| ||||||
上期本刊記者在地產代理行放蛇，發現而家啲代理推銷新盤；偷步收票、代客墊支，通通有齊！涉嫌違反今年四月生效的《一手銷售條例》下的執業指引。不過呢個星期，仍唔見有關當局採取咩行動噃。咁究竟點都叫監管機構嘅地產代理監管局，過去有無做過嘢呢？睇番條數，佢哋今年中為止，去咗樓盤銷售處242次、地產代理鋪275間，兼106次網上巡查，但只係發現一宗涉嫌違規個案咁大把！本刊記者放蛇，卻又鋪鋪中！據知，地監局每次巡查都大鑼大鼓，係人都知佢哋係阿水，咁又查到咩呢？ 現屆地監局主席，是老牌發展商永傑集團嘅成員陳韻雲。佢自己亦創辦了VCC Land，發展服務式住宅，今年中將跑馬地的V Happy Valley分拆出售時，美聯及中原等代理都有幫手銷售。佢亦係資深投資者，去年一炮過買入十二個灣仔尚匯單位，月初又有傳她以五億元買入和黃白加道獨立屋；佢同地產界中人，交手頻密。睇番涉嫌偷步賣樓的行政會議成員林奮強，一樣係地產界投資者，至今雖無證據顯示佢違法，但佢最終都要辭去行會成員一職。當有角色衝突，會出現咩問題，真係有辦你睇！ 壹計就明：渣打冧價早有預兆 本欄找來有二十多年經驗的資深會計師林智遠及鄔碩晉，每期踢爆一間上市公司的會計陷阱，股民入市前睇清睇楚，一計就明。 渣打（2888）月初公布「結算期前業務狀況報告」，預計2013全年收入「大致持平」，但淨息差將「全年輕微下跌」，市場普遍用「差強人意」形容這報告，股價亦大幅下挫。嘗試把時鐘撥前，看看在2013年中期財務報告，甚至之前的財務報告，是否可以預警倒退？在2013年中期和2012年全年財務報告中，渣打的總資產和總負債，都是以每半年溫和的2%至3%增長。從事借貸的銀行，資產和負債數額直接影響利息和經營收入，增長放緩必然局限收入增長。故此，渣打在2012年下半年經營收入增長，只有0.4%；2013年上半年經營收入能有6%增長，主要是「買賣收入淨額」增長43%，但未計10億美元商譽減值及其他調整的溢利，只較去年同期上升4%。如減值計入溢利中，除稅前溢利甚至是倒退16%。影響渣打整體溢利是否只因某地區表現？渣打的確為韓國地區作出商譽減值和其他撥備，但進一步看財務報告附註，除香港區和非洲區外，其他六個地區的經營收入和溢利，都未能連續保持增長，在新加坡和其他亞太地區，甚至連續出現溢利倒退，早兩年印度及中東也已連續倒退。基於以上分析，怎可能預期2013年下半年能逆轉呢？是否還記得個多月前分析滙豐時，指出滙豐2013年中期全面收益，只是同期稅後盈利三分一。事有巧合，渣打同期全面收益，也剛是稅後盈利三分一。其實渣打與匯豐一樣，早已出現預警倒退信號。（林智遠） 高官難救漢能撐唔住 本刊喺兩個月前，直搗去年才借殼上市嘅漢能太陽能（566）生產基地，踢爆呢間生產製造太陽能薄膜機械設備的公司，唯一客源是母公司。當時股價跌咗一跌，但好快就如食咗「偉哥」撐得住！不過，上週藥力終於減退，有傳大股東押股及被叫停孖展，觸發拋售，令股價一連三日洗倉，一度下瀉三成要停牌。據知，公司主席同ＣＦＯ早排先親自飛去倫敦同瑞典，搞咗個NDR（Non Deal Roadshow），會見投資者，想力挽狂瀾，而首次登上福布斯中國富豪榜第四名嘅幕後老闆李河君，仲喺辦公室裡面，放咗七張同中常委嘅合照「射住」，以示實力。不過鬼咩，而家內地政治局勢都立立亂，自身難保，點打救你呢，又？ | ||||||
| ||||||
本刊早前踢爆經紀為谷新盤，出錢製造大量「水分票」，令屯門站瓏門二期收票達五千張！上週六開售的烏溪沙迎海．星灣，首批賣唔夠二百伙，竟然收票超過八千張！情況未見收斂。 去年上半年巡查幾百次、先捉到一宗涉嫌違規「咁大把」的地產代理監管局（EAA），今次終於不敢怠慢，傳聞佢哋學足傳媒玩放蛇，仲即刻有「收穫」。據知一個EAA臥底「扮」碌咭入票買迎海，可惜佢碌盡都只係得八萬銀。人哋發展商要收十五萬元一張票；既然差咗一大截，個經紀唯有「好心相助」，借埋俾佢。咁，咪即時斷正囉！ 小宗知EAA視放蛇為「特別行動」，要高層批准先成事，不過，EAA個CEO伍華強，上年平安夜宣布唔do，現正休假，而執行總監黃維豐走得仲快，今個月初已閃人，咁今次行動係邊個下令呢？照咁數，對上都係得番主席陳韻雲。雷厲風行，相信同監管發展商嘅一手住宅物業銷售監管局（銷監局）有關。近一個月銷監局頻頻出手，一時鬧新地，一時又關注長實，最勁係以「極有可能誤導」呢個原因，逼發展商唔可以再用「平均折實呎價」宣傳。銷監局阿頭係馮建業專員；佢AO出身，最耍家就係監管，絕不容許有半點差池，令發展商叫苦連天；難怪地監局都要學習學習咯！ 壹計就明翠華賺錢不夠效益 本欄找來有二十多年經驗的資深會計師林智遠及鄔碩晉，每期踢爆一間上市公司的會計陷阱，股民入市前睇清睇楚，一計就明。 2013和2014年交接前後，讓「一生一世」成為不同形式的綽頭。在股票市場，可有一生一世這回事？翠華控股（1314）在前年年底才上市，還算是一隻半新股。經營茶餐廳式餐飲的翠華，是不少香港人經常光顧的餐廳。從財務報表看翠華的收入，實在也很亮麗，由2010年的$4.4億，上升至2013年的$10.8億，以年度計的增長率達35%；同期的稅後溢利，由$5,700萬上升至$1.3億，年度增長率亦達32%，大致跟得上收入增幅。加上餐飲業務的現金流很強，翠華實在令不少人充滿憧憬。若希望較全面分析投資價值，權益回報率（Return on Equity）是一個不能忽略的項目。權益回報率是以稅後溢利除以股東權益，讓人理解每個年度的回報狀況。翠華在上市時，籌集了一筆資金，這屬於股東權益的一部分。能把握資金的增值能力，自然能為股東創造更高的回報。但實際上，不少新股上市後，都無法讓籌集得來的資金，獲得跟上市前一樣的權益回報率。以年底的權益額計算，翠華2010至2012年的權益回報率，分別是45%、38%及43%，上市後的2013年則是13%。當然，2013年度的數據不完全準確，事關上市的資金，不是全年到位。但若計算2013/14年度翠華的半年權益回報率，則約為8%，全年或可達16%，但比上市前，差多了。競爭對手大家樂（341），同期的半年權益回報率約為7%，較翠華略為遜色。但大家樂的市盈率是25倍，翠華卻是46倍，翠華的股價明顯「貴」得多！考慮投資時，單看盈利增長，但忽略權益回報率的話，其實甚吃虧。（鄔碩晉） 「打虎英雄」鬧苦主：貪心！ 講開監管機構，去年五月，證監會調查長實拆售酒店項目雍澄軒，質疑此乃集體投資項目，令長實要叫停所有交易同賠償。一班為數廿幾人的「苦主」至今未肯罷休，早兩日幾個苦主仲約埋議員涂謹申上證監會開會，想證監跟進。證監嘅「打虎英雄」、執行董事並掌管法規執行部的施衞民，都有出席。點知一埋牙，打虎英雄劈頭就話班苦主：「貪心！」仲話長實肯賠一萬銀俾佢哋已經好好，講到明：「唔會為攞小便宜的人用公帑去告長實！」搞到個場充滿火藥味。呢班苦主，亦非善男信女，一大籮理據拋俾證監，包括長實嘅「賠償」唔夠俾律師費、融資成本，又話間酒店房已升晒值，估值每間已五百萬銀，所以長實應賠過百萬。打虎英雄雖則理解佢哋要求，但始終都係咗一句「silly!」右一句「not realistic!」寸到班苦主應一應，最終個會開咗兩粒幾鐘，結論係：「長實不解決拆售事件，證監會必定執法。」咁幾時？唔知喎，怕且仲有排搞！ 夜蒲股交「保安費」 老蘭最近嘅hot topic之一，一定係夜蒲股Magnum（2080），招股首日孖展已經超購900倍。平時去蒲，都知道實俾人「劏」到一頸血，但打開佢份招股書，先知呢頸血，流到一地都係。Magnum賣酒水同煙嘅收入，佔總收入超過七成，毛利達八成。當中熱賣嘅香檳Moët & Chandon Brut Impérial，索價一萬七千二百蚊一打，即係每支成千四蚊。小宗去超市睇過，呢支酒不過二百九十九蚊。Magnum酒貴，入場費亦唔平，想book番張枱威吓？最低消費盛惠三萬五蚊。各位蒲友可以考慮抽番手，賺番些少「對沖」。（但要注意：股票價格可升可跌。）不過，佢貴得有理嘅。因為Magnum有筆「保安」成本，招股書顯示，呢筆開支，一年要成七、八百萬。大家唔好諗錯隔籬，唔係「保護費」。小宗入場睇過，由門口開始，幾乎「三步一崗，五步一哨」，一路都有著住黑色西裝嘅外籍保安「保護住」，佢哋維持場內秩序，做到加零一。無他嘅，夜場最怕就係出事。個底花咗，續酒牌就好易俾人刁難。Magnum旗下嘅Billion Club同Beijing Club都試過接待超過酒牌限定人數，被罰款四次，共萬九蚊。○七年，主席葉茂林嘅Hei Hei Club 就試過因續唔到酒牌而結業。前車可鑑，「保安費」貴得有道理！ 金牙大狀講嘢 阿爺成全超人李？超人李唔妥人哋話佢撤資，不惜紆尊降貴現身說法，話咁講法係莫大嘅笑話。言猶在耳，電能分拆港燈上市，集資近三百億元。過去電能全資擁有港燈，分拆之後，持股不過一半。若果咁做唔係撤資，又係乜呢？或者係減持囉。間公司本來好好哋，忽然割一半出嚟賣俾人，咁會俾人個乜嘢印象呢？一係就莫財，等錢使，焗住要賣；再唔係就睇淡前景，骨水鬆人。超人李莫財？講笑咩？既非莫財，咁為乜分拆港燈又仲使問阿桂咩？超人李出貨，接貨者赫然為國家電網，此又不期然引發諸般聯想。時至今天，可能國家已經好似毛主席咁諗通咗。憶昔七一年林彪出走，毛主席慨然而嘆：「天要下雨，娘要改嫁，都是沒有辦法的事，讓他去吧！」唔止「讓他去吧」，國家更加成全佢，邊個話世界唔係進步嘅呢？ | ||||||