每個男人心裏面都有一個......黃翠如定係唐詩詠？
1 :
GS(14)@2017-05-06 11:38:39前年因為一張拖手相，唔少港男對洪永城又羨慕又?忌，只因佢左手拖住「好兄弟」翠如BB，右手拖實正印女友唐詩詠，左右逢源。加上潮文《每個男人心裏面都有1個黃翠如》同潮語「有一種女朋友叫唐詩詠」帶動下，令翠如BB同詩詠BB被逼要嚟個正面較量。入行17年嘅唐詩詠，外形清純，宜古直今，可惜唔係演人哋細妹就係人哋閨蜜，未有機會成為當家花旦。視愛情大於一切嘅唐詩詠，早年同雜食男友崔建邦陷入膠著狀態，面對對方多次不忠，唐詩詠選擇大方原諒，直至15年遇上同樣口花嘅洪永城，唐詩詠終於捨得放棄前度，投入新戀情。如此全情投入、義無反顧付出嘅性格，難怪被網民封為最佳女友。相對唐詩詠，今年35歲嘅黃翠如，事業運可謂搖搖領先，12年由有線轉投無綫後，喺處女作《心路GPS》已經擔正做女二，儘管坊間批評演技幼嫩，但到13年《師父·明白了》中更擔正做女一，自此成為被捧花旦之一，往後嘅《愛我請留言》、《舌劍上的公堂》都同樣揹重飛做女一，更喺年尾頒奬禮角逐提名最佳女主角。感情方面，黃翠如同洪永城一直份屬多年好友，到12年二人合作主持《走過浮華大地》系列，緋聞進一步升溫，坊間認定二人情侶關係，點知喺14年，翠如BB拍攝《師奶MADAM》時，同蕭正楠撻着，令佢同洪永城嘅「戀情」瞬間冷卻。
來源:
http://hk.apple.nextmedia.com/entertainment/art/20170506/20012412