑或公正客觀，由市場決定，市場肯俾，就即合理。
如果睇睇呢間公司，二零一一年，根據公司內股權交易計算，大約值八十億，今年一月，BLACKROCK向員工換股，變左值九十億，到五月，另一間私募基金涉及股權交易，又變左值九十八億。
換句話，日子越拖得耐，TWITTER就越值錢，而呢個籌碼鬥大遊戲，隨公司上市帶出一個問題，上市咪即係估值見頂？
用戶上，TWITTER大約二億，佢都值一百廿億，新浪，騰訊可以炒到更高，TWITTER擺明係貴。
但華爾街要SELL一樣野，功力在於令市場對問題視而不見，聽而不聞，凡事從好方面想。
一，TWITTER用戶數據資料值錢。二，美國大戶經常利用呢個平台發佈資訊。
三，上市公司政府均可以透過TWITTER發佈公司消息速遞等等。
同樣有利估值在於科網公司估值比較對象。TWITTER要計合理盈利及增長潛力，結果FACEBOOK成為參考。
用TWITTER盈利，用戶，以毛利率，公司到2017年，收入就會多達五十億美元，比依達多達十倍。
如果用2017年預測市盈率的話，豈非單位數字？
講到尾，科網雖屬新經濟，但估值合理與否，市場仍然流於原始時代，你比我，我比較你，再加一定想像能力，呢個或者真正體現新經濟行業既創意無限!!
題外話，說到科網熱潮，令人不得不再關注阿里巴巴。
呢幾日又有消息稱、馬雲來港為上市作最後努力。但同時又有報道指，阿里巴巴放風會考慮到上海掛牌。
綜合不同消息，其實港交所的確有為馬雲開綠燈，只是馬雲個人主義太強，不懂妥協，令上市告吹。
由於軟庫願意將投票權轉讓予合夥人，令合夥人持有近四成投票權，合符規定。
不過對於港交所開出一系列條件，包括降低股東大會提名董事重選次數至一到兩次，同時合夥人制度設有三年有效期，只要馬雲願意，九月已經進行上市程序。
但金融時報Lex 所指，對於容易發脾氣的馬雲，這種要求及質疑、被視為來自官僚主義笨蛋的無禮冒犯。
結果這個阿里巴巴的千秋萬代傳承計劃，一開始就註定、不會在香江這個彈丸之地誕生。
真好彩!!
自製減辣 Money Cafe
http://moneycafe-icable.blogspot.hk/2013/10/blog-post_8.html終於有發展商行頭劈價，震撼市場!
震撼之處係一向高溢價、創天價嘅新地，劈價推出九龍站天璽貨尾。
而且比出、前所未見嘅稅務回贈，最平嘅入場單位，大拿拿慳成三百幾萬，變相劈價兩、三成。
亦都等同、完全補貼海外買家要俾嘅稅，甚至透過900日超長成交期，抵銷新版SSD嘅規限。
發展商否認咁做係同政府作對! 但無可否認、所有折扣都係突破「辣招規範」，而劈價即時冰封二手市場。
代理認為將會掀起豪宅劈價潮、天璽貨尾劈價三成有效，吸番晒內地客、同公司客歸隊!
的確，政府堅決唔減辣，發展商唯有自製減辣、見招拆招。
又有超長成交期，擺脫額外印花稅綁手綁腳；咁到底天璽劈價清貨尾、係咪預示: 跌市嘅開始?!
天璽開出181伙、佔貨尾量300伙嘅60%，貨量一啲都唔少! 因為天璽今年以嚟、只係成到 8宗二手買賣。
呢批貨尾，平均呎價29098蚊，單計基本折扣14%，訂價25024蚊一呎，相比現時天璽二手價29000蚊，已經開低咗16%，反映新地、帶頭要量唔要價
個別訂價最低、1座星鑽璽56樓K室為例，實用435呎、原本訂價1301.7萬，呎價29924。
會員加唔用二按、再加180日提前成交嘅話，會先減14%，再連同七成稅務回贈，折實七折價係930萬，相等於慳咗371萬，呎價21400蚊。
對比番星鑽璽今年以嚟、接近質素嘅細單位，呎價要29000蚊，今次係低咗 26%、的確有殺傷力!
更罕見係、雖然天璽已經係現樓，但新地仍然比出、超長900日嘅成交期，係現樓新盤當中罕見咁長，相等於、買家喺兩年半後收樓嗰刻，已經幾乎脫離加強版額外印花稅嘅規限。
市場消息就指，兩日收票超過300張，相對第一批181伙，超額認購0.7倍，反映策略收效。
消息仲話、基於新地高額補貼7成印花稅，入票嘅人當中、公司客、同內地客比例，各佔一半半，簡直重現九龍站新盤嘅客路。
天璽貨尾量係得300伙，照現有反應睇、大有機會清到貨。
但係二手市場、就陷入半放棄狀態，唔上亦唔落。
其實九龍站業主、實力派居多，唔會揀呢刻風頭火勢、同大發展商硬碰。
天璽劈價、唔只全面凍結西九龍，遠到去大埔嘅海鑽. 天賦海灣都受到牽連，代理話，部分買家變得猶疑，現價仲值唔值?
如果呢種「猶疑」蔓延開去，樓市很快就會出現連鎖效應，加上發展商呢幾個月去貨心切，今次自製減辣，很有可能成為樓市最後一根稻草!!
一個字: 「掂」! Money Cafe
http://moneycafe-icable.blogspot.hk/2013/11/blog-post.html週末去澳門大型賭場走一轉，不禁發現自己愈來愈「寒酸」!!
見到在一眾賭場大廳、賭客個出手闊綽，有統計發現，目前大廳平均最低賭注額，由兩年前300港元、已經跳升至1000元!!
甚至部分賭場去到最低消費要5000蚊、眼望就算玩角子老虎機，內地富客都係一張張一千蚊紙放入去，點會唔感覺自己「寒酸」?
即管做個比較、菲律賓賭場平均最低消費係60蚊，老牌賭城拉斯維加斯消費係150蚊，反而最接近有競爭力要數到新加坡，都係四百蚊左右，你話啦，點夠「馬交」玩?
難怪新鮮出爐博彩收入、可以達到破紀錄365億元，突破左三月時上個紀錄313億，今年頭十個月收入已經迫近去年總和，比起拉斯維加斯、高出足足六倍!!
由銀娛、金沙、美高梅同永利業績都睇到，第三季盈利都有雙位數增長、今年股價表現，遠遠跑贏恆指只有7%升幅
要衡量博彩股平貴、唔可以用傳統PE或PBOOK，黃師傅早有介紹大家要以股價對EBITDA值計數。
而家平均已經升至16倍、遠高於12倍平均水平，似乎估值有啲偏高，咁係咪應該聽沈大師講法，一年內不再推介博彩股?
由兩方面睇、業績增長以及內地因素。
前者今年估計博彩股盈利增長仍有18%、不過比起兩年前43%增長，已經有放緩跡象，而且估計明年仲會進一步放慢。
但我地反而更關注內地因素、今年以來內地旅客有增無減，一個黃金週就有12%增長，雖然時不時有傳聞新政府要打貪，限制內地旅客到澳門、但目前來看似乎通通係流料!!
阿爺不單沒有出手阻止內地賭客前往澳門，長遠看，更會允許更多城市開放澳門旅遊。
咁樣睇來，劉老師劉紹文真係神機妙算，上星期在敝台週年論壇、諸葛孔明上身算出一個「掂」字，已經告之各位，故事未完!!
不過佢頭炮之一、8月中首評澳門勵駿，今日就主動調低評級至中性，原因係賭枱下注額大增38%，不過賭枱贏率比平常低得多，令EBITDA只係有6%增長，遠差過佢地預期。
賭仔有云、贏輸早注定，當然唔可以怪公司Poor Luck，不過間間賭場都有能力在中場贏大場，獨獨係勵駿無運行?? 管理層係咪會檢討下!
不過話分兩頭，劉老師早在八月推介1680，當時股價3毫2有找，持至今日帳面仍有五成利潤。
呢個「掂」字、似乎劉老師暫時仲可以掛喺心口多一段時間!!
毫無亮點? Money Cafe
http://moneycafe-icable.blogspot.hk/2013/11/blog-post_4.html滙豐季度盈利倒退, 差過預期, 年底到期的三年計劃, 只有資本充足率達標, 股本回報和成本效益比率都惡化。
第三季市況波動，拖累滙控環球銀行業務、盈利倒退超過一成，受英國客戶撥備拖累，歐洲業績再次見紅。
但既然業績咁差，問題係匯豐倫敦反而有得升、一度升近3%，點樣解釋好？
真係視乎市場情緒點走、大行側重歐智華對經濟前景評估相當樂觀、加上資本改善，估計股價有支持。
綜合摩通、瑞信及瑞銀意見、匯控資本改善，估計年底核心資本率有機會達到12%，而且瑞銀同瑞信話、對管理層經濟前贍感到樂觀，形容係正面因素，摩通同瑞信更預期，由於第二季以來、匯控股價都跑輸大市，估計會因為業績令股價有支持。
其實仔細分析，純粹據第三季稅前盈利比較，無論整體大數四十五億二美元，或核心稅前盈利五十億五美元，均遠低於任何一間大行估算。
無疑，按年計，大像兩組數字仍有升幅，惟按季比較，分別跌幅百分之二十，及百分之八，其中核心稅前盈利更連續兩個季度回落。
若非撥備再減，分析員指，大象季績肯定更遜預期。而剛在提及核心兩個字，匯豐目前最大問題正正來自核心動力不再，大像三大收入範圍：淨利息收入，非利息收入及交易收益去看，三者無論按年及按季均告下跌，當中淨利息收入連跌三季，交易收益則跌近五成。
暫時而言，匯豐唯一賣點屬於資本多，一級核心資本比率升至一成三，問題在於英國監管要求提升，匯豐尚欠市場一個答案。
而更現實是，經歷早前斬頭，裁員，賣資產後，匯豐在成本減省帶動的盈利上升，已屆盡頭。
地區劃分，香港成為唯一按季力保不失市場，仲佔盈利比重45%，多謝馮姐!!!
其餘北美，亞太則通通走樣。而按業務劃分，GBM下跌，更叫人失望為商業銀行按季稅前盈利要倒退一成四，零售及財富管理業務尚且有1%增長。
零售銀行眾所周知靠貸款，匯豐較大亮點來自第三季整體客戶貸款有百分之五增長，屬近年少有貸款及存款升幅幾近相同一次，但由於淨利息收入下跌，表面睇幾乎代表息差壓力持續。
再三強調，匯豐雖則動力不足，惟穩健有餘，由於一級核心資本比率近乎全歐洲之冠，派息上調憧憬仍會繼續。如果再睇部份細數，管理層可能要應記一功。
首先，風險權重資產方面，大象整體涉及總數較今年年中少近一個百分點，而更有趣在於，匯豐列為可供出售投資，較之年中大減四成七。
一，匯豐對資本鞏固，強化賣點有備而來。
二，大象或多或少對未來利率環球似難以盤算，不言的話，豈會將可供出售資產大減，因為只要改列為持有到期類別的話，利率升跌，匯豐毋須有帳面影響。
中環分析員形容，大象成本減省效應之後，正處於穩健中下移，而繼續叫市場留意的一個小關注，仍然來自錢太多。
從中期報告第十三頁反映，象哥存放中央銀行資金，即剩餘資本再度升破千七億，比三個月前忽然大升一成半。
簡單講，伯南克好，耶倫好，繼續人為壓低利率，呢筆多餘錢，足夠令九哥領導的匯豐無連行!!!
大媽炒BITCOIN Money Cafe
http://moneycafe-icable.blogspot.hk/2013/11/bitcoin.html伯南克，耶倫所一唱一和，不退市，不加息。
結果? 令BITCONI「比特幣」近日又再大發奇功，成為環球市場不信任央行指標最新基準。
年初一度以為爆破，試過一晚急插六成，但近來繼本月初破頂，即是4月歷史高位266美元之後，更加勢如破竹。
最新指標顯示，呢個全球央行最信任指數，已創新高。
BITCOIN「交易所」數據顯示，BITCOIN近日一度突破900美元，以為可妣直撲1000美元大關，不過又轉眼又回落至500美元樓下，果然好似過山車。
連美國國會議員，都要連開兩場聽證會，想知道發生緊乜事。
雖然會上冇議員提出，要即時立例監管，但就連番追問BITCOIN，會唔會被人用來洗黑錢，甚至資助非法份子，同埋恐佈組織。
美國財政部官員話，當局有留意BITCOIN事態發展，但就冇正面回應，亦唔肯透露更多詳情，更諷刺在於伯南克竟然對BITCOIN這種另類貨幣，抱開放態度。似乎主席理應申報!!
BITCOIN變相「冇王管」，又冇外匯管制，可以自由浮動，理論上只要網民夠多，又對BITCOIN走向有強烈預期，就可以出手，將講明供應上限堅定不移的BITCOIN舞高弄低。
中國人總是聰明，炒金，囤奶等等之外，近日就有傳在中國，有網民加入BITCOIN炒作大軍，幫手推高BITCOIN，唔知當中又有幾多「中國大媽」，同埋「溫州大叔」。
雖然BITCOIN好大可能，可以贏跑國際金價，但有不少人質疑，BITCOIN背後冇中央銀行，以至政府支持，會大量購買好似黃金咁，給予市場信心，令到呢種不存在的貨幣，存在本身可能已經有風險。
事實上，有愈來愈多人相信，BITCOIN會逐漸由虛擬世界，融入實體經濟。
例如在美國，已經有人用呢套「開放原碼」系統，用黎交租買野去旅行，甚至有唔少國際機構，都接受顧客用BITCOIN捐款。
針無兩頭利，但「每個硬幣都總有兩面」, 隨之而來的，已經有BITCOIN交易犯罪個案出現，近日因為美加出現偽造BITCOIN程式都判罰款。
有人話，BITCOIN主要係「黑市」流通貨幣，方便地下市場運作，好似毒品同非法槍械咁
純粹有聞必錄，甚至有報道指，有用BITCOIN的相關地下組織，曾經計劃暗殺伯南克同奧巴馬，唔知到最後，要點樣判斷BITCOIN，係「劣幣」定係「良幣」嘞。
但BITCOIN既神秘面紗一日不揭，耶鴿繼續盡忠職守的話，BITCOIN令太多人有按不著的誘憾!
阿松 Money Cafe
http://moneycafe-icable.blogspot.hk/2013/11/blog-post_19.html前松司長離隊黑石實不為意外，理由有三：
一，當年黑石大十中華班底早已各散東西，年幾前總公司更空降一名高層駐港，令阿松變相削權。
二，黑石打私募基金旗號，但實際私募投資不多，尤其內地，主席蘇世民不下多次提過，中國私募投資索價太高。
結果，黑石大搞房產業務，黑石用松長司無疑大材小用？倒不如搵施老闆!!
脫離官場, 走進全球最大的私募基金, 阿松再次轉身加入本港老牌發展商。
一直從事金融行業, 履歷上無明顯地產相關經驗, 為何南豐要額外加設行政總裁一職予梁錦松?
梁錦松加入南豐, 又會帶領公司有甚麼新發展, 外界有不少疑問?
南豐集團非上市公司, 實際資產及業務比例, 無從稽考。
不過從公司今年年中, 於新加坡發債, 向新交所披露的財務文件顯示。
以地產業務為主業的南豐, 金融投資規模都佔總資產近20%, 可出售資產總值186億港元。
單是證券投資、在過去一個財政年度, 就為公司帶來逾16億進帳。
年中更斥資14億, 購入一新加坡上市的內地房產信託基金近30%股權。
所以估計, 南豐找梁錦松加入, 除了管理金融資產外, 他的中國網絡亦是主因
梁錦松七年前加入黑石後, 即促成有中國主權基金之稱的中投公司入股黑石, 後期又協助黑石建立中國及亞洲地區物業投資組合
據中環人講，正正是引入中投公司一役, 令前松司長耿耿於懷，因為現價計，我國帳面仍蝕近百分之七，計及派息則僅賺三億美元，八年回報一成左右，跑輸天水圍私樓。
前松司長早有去意，惟轉行搞地產，當其南豐行政總裁實為大吃市場一驚，由當年花旗炒房阿松，到摩通及特區政府與馬局長左右門神，幹什麼會跟陳慧慧扯上關係?
更諷刺仍在於，前松司長公開場合多次明言，香港樓買唔過!!!
南豐目前架構，主席之下兩位執董，三位非執董，並無CEO一職，換言之慧慧專增設高位予松松。
外界估，從企業上發展考慮，南豐家族爭產之後要轉趨高調，甚至繼八九年以後，再部署重登上市公司地位。
更實在，南豐表面中，港為主，但業務頗國際化，美國，歐洲大把物業、旗下亦有航運，更重要，集團截至今年三月底，六十六億盈利當中，兩成半來自投資，表列金融證券，企業債務等投資工具資產達六百八十三億，金額計較之本港，海外投資物業還要多。
炒房出身前松司長，大派用場也。
銀行界認為，梁錦松對南豐增值價值遠大於黑石；一，海外投資，松兄有認識。二，南豐零一年起有另類投資部門，一一年更設立對沖基金，岩曬路數。三，南豐信貸評級僅BAA3，穆迪認為企管為問題之一，松哥一到，評級一升，發債成本都賺突!!
民營錢莊 Money Cafe
http://moneycafe-icable.blogspot.hk/2013/11/blog-post_29.html劉明康建議，內地金融機構，尤其中小型，可以考慮併冪科網公司，擴大平台，維持競爭。
聽落，似乎順理成章，但深想一層，其實發出頗負面訊息：一，出自具備份量銀監前高層口中，似乎引證內地銀行競爭力欠奉
二，銀行本業靠利息及收費事業為主，產品渠道及網上平台，亦代表內銀息差既收窄，當年劉前主席一直呼籲銀行擴非利息收入仍然空中樓閣。
表面，內地金融機構缺乏是網上平台橫向幅射網絡，但實際，內地銀行分行仍然多的是，論門市，分行，其實總有一間喺左緊。
外國由傳統零售行業打入金融例子多的是，而且相當成功。澳洲COLES透過分店賣產品，搞保險，業務貢獻佔比高達三成以上，TESCO情況亦一樣，而兩間機構亦部署申請銀行牌照，實行由超市跨業務擴展至錢莊。
但西方成功例子在於傳統銀行分行有限，客戶流亦遜於超市，同內地截然不同。
眾所周知，內銀分行，存款極多，但諷刺在於，無論一、二、三線銀行，頭兩大保險集團，仍然需要靠網上平台谷銷售，到底當前問題在於銀行本身，抑或網上平台競爭，最好先搞消搞楚。
原本，阿里巴巴等平台僅僅屬於寄賣站，但原統一間金融機構，自己銷售產品唔得，但網上寄賣就掂，適逄中央要民間資金釋放，結果造就當局先批互聯網發行本身金融產品，繼而隨時獲發民營銀行牌照。
內地金融機構經營問題，相實相當複雜，撇除壞帳等等，十三億人最想要是高回報，但銀行或保險公司提供高回報，就觸發風險增加，資本減少，既然如此，似乎當局有意行一條路，高回報，高風險產品，由網上買賣為主，銀行及保險回歸基本。
國壽傳媒日表明，來年保費可能要跌，轉型要緊，產品要保障行先，做真真正正保險股，內地銀行亦因應利率市場化，理產產品規範化，一切資本充足為主。
從另一角度看，內地金融刻下似受網上平台競爭，或者其實當局用心良苦，要佢地正正式式消除風險，去走瘀血，市民要高回報，高風險產品，搵馬雲及化騰，監管當局表面政策支持，實為向兩人輸出銀行長期面對的風險。
大額存單 Money Cafe
http://moneycafe-icable.blogspot.hk/2013/12/blog-post_9.html小川認真，大額存單已成真。觀乎消息一出，內銀腳軟，證明市場歸市場，憧憬敵不過市場，改革並無樣樣可以即時叫好。
存款證推行，為落實利率市場化先決條件，如果從內地財金官員早前講話思路；先決條件之後，更先先決條件在於引入存保制。
而過渡期間，五千萬存款證，規模可能會遂步減少，由二千，一千，至五百萬等等。
從人行今年火速推大額存單，證明最少二點：一，改革目前多多，但金改的而且確最認真。
二，人行為首財金部委，部署周密，先大額，截去部份理財產品資金、風險先控，而早前人行率先用十多間銀行，制定指標利率，背後目的就是為了大額存單，意義在於，價你們定，那就別亂來也!!
改革成因是要解決問題，繼而達致提升目的，過程當中，由發掘問題，到表態計劃改革最易，但宣佈改革，到進步當中，最難。
人行雖然規劃有序，但似乎距離遇到困難為期不遠矣。
好簡單，當局希望改善市場，利用市場，提升目前的市場，價格要由市場反映為中央目標，但話說回頭，如果挑選一個，或那一個屬於最市場利率，似乎人行或有局限。
外國央行喜歡回購利率，因為央行有絕對左右主導權，但內地情況在於，回購利率對拆借市場利率傳導性，近年開始下降。
拆息市場本應亦屬於一個極佳市場指標，但如果現在即時用的話，等於亞里士多德的石頭，將石頭放落自己隻腳。
因為一，內地拆息目前太高，以上星期三個月要六厘以上，企業無受惠之餘，反而會受死。
二，離岸人民幣機制下，本港為首離岸市場利息低得很，當局會變相鼓勵套戥。
如人行首批大額存款決定按拆息計價反映，當局已經選定拆息作為市場利率指標。嘗試掌握當局想法的話，人行既要改革響，又要用家受惠，幾乎肯定，當局未來一段時間會不由自主地逆回購，剛剛人行更為二十八日期詢價，似乎可見一班，但代價在於流動性加大。
或者用領導人講法，改革某程度上要踩鋼線走路吧!
Next Page