|
||||||
|
九月號「中大校 友」季刊嘅校友捐款一欄，列出最新嘅捐款校友名單，雅虎香港老總C係中大新亞畢業生，佢睇吓捐款校友名字，低呼一聲：「乜新亞校友捐咁多？」哦，睇清楚， 係噃，有較大額嘅校友捐款，即是梁英偉（新亞校董會主席）捐二百萬，新亞校友會會長陳志新捐一百萬，林榮德、王文彥兩位校董各捐一百萬，黃桂林校董捐五十 萬，楊汝梅博士嘅學生捐一百萬，以上校友加埋捐咗六百五十萬元，最大嘅得益者當然係現時及將來嘅新亞學生。呢幾項捐款嘅校友都係六、七十年代嘅學生，希望 二十一世紀第一個十年嘅學生到咗2040年可以捐更多錢回饋母校。
學校能有舊生捐款，固然可喜，證明學校產品能在社會上出 人頭地，事業成功也。同樣可喜，彌足珍貴嘅就係同時有學生在學業成就上對世人有貢獻。新亞一九六七年中文系畢業嘅張洪年（中文大學中文系講座教授）就係一 位表表者，佢曾在柏克萊教書，所著《A Practical Chinese Grammar》被學術界稱譽為「巨細靡遺」之作，廣為西方研究中文嘅學者重視。今年新亞慶祝成立六十一年，適逢張校友自中大退休，新亞請佢做演講嘉賓， 張教授臨別秋波，演講詞寫得非常用心（全文刊登於十月之新亞生活月刊），左丁山一再拜讀，服到五體投地，覺得所有中大學生校友，特別係新亞人，都應該讀一 讀，欣賞張教授嘅文采與對新亞嘅感情。佢講在天人合一亭感覺到嘅浪漫，引伸到「人不浪漫枉少年」，以至上一代學人之浪漫情懷與執着，到今天學生讀大學的目 的，內有深意。試看一小段：「整個校園最美的一塊福地在哪裡？也許各人有各人的喜愛。我自己最鍾愛的是新亞書院背後的天人合一亭。有識之士，擇地山坡，闢 土為塘，半圓的淺水曲池，圍繞著百年老樹，鬱蒼蒼的樹蔭底下，風起處，水波漣漪，輕輕地向外蔓延，一水連天。吐露港外，朝霞夕輝，頓時盡在眼前腳下。池的 外沿，有裙帶小徑，人立其上，前面的池，背後的海，連接成片，共長天一色。在小徑上緩步慢行，恍如在水中央，凌波細步，其優雅嫺靜，非人間世可言。諸位曾 經去過，自然明白，沒有去過的，請會後務必過去看看。對於什麼叫做天人合一，自然會別有領會。同學們都知道，黃昏時分，新月初上的晚上，在那裡散步，意境 最是浪漫。」 張教授大概有六十五歲，不時在耳仔戴上小耳環，頭髮濃密只有華髮少許，望之如知天命之年，今自中大引退，校園內少了一位浪漫人物，惜哉。 |
||||||
|
||||||
|
基金F願意去大 學演講，於是同一啲大學教授有聯絡，與港大王教授與中大王教授有聯絡喎，港大王就係王于漸啦，王教授每星期在信報發表長文講經濟，左丁山列為必讀。中大王 係邊位呢？基金F話係一位年青牛津博士，以前係高盛行家，商而優則學，在高盛賺到夠就返回學府教金融，裨益下一代。左丁山唔識呢位王教授，但上星期六出版 嘅iMoney雜誌有一篇封面文章，「教科書加價有理」，封面照片就係教育局副局長陳維安與中大金融系教授王澤基，王教授與潘凱媛、鍾耀恆合寫一篇長達十 頁嘅文章，深入探討教科書分拆，結論係乜嘢呢，就是政府應把時間花在更有意義政策上，白啲講就係：教育局不惜氣力、不惜時間要書商分拆教科書與教材，爭拗 成果毫無意義。好少見一位教授為一個社會議題做咁深入嘅資料搜集與探討，睇完呢篇壓卷文章，其他人唔駛再為呢個教科書分拆題目寫字咯，包括左丁山在內，教 育局官員與大學教授如果唔閱讀王澤基教授嘅大作，請收口，冇資格講嘢。又或者如果另有教授唔順氣，要與王澤基對着幹，精心另寫一篇十頁文字批駁嘅話，則市 民有福，讀者有福了。
基金F對書價與分拆全無興趣，與王教授唔會講呢樣，只會講香港金融基建與未來發展。佢嘅下一代讀國際 學校，對本地學生嘅教科書認識甚少，故此冇意見。獅子山學會嘅皮蛋王以前又係讀國際學校嘅，記得用書好國際化，與其他國家地區嘅學生用書雷同，亦唔見有乜 教材，佢話點解本地學校唔照辦煮碗呢？佢睇真啲，做小小研究，就發覺本港課程與IB，有極大不同，學生讀外國教科書就會好唔掂，如果要改書，首先就要改晒 啲課程，向IB靠攏，而呢樣係特區政府教育局誓死不願嘅，唔好講第二樣，淨係「國民教育」一科已經要別樹一幟，即使明年無教科書用亦要實施啦。特區教育官 員嘅思想非常獨特，廢除中史（睇教評會副主席何漢權文章就知道中史老師有幾激氣），大部份學生不識中國歷史，但又要講「國民」，幾荒謬。人地德國嘅中學有 四科必修科，就係德文、英文、數學與歷史，睇吓德國人幾愛國！ |
||||||