豪言大志：唔偷食就係完美情人？
1 :
GS(14)@2012-01-11 22:29:28http://m.sharpdaily.hk/detail.ph ... 8065&category=daily
世上有無完美情人？
有人抱住「寧可信其有，不可信其無」嘅心態；就好似你唔信有鬼神，但你都唔敢喺墳場嘅墓屙尿唔講一句「唔該借借」啦。
同樣道理，啲人唔信有完美情人，但揀人嘅時候，都會諗「容乜易真係有，我揀呢件唷嘢咪搵自己笨」，於是就同對方講「唔該借借」，又趕走一件。如是者，圓寂嗰日都未搵到完美情人。
男人對「完美情人」嘅定義好寬鬆：我升官發財都唔換老婆，已經係一個完美情人。
就好似大陸啲官咁樣，「我做官咁多年，擔A都唔偷食，我仲唔係一個好官？」唔係喎師兄，啲百姓話你咁多年都無落過區喎。
「我無做壞事，亦無淫人妻女笑呵呵，我都算對得你住啦！」
男人就係咁，拍咗拖咁耐，雖然無送花畀你，但我都無送過花畀其他人喎。我為咗你忍手，仲唔係完美？
可惜女人覺得，「忠誠」只係最基本的要求，就像老闆覺得員工「唔秘撈」是基本道德，無理由要求警方表揚一個市民，原因係「佢無做賊」？
不過好多男人都未醒覺，台灣嘅馬英九，競選連任，仲不斷強調自己「清廉無A過錢」，但台灣選民已經聽厭咗。你第一次做總統SELL清廉，連任都應該SELL第二樣啦？你除咗唔去偷食，係咪都應該令市民有啖好食呢？
電郵：
[email protected]
曾志豪