原定「醒」俾新世界嘅星光大道擴展大計，擬建個景觀瞭望台頂住信和置業旗下帝國中心、尖沙咀中心及香格里拉酒店嘅風水，兩位大孖沙黃志祥和郭鶴年旗下公司遂提司法覆核，準備同新世界拼過。政府鮮有從善如流取消與新世界合作計劃，兩個大孖沙發功就要縮，純官台型似乎唔係好夠。 熟悉國情人士八卦，謂黃志祥家族喺新加坡有Far East Organisation，差不多是全新加坡最大私人發展商，有「糖王」稱號的郭鶴年更唔使講，在星、馬皆有上市公司，分別為做糧食豐益國際以及PPB Group，兩大孖沙喺東南亞地區政、經界皆有影響力，其統戰價值大大優於純官，呢個世界講power嘛，惟有講句和氣生財。 亞視有剩餘價值 永恒嘅亞視，死極唔斷氣，除咗歸功於蘇錦樑夠廢柴之外，原來「亞視」呢個招牌，仲有好多商人係覺得值錢嘅！有睇過亞視「全相」嘅商人同小宗講，而家投資亞視有咗新玩法。以往，商人會真金白銀入股亞視，搏阿爺喺內地回贈番啲地皮呀、新項目呀咁，叫做攞番啲油水。但現時亞視業務太爛，阿爺「找數」又慢，決定轉玩法，「而家唔要資產，唔要廠，唔要爛鬼機器，更加唔想要債。大家只想同亞視『合作』，搏炒番轉！」就好似上市公司協盛協豐（707），去年尾搵來葉家寶做CEO，只係話要翻拍亞視劇集咋，股價就升咗一成，跟手，仲搵到華誼兄弟合作添！講到尾，喺內地商人眼中，「亞視」兩隻字，仲係有剩餘價值o架！ 財爺裝備 一部iPad、兩部手提電腦、三座電話，仲有個港英遺留落嚟、令人回味無窮之H↑K雞爪嘜字紙簍（黃圈內）。加埋部手機，財爺起碼有四個電話，使唔使吖？ 中環寸嘴：拜神都講現實 工廈大王楊耀松長子，遊走各地高級酒店、銀行，及知名食肆，與各路人士打交道，透過美酒佳餚，察看人生百態，讓讀者「嗒」落有味。 股市咁搞法，好多做生意嘅人都好miserable，連帶善款都「唔得掂」，嗰日去文武廟，以往個「金榜題名」排到密麻麻，今年個牌匾好似坐日航「全日空」，拜神都講現實，啲父母見取消一年TSA仲使幫仔女金榜題名搵文昌帝？好似我老豆，知道自己錢少要集中火力，捐死一檔東華三院，因為一個人由出世到拉柴都照顧到，我哋都係小富由儉，我家陣都係捐死一條友，就係贊助我學兄周永健（馬會副主席）喺公益金唱歌；阿莎莎郭（莎莎老闆郭少明）話包底贊助佢五十萬唱一支歌，嘩，嚇到我傻咗，麻甩佬唱歌咋，唔係搵條女唱喎，我話最多次次唱都贊助，一次俾唔晒五十萬，要慢慢儲啲租來贊助。 做善事都要selective，九一一之後，美國凍結咗中東佬啲戶口，滙豐度條絕世好橋，歡迎啲友走去加拿大，加拿大滙豐話要搞多元文化慈善步行，通常唐人都係贊助番唐人街分行經理，我個private banker問我敢唔敢贊助總行，我即刻寫張支票去贊助加拿大滙豐個主席行慈善walk，佢係John Bond隻馬，滙豐喺溫哥華租我家族商場，在公在私都要支持啦，恐防第時續租有麻煩，我又唔係最大貸款客戶，又唔係最大存戶，不過就係最撐滙豐搞善事嘅客戶，如果唔係又點stand out，所以次次John Bond來巡視溫哥華呢間以每呎計，曾是最賺錢嘅北美洲滙豐分行，我行開咗都叫老婆企定定迎接佢o架。 Buy One Get One Free 獅子銀行派成績表，阿仔叻過阿媽，恒生多賺82%，滙控賺多1%咁大把，恒生咁叻都係歸功於一姐李慧敏（Rose），去年初起逐步減持國內興業銀行5%股權，套現近三百億，嗰陣人仔未有貶值壓力，股市未爆煲，簡直係完美交易。唔好忘記，Rose嘅愛人袁天凡，當年電盈完成合併後，馬上行使部分認股權並在十五元沽出，大賺一億，立即以$1.63億買咗間山頂白加道大宅歎。最盞鬼係兩公婆去年以十五億摸頂沽貨，兩公婆都咁識睇位，恒生有一姐坐鎮，恍如buy one get one free！ 壹週窺秘 上海灘創辦人鄧永鏘上週轟689連李鵬也不如，有咁嘅眼界、膽識嘅名流香港買少見少，鄧爵士同英國皇室成員、國際政商界名人友好，其西貢斬竹灣別墅就是招呼名人嘅鄧氏府第，查理斯王子及前英國首相馬卓安都曾是座上客。小宗帶大家去目及吓。 | ||||